Yo‘l harakati xavfsizligini ta’minlash sohasiga xususiy sektorni keng jalb qilish orqali tadbirkorlik subyektlarining rolini yanada oshirish hamda ularga bu borada keng imkoniyatlar yaratish maqsadida Vazirlar Mahkamasi qaror qiladi:

1. Vazirlar Mahkamasining “Yo‘l harakati xavfsizligini ta’minlash sohasiga xususiy sektorni jalb etishga doir qo‘shimcha chora-tadbirlar to‘g‘risida” 2021-yil 21-apreldagi 232-son qaroriga ilovaga muvofiq quyidagilarni nazarda tutuvchi o‘zgartirish va qo‘shimchalar kiritilsin:

tadbirkorlik subyektlari tomonidan avtomobil yo‘llarida yo‘l harakati qoidalari buzilganligini maxsus avtomatlashtirilgan foto va video qayd etish dasturiy-texnik vositalarini (keyingi o‘rinlarda — dasturiy-texnik vositalar) o‘rnatish va ishga tushirish muddatini 60 kundan 180 kunga uzaytirish;

dasturiy-texnik vositalar “Ma’muriy amaliyot” kompleks avtomatlashtirilgan axborot tizimiga integratsiya qilingandan so‘ng ularni o‘n kun davomida sinov tariqasida ishlatish;

dasturiy-texnik vositalar orqali qayd etilgan yo‘l harakati qoidabuzarliklaridan undirilgan jarima summasi taqsimlanishida tadbirkorlik subyektlariga berilgan imtiyozli davrni 1 yildan 2 yilga uzaytirish;

tadbirkorlik subyekti auksion savdosida g‘olib bo‘lganligi to‘g‘risidagi bildirishnomani olgan kundan boshlab 90 kun ichida obyektda dasturiy-texnik vositalarni o‘rnatish bilan bog‘liq biror-bir harakat (qurilish-montaj ishlari)ni amalga oshirmaganda, uning obyektga nisbatan bo‘lgan mulk huquqini sud tartibida bekor qilish;

dasturiy-texnik vositalar orqali qayd etilgan yo‘l harakati qoidabuzarlik holatlari bo‘yicha “Ma’muriy amaliyot” kompleks avtomatlashtirilgan axborot tizimiga yuborilgan ma’lumotlardagi xatoliklarning umumiy soni besh va undan ortiq foizni tashkil etgan taqdirda, tadbirkorlik subyektining obyektga nisbatan bo‘lgan mulk huquqini sud tartibida bekor qilish.

2. Milliy axborot agentligi hamda Milliy teleradiokompaniya Ichki ishlar vazirligi bilan birgalikda ushbu qarorning mazmun-mohiyati ommaviy axborot vositalari, ijtimoiy tarmoqlar va rasmiy veb-saytlarda keng yoritilishini tashkil etsin.

3. Mazkur qarorning bajarilishini nazorat qilish O‘zbekiston Respublikasi ichki ishlar vaziri P.R. Bobojonov zimmasiga yuklansin.

1. 4-bandning “a” va “b” kichik bandlari birinchi xatboshilaridagi “1” raqami “2” raqami bilan almashtirilsin.

2. Tadbirkorlik subyektlari tomonidan avtomobil yo‘llarida yo‘l harakati qoidalari buzilganligini maxsus avtomatlashtirilgan foto va video qayd etish dasturiy-texnik vositalarini o‘rnatish va ekspluatatsiya qilish tartibi to‘g‘risidagi nizomda (qarorga 1-ilova):

a) 2-bandning uchinchi xatboshisi quyidagi tahrirda bayon etilsin:

“tizim qurilmalari — tadbirkorlik subyektlari tomonidan tizimni shakllantirish uchun foydalaniladigan hamda transport vositalari tomonidan sodir etiladigan ma’muriy huquqbuzarliklarni foto va video qayd etish uskunasi, “I”, “G”, “T” yoki “P” shakldagi metall ustun, qayd etilgan qoidabuzarlik va transport vositalari to‘g‘risidagi ma’lumotlarni o‘zida saqlovchi qurilma, kommutator, marshrutizator va boshqalardan iborat bo‘lgan tarmoq qurilmalari hamda elektr quvvati bilan ta’minlovchi qurilmalar”;

b) 11-bandning birinchi xatboshisi “Tadbirkorlik subyektlari tomonidan” so‘zlaridan keyin “o‘rnatiladigan” so‘zi bilan to‘ldirilsin;

v) 17-bandning birinchi xatboshisidagi “o‘rnatilgandan” so‘zi “Ma’muriy amaliyot” KAATga integratsiya qilingandan” so‘zlari bilan almashtirilsin;

g) 41-band quyidagi tahrirda bayon etilsin:

“41. Vakolatli organ tomonidan bildirilgan quyidagi e’tirozlar mazkur Nizomning 42-bandida ko‘rsatilgan muddatlarda bartaraf etilmagan taqdirda, tadbirkorlik subyektlarining obyektga nisbatan bo‘lgan mulk huquqi sud tartibida bekor qilinishiga olib keladi:

tadbirkorlik subyekti auksion savdosida g‘olib bo‘lganligi to‘g‘risidagi bildirishnomani olgan kundan boshlab 90 kun ichida obyektda dasturiy-texnik vositalarni o‘rnatish bilan bog‘liq biror-bir harakat (qurilish-montaj ishlari)ni amalga oshirmaganda;

tizimdan boshqa maqsadlarda foydalanganda;

tizimdan foydalanish jarayonida ushbu Nizom bilan tasdiqlangan texnik talablarga javob bermaydigan holatlar kelib chiqqanda;

tizimga vakolatli organning ruxsatisiz qo‘shimcha yoki boshqa qurilma o‘rnatilganda;

tizimda qayd etilgan yo‘l harakati qoidalarining buzilganlik holatlari bo‘yicha “Ma’muriy amaliyot” KAATga yuborilgan ma’lumotlardagi xatoliklarning umumiy soni besh va undan ortiq foizni tashkil etganda;

tashqi ta’sir natijasida tizim qurilmalarining joylashuvida o‘zgarish yuz berib, transport vositalarining xavfsiz harakatlanishiga to‘sqinlik qilganda.

Qonunchilik hujjatlarida obyektga nisbatan mavjud bo‘lgan mulk huquqini bekor qilishning boshqa asoslari ham nazarda tutilishi mumkin”;

d) 47-bandning oltinchi xatboshisidagi “60” raqami “180” raqami bilan almashtirilsin;

e) 48-bandda:

quyidagi mazmundagi sakkizinchi xatboshi bilan to‘ldirilsin:

“tadbirkorlik subyekti auksion savdosida g‘olib bo‘lganligi to‘g‘risidagi bildirishnomani olgan kundan boshlab 90 kun ichida obyektda dasturiy-texnik vositalarni o‘rnatish bilan bog‘liq biror-bir harakat (qurilish-montaj ishlari)ni amalga oshirmagan taqdirda, uni obyektga nisbatan bo‘lgan mulk huquqini sud tartibida bekor qilish choralarini ko‘rish to‘g‘risida rasmiy ogohlantirish”;

sakkizinchi xatboshi to‘qqizinchi xatboshi deb hisoblansin;

j) 1-ilovaning izoh qismidagi “60” raqami “180” raqami bilan almashtirilsin;

z) 2-ilovada:

3-bandda:

birinchi xatboshi “tizim doirasida quyidagi” so‘zlardan keyin “(bir yoki bir nechta)” so‘zlari bilan to‘ldirilsin;

ikkinchi xatboshidagi “(radar)” so‘zi chiqarib tashlansin;

8-bandning uchinchi xatboshisidagi “360 gradus radiusda, 100” so‘zlari “50” raqami bilan almashtirilsin;

10-band quyidagi tahrirda bayon etilsin:

“10. Tizimni joylashtirish uchun avtomobil yo‘lining qatnov qismiga xalaqit bermaydigan holda, o‘ng yoki chap yo‘nalishga “I”, “G”, “T” yoki “P” shakldagi metall ustun o‘rnatiladi”;

13-band quyidagi tahrirda bayon etilsin:

“13. Metall ustun va transport vositasining to‘xtash chizig‘i oralig‘idagi masofa tizim qurilmalarining texnik xususiyatlari, relyefning murakkabligi va muhandislik kommunikatsiyalari mavjudligidan kelib chiqqan holda belgilanishi lozim”;

14-band “ta’minlash maqsadida” so‘zlaridan keyin “360 gradus radiusdagi” so‘zlari bilan to‘ldirilsin;

25-band quyidagi tahrirda bayon etilsin:

“25. Tizimni elektr quvvati bilan ta’minlashga mo‘ljallangan elektr ta’minoti qurilmasining (keyingi o‘rinlarda — elektr ta’minoti) erga ulanish kontur qarshiligi tizim qurilmalarining texnik talablari asosida hisoblanishi lozim”.