O‘zbekiston Respublikasi Prezidentining “Gimnastika sport turlarini yanada rivojlantirish chora-tadbirlari to‘g‘risida” 2022-yil 23-dekabrdagi PQ-449-son qarori ijrosini ta’minlash maqsadida Vazirlar Mahkamasi qaror qiladi:

1. O‘zbekiston Respublikasi Prezidentining “Gimnastika sport turlarini yanada rivojlantirish chora-tadbirlari to‘g‘risida” 2022-yil 23-dekabrdagi PQ-449-son qaroriga muvofiq O‘zbekiston Respublikasi Yoshlar siyosati va sport vazirligi tizimida Nukus, Samarqand va Farg‘ona shaharlarida Gimnastika sport turlariga ixtisoslashtirilgan sport maktablari negizida Gimnastika sport turlariga tayyorlash markazlari (keyingi o‘rinlarda — Gimnastika markazlari) tashkil etilganligi ma’lumot uchun qabul qilinsin.

2. Quyidagilar Gimnastika markazlarining asosiy vazifalari etib belgilansin:

sport maktablari, sport klublari va boshqa sport-ta’lim muassasalarining kamida boshlang‘ich sport tayyorgarligi bosqichini tugatgan va ta’lim muassasalarida eng yaxshi natija ko‘rsatgan hamda sport sinovlaridan muvaffaqiyatli o‘tgan sportchi yoshlarni ochiq tanlov asosida qabul qilish;

iqtidorli yoshlarni gimnastikaning ixtisoslashtirilgan turlari bo‘yicha professional tarzda shug‘ullantirish va ular hisobidan terma jamoalarga asosiy nomzodlarni shakllantirish;

zarur sport anjomlari va uskunalari bilan jihozlangan, zamonaviy xalqaro talablar va standartlarga javob beradigan moddiy-texnika hamda o‘quv-mashg‘ulot bazalarini yaratish, turli darajadagi nufuzli xalqaro va mintaqaviy musobaqalarda — Olimpiya va Osiyo o‘yinlari, jahon va Osiyo chempionatlari, universiadalar hamda boshqalarda O‘zbekiston sharafini munosib himoya qilishga qodir bo‘lgan xalqaro darajadagi sportchilarni tayyorlash;

sportchilarning o‘quv-mashg‘ulot jarayonini xalqaro standartlar darajasida tashkil etish, ilg‘or xorijiy tajribani hisobga olgan holda, o‘quv-mashq jarayonlariga eng yangi ilmiy-uslubiy texnologiyalarni joriy etish orqali ularni nazariy va texnik-taktik jihatdan tayyorlash sifatini muntazam oshirib borish;

sport zaxirasini sifatli tayyorlash uchun zarur tashkiliy, o‘quv-metodik, psixologik-pedagogik, tibbiy-biologik va moddiy-texnik shart-sharoitlar yaratish;

gimnastika sport turlari bo‘yicha milliy terma jamoalar va ularning zaxiralari ishtirokida o‘quv-mashq yig‘inlari, respublika va mintaqaviy sport musobaqalarini tashkil etish hamda muntazam ravishda o‘tkazib borish;

trenerlar va sportchilarning kasb mahorati darajasini oshirish uchun tajriba almashish maqsadida gimnastika sport turlari bo‘yicha xorijiy sport maktablari akademiyalari va klublari bilan hamkorlikni rivojlantirish.

3. Belgilansinki:

Gimnastika markazlari ixtisoslashtirilgan davlat sport-ta’lim muassasasi hisoblanib, gimnastika sport turlariga ixtisoslashtirilgan sport maktabiga ega bo‘ladi;

Gimnastika markazlarining faoliyati gimnastika sport turlari bo‘yicha qobiliyatli va iqtidorli yosh sportchilarni tanlab olish hamda asosan terma jamoalarga nomzod sifatida tayyorlashga yo‘naltiriladi;

Gimnastika markazlari o‘z faoliyatini 2024/2025 o‘quv yilidan boshlaydi va Vazirlar Mahkamasining “Sport maktablari faoliyatini hamda sport maktablari trenerlari va mutaxassislari mehnatini moddiy rag‘batlantirish tizimini yanada takomillashtirish to‘g‘risida” 2010-yil 23-sentabrdagi 211-son hamda “Sport turlari bo‘yicha ixtisoslashtirilgan davlat maktab-internatlari faoliyatini takomillashtirish to‘g‘risida” 2018-yil 2-iyundagi 410-son qarorlarida belgilangan tartibga muvofiq amalga oshiradi;

Gimnastika markazlari o‘quvchilarining umumiy kontingenti jami 132 nafarni tashkil etib, ular 1 — 11-sinf o‘quvchilaridan iborat bo‘ladi;

Gimnastika markazlarining 1-sinfiga gimnastika sport turlariga ixtisoslashtirilgan sport maktablarida, shuningdek, respublika hududlaridagi sport maktablarida shug‘ullangan, aholining jismoniy tayyorgarlik darajasini baholash tizimi bo‘yicha sport sinovlarini muvaffaqiyatli topshirgan va yuqori iqtidorga ega bo‘lgan hamda o‘qish istagini bildirgan o‘quvchilar tanlov asosida qabul qilinadi;

Gimnastika markazlari o‘quvchilari ularga eng yaqin joylashgan umumiy o‘rta ta’lim maktablarida umumta’lim dasturlari bo‘yicha o‘qitiladi;

Gimnastika markazlari Davlat budjeti mablag‘lari hisobidan 10-11-sinf o‘quvchilarini asosiy sport mashg‘ulotlaridan bo‘sh bo‘lgan vaqtlarida malakali mutaxassislarni jalb qilgan holda, gimnastika sport turlari bo‘yicha maxsus nazariy fanlar asosida o‘qitishni tashkil qiladi;

Gimnastika markazlarining o‘quv jarayoni O‘zbekiston Respublikasi Sport vazirligi hamda Maktabgacha va maktab ta’limi vazirligi tomonidan belgilanadi, o‘quv dasturini o‘zlashtirib, yakuniy davlat attestatsiyasidan o‘tgan 11-sinf bitiruvchilariga Vazirlar Mahkamasining “Sport turlari bo‘yicha ixtisoslashtirilgan davlat maktab-internatlari faoliyatini takomillashtirish to‘g‘risida” 2018-yil 2-iyundagi 410-son qarorga muvofiq belgilangan tartibda davlat namunasidagi diplom beriladi;

Gimnastika markazlarining o‘quvchilari turar joy, sutkalik oziq-ovqat normasi, maxsus sport kiyimi va libosi, sport uskuna va anjomlari bilan Vazirlar Mahkamasining “Gimnastika sport turlari bo‘yicha davlat sport-ta’lim muassasalarida shug‘ullanuvchi o‘quvchi-sportchilar uchun oziq-ovqat me’yorlari, jihoz va inventarlar normalarini tasdiqlash to‘g‘risida” 2023-yil 12-iyundagi 238-son qaroriga muvofiq ta’minlanadi;

Gimnastika markazlarining o‘quvchilarini ovqatlantirish xarajatlari Davlat budjeti mablag‘lari hisobidan amalga oshiriladi;

Gimnastika markazlari direktorlari, ularning sport ishlari bo‘yicha o‘rinbosarlari, trenerlari, yo‘riqchi-uslubchilariga Olimpiya va paralimpiya sport turlariga tayyorlash markazlari uchun belgilangan mehnatga haq to‘lash va moddiy rag‘batlantirish shartlari qo‘llaniladi;

Gimnastika markazlari direktorining ma’naviy-ma’rifiy ishlar bo‘yicha o‘rinbosari va tarbiyachilari mehnatiga haq to‘lash hamda ularni rag‘batlantirish Vazirlar Mahkamasining “Xalq ta’limi xodimlari mehnatiga haq to‘lashning takomillashtirilgan tizimini tasdiqlash to‘g‘risida” 2005-yil 21-dekabrdagi 275-son qaroriga muvofiq amalga oshiriladi;

Gimnastika markazlari tibbiyot xodimlari mehnatiga haq to‘lash Vazirlar Mahkamasining “Tibbiyot xodimlari mehnatiga haq to‘lashning takomillashtirilgan tizimini tasdiqlash to‘g‘risida” 2005-yil 21-dekabrdagi 276-son qaroriga muvofiq amalga oshiriladi, shuningdek, ularni moddiy rag‘batlantirishda Olimpiya va paralimpiya sport turlariga tayyorlash markazlari uchun belgilangan moddiy rag‘batlantirish shartlari qo‘llaniladi.

4. Quyidagilar Gimnastika markazlari faoliyatini moliyalashtirish manbalari etib belgilansin:

Davlat budjeti mablag‘lari;

faoliyat ixtisosligi bo‘yicha shartnoma asosida xizmatlar ko‘rsatishdan va ularning ustavidagi vazifalarga muvofiq bo‘lgan boshqa faoliyat turlaridan olinadigan daromadlar;

asosiy mashg‘ulotlar o‘tkazilmaydigan vaqtda bo‘sh turgan mol-mulkni ijaraga berishdan tushadigan mablag‘lar;

yuridik va jismoniy shaxslarning homiylik xayriyalari;

qonunchilik hujjatlarida taqiqlanmagan boshqa manbalar.

5. O‘zbekiston Respublikasi Sport vazirligi:

Kambag‘allikni qisqartirish va bandlik vazirligi hamda Iqtisodiyot va moliya vazirligi bilan birgalikda 2023-yil 1-dekabrga qadar Gimnastika markazlarining boshqaruv, instruktor-metodistlar, trenerlar tarkibi, pedagog, texnik, xizmat ko‘rsatuvchi va o‘quv-yordamchi xodimlarining shtat jadvalini ishlab chiqsin va tasdiqlasin;

2024-yil 1-mayga qadar Gimnastika markazlarining ustavini ishlab chiqib tasdiqlasin hamda belgilangan tartibda davlat ro‘yxatidan o‘tkazsin;

o‘quv-mashg‘ulotlar rejasi, Gimnastika markazlariga o‘quvchilarni tanlab olish va qabul qilish tartibi to‘g‘risidagi nizomni ishlab chiqsin va belgilangan tartibda tasdiqlasin;

2024/2025 o‘quv yiliga qadar Gimnastika markazlarini ochiq mustaqil tanlov asosida zamonaviy pedagogik texnologiyalarni egallagan malakali pedagog kadrlar hamda trenerlar bilan to‘ldirsin;

manfaatdor vazirlik va idoralar bilan kelishgan holda, Gimnastika markazlari zarur o‘quv-metodik adabiyotlar hamda sport inventarlari bilan jihozlanishini ta’minlasin;

yoshlarni gimnastika bilan qamrab olish va ularda boshlang‘ich ko‘nikmalarni shakllantirish maqsadida elektron qo‘llanmalar tayyorlasin va ijtimoiy tarmoqlarga joylashtirib borsin;

O‘zbekiston Milliy olimpiya qo‘mitasi bilan birgalikda Gimnastika markazlarida sportchilarni tayyorlash sifati yuzasidan doimiy nazoratni amalga oshirsin.

6. O‘zbekiston Respublikasi Maktabgacha va maktab ta’limi vazirligi Gimnastika markazlari o‘quvchilarini ushbu markazlarga yaqin joylashgan umumiy o‘rta ta’lim maktablarida umumiy o‘rta ta’lim dasturi bo‘yicha o‘qitishni tashkil etish yuzasidan zarur choralar ko‘rsin.

7. O‘zbekiston Respublikasi Oliy ta’lim, fan va innovatsiyalar vazirligi:

Iqtisodiyot va moliya vazirligi bilan birgalikda vazirlik tizimidagi kasb-hunar maktablari sport zallarini gimnastika sport turlari jihozlari bilan ta’minlash choralarini ko‘rsin;

2023/2024 o‘quv yilidan boshlab zarur sharoitlarga ega bo‘lgan kasb-hunar maktablarida o‘quvchilar uchun gimnastika to‘garaklarini tashkil qilsin.

8. Belgilansinki, Gimnastika markazlarini zamonaviy va xalqaro talablarga muvofiq tashkil etish (binolar qurish, mavjudlarini rekonstruksiya qilish va ta’mirlash) doirasida:

a) “O‘zavtosanoat” AJ — buyurtmachi funksiyasini amalga oshiradi;

b) bosh loyiha va pudrat tashkilotlari belgilangan tartibda o‘tkaziladigan tender (tanlov) natijalariga ko‘ra aniqlanadi;

v) “O‘zavtosanoat” AJ tomonidan ajratiladigan homiylik xayriyalari moliyalashtirish manbai hisoblanadi;

g) obyektlarni qurish va foydalanishga topshirish, jihozlash ishlari 2024-yil 30-iyulga qadar to‘liq yakuniga yetkaziladi.

Bunda “O‘zavtosanoat” AJ homiylik mablag‘lari hisobidan mazkur obyektlarning loyiha-smeta hujjatlarini ishlab chiqsin va qurilish ishlarini amalga oshirish uchun zarur mablag‘lar ajratilishini ta’minlasin.

9. O‘zbekiston Respublikasi Qurilish va uy-joy kommunal xo‘jaligi vazirligi obyektlar bo‘yicha ishlab chiqilgan loyiha-smeta hujjatlarini belgilangan tartibda ekspertizadan o‘tkazsin va qurilish-montaj ishlarining sifatli bajarilishi yuzasidan nazorat o‘rnatsin.

10. Qoraqalpog‘iston Respublikasi Vazirlar Kengashi, Samarqand va Farg‘ona viloyatlari hokimliklarining:

Gimnastika markazlarini Gimnastika sport turlariga ixtisoslashtirilgan sport maktablari bazasiga joylashtirish hamda mavjud bino va inshootlarda zaruratga ko‘ra rekonstruksiya, kapital ta’mirlash va qurilish ishlarini amalga oshirish;

zamonaviy infratuzilmani yaratishda ehtiyojga ko‘ra qo‘shimcha yer maydonlarini Gimnastika sport turlariga ixtisoslashtirilgan sport maktablariga tutash yoki yaqin hududdan ajratish;

hududlarda, shu jumladan, olis va chekka hududlarda aholi o‘rtasida sportning gimnastika turlari bo‘yicha musobaqalar, sport aksiyalari, havaskorlik chempionatlarini o‘tkazishni tizimli yo‘lga qo‘yish;

Gimnastika markazlari o‘quvchilarini turli sport musobaqalariga, shuningdek, ta’lim oladigan umumiy o‘rta ta’lim maktablariga olib borish va olib kelishda qulaylik yaratish maqsadida Qoraqalpog‘iston Respublikasi, Samarqand va Farg‘ona viloyatlari mahalliy budjetlari hamda ularning qo‘shimcha manbalari hisobidan Gimnastika markazlarini O‘zbekistonda ishlab chiqarilgan “Isuzu” avtobusi bilan ta’minlash to‘g‘risidagi takliflari ma’qullansin.

11. Qoraqalpog‘iston Respublikasi Vazirlar Kengashi, Samarqand va Farg‘ona viloyatlari hokimliklari Gimnastika markazlari uchun zamonaviy infratuzilmani yaratish maqsadida zaruratga ko‘ra O‘zbekiston Respublikasi Sport vazirligining talabnomasiga muvofiq zarur yer maydonlari ajratilishini ta’minlasin.

12. O‘zbekiston Respublikasi Yoshlar siyosati va sport vazirligi Iqtisodiyot va moliya vazirligi bilan birgalikda Gimnastika markazlarini xalqaro standartlarga muvofiq zamonaviy jihoz va inventarlar bilan ta’minlash uchun zarur bo‘ladigan mablag‘lar 2024-yil uchun Davlat budjeti parametrlarida nazarda tutilishini ta’minlasin.

13. Belgilab qo‘yilsinki, Gimnastika markazlarini saqlash bilan bog‘liq xarajatlarni moliyalashtirish uchun 2024-yildan boshlab Davlat budjeti parametrlarida zarur mablag‘lar nazarda tutiladi.

14. O‘zbekiston Respublikasi Eshlar siyosati va sport vazirligi manfaatdor vazirlik va idoralar bilan birgalikda o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

15. Mazkur qarorning bajarilishini nazorat qilish O‘zbekiston Respublikasi yoshlar siyosati va sport vaziri A.I. Ikramov zimmasiga yuklansin.