Oʻzbekiston Respublikasi Oliy Majlisi Qonunchilik palatasi va deputatlari faoliyatini ilmiy, axborot-tahliliy jihatdan taʼminlash, palataning qonun ijodkorligi va parlament nazoratini amalga oshirish borasidagi faoliyatiga koʻmaklashish, parlamentarizm muammolarini tadqiq etish, xalqaro normalar va standartlarni qonunlarga implementatsiya qilish yuzasidan takliflar tayyorlash borasidagi ishlar samaradorligini oshirish maqsadida Oʻzbekiston Respublikasi Oliy Majlisi Qonunchilik palatasining Kengashi qaror qiladi:

1. Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining 2023-yil 2-maydagi 3128-IV/KQ-494-IV-sonli Qoʻshma qarori bilan Oʻzbekiston Respublikasi Oliy Majlisi huzuridagi Qonunchilik muammolari va parlament tadqiqotlari instituti negizida Oʻzbekiston Respublikasi Oliy Majlisi Qonunchilik palatasi Kengashi tomonidan Oʻzbekiston Respublikasi Oliy Majlisi Qonunchilik palatasi huzuridagi Parlament tadqiqotlari institutini (bundan buyon matnda Institut deb yuritiladi) tashkil etishga rozilik berilganligi maʼlumot uchun qabul qilinsin.

2. Oʻzbekiston Respublikasi Oliy Majlisi huzuridagi Qonunchilik muammolari va parlament tadqiqotlari instituti negizida Oʻzbekiston Respublikasi Oliy Majlisi Qonunchilik palatasi huzuridagi Parlament tadqiqotlari instituti tashkil etilsin.

3. Belgilab qoʻyilsinki:

Institut yuridik shaxs shaklidagi davlat ilmiy-tadqiqot ekspert muassasasi boʻlib, u oʻz faoliyatida Oʻzbekiston Respublikasi Oliy Majlisi Qonunchilik palatasining Kengashiga hisobdordir;

Oʻzbekiston Respublikasi Oliy Majlisi Qonunchilik palatasi huzuridagi Parlament tadqiqotlari instituti Oʻzbekiston Respublikasi Oliy Majlisi huzuridagi Qonunchilik muammolari va parlament tadqiqotlari institutining huquq va majburiyatlari boʻyicha huquqiy vorisi hisoblanadi;

Institutni Qonunchilik palatasining Kengashi tomonidan lavozimga tayinlanadigan va lavozimidan ozod etiladigan direktor boshqaradi;

Institut direktorining oʻrinbosari Qonunchilik palatasining Kengashi tomonidan lavozimga tayinlanadi va lavozimidan ozod etiladi.

4. Quyidagilar Institutning asosiy vazifalari etib belgilansin:

Oʻzbekiston Respublikasi Oliy Majlisi Qonunchilik palatasi (bundan buyon matnda Qonunchilik palatasi deb yuritiladi) va deputatlar faoliyatini ilmiy, axborot-tahliliy jihatdan taʼminlash, ularning qonun ijodkorligi borasidagi faoliyatiga koʻmaklashish;

parlamentarizm muammolarini tadqiq etish, huquq, siyosat, iqtisodiyot va boshqa sohalarda ilmiy tadqiqotlar oʻtkazish, Yangi Oʻzbekiston taraqqiyot strategiyasining maqsad va vazifalariga muvofiq parlamentarizmni mustahkamlashga qaratilgan tashabbuslarni ilgari surish, “Parlament huquqi” ixtisosligi boʻyicha oliy taʼlimdan keyingi taʼlimni tashkil etish;

xorijiy parlamentlar va xalqaro parlamentlararo tashkilotlar faoliyatini oʻrganish natijalari asosida parlament faoliyatini takomillashtirishga doir takliflar ishlab chiqish;

Qonunchilik palatasiga kiritilgan qonun loyihalarini ilmiy ekspertizadan oʻtkazish, ularning tartibga solish taʼsirini baholash hamda xalqaro normalar va standartlarga muvofiqligini oʻrganish;

qonun ijodkorligini demokratlashtirish, uning ilmiy asoslarini takomillashtirish hamda xalqaro normalar va standartlarni qonunlarga implementatsiya qilish boʻyicha takliflar ishlab chiqish;

Qonunchilik palatasiga parlament nazorati shakllarini rivojlantirishga va vakillik funksiyalarini amalga oshirishga koʻmaklashish, Qonunchilik palatasi, uning qoʻmitalari, komissiyalari, Qonunchilik palatasidagi siyosiy partiyalar fraksiyalari va deputatlar tomonidan amalga oshiriladigan nazorat tadbirlarini axborot-tahliliy jihatdan taʼminlash;

qonun hujjatlarining mohiyati va ahamiyatini keng jamoatchilikka tushuntirish boʻyicha targʻibot va tashviqot ishlarini amalga oshirishda ishtirok etish;

Oʻzbekiston Respublikasining xalqaro reyting va indekslardagi oʻrnini yaxshilash boʻyicha amaliy takliflar ishlab chiqish hamda Oʻzbekiston Respublikasining xalqaro majburiyatlari bajarilishini oʻrganib borish.

5. Quyidagilar:

Oʻzbekiston Respublikasi Oliy Majlisi Qonunchilik palatasi huzuridagi Parlament tadqiqotlari institutining tuzilmasi 1-ilovaga*;

Oʻzbekiston Respublikasi Oliy Majlisi Qonunchilik palatasi huzuridagi Parlament tadqiqotlari instituti toʻgʻrisidagi nizom 2-ilovaga*;

Oʻzbekiston Respublikasi Oliy Majlisi Qonunchilik palatasi huzuridagi Parlament tadqiqotlari institutining shtatlar jadvali 3-ilovaga*;

Oʻzbekiston Respublikasi Oliy Majlisi Qonunchilik palatasi huzuridagi Parlament tadqiqotlari instituti xodimlarining mehnatiga Yagona taʼrif setkasi boʻyicha haq toʻlash razryadlari 4-ilovaga* muvofiq tasdiqlansin.

6. Institut direktori, uning oʻrinbosari va xodimlariga nisbatan tegishincha Qonunchilik palatasi Devonining xodimlari uchun belgilangan tibbiy taʼminot, moddiy ragʻbatlantirish va mehnatga haq toʻlash shartlari tatbiq etilsin.

7. Institut Oʻzbekiston Respublikasi Oliy Majlisi Qonunchilik palatasining binosidan foydalanish boshqarmasi balansidagi Toshkent shahar, Chilonzor tumani, Furqat koʻchasi, 171-uy manzili boʻyicha joylashgan binoga joylashtirilsin.

Oʻzbekiston Respublikasi Oliy Majlisi Qonunchilik palatasining binosidan foydalanish boshqarmasi ushbu binoning Institut joylashtirilgan qismiga ham belgilangan tartibda xizmat koʻrsatilishini taʼminlasin.

8. Oʻzbekiston Respublikasi Iqtisodiyot va moliya vazirligi Oʻzbekiston Respublikasi Davlat budjeti parametrlarida ushbu Qarorni amalga oshirish bilan bogʻliq xarajatlarni moliyalashtirish uchun zarur boʻlgan mablagʻlarni nazarda tutsin.

9. Ushbu Qarorning ijrosini nazorat qilish Oʻzbekiston Respublikasi Oliy Majlisi Qonunchilik palatasi Spikerining birinchi oʻrinbosari A. Saidov zimmasiga yuklatilsin.

10. Ushbu Qaror qabul qilingan kundan eʼtiboran kuchga kiradi.