Ijtimoiy soha obyektlarining isitish tizimlarini modernizatsiya qilishda tadbirkorlik subyektlarini moliyalashtirish mexanizmlarini takomillashtirish va soliq imtiyozlarini berish orqali ragʻbatlantirish shuningdek, sohaga xususiy sektorni jalb qilish jarayonlarini jadallashtirish maqsadida:

1. Oʻzbekiston Respublikasi Prezidentining 2023-yil 10-apreldagi “Ijtimoiy soha obyektlarining isitish tizimlarini davlat-xususiy sheriklik asosida modernizatsiya qilish toʻgʻrisida”gi PQ-118-son qaroriga ilovaga muvofiq quyidagilarni nazarda tutuvchi oʻzgartirish va qoʻshimchalar kiritilsin:

xususiy sheriklar tomonidan koʻmir mahsulotlari zaxirasini yaratishga budjetdan rejalashtirilgan mablagʻlar doirasida oldindan 50 foizgacha boʻnak mablagʻlarini moliyalashtirish va qolgan mablagʻlarni 1-sentabrga qadar moliyalashtirish;

mahalliy isitish qozonlari ishlab chiqaruvchilarga Oʻzbekiston Respublikasi hududiga xomashyo va ehtiyot qismlarini olib kirishda qoʻshilgan qiymat soligʻini 6 oy muddatga foizlar hisoblanmagan holda boʻlib-boʻlib toʻlash huquqini berish;

xalq deputatlari tuman (shahar) Kengashlari xususiy sheriklarning eng maqbul takliflarini tanlab olishda Qoraqalpogʻiston Respublikasining uzoq hududlarida joylashgan obyektlar uchun xususiy sheriklar mablagʻlari ulushi kamida 30 foiz va undan yuqori boʻlishiga ruxsat berish.

2. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.

1. 2-bandda:

birinchi xatboshidagi “va viloyatlar” soʻzlari “viloyatlar va Toshkent shahar” soʻzlari bilan almashtirilsin;

quyidagi mazmundagi xatboshi bilan toʻldirilsin:

“xususiy sherikka ijtimoiy soha obyektlaridagi mavjud soz holatida boʻlgan isitish qozonlaridan foydalanish, birinchi bosqichda eski va samarasiz qozonlarni almashtirish hamda keyingi bosqichlarda loyiha davomida qolgan qozonlarni almashtirish huquqi berilsin”.

2. 5-bandda:

birinchi xatboshidagi “Andijon viloyati hokimligi (Sh. Abduraxmonov), Namangan viloyati hokimligi (Sh. Abdurazakov) va Fargʻona viloyati hokimligi (X. Bozarov)” soʻzlari “Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 2-ilovada belgilangan hududlar boʻyicha” soʻzlari bilan almashtirilsin;

quyidagi mazmundagi toʻrtinchi xatboshisi bilan toʻldirilsin:

“xususiy sherikka ijtimoiy soha muassasalarining foydalanilmayotgan, boʻsh turgan bino va inshootlarini foydalanish uchun vaqtinchalik ijaraga berish yoki omborxona qurilishi uchun yer uchastkasini (yer maydoniga egalik qilish huquqi berilmagan holda) ajratish”;

toʻrtinchi va beshinchi xatboshilar tegishincha beshinchi va oltinchi xatboshilar deb hisoblansin.

3. 6-bandda:

quyidagi mazmundagi ikkinchi xatboshi bilan toʻldirilsin:

“loyiha-smeta hujjatlarini ishlab chiqish uchun loyiha institutlari — elektron tender (tanlov) savdolari platformalari orqali va (yoki) Xalq deputatlari viloyat, tuman (shahar) Kengashi qarorlari asosida eng maqbul takliflari asosida tanlab olinadi va tanlov asosida jalb qilingan loyiha institutlari bilan Yagona buyurtmachi xizmati injiniring kompaniyasi oʻrtasida shartnomalar rasmiylashtiriladi”;

ikkinchi va uchinchi xatboshilar tegishincha uchinchi va toʻrtinchi xatboshilar deb hisoblansin.

4. 8-band quyidagi tahrirda bayon etilsin:

“8. Belgilansinki:

Loyihalarni amalga oshirishda modernizatsiya qilish va taʼmirlash xarajatlari uchun talab etiladigan investitsiya mablagʻlari xususiy sheriklar va Davlat budjeti mablagʻlari hisobidan ajratiladi;

xususiy sheriklar tomonidan koʻmir mahsulotlari zaxirasini yaratishga budjetdan rejalashtirilgan mablagʻlar doirasida oldindan 50 foizgacha boʻnak mablagʻlari moliyalashtiriladi hamda qolgan mablagʻlar 1-sentabrga qadar moliyalashtiriladi;

xususiy sheriklarning ulushi kamida 50 foizni, Qoraqalpogʻiston Respublikasining uzoq hududlarida (tuman (shahar) markazidan kamida 30 km) joylashgan kichik va ayrim obyektlar uchun kamida 30 foizni hamda obyektlarni ekspluatatsiya qilish muddati 10 yilni tashkil etadi;

loyihalarni boshqarish va ekspluatatsiya qilish davri davomida xususiy sheriklar tomonidan koʻrsatiladigan xizmatlar 2023-yilda mahalliy budjet parametrlarida ushbu maqsadlar uchun koʻzda tutilgan mablagʻlar, shuningdek, mavjud shtat birliklarini qisqartirish hamda energiya resurslarini tejash hisobiga iqtisod qilinadigan mablagʻlar hisobidan moliyalashtiriladi.

Bunda, Qoraqalpogʻiston Respublikasining uzoq hududlarda (tuman (shahar) markazidan kamida 30 km) joylashgan kichik va ayrim obyektlarning ekspluatatsiya xarajatlariga 2023-yilda mahalliy budjet parametrlarida ushbu maqsadlar uchun koʻzda tutilgan mablagʻlarga nisbatan qoʻshimcha 30 foizgacha mablagʻ ajratilishi mumkin;

ayrim hududlarda ijtimoiy soha isitish tizimi tabiiy gazdan koʻmirga oʻtkazilishini hamda koʻmir xarajatlarining normalari va narxini oshishini inobatga olib, mahalliy budjet parametrlarida ekspluatatsiya xarajatlari uchun koʻzda tutilgan mablagʻlarni hisob-kitoblarga koʻra oshirishga ruxsat beriladi va ular mahalliy budjetning qoʻshimcha manbalari yoki maqbullashtirish hisobiga amalga oshiriladi;

davlat-xususiy sheriklik toʻgʻrisidagi bitimlar doirasida ijtimoiy soha obyektlarida issiqlik energiyasi yoʻqotishlarini kamaytirish va obyektning energiya samaradorligini oshirish tadbirlari koʻzda tutilishi mumkin;

tuman (shahar) hokimlari ijtimoiy soha obyektlarining isitish tizimlari toʻlaqonli faoliyat koʻrsatishi uchun masʼul va shaxsiy javobgar hisoblanadi;

mahalliy isitish qozonlari ishlab chiqaruvchilariga Oʻzbekiston Respublikasi hududiga xomashyo va ehtiyot qismlarini olib kirishda qoʻshilgan qiymat soligʻini 6 oy muddatga foizlar hisoblanmagan holda boʻlib-boʻlib toʻlash huquqi beriladi;

tuman (shahar) hokimlari davlat-xususiy sheriklik toʻgʻrisidagi bitimlar doirasida xususiy sherikka oʻz majburiyatlarini bajarishga har tomonlama, shu jumladan koʻmir yoqilgʻisini muddatidan oldin jamlab qoʻyishda amaliy yordam koʻrsatsin”.

5. 9-bandning ikkinchi xatboshisi quyidagi tahrirda bayon etilsin:

“xususiy sheriklar mablagʻlarining ulushi kamida 50 foiz, Qoraqalpogʻiston Respublikasining uzoq hududlarda (tuman (shahar) markazidan kamida 30 km) joylashgan kichik va ayrim obyektlar uchun kamida 30 foiz va undan yuqori boʻlishi”;

6. 11-bandning birinchi xatboshisidagi “shundan Andijon, Namangan va Fargʻona viloyatlari uchun 250 mlrd soʻm, Qoraqalpogʻiston Respublikasi va Qashqadaryo viloyatiga 50 mlrd soʻmdan mablagʻ ajratsin” soʻzlari “ajratsin hamda davlat-xususiy sheriklik bitimi rasmiylashtirilishiga qarab moliyalashtirib borilishini taʼminlasin” soʻzlari bilan almashtirilsin.