Yoshlarning mustaqil hayotga qadam qoʻyishlari, oʻz iqtidori va salohiyatini toʻliq namoyon etishlari uchun sharoitlarni kengaytirish, ularning bandligiga koʻmaklashish, doimiy ish bilan hamda munosib daromad olishini taʼminlash borasida olib borilayotgan islohotlarni izchil davom ettirish maqsadida:

1. Belgilab qoʻyilsinki, 2023-yil 1-maydan boshlab 2025-yil 1-yanvarga qadar ish beruvchilarga (budjet tashkilotlari, davlat korxonalari, ustav jamgʻarmasi (kapitali)da davlat ulushi 50 foiz va undan ortiq boʻlgan yuridik shaxslar, shuningdek, ijtimoiy soliqni 1 foiz stavkada toʻlovchilar bundan mustasno) ular tomonidan 25 yoshdan oshmagan xodimlar uchun toʻlangan ijtimoiy soliq summasi Davlat budjetidan toʻliq qoplab beriladi.

Bunda, ijtimoiy soliq summasi yosh xodimlar olti oy davomida uzluksiz mehnat faoliyatini amalga oshirishi sharti bilan yettinchi oydan boshlab qoplab beriladi.

2. Belgilansinki, ish beruvchilarga ijtimoiy soliq summasining qoplab berilishi 2023-yilda Oʻzbekiston Respublikasining respublika budjetidan Iqtisodiyot va moliya vazirligi huzuridagi budjetdan tashqari Pensiya jamgʻarmasiga ajratiladigan transfertlar hisobidan amalga oshiriladi.

3. Iqtisodiyot va moliya vazirligi 2024-yil va 2025-yil uchun Davlat budjetini shakllantirishda ijtimoiy soliq hisoboti ortib boruvchi yakun bilan har oyda hisobot davridan keyingi oyning 15-sanasidan kechiktirmasdan topshirilishini inobatga olib, 2024-yil va 2025-yilning I choragida ish beruvchilarga ijtimoiy soliq summasini qoplab berish xarajatlarini alohida qatorda rejalashtirishni nazarda tutsin.

4. Yoshlar siyosati va sport vazirligi Iqtisodiyot va moliya vazirligi, Oʻzbekiston Milliy axborot agentligi, Oʻzbekiston Milliy teleradiokompaniyasi, Axborot va ommaviy kommunikatsiyalar agentligi bilan birgalikda ushbu Farmon maqsadi va vazifalarini ommaviy axborot vositalarida va Internet tarmogʻida keng yoritish ishlarini tashkil etsin.

5. Vazirlar Mahkamasining 2021-yil 24-iyuldagi “Ish beruvchilarga ular tomonidan 25 yoshdan oshmagan xodimlar uchun toʻlangan ijtimoiy soliq summasini davlat budjetidan toʻliq qoplab berish tartibi toʻgʻrisidagi vaqtinchalik nizomni tasdiqlash haqida”gi 460-son qaroriga ilovaga muvofiq oʻzgartirish va qoʻshimchalar kiritilsin.

6. Mazkur Farmonning ijrosini nazorat qilish Oʻzbekiston Respublikasi Bosh vaziri A.N. Aripov zimmasiga yuklansin.

1. Muqaddimadagi “Farmoni” soʻzi “va “Yoshlarning bandligiga koʻmaklashish hamda ularni doimiy ish bilan taʼminlashga oid qoʻshimcha chora-tadbirlar toʻgʻrisida” 2023-yil 26-apreldagi PF-61-son farmonlari” soʻzlari bilan almashtirilsin.

2. 1-band oʻz kuchini yoʻqotgan deb hisoblansin.

3. 2-bandda:

uchinchi xatboshidagi “Davlat soliq qoʻmitasi” soʻzlari “Iqtisodiyot va moliya vazirligi huzuridagi Soliq qoʻmitasi” soʻzlari bilan almashtirilsin;

beshinchi xatboshidagi “Moliya vazirligi Gʻaznachiligi” soʻzlari “Iqtisodiyot va moliya vazirligi huzuridagi Gʻaznachilik xizmati qoʻmitasi” soʻzlari bilan almashtirilsin.

4. Quyidagi mazmundagi 3¹-band bilan toʻldirilsin:

“3¹. Ish beruvchilarga ijtimoiy soliq summasining qoplab berilishi 2023-yilda Oʻzbekiston Respublikasining respublika budjetidan Oʻzbekiston Respublikasi Iqtisodiyot va moliya vazirligi huzuridagi budjetdan tashqari Pensiya jamgʻarmasiga ajratiladigan transfertlar hisobidan amalga oshiriladi”.

5. Quyidagi mazmundagi 4¹-band bilan toʻldirilsin:

“4¹. Oʻzbekiston Respublikasi Iqtisodiyot va moliya vazirligi 2024-yil va 2025-yil uchun Davlat budjetini shakllantirishda ijtimoiy soliq hisoboti ortib boruvchi yakun bilan har oyda hisobot davridan keyingi oyning 15-sanasidan kechiktirmasdan topshirilishini inobatga olib, 2024-yil va 2025-yilning I choragida ish beruvchilarga ijtimoiy soliq summasini qoplab berish xarajatlarini alohida qatorda rejalashtirishni nazarda tutsin”.

6. Ilovada:

2-band “yuridik shaxslarga” soʻzlaridan keyin “, shuningdek, ijtimoiy soliqni 1 foiz stavkada toʻlovchilarga” soʻzlari bilan toʻldirilsin;

3-bandning ikkinchi xatboshisidagi “Moliya vazirligi” va “Davlat soliq qoʻmitasining” soʻzlari tegishlicha “Iqtisodiyot va moliya vazirligi” hamda “Iqtisodiyot va moliya vazirligi huzuridagi Soliq qoʻmitasining” soʻzlari bilan almashtirilsin;

quyidagi mazmundagi 4¹-band bilan toʻldirilsin:

“4¹. Ijtimoiy soliq hisoboti ortib boruvchi yakun bilan har oyda hisobot davridan keyingi oyning 15-sanasidan kechiktirmasdan topshirilishini inobatga olib, ushbu Nizom 2023-yil 1-maydan 2025-yil 15-yanvarga qadar toʻlangan ijtimoiy soliq summasini Davlat budjetidan qoplab berishga nisbatan tatbiq etiladi. Bunda, 2024-yil dekabr oyi uchun toʻlangan ijtimoiy soliq summasini qoplab berish uchun ish beruvchi tomonidan ariza berishning oxirgi muddati 2025-yil 1-aprel kuni etib belgilanadi”;

9-banddagi “Moliya vazirligi Gʻaznachiligiga” soʻzlari “Iqtisodiyot va moliya vazirligi huzuridagi Gʻaznachilik xizmati qoʻmitasiga” soʻzlari bilan almashtirilsin;

16-band quyidagi tahrirda bayon etilsin:

“16. Ish beruvchilarga Davlat budjetidan toʻliq qoplab berilgan ijtimoiy soliq summasiga doir choraklik hisobot Iqtisodiyot va moliya vazirligi huzuridagi Soliq qoʻmitasi tomonidan har chorakda hisobot davridan keyingi oyning 25-sanasiga qadar Iqtisodiyot va moliya vazirligiga kiritib boriladi”;

18-banddagi “2023-yil” soʻzlari “2025-yil” soʻzlari bilan almashtirilsin;

Vaqtinchalik nizomga 2-ilovada:

3-bosqich “Tadbirlar” ustunidagi “Moliya vazirligi Gʻaznachiligiga” soʻzlari “Iqtisodiyot va moliya vazirligi huzuridagi Gʻaznachilik xizmati qoʻmitasiga” soʻzlari bilan almashtirilsin;

4-bosqich “Subyektlar” ustunidagi “Moliya vazirligi Gʻaznachiligi” soʻzlari “Iqtisodiyot va moliya vazirligi huzuridagi Gʻaznachilik xizmati qoʻmitasi” soʻzlari bilan almashtirilsin.