So‘nggi yillarda respublikada o‘rmon bilan qoplangan maydonlarni kengaytirish, qishloq xo‘jaligiga mo‘ljallangan yerlarning shamol eroziyasiga va suv xo‘jaligi obyektlarini qum bosishiga qarshi kurashish, shuningdek, shamol eroziyasining qishloq xo‘jaligi ekinlariga salbiy ta’sirini kamaytirish maqsadida ihota daraxtzorlarini barpo etish borasida izchil chora-tadbirlar amalga oshirilmoqda.

Shu bilan birga, sug‘oriladigan yerlar va suv xo‘jaligi obyektlarini himoya qilishda ihota daraxtzorlarini barpo etish, ekilgan daraxtlarni parvarish qilish uchun ajratilgan mablag‘larini to‘lab berish, shuningdek, buyurtmachi hamda pudrat tashkilotlari o‘rtasida tuzilgan shartnoma majburiyatlari to‘liq bajarilishini ta’minlash muhim vazifa bo‘lib qolmoqda.

O‘zbekiston Respublikasi Prezidentining “O‘zbekiston Respublikasida o‘rmon xo‘jaligi tizimini 2030-yilgacha rivojlantirish konsepsiyasini tasdiqlash to‘g‘risida” 2020-yil 6-oktabrdagi PQ-4850-son qarori ijrosini ta’minlash, shuningdek, sug‘oriladigan yerlarning shamol eroziyasiga hamda suv xo‘jaligi obyektlarini qum bosishiga qarshi ihota daraxtzorlarini barpo etish va rekonstruksiya qilishni moliyalashtirish bo‘yicha ajratilgan O‘zbekiston Respublikasi davlat budjeti mablag‘laridan samarali foydalanishni ta’minlash maqsadida Vazirlar Mahkamasi qaror qiladi:

1. Quyidagilar:

O‘zbekiston Respublikasi Prezidentining “O‘zbekiston Respublikasida o‘rmon xo‘jaligi tizimini 2030-yilgacha rivojlantirish konsepsiyasini tasdiqlash to‘g‘risida” 2020-yil 6-oktabrdagi PQ-4850-son qarorida 2022-yilda Qoraqalpog‘iston Respublikasi va viloyatlarda sug‘oriladigan yerlarning shamol eroziyasiga va suv xo‘jaligi obyektlarini qum bosishiga qarshi 2500 gektar maydonda ihota daraxtzorlari barpo etilishi belgilanganligi;

2022-yil bahor mavsumida Qoraqalpog‘iston Respublikasi va viloyatlarda sug‘oriladigan yerlarning shamol eroziyasiga va suv xo‘jaligi obyektlarining qum bosishiga qarshi 2130 gektar maydonda (85 foiz) ihota daraxtzorlari barpo etilganligi hamda 370 gektar maydon (15 foiz) kuz mavsumida daraxt ekish rejalashtirilganligi ma’lumot uchun qabul qilinsin.

2. Vazirlar Mahkamasining 2018-yil 5-iyundagi 422-son qarori bilan tasdiqlangan Sug‘oriladigan yerlarning shamol eroziyasiga hamda suv xo‘jaligi obyektlarini qum bosishiga qarshi ihota daraxtzorlarini barpo etish va rekonstruksiya qilish tartibi to‘g‘risida nizom 28-bandining uchinchi xatboshisi quyidagi mazmundagi uchinchi va to‘rtinchi xatboshilar bilan almashtirilsin:

“har oyda joriy moliyalashtirish bajarilgan ishlar hajmining 95 foizi miqdorida, berilgan avansga proporsional ravishda chegirib qolgan holda;

loyiha qiymatining qolgan 5 foizini to‘lash shartnomada ko‘rsatilgan kafolat muddati tugagandan so‘ng amalga oshiriladi”.

3. Mazkur qarorning bajarilishini nazorat qilish O‘zbekiston Respublikasining Bosh vazirining agrar va oziq-ovqat sohalarini rivojlantirish masalalari bo‘yicha o‘rinbosari Sh.M. G‘aniyev zimmasiga yuklansin.