“Shaxsga doir ma’lumotlar to‘g‘risida”gi O‘zbekiston Respublikasi Qonunining 7-moddasi ijrosini ta’minlash maqsadida Vazirlar Mahkamasi qaror qiladi:

1. Quyidagilarni nazarda tutuvchi:

a) Shaxsga doir ma’lumotlarga ishlov berishda ularning himoya qilinganlik darajasini belgilash to‘g‘risidagi nizom 1-ilovaga muvofiq tasdiqlansin:

shaxsga doir ma’lumotlarga ishlov berishda ushbu ma’lumotlarning xavfsizligini ta’minlash;

shaxsga doir ma’lumotlarga ishlov berishda ushbu ma’lumotlarning xavfsizligiga bo‘lgan tahdidlardan kelib chiqib, ularning himoya qilinganlik darajalarini belgilash;

shaxsga doir ma’lumotlarning himoya qilinganlik darajasini ta’minlash bo‘yicha talablar;

b) Biometrik va genetik ma’lumotlar mavjud bo‘lgan moddiy jismlarga hamda bunday ma’lumotlarni shaxsga doir ma’lumotlar bazalaridan tashqarida saqlash texnologiyalariga oid talablar to‘g‘risidagi nizom 2-ilovaga muvofiq tasdiqlansin:

biometrik va genetik ma’lumotlarni moddiy jismlarda saqlash, ulardan foydalanish va ularning hisobini yuritish tartibi;

biometrik va genetik ma’lumotlarni shaxsga doir ma’lumotlar bazalaridan tashqarida saqlash texnologiyalariga qo‘yiladigan talablar.

2. Belgilab qo‘yilsinki, ushbu qarorga 1 va 2-ilovalarda belgilangan talablarga amal qilishda kelib chiqadigan xarajatlar shaxsga doir ma’lumotlarga ishlov beruvchi tashkilotlarning o‘z mablag‘lari hisobidan amalga oshiriladi.

3. Vazirlar Mahkamasi huzuridagi Davlat personallashtirish markazi ikki oy muddatda:

Ichki ishlar vazirligi bilan birgalikda “Shaxsga doir ma’lumotlar to‘g‘risida”gi O‘zbekiston Respublikasining Qonuni talablarini buzish holatlarini aniqlash, ular bo‘yicha ma’muriy huquqbuzarlik to‘g‘risidagi bayonnomani rasmiylashtirish va sudga taqdim etish vakolatiga ega bo‘lgan davlat organini belgilashni nazarda tutuvchi normativ-huquqiy hujjat loyihasini o‘rnatilgan tartibda Vazirlar Mahkamasiga kiritsin;

manfaatdor vazirliklar va idoralar bilan birgalikda o‘zlari qabul qilgan normativ-huquqiy hujjatlarini ushbu qarorga muvofiqlashtirsin.

4. Ushbu qaror rasmiy e’lon qilingan kundan boshlab, uch oydan so‘ng kuchga kiradi.

5. Mazkur qarorning bajarilishini nazorat qilish O‘zbekiston Respublikasi Vazirlar Mahkamasi huzuridagi Davlat personallashtirish markazi direktori U.Sh. Tashxodjayev zimmasiga hamda Vazirlar Mahkamasining IT-texnologiyalar, telekommunikatsiyalar va ilmiy faoliyatni rivojlantirish masalalari departamentiga yuklansin.

1. Ushbu Nizom “Shaxsga doir ma’lumotlar to‘g‘risida” Qonuniga muvofiq shaxsga doir ma’lumotlar bazasi (keyingi o‘rinlarda — ma’lumotlar bazasi) mulkdor va (yoki) operatorlari tomonidan shaxsga doir ma’lumotlarga ishlov berishda ushbu ma’lumotlarning xavfsizligiga bo‘lgan tahdidlardan kelib chiqib, ularning himoya qilinganlik darajasini belgilaydi.

2. Mulkdor va (yoki) operatorlar shaxsga doir ma’lumotlarga ishlov berishda ularning xavfsizligiga bo‘lgan tahdidlardan kelib chiqib, ushbu ma’lumotlarni himoya qilishning tashkiliy va texnik chora-tadbirlarini amalga oshiradi.

3. Shaxsga doir ma’lumotlar xavfsizligini ta’minlash mulkdor va (yoki) operatorlar yoxud ular mas’ul etib belgilagan shaxslar tomonidan amalga oshiriladi.

4. Ma’lumotlar bazalarida ishlov beriladigan shaxsga doir ma’lumotlar “Shaxsga doir ma’lumotlar to‘g‘risida”gi O‘zbekiston Respublikasining Qonuni 25, 26, 29-moddalariga muvofiq maxsus, biometrik, genetik va hamma foydalanishi mumkin bo‘lgan ma’lumotlardan tashkil topadi.

5. Mazkur Nizomda quyidagi asosiy tushunchalar qo‘llaniladi:

amaliy dasturiy ta’minot — aniq predmet sohasi bo‘yicha muayyan masalalar sinfini yechishga mo‘ljallangan dasturlar majmuasidir (Access, Oracle va hokazo).

biometrik ma’lumotlar — subyektning anatomik va fiziologik o‘ziga xos xususiyatlarini tavsiflovchi shaxsga doir ma’lumotlar;

genetik ma’lumotlar — subyektning nasldan-naslga o‘tgan yoki orttirilgan xususiyatlariga taalluqli bo‘lgan, subyektning biologik qiyofasini tahlil qilish yoki muqobil axborot olish imkonini beradigan boshqa elementni tahlil qilish natijasi bo‘lgan shaxsga doir ma’lumotlar;

ma’lumotlar bazasi — tarkibida shaxsga doir ma’lumotlar mavjud bo‘lgan axborot tizimi tarzidagi ma’lumotlar bazasi;

ma’lumotlar bazasining mulkdori (mulkdor) — shaxsga doir ma’lumotlar bazasiga egalik qilish, undan foydalanish va uni tasarruf etish huquqiga ega bo‘lgan davlat organi, jismoniy va (yoki) yuridik shaxs;

ma’lumotlar bazasining operatori (operator) — shaxsga doir ma’lumotlarga ishlov berishni amalga oshiruvchi davlat organi, jismoniy va (yoki) yuridik shaxs;

maxsus ma’lumotlar — irqiy yoki ijtimoiy kelib chiqishga oid ma’lumotlar, siyosiy, diniy yoki dunyoqarashga oid e’tiqodlar, siyosiy partiyalar va kasaba uyushmalariga a’zolik to‘g‘risidagi ma’lumotlar, shuningdek jismoniy yoki ruhiy (psixik) salomatlikka taalluqli ma’lumotlar, shaxsiy hayot va sudlanganlik to‘g‘risidagi ma’lumotlar shaxsga doir maxsus ma’lumotlardir;

tizimli dasturiy ta’minot — kompyuterning va kompyuter tarmoqlarining ishini ta’minlovchi dasturlar majmuasi (operatsion tizimlar, drayverlar, utilitalar, arxivatorlar va boshqalar);

hamma foydalanishi mumkin bo‘lgan ma’lumotlar — subyektning roziligi bilan erkin foydalanilishi mumkin bo‘lgan yoki maxfiylikka rioya etishga doir talablar tatbiq etilmaydigan ma’lumotlar.

6. Mulkdor va (yoki) operatorlar xodimlarining ma’lumotlar bazasida faqatgina ushbu xodimlarning shaxsga doir ma’lumotlariga ishlov beriladi.

Mulkdor va (yoki) operatorning xodimlari bo‘lmagan subyektlarning shaxsga doir ma’lumotlariga ishlov berish alohida ma’lumotlar bazasida amalga oshiriladi.

7. Shaxsga doir ma’lumotlarning xavfsizligiga tahdidlar deganda, ma’lumotlar bazasiga ruxsatsiz, shu jumladan tasodifiy kirish natijasida shaxsga doir ma’lumotlarni o‘zgartirish, to‘ldirish, ulardan foydalanish, ularni berish, tarqatish, uzatish, egasizlantirish, yo‘q qilish, nusxalash, shuningdek, boshqa noqonuniy harakatlarga olib kelishi mumkin bo‘lgan shart-sharoitlar va omillar yig‘indisi tushuniladi.

Shaxsga doir ma’lumotlar bazasining tizimli dasturiy ta’minotida deklaratsiya qilinmagan (e’lon qilinmagan) imkoniyatlar mavjudligi bilan bog‘liq tahdidlar 1-turdagi tahdidlar hisoblanadi.

Shaxsga doir ma’lumotlar bazasining amaliy dasturiy ta’minotida deklaratsiya qilinmagan (e’lon qilinmagan) imkoniyatlar mavjudligi bilan bog‘liq tahdidlar 2-turdagi tahdidlar hisoblanadi.

Shaxsga doir ma’lumotlar bazasining tizimli hamda amaliy dasturiy ta’minotida deklaratsiya qilinmagan (e’lon qilinmagan) imkoniyatlar mavjudligi bilan bog‘liq bo‘lmagan tahdidlar 3-turdagi tahdidlar hisoblanadi.

8. Ma’lumotlar bazasiga taalluqli shaxsga doir ma’lumotlarning xavfsizligiga bo‘lgan tahdidlarning turi ushbu hujjatga muvofiq mulkdor va (yoki) operator tomonidan belgilanadi.

9. Ma’lumotlar bazalarida shaxsga doir ma’lumotlarga ishlov berishda ushbu ma’lumotlarni himoya qilishning 4 ta darajasi mavjud.

10. Ma’lumotlar bazalarida shaxsga doir ma’lumotlarga ishlov berishda ularni himoya qilishning 1-darajasi o‘rnatilishi uchun quyidagi shartlardan kamida bittasi mavjud bo‘lishi lozim:

ma’lumotlar bazalari uchun 1-turdagi tahdidlar mavjud bo‘lganda hamda ma’lumotlar bazalarida maxsus va (yoki) biometrik va (yoki) genetik ma’lumotlarga ishlov berilganda;

ma’lumotlar bazalari uchun 2-turdagi tahdidlar mavjud bo‘lganda hamda mulkdor va (yoki) operatorning xodimlari bo‘lmagan 50 000 dan ortiq subyektlarning maxsus ma’lumotlariga ishlov berilganda.

11. Ma’lumotlar bazalarida shaxsga doir ma’lumotlarga ishlov berishda ularni himoya qilishning 2-darajasi o‘rnatilishi uchun quyidagi shartlardan kamida bittasi mavjud bo‘lishi lozim:

ma’lumotlar bazalari uchun 1-turdagi tahdidlar mavjud bo‘lganda hamda ma’lumotlar bazalarida hamma foydalanishi mumkin bo‘lgan ma’lumotlarga ishlov berilganda;

ma’lumotlar bazalari uchun 2-turdagi tahdidlar mavjud bo‘lganda hamda mulkdor va (yoki) operator xodimlarining maxsus ma’lumotlari yoki mulkdor va (yoki) operatorning xodimlari bo‘lmagan 50 000 dan kam bo‘lgan subyektlarning maxsus ma’lumotlariga ishlov berilganda;

ma’lumotlar bazalari uchun 2-turdagi tahdidlar mavjud bo‘lganda hamda ma’lumotlar bazalarida biometrik va (yoki) genetik ma’lumotlarga ishlov berilganda;

ma’lumotlar bazalari uchun 2-turdagi tahdidlar mavjud bo‘lganda hamda mulkdor va (yoki) operatorning xodimlari bo‘lmagan 50 000 dan ortiq subyektlarning hamma foydalanishi mumkin bo‘lgan ma’lumotlariga ishlov berilganda;

ma’lumotlar bazalari uchun 3-turdagi tahdidlar mavjud bo‘lganda hamda mulkdor va (yoki) operatorning xodimlari bo‘lmagan 50 000 dan ortiq subyektlarning maxsus ma’lumotlariga ishlov berilganda.

12. Ma’lumotlar bazalarida shaxsga doir ma’lumotlarga ishlov berishda ularni himoya qilishning 3-darajasi o‘rnatilishi uchun quyidagi shartlardan kamida bittasi mavjud bo‘lishi lozim:

ma’lumotlar bazalari uchun 2-turdagi tahdidlar mavjud bo‘lganda hamda mulkdor va (yoki) operator xodimlarining hamma foydalanishi mumkin bo‘lgan ma’lumotlariga yoxud mulkdor va (yoki) operatorning xodimlari bo‘lmagan 50 000 dan kam bo‘lgan subyektlarning hamma foydalanishi mumkin bo‘lgan ma’lumotlariga ishlov berilganda;

ma’lumotlar bazalari uchun 3-turdagi tahdidlar mavjud bo‘lganda hamda mulkdor va (yoki) operator xodimlarining maxsus ma’lumotlariga yoki mulkdor va (yoki) operatorning xodimlari bo‘lmagan 50 000 dan kam bo‘lgan subyektlarning maxsus ma’lumotlariga ishlov berilganda;

ma’lumotlar bazalari uchun 3-turdagi tahdidlar mavjud bo‘lganda hamda biometrik va (yoki) genetik ma’lumotlarga ishlov berilganda.

13. Ma’lumotlar bazalarida shaxsga doir ma’lumotlarga ishlov berishda ularni himoya qilishning 4-darajasi o‘rnatilishi uchun quyidagi shart mavjud bo‘lishi lozim:

ma’lumotlar bazalari uchun 3-turdagi tahdidlar mavjud bo‘lganda hamda ma’lumotlar bazasida hamma foydalanishi mumkin bo‘lgan ma’lumotlarga ishlov berilganda.

14. Ma’lumotlar bazalarida shaxsga doir ma’lumotlarga ishlov berishda ularni himoya qilishning 4-darajasini ta’minlash uchun quyidagi talablar bajarilishi kerak:

ma’lumotlar bazalari joylashgan binolarning xavfsizlik rejimini tashkil etish, ushbu binolarga kirish huquqiga ega bo‘lmagan shaxslarning nazoratsiz kirishi yoki ushbu binolarda qolishining oldini olish;

shaxsga doir ma’lumotlar mavjud bo‘lgan moddiy jismlar xavfsizligini ta’minlash;

ma’lumotlar bazalarida ishlov berilayotgan shaxsga doir ma’lumotlarga kirish, ularning xizmat (mehnat) vazifalarini bajarishi uchun zarur bo‘lgan shaxslar ro‘yxatini belgilaydigan hujjatni mulkdor va (yoki) operator rahbari tomonidan tasdiqlash;

shaxsga doir ma’lumotlarni mavjud tahdidlardan himoya qilish, zarurat bo‘lganda axborot xavfsizligi sohasidagi qonunchilik talablariga muvofiqligini baholash tartibidan o‘tgan axborot xavfsizligi vositalaridan foydalanish.

15. Ma’lumotlar bazalarida shaxsga doir ma’lumotlarga ishlov berishda ularni himoya qilishning 3-darajasini ta’minlash uchun:

ushbu Nizomning 14-bandida nazarda tutilgan talablarni bajarish;

ma’lumotlar bazasidagi shaxsga doir ma’lumotlar xavfsizligini ta’minlash uchun mas’ul mansabdor shaxs (xodim) tayinlash zarur.

16. Ma’lumotlar bazalarida shaxsga doir ma’lumotlarga ishlov berishda ularni himoya qilishning 2-darajasini ta’minlash uchun:

ushbu Nizomning 15-bandida nazarda tutilgan talablarni bajarish;

ma’lumotlar bazasining elektron xabarlar jurnalidagi ma’lumotlar faqat xizmat (mehnat) vazifalarini bajarishi uchun zarur bo‘lgan xodimlar yoki vakolatli shaxslarga ushbu jurnalga kirish huquqini taqdim etish lozim.

17. Ma’lumotlar bazalarida shaxsga doir ma’lumotlarga ishlov berishda ularni himoya qilishning 1-darajasini ta’minlash uchun:

ushbu Nizomning 16-bandida nazarda tutilgan talablarni bajarish;

ma’lumotlar bazalaridagi shaxsga doir ma’lumotlarga kirish uchun mulkdor va (yoki) operator xodimining vakolatlari o‘zgarishini elektron xavfsizlik jurnalida avtomatik ravishda ro‘yxatga olish;

ma’lumotlar bazalaridagi shaxsga doir ma’lumotlarning xavfsizligini ta’minlash uchun mas’ul bo‘lgan tarkibiy bo‘linma tuzish yoki tarkibiy bo‘linmalardan biriga bunday xavfsizlikni ta’minlash vazifalarini yuklash lozim.

18. Mazkur Nizomni amalga oshirishda yuzaga keladigan nizolar qonunchilik hujjatlarida belgilangan tartibda hal qilinadi.

19. Ushbu Nizom talablari buzilishida aybdor bo‘lgan shaxslar qonunchilik hujjatlariga muvofiq javob beradilar.

1. Ushbu Nizom O‘zbekiston Respublikasining “Shaxsga doir ma’lumotlar to‘g‘risida” Qonuniga muvofiq biometrik va genetik ma’lumotlar mavjud bo‘lgan moddiy jismlarga hamda bunday ma’lumotlarni shaxsga doir ma’lumotlar bazalaridan tashqarida saqlash texnologiyalariga oid talablarni belgilaydi.

2. Mazkur Nizomda quyidagi asosiy tushunchalar qo‘llaniladi:

biometrik ma’lumotlar — subyektning anatomik va fiziologik o‘ziga xos xususiyatlarini tavsiflovchi shaxsga doir ma’lumotlar;

genetik ma’lumotlar — subyektning nasldan-naslga o‘tgan yoki orttirilgan xususiyatlariga taalluqli bo‘lgan, subyektning biologik qiyofasini tahlil qilish yoki muqobil axborot olish imkonini beradigan boshqa elementni tahlil qilish natijasi bo‘lgan shaxsga doir ma’lumotlar;

ma’lumotlarni elektron ko‘rinishda saqlaydigan moddiy jismlar — moslashuvchan magnit disklar, optik disklar, qattiq (olinmaydigan) magnit disklar, elektron xotirali disklar (flesh), autentifikatsiyaning elektron vositalari (tokenlar, planshetlar va boshqalar);

moddiy jismlar — shaxsga doir ma’lumotlarni tashkil etuvchi axborot qayd etilgan moddiy jismlar, shu jumladan hajmli jismlar, shaxsga doir ma’lumotlarni o‘z ichiga olgan hujjatlar;

shaxsga doir ma’lumotlar — muayyan jismoniy shaxsga taalluqli bo‘lgan yoki uni identifikatsiya qilish imkonini beradigan, elektron tarzda, qog‘ozda va (yoki) boshqa moddiy jismda qayd etilgan axborot;

shaxsga doir ma’lumotlar bazasi (ma’lumotlar bazasi) — tarkibida shaxsga doir ma’lumotlar mavjud bo‘lgan axborot tizimi tarzidagi ma’lumotlar bazasi;

shaxsga doir ma’lumotlar bazasining mulkdori (mulkdor) — shaxsga doir ma’lumotlar bazasiga egalik qilish, undan foydalanish va uni tasarruf etish huquqiga ega bo‘lgan davlat organi, jismoniy va (yoki) yuridik shaxs;

shaxsga doir ma’lumotlar bazasining operatori (operator) — shaxsga doir ma’lumotlarga ishlov berishni amalga oshiruvchi davlat organi, jismoniy va (yoki) yuridik shaxs;

shaxsga doir ma’lumotlarga ishlov berish — shaxsga doir ma’lumotlarni yig‘ish, tizimlashtirish, saqlash, o‘zgartirish, to‘ldirish, ulardan foydalanish, ularni berish, tarqatish, uzatish, egasizlantirish va yo‘q qilish bo‘yicha bir harakatni yoki harakatlar majmuini amalga oshirish;

shaxsga doir ma’lumotlar subyekti (subyekt) — shaxsga doir ma’lumotlar o‘ziga taalluqli bo‘lgan jismoniy shaxs;

qog‘oz yoki plastmassadan iborat moddiy jismlar — qog‘oz asosida chop etilgan matnli, grafik va boshqa ma’lumotlar, plastik kartalar va boshqalar.

3. Biometrik va genetik ma’lumotlarga ishlov berish maqsadida foydalaniladigan har qanday moddiy jismlar qonunchilikda belgilangan tartibda “maxfiy” yoki “xizmat doirasida foydalanish uchun” grifi bilan belgilanishi lozim.

4. Biometrik va genetik ma’lumotlarni elektron shaklda saqlashda ushbu ma’lumotlar shifrlangan va kriptografik yoki boshqa usullarda himoyalangan bo‘lishi zarur.

5. Mulkdor va (yoki) operator biometrik va genetik ma’lumotlarga ishlov berish jarayonida ushbu ma’lumotlar saqlanayotgan moddiy jismlarning hisobi yuritilishini ta’minlashi shart.

6. Mulkdor va (yoki) operator biometrik va genetik ma’lumotlar qayd etilgan moddiy jismlarning o‘g‘irlanishi, o‘chirilishi, yo‘q qilinishi, ruxsatsiz olinishi, o‘zgartirilishi hamda nazoratsiz qoldirilishining oldini oluvchi tegishli xavfsizlik choralarini ko‘rishi lozim.

Xavfsizlik choralarini ko‘rishda biometrik va genetik ma’lumotlar:

yong‘in xavfsizligi talablariga, sanitariya qoidalari, normalari va gigiyena normativlariga mos bo‘lishi, shuningdek, suv bosmasligidan kafolatlangan bo‘lishi;

begona shaxslarning kirish imkoniyatini istisno etadigan ishonchli himoya vositalariga ega bo‘lishi;

seyflarda, metall javonlarda yoki metall stellajlarda saqlanishi;

kirish eshiklari va derazalari qo‘riqlash xizmatiga bog‘langan qo‘riqlash signalizatsiyasi va videokuzatuv moslamalari bilan jihozlangan xonalarda saqlanishi.

7. Biometrik va genetik ma’lumotlar qayd etilgan moddiy jismlardan shaxsga doir ma’lumotlar o‘chirilganda, ushbu moddiy jismlar hisobdan chiqarilmaydi.

Hisobdan chiqarilmagan moddiy jismlardan kelgusida shaxsga doir ma’lumotlarga ishlov berish maqsadida qayta foydalanish mumkin, bir martalik foydalanish nazarda tutilgan va foydalanishga yaroqsiz holga kelgan moddiy jismlar bundan mustasno. Bunday moddiy jismlar belgilangan tartibda yo‘q qilinadi.

8. Moddiy jismdan unga biometrik va genetik ma’lumotlarni qayd etgan mulkdor va (yoki) operator tomonidan belgilangan, lekin ishlab chiqaruvchi tomonidan o‘rnatilgan ekspluatatsiya muddatidan ko‘p bo‘lmagan muddatda foydalanilishi kerak.

9. Biometrik va genetik ma’lumotlardan nusxa ko‘chirish ushbu ma’lumotlar ishlov berilishiga ruxsat etilgan texnik qurilmalarda hamda mulkdor va (yoki) operator mas’ul xodimlarining bevosita ishtirokida amalga oshiriladi.

10. Agar moddiy jismda biometrik va genetik ma’lumotlar bilan birga ularga bog‘liq qo‘shimcha shaxsga doir ma’lumotlar ham bo‘lsa, bunday ma’lumotlar kuchaytirilgan malakali elektron imzo bilan tasdiqlanishi va (yoki) moddiy jismda qayd etilgan ma’lumotlarning yaxlitligi hamda o‘zgarmasligini saqlab qolish imkonini beruvchi boshqa axborot texnologiyalari bilan himoyalangan bo‘lishi kerak.

11. Ma’lumotlar bazasidagi biometrik va genetik ma’lumotlarga ishlov berish jarayonida qo‘llanilgan qurilma to‘g‘risida identifikatsiya ma’lumotlari (IP-adres, MAC-adres va boshqa identifikatorlar) qayd etilishi lozim.

12. Biometrik va genetik ma’lumotlarga ishlov berish uchun foydalaniladigan moddiy jism turi mulkdor va (yoki) operator tomonidan belgilanadi.

13. Biometrik va genetik ma’lumotlarni shaxsga doir ma’lumotlar bazalaridan tashqarida saqlashda quyidagi texnologik va boshqa talablar ta’minlanishi lozim:

mulkdor va (yoki) operatorning vakolatli shaxslari uchun moddiy jismda saqlanayotgan shaxsga doir ma’lumotlarga kirish;

moddiy jismda qayd etilgan biometrik va genetik ma’lumotlarning yaxlitligi va o‘zgarmasligini saqlab qolishga imkon beruvchi elektron imzo vositalaridan yoki boshqa axborot texnologiyalaridan foydalanish;

subyektning o‘ziga tegishli biometrik va genetik ma’lumotlarni ishlov berishga bergan yozma roziligi yoki biometrik va genetik ma’lumotlarga ishlov berish uchun qonunchilik hujjatlarida ko‘rsatilgan boshqa asoslar mavjudligini tekshirish.

14. Biometrik va genetik ma’lumotlar shaxsga doir ma’lumotlar bazasidan alohida saqlash uchun chiqarilganda, ushbu ma’lumotlarni ruxsatsiz va takroran qayd etish asoslari ro‘yxatga olinishi talab etiladi.

15. Mulkdor va (yoki) operator o‘zining ma’lumotlar bazalarida biometrik va genetik ma’lumotlarni himoya qilish usullaridan kelib chiqib, ushbu ma’lumotlarni shaxsga doir ma’lumotlar bazalaridan tashqarida saqlash texnologiyalariga qonunchilik hujjatlariga zid bo‘lmagan qo‘shimcha talablarni belgilash huquqiga ega.

16. Mazkur Nizomni amalga oshirishda yuzaga keladigan nizolar qonunchilik hujjatlarida belgilangan tartibda hal qilinadi.

17. Ushbu Nizom talablari buzilishida aybdor bo‘lgan shaxslar qonunchilik hujjatlariga muvofiq javob beradilar.