O‘zbekiston Respublikasi Prezidentining “Vatan tayanchi” bolalar va o‘smirlar harbiy-vatanparvarlik harakati faoliyatini tashkil etish to‘g‘risida” 2022-yil 2-martdagi PQ-150-son qarori ijrosini ta’minlash maqsadida Vazirlar Mahkamasi qaror qiladi:

1. O‘zbekiston Respublikasi Prezidentining “Vatan tayanchi” bolalar va o‘smirlar harbiy-vatanparvarlik harakati faoliyatini tashkil etish to‘g‘risida” 2022-yil 2-martdagi PQ-150-son qaroriga muvofiq “Vatan tayanchi” harakatining faoliyatini samarali tashkil etish uchun yuridik shaxs bo‘lmagan “Vatan tayanchi” bolalar va o‘smirlar harbiy-vatanparvarlik harakatini rivojlantirish jamg‘armasi (keyingi o‘rinlarda — Jamg‘arma) tashkil etilganligi, Jamg‘arma mablag‘larini shakllantirish manbalari va sarflash maqsadlari belgilanganligi ma’lumot uchun qabul qilinsin.

2. Quyidagilarni nazarda tutuvchi “Vatan tayanchi” bolalar va o‘smirlar harbiy-vatanparvarlik harakatini rivojlantirish jamg‘armasining mablag‘larini shakllantirish va ulardan foydalanish tartibi to‘g‘risidagi nizom ilovaga muvofiq tasdiqlansin:

Jamg‘arma mablag‘larini shakllantirish manbalari va ulardan foydalanish tartibi;

Jamg‘armaning daromadlar va xarajatlar smetasini “Vatan tayanchi” harakati rahbari tomonidan tasdiqlash va Toshkent harbiy okrugi moliya xizmatida ro‘yxatga olish tartibi;

Jamg‘arma mablag‘larini hisobga olishni O‘zbekiston Respublikasi Mudofaa vazirligining budjetdan tashqari mablag‘lari ro‘yxati asosida yuritish va Jamg‘arma mablag‘laridan foydalanish yuzasidan hisobotlarni taqdim etish tartibi.

3. O‘zbekiston Respublikasi Mudofaa vazirligi manfaatdor vazirliklar va idoralar bilan birgalikda o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

4. Mazkur qarorning bajarilishini nazorat qilish O‘zbekiston Respublikasi Bosh vazirining moliya-iqtisodiyot va kambag‘allikni qisqartirish masalalari bo‘yicha o‘rinbosari — iqtisodiy taraqqiyot va kambag‘allikni qisqartirish vaziri J.A. Qo‘chqorov va O‘zbekiston Respublikasi mudofaa vaziri B.N. Kurbanov zimmasiga yuklansin.

1. Mazkur Nizom O‘zbekiston Respublikasi Mudofaa vazirligi huzuridagi “Vatan tayanchi” bolalar va o‘smirlar harbiy-vatanparvarlik harakatining “Vatan tayanchi” bolalar va o‘smirlar harbiy-vatanparvarlik harakatini rivojlantirish jamg‘armasi (keyingi o‘rinlarda — Jamg‘arma) mablag‘larini shakllantirish va ulardan foydalanish, Jamg‘arma mablag‘larini boshqarish, shuningdek, hisob va hisobotini yuritish tartibini belgilaydi.

2. Jamg‘arma yuridik shaxs hisoblanmaydi va uning mablag‘lari O‘zbekiston Respublikasi Mudofaa vazirligi huzuridagi “Vatan tayanchi” bolalar va o‘smirlar harbiy-vatanparvarlik harakatining (keyingi o‘rinlarda — “Vatan tayanchi” harakati) alohida budjetdan tashqari mablag‘larini saqlash uchun “G‘alaba bog‘i” yodgorlik majmuasi moliya xizmatida alohida depozit hisobvarag‘ida jamlanadi hamda ushbu Nizomda belgilangan maqsadlarga sarflanadi.

3. Jamg‘arma mablag‘laridan foydalanish “Vatan tayanchi” harakatining rahbari tomonidan tasdiqlangan va Toshkent harbiy okrugi moliya xizmatida belgilangan tartibda ro‘yxatga olinadigan yillik daromadlar va xarajatlar smetasi asosida amalga oshiriladi.

4. Jamg‘arma faoliyatini boshqarish va nazorat qilish “Vatan tayanchi” harakati rahbari tomonidan amalga oshiriladi.

5. Yil oxirida Jamg‘arma mablag‘larining qoldiqlari O‘zbekiston Respublikasi Davlat budjeti daromadiga kiritilmaydi va kelgusi moliya yili uchun Jamg‘armaning daromadlar va xarajatlar smetasini tuzishda hisobga olinadi.

6. Jamg‘arma mablag‘lari kuyidagilar hisobiga shakllantiriladi:

davlat organlari va tashkilotlari, shu jumladan, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tomonidan yoshlarga oid davlat siyosatini amalga oshirish bo‘yicha dasturlar, “yo‘l xaritalari” doirasida belgilangan tartibda ajratiladigan mablag‘lar;

“Vatan tayanchi” harakatining vaqtincha bo‘sh mablag‘larini davlat ulushi bo‘lgan tijorat banklari depozitlariga joylashtirishdan tushadigan tushumlar;

yuridik va jismoniy shaxslar, shu jumladan, O‘zbekiston Respublikasi norezidentlarining homiylik xayriyalari;

xalqaro tashkilotlar va moliya institutlari, shuningdek, boshqa xorijiy donorlarning grantlari;

qonunchilik hujjatlarida taqiqlanmagan boshqa manbalar.

7. Jamg‘arma mablag‘lari quyidagi maqsadlarda sarflanadi:

o‘quvchi yoshlarga har tomonlama ta’lim-tarbiya berish maqsadida umumta’lim maktablarida amaliy va texnik yo‘nalishdagi to‘garaklar faoliyatini yo‘lga qo‘yish;

“Vatan tayanchi” harakatini saqlash, uning moddiy-texnika bazasini rivojlantirish va mustahkamlash;

davra suhbatlari, konferensiyalar, amaliy mashg‘ulotlar, treninglar, shuningdek, madaniy-ma’rifiy, ommaviy-madaniy va boshqa tadbirlar o‘tkazish.

8. Jamg‘armaning daromadlar va xarajatlar smetasi “Vatan tayanchi” harakatining rahbari tomonidan tasdiqlanadi va Toshkent harbiy okrugi moliya xizmatida belgilangan tartibda ro‘yxatga olinadi.

9. Jamg‘armadan mablag‘lar ajratish va ularni sarflash daromadlar va xarajatlar smetasi Toshkent harbiy okrugi moliya xizmatida ro‘yxatga olinganidan so‘ng amalga oshiriladi.

10. Jamg‘armaning daromadlar va xarajatlar smetasiga kiritiladigan o‘zgartirishlar belgilangan tartibda Toshkent harbiy okrugi moliya xizmatida ro‘yxatga olinadi.

11. Yuridik va jismoniy shaxslar tomonidan ko‘rsatilgan homiylik xayriyalarining to‘liq summasi, agar homiy bilan aniq maqsadlar uchun yo‘naltirilishi kelishilmagan bo‘lsa, “Vatan tayanchi” harakatining faoliyatini amalga oshiruvchi tarkibiy bo‘linmalarning moddiy-texnika bazasini mustahkamlash uchun sarflanadi.

12. Jamg‘arma mablag‘larini hisobga olish belgilangan tartibda va O‘zbekiston Respublikasi Mudofaa vazirligining budjetdan tashqari mablag‘lari ro‘yxati asosida yuritiladi.

13. Jamg‘arma mablag‘laridan foydalanish yuzasidan hisobot belgilangan tartibda “Vatan tayanchi” harakatining rahbari tomonidan Toshkent harbiy okrugi moliya xizmatiga taqdim etiladi.

14. “Vatan tayanchi” harakatining rahbari quyidagilar uchun javobgar hisoblanadi:

Jamg‘arma mablag‘larining qonuniy va maqsadli yo‘naltirilishi;

Jamg‘arma mablag‘larining tasdiqlangan daromadlar va xarajatlar smetasiga qat’iy muvofiq ravishda sarflanishi;

Jamg‘arma mablag‘lari bo‘yicha xarajatlarning to‘g‘ri hisobga olinishi;

Jamg‘arma mablag‘laridan oqilona foydalanilishi;

yuridik va jismoniy shaxslar (yetkazib beruvchilar) bilan tuziladigan shartnomalarning asosli va qonunchilik hujjatlariga muvofiq rasmiylashtirilishi va tuzilishi.

15. Jamg‘arma mablag‘larining to‘g‘ri shakllantirilishi va ulardan foydalanilishini nazorat qilish O‘zbekiston Respublikasi Mudofaa vazirligining Moliya-iqtisod bosh boshqarmasi, Nazorat-taftish boshqarmasi hamda qonunchilik hujjatlariga muvofiq boshqa nazorat qiluvchi organlar tomonidan amalga oshiriladi.

16. Ushbu Nizom talablari buzilishida aybdor bo‘lgan shaxslar qonunchilik hujjatlarida belgilangan tartibda javob beradilar.