Respublikada parrandachilik sohasini har tomonlama qo‘llab-quvvatlash va rivojlantirish, ichki va tashqi bozorlarga yo‘naltirish uchun raqobatbardosh mahsulotlar ishlab chiqarish hajmlarini ko‘paytirish, parrandachilik xo‘jaliklarining ozuqaga bo‘lgan talabini barqaror ta’minlash mexanizmlarini yo‘lga qo‘yish, sohaga keng aholi qatlamlarini jalb etish va huquqiy madaniyatini oshirish, shuningdek, tarmoqda ilmiy-texnik yondashuvlar va axborot texnologiyasidan samarali foydalanishni tashkil etish maqsadida:

1. Veterinariya va chorvachilikni rivojlantirish davlat qo‘mitasi, Iqtisodiy taraqqiyot va kambag‘allikni qisqartirish vazirligi, Moliya vazirligi hamda “Parrandasanoat” uyushmasining 2023-yil 1-apreldan boshlab parrandachilik mahsulotlarini ishlab chiqarish bilan shug‘ullanuvchi tadbirkorlik subyektlarini davlat tomonidan qo‘llab-quvvatlash, subsidiyalar ajratish va boshqa imtiyozlardan foydalanish huquqini faqatgina “my.vetgov.uz” saytida ro‘yxatdan o‘tgan hamda belgilangan tartibdagi mezonlarga mos keluvchi parrandachilik xo‘jaliklariga berish to‘g‘risidagi taklifi ma’qullansin.

2. Veterinariya va chorvachilikni rivojlantirish davlat qo‘mitasi Axborot texnologiyalari va kommunikatsiyalarini rivojlantirish vazirligi, Moliya vazirligi, Davlat soliq qo‘mitasi, Davlat statistika qo‘mitasi hamda manfaatdor vazirlik va idoralar bilan birgalikda 2022-yil 1-dekabrga qadar “my.vetgov.uz” saytini quyidagilarni nazarda tutgan holda takomillashtirsin:

parrandachilik sohasidagi ma’lumotlarni tizimli tahlil qilish uchun soliq xizmati, statistika, bojxona, veterinariya organlari va boshqa manfaatdor tashkilotlarning axborot tizimlarini o‘zaro integratsiya qilish;

parrandachilik xo‘jaliklaridagi ota-onalar galasi, inkubatsion tuxumlar, bir kunlik jo‘jalar, ozuqa yem zaxirasi, parrandachilik mahsulotlari (iste’mol tuxumi), parranda go‘shti hamda boshqa mahsulotlarni ishlab chiqarishdan to oxirgi iste’molchiga sotish hajmlarining butun zanjiri bo‘yicha kompleks hisobga olish;

parrandachilik xo‘jaliklarining haqiqiy ishlab chiqarish quvvatlarini, shuningdek, ozuqa yem mahsulotlariga bo‘lgan ehtiyoji va subsidiyalar ajratish miqdorini aniqlash mezonlarini joriy etish.

Moliya vazirligi Veterinariya va chorvachilikni rivojlantirish davlat qo‘mitasining asoslantirilgan hisob-kitoblariga muvofiq 2022-yil 1-sentabrga qadar “my.vetgov.uz” saytini bosqichma-bosqich takomillashtirish uchun zarur mablag‘larning ajratilishini ta’minlasin.

Vazirlar Mahkamasi (G‘aniyev, Qo‘chqorov) 2022-yil 1-noyabrga qadar ushbu bandda nazarda tutilgan mezonlar bo‘yicha tartibning ishlab chiqilishi va tasdiqlanishini ta’minlasin.

3. Belgilansinki, 2022-yil 1-iyundan boshlab Qishloq xo‘jaligini davlat tomonidan qo‘llab-quvvatlash jamg‘armasi tomonidan tijorat banklariga ularning buyurtmasiga asosan joylashtiriladigan 400 milliard so‘mgacha kredit resurslari hisobidan parrandachilik xo‘jaliklari va parranda omuxta yemi ishlab chiqaruvchi tadbirkorlik subyektlariga don zaxirasi yaratish uchun Markaziy bank asosiy stavkasida 3 oylik imtiyozli davr bilan 12 oy muddatgacha revolver kreditlar ajratiladi.

Bunda, ushbu kredit hisobidan tadbirkorlik subyektlarining tijorat banklaridan olingan boshqa kreditlarini so‘ndirishga yo‘l qo‘yilmaydi.

4. Shunday tartib o‘rnatilsinki, unga muvofiq:

b) parrandachilikni rivojlantirish bo‘yicha maqsadli davlat dasturlari bo‘yicha kredit mablag‘lari 10 yilgacha muddatga 3 yilgacha imtiyozli davr bilan ajratiladi.

Bunda, asosiy poda (gala)ni shakllantirish, shu jumladan inkubatsion tuxum, jo‘jalar (final gibrid), ona tovuqlar va ota-ona galasini xarid qilish bilan bog‘liq tadbirlar uchun kreditlar investitsiya loyihasini moliyalashtirish sifatida uzoq muddatga ajratilishi nazarda tutilsin.

5. O‘zbekiston Respublikasi Prezidentining 2021-yil 14-iyundagi “Parrandachilikni rivojlantirish va tarmoq ozuqa bazasini mustahkamlashga qaratilgan qo‘shimcha chora-tadbirlar to‘g‘risida”gi PQ-5146-son qaroriga muvofiq Tiklanish va taraqqiyot jamg‘armasi mablag‘lari hisobidan parrandachilik loyihalarini moliyalashtirish uchun “Mikrokreditbank” ATBga ajratilgan maqsadli mablag‘larning 1-bosqichidan qaytgan qismi ushbu qarorning 4-bandi “a” kichik bandi ikkinchi-uchinchi xatboshilarida nazarda tutilgan maqsadlarga “b” kichik bandida belgilangan muddatlarda kredit ajratish uchun yo‘naltirilsin.

6. Tiklanish va taraqqiyot jamg‘armasining parrandachilik xo‘jaliklari va parranda omuxta yemi ishlab chiqaruvchi tadbirkorlik subyektlari loyihalarini moliyalashtirish uchun “Mikrokreditbank” ATBga yo‘naltirilgan miqdoridagi mablag‘larini qaytarish muddati 7 yildan 10 yilgacha 5 yillik imtiyozli davr bilan uzaytirilsin.

Tijorat banklari O‘zbekiston Respublikasi Prezidentining 2018-yil 13-noyabrdagi “Parrandachilikni yanada rivojlantirish bo‘yicha qo‘shimcha chora-tadbirlar to‘g‘risida”gi PQ-4015-son hamda 2021-yil 14-iyundagi “Parrandachilikni rivojlantirish va tarmoq ozuqa bazasini mustahkamlashga qaratilgan qo‘shimcha chora-tadbirlar to‘g‘risida”gi PQ-5146-son qarorlariga asosan parrandachilik mahsulotlari va parranda omuxta yemi ishlab chiqaruvchi tadbirkorlik subyektlariga ularning mavjud quvvatlarini to‘liq ishga tushirish, shu jumladan modernizatsiya va rekonstruksiya qilish, ozuqa mahsulotlari zaxirasini tashkil etish va aylanma mablag‘lar bilan to‘ldirish uchun mazkur qaror qabul qilingunga qadar ajratilgan kreditlarning qaytarish muddatini tadbirkorlarning arizalariga ko‘ra hamda Veterinariya va chorvachilikni rivojlantirish davlat qo‘mitasi takliflariga asosan o‘n yilgacha uzaytirsin.

7. Tijorat banklari parrandachilik va omuxta yem mahsulotlari ishlab chiqaruvchi tadbirkorlik subyektlariga ajratilgan kreditlarning qaytarish muddatlarini qarzdorlarning arizalariga asosan ularning moliyaviy holati va pul oqimlari prognozi tahlilidan kelib chiqib qayta ko‘rib chiqsin.

8. Moliya vazirligi bir oy muddatda “Parrandasanoat” uyushmasining moddiy-texnika bazasini mustahkamlash, tarmoq korxonalariga xizmatlar ko‘rsatish sifatini yanada yaxshilash, sohaga xorijiy mutaxassislarni jalb qilish, xodimlarni ijtimoiy rag‘batlantirish, ko‘rgazmalar, yarmarkalar va boshqa tadbirlarni amalga oshirish uchun 2023-yilning avgust — dekabr oylarida teng ulushlarda qaytarish sharti bilan yillik 4 foiz stavkada 10 milliard so‘m ajratsin.

9. “Parrandasanoat” uyushmasiga a’zo bo‘lgan parrandachilik xo‘jaliklariga 2022-yil 1-iyuldan boshlab 2024-yil 1-yanvarga qadar davrda parrandachilik xo‘jaliklariga har bir bosh 1 kunlik nasldor jo‘jani import qilish bilan bog‘liq xarajatlarni qoplash uchun davlat tomonidan ajratiladigan subsidiya miqdori 12 ming so‘m etib belgilansin.

10. Moliya vazirligi mazkur qarorning 9-bandida nazarda tutilgan subsidiya to‘lovlari bo‘yicha moliyaviy resurslar ajratilishini, shu jumladan respublika budjetining parametrlariga tegishli o‘zgartirishlar kiritilishini ta’minlasin.

11. “O‘zbekiston respublika tovar-xom ashyo birjasi” AJ Rossiya Federatsiyasi, Qozog‘iston Respublikasi va boshqa davlatlardagi bug‘doy va makkajo‘xori doni, soya va kungaboqar shroti ishlab chiqaruvchi kompaniyalarni birja savdolariga jalb etish choralarini ko‘rsin.

Bunda, “Parrandasanoat” uyushmasi xorijiy kompaniyalar tomonidan birja savdolariga yem mahsulotlari talabni qondiradigan hajmlarda qo‘yilishini ta’minlash maqsadida parrandachilik korxonalarini birja savdolariga jalb qilish choralarini ko‘rsin hamda ularning bug‘doy, makkajo‘xori doni, soya va kungaboqar shroti mahsulotlariga bo‘lgan talabini korxonalar kesimida har oy birjaga kiritib borsin.

12. Iqtisodiy taraqqiyot va kambag‘allikni qisqartirish vazirligi, “O‘zdonmahsulot” AJ, “O‘zbekiston respublika tovar-xom ashyo birjasi” AJ kalendar yilning yanvar — iyun, dekabr oylarida har oyda kamida 30 ming tonna donni sotish uchun birja savdolariga chiqarish choralarini ko‘rsin.

13. Qoraqalpog‘iston Respublikasi Vazirlar Kengashi Raisi va viloyat hokimlari, Veterinariya va chorvachilikni rivojlantirish davlat qo‘mitasi, “Parrandasanoat” uyushmasi 2022-yil 1-sentabrga qadar respublikada faoliyat ko‘rsatayotgan har bir yirik parrandachilik xo‘jaliklarining faoliyati bilan bog‘liq bo‘lgan barcha muammolarini, ularning ishlab chiqarish quvvatlarini, mahsulot ishlab chiqarish hajmi va tannarxini o‘rgansin hamda hududlarda tuxum yo‘nalishida amalga oshiriladigan loyihalarning samaradorligi bo‘yicha O‘zbekiston Respublikasi Prezidenti Administratsiyasiga axborot kiritsin.

14. Iqtisodiy taraqqiyot va kambag‘allikni qisqartirish vazirining birinchi o‘rinbosari S. Xolxo‘jayev parrandachilikni mahallalar kesimida rivojlantirish va sohani moliyaviy qo‘llab-quvvatlash masalalarini hal qilish uchun mas’ul etib belgilansin va sohani rivojlantirish borasida amalga oshirilgan ishlar yuzasidan har o‘n besh kunda Chorvachilik va uning tarmoqlarini rivojlantirish Respublika kengashiga axborot kiritib borsin.

15. Qoraqalpog‘iston Respublikasi Vazirlar Kengashi va viloyatlar hokimliklari Veterinariya va chorvachilikni rivojlantirish davlat qo‘mitasi hamda “Parrandasanoat” uyushmasi bilan birgalikda 2022-yil yakuniga qadar 1-ilovaga muvofiq parranda mahsulotlari yetishtirishning prognoz ko‘rsatkichlarini bajarish choralarini ko‘rsin.

Bunda, Qoraqalpog‘iston Respublikasi Vazirlar Kengashi Raisi va viloyatlar hokimlari “Parrandasanoat” uyushmasi bilan birgalikda parranda go‘shti ishlab chiqarish hajmlarini yil yakuniga qadar kamida 35 foizga oshirib, 600 ming tonnaga yetkazsin.

16. O‘zbekiston Respublikasi Prezidentining 2021-yil 14-iyundagi “Parrandachilikni rivojlantirish va tarmoq ozuqa bazasini mustahkamlashga qaratilgan qo‘shimcha chora-tadbirlar to‘g‘risida”gi PQ-5146-son qaroriga 2-ilovaga muvofiq o‘zgartirishlar kiritilsin.

17. Veterinariya va chorvachilikni rivojlantirish davlat qo‘mitasi, “Parrandasanoat” uyushmasi manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritsin.

18. Veterinariya va chorvachilikni rivojlantirish davlat qo‘mitasi raisi B. Norqobilov va “Parrandasanoat” uyushmasi raisi B. Isayev zimmasiga qarorning o‘z vaqtida va samarali ijro etilishini ta’minlash hamda yuzaga keladigan muammolarni bartaraf etish yuzasidan Chorvachilik va uning tarmoqlarini rivojlantirish Respublika kengashiga takliflar kiritib borish vazifasi yuklansin.

Mazkur qaror ijrosini ta’minlashga mas’ul vazirlik va idoralar faoliyatini nazorat qilish hamda muvofiqlashtirish Bosh vazir o‘rinbosarlari Sh.M. G‘aniyev va D.A. Qo‘chqorov zimmasiga yuklansin.

1. 2-bandning “a” kichik bandi chiqarib tashlansin.

2. 4-bandning to‘rtinchi xatboshisi quyidagi tahrirda bayon etilsin:

“Mazkur mablag‘larning 70 million AQSH dollari ekvivalentidagi qismi tadbirkorlik subyektlariga Markaziy bank asosiy stavkasida kreditlar berish uchun “Mikrokreditbank” ATBga 10 yil muddatga 5 yillik imtiyozli davr bilan Markaziy bank asosiy stavkasidan 4 foiz punktdan past foiz stavkada ajratiladi”.

3. 5-band “a” kichik bandining ikkinchi va uchinchi xatboshilari quyidagi tahrirda bayon etilsin:

“parrandachilik xo‘jaliklari va omuxta yem ishlab chiqaruvchi tadbirkorlik subyektlarining ishlab chiqarish quvvatlaridan kelib chiqib, inkubatsion tuxum, bir kunlik jo‘ja, ozuqa mahsulotlari va uning qo‘shimchalari, dori vositalari, qo‘shimcha komponentlar, bug‘doy, makkajo‘xori, soya doni, soya va kungaboqar shrotini zaxira qilishga aylanma mablag‘larni to‘ldirish;

go‘sht yetishtirish yo‘nalishidagi yangi loyihalarni amalga oshirish, barcha turdagi inkubatsion sexlar, parrandachilik mahsulotlarini qayta ishlash va saqlash texnologik asbob-uskunalari, shuningdek, maxsus texnikalar va ularning ehtiyot qismlari hamda boshqa asosiy vositalarni sotib olish va modernizatsiya qilish”.