Yurtimiz ozodligi va mustaqilligi uchun kurashlarda matonat ko‘rsatgan, millatni hurlik va erkinlikka chorlagan, mustabid tuzum yillarida qatag‘on etilgan vatandoshlarimizning mo‘tabar xotirasini abadiylashtirish, ularning ibratli hayoti va faoliyati, ilmiy-ijodiy merosini chuqur o‘rganish, yoshlar qalbida metin irodali, mard ajdodlarimiz ruhi-pokiga ehtirom, ijtimoiy adolat tantanasiga ishonch, istiqlol g‘oyalariga sadoqat, vatanparvarlik va fidoyilik tuyg‘ularini kuchaytirish maqsadida, O‘zbekiston Respublikasi Prezidentining 1999-yil 12-maydagi F-999-son Farmoyishiga muvofiq Vazirlar Mahkamasi qaror qiladi:

1. Mustamlakachilik davri qurbonlari xotirasini abadiylashtirish bo‘yicha jamoatchilik komissiyasining qatag‘on qurbonlari bo‘lgan vatandoshlarimiz hayoti va faoliyatini o‘rganish, xotirasini abadiylashtirish yuzasidan taklif va tavsiyalari ma’qullansin.

Jamoatchilik komissiyasining keng xalq ommasi fikrlariga asoslangan takliflari hisobga olinib, Mustamlakachilik davri qurbonlari xotirasini abadiylashtirish bo‘yicha respublika tashkiliy qo‘mitasi tuzilsin va uning tarkibi 1-ilovaga* muvofiq tasdiqlansin.

Tashkiliy qo‘mita jamoatchilik komissiyasi bilan birgalikda, Madaniyat ishlari vazirligi, Badiiy akademiya, ijodiy uyushmalar, nodavlat va jamoat tashkilotlari, o‘z-o‘zini boshqarish organlari, ijtimoiy fan vakillarini jalb etgan holda:

— Toshkent shahrining Yunusobod tumanidagi Bo‘zsuv qirg‘og‘ida Mustamlakachilik davri qurbonlari xotira majmuasini barpo etish bo‘yicha keng jamoatchilik fikrini to‘liq o‘rganish va tanlovlar asosida tayyorlangan takliflarni ikki oy muddatda Vazirlar Mahkamasiga kiritsin;

— viloyatlar, tuman va shaharlarda mustamlakachilik davri qurbonlari xotirasini abadiylashtirish maqsadida yodgorlik majmualarini barpo etish va boshqa qo‘shimcha tadbirlarni ko‘zda tutuvchi dasturlarni ishlab chiqsin.

Qoraqalpog‘iston Respublikasi Vazirlar Kengashi va viloyatlar hokimliklari ushbu tadbirlarning o‘z hududlarida amalga oshirilishini ta’minlasin.

2. Mustamlakachilik davri qurbonlari xotirasini abadiylashtirish bo‘yicha jamoatchilik komissiyasi huzurida “Shahidlar xotirasi” xayriya jamg‘armasini tuzish to‘g‘risidagi taklif inobatga olinsin.

“Shahidlar xotirasi” xayriya jamg‘armasining vazirliklar, davlat qo‘mitalari, kompaniyalar, korporatsiyalar, banklar va boshqa muassasalardan iborat homiylar guruhi 2-ilovaga muvofiq ma’qullansin.

Jamg‘armaning tarkibiy tuzilmasi 3-ilovaga muvofiq ma’qullansin va uning Nizomi belgilangan tartibda ro‘yxatdan o‘tkazilsin.

Xalqaro tashkilotlar, ayrim fuqarolar va xorijiy shaxslarning xayriya ulushlari uchun jamg‘arma hisobi ochiq ekanligi e’tiborga olinsin.

3. Quyidagilar “Shahidlar xotirasi” xayriya jamg‘armasining asosiy vazifalari etib belgilanishi ma’lumot uchun qabul qilinsin:

— Mustamlakachilik davri qurbonlari xotirasini abadiylashtirish bo‘yicha jamoatchilik komissiyasi ishini tashkil etish va komissiya zimmasiga yuklangan vazifalarning bajarilishiga yordam berish;

— qatag‘on etilgan fidoyi vatandoshlarimizni nomma-nom aniqlash maqsadida jamoatchilik komissiyasi tomonidan mamlakatimiz hududlarida tuziladigan ilmiy-ishchi guruhlar faoliyatini qo‘llab-quvvatlash;

— shahid bo‘lgan yurtdoshlarimiz nomini abadiy saqlash va kelgusi avlodlarga yetkazish maqsadida ko‘p jildlik “Qatag‘on qurbonlari” xotira kitobini yaratish va nashr etishga ko‘maklashish;

— xorijdagi turli arxiv, muzey, kutubxona va boshqa ilmiy-ma’rifiy muassasalar, mutaxassislar bilan aloqalar o‘rnatish, hamkorlik qilish hamda vatandoshlarimiz hayoti, faoliyatiga oid chet ellardagi mavjud manbalarni izlab topish va o‘rganish maqsadida ilmiy ekspeditsiyalar tashkil etish;

— qonunda belgilangan tartibda ishlab chiqarish hamda tadbirkorlik faoliyatini amalga oshirish.

4. O‘zbekiston Respublikasi Moliya vazirligi “Shahidlar xotirasi” xayriya jamg‘armasi faoliyatini qo‘llab-quvvatlash uchun Vazirlar Mahkamasining zaxira jamg‘armasidan 20 million so‘m ajratsin.

“Shahidlar xotirasi” xayriya jamg‘armasi va uning tasarrufiga kiruvchi bo‘linmalar, korxonalar barcha turdagi davlat soliqlaridan, bojxona to‘lovi hamda davlat budjetiga o‘tkaziladigan boshqa to‘lovlardan besh yil muddatga ozod etilsin.

Homiylarning daromaddan to‘laydigan soliq bo‘yicha bazasi ularning jamg‘armaga o‘tkazadigan pul mablag‘lari miqdoriga monand qisqartirilishi belgilab qo‘yilsin.

5. Toshkent shahar hokimligi bir oy muddatda “Shahidlar xotirasi” xayriya jamg‘armasini Toshkent shahar Navoiy ko‘chasidagi 69-uy (O‘zbekiston Fanlar akademiyasining sobiq Qo‘lyozmalar instituti binosi)ga joylashtirsin.

6. O‘zbekiston pochta va telekommunikatsiyalar agentligiga “Shahidlar xotirasi” xayriya jamg‘armasi boshqaruvini shahar va hukumat telefon aloqasi bilan ta’minlash topshirilsin.

7. “Shahidlar xotirasi” xayriya jamg‘armasi “Adolat” va “Ma’naviyat” nashriyotlarida “Istiqlol fidoyilari” turkumida mustamlakachilik davri qurbonlarining ilmiy-ijodiy merosi, ular haqidagi tadqiqotlar, Vatanimiz ozodligi yo‘lida jon fido qilgan insonlarning ibratli hayotidan hikoya qiluvchi xotiralar, yodnomalar, shuningdek targ‘ibiy-tashviqiy adabiyotlar va ko‘rgazmali vositalarni muntazam chop etishni yo‘lga qo‘ysin.

8. O‘zbekiston Respublikasi Milliy xavfsizlik xizmati, Respublika Prokuraturasi, Ichki ishlar vazirligi, Mudofaa vazirligi, Fanlar akademiyasi, Prezident devoni arxivi va Bosh arxiv boshqarmasi Mustamlakachilik davri qurbonlari xotirasini abadiylashtirish jamoatchilik komissiyasi hamda “Shahidlar xotirasi” xayriya jamg‘armasi so‘rovlariga binoan, zarur arxiv hujjatlaridan foydalanish uchun tegishli sharoitlar yaratsin.

9. “O‘zteleradio” kompaniyasiga “Unutmas meni Vatan” nomli maxsus ijodiy guruh tashkil etib, mustamlakachilik davri qurbonlarining xotirasini abadiylashtirishga oid amalga oshirilayotgan ishlarni muntazam yoritib borish topshirilsin.

10. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari H. Karomatov zimmasiga yuklansin.

1. Xalq ta’limi vazirligi

2. Oliy va o‘rta maxsus ta’lim vazirligi

3. Madaniyat ishlari vazirligi

4. Mudofaa vazirligi

5. Ichki ishlar vazirligi

6. Tashqi iqtisodiy aloqalar vazirligi

7. Tashqi iqtisodiy faoliyat milliy banki

8. O‘zbekiston Respublikasi Markaziy banki

9. Davlat matbuot qo‘mitasi

10. “O‘zteleradio” kompaniyasi

11. Fan va texnika davlat qo‘mitasi

12. Fanlar akademiyasi

13. Badiiy akademiya

14. O‘zbekiston Kasaba uyushmalari Federatsiyasi

15. O‘zbekiston Respublikasi Prezidenti huzuridagi Davlat va jamiyat qurilishi akademiyasi

16. “O‘zbekkino” davlat-aksiyadorlik kompaniyasi

17. “O‘zbekiston havo yo‘llari” milliy aviakompaniyasi

18. “O‘zbekturizm” milliy kompaniyasi

19. “Sharq” nashriyot-matbaa konserni

20. “Ma’naviyat va ma’rifat” jamoatchilik markazi

21. “Oltin meros” jamg‘armasi

22. “Mahalla” jamg‘armasi

23. “Navro‘z” jamg‘armasi

24. “Kamolot” jamg‘armasi

25. “Vatanparvar” jamiyati

26. Ommaviy axborot vositalarini demokratlashtirish va qo‘llab-quvvatlash jamg‘armasi

27. “Alp Jamol” tijorat korporatsiyasi