Ushbu Qonunning maqsadi geografik koʻrsatkichlarni huquqiy jihatdan muhofaza qilish va ulardan foydalanish sohasidagi munosabatlarni tartibga solishdan iborat.

Ushbu Qonunning amal qilishi tovar kelib chiqqan joy nomlarini huquqiy jihatdan muhofaza qilish va ulardan foydalanish sohasidagi munosabatlarga nisbatan tatbiq etilmaydi.

Geografik koʻrsatkichlar toʻgʻrisidagi qonunchilik ushbu Qonun va boshqa qonunchilik hujjatlaridan iboratdir.

Agar Oʻzbekiston Respublikasining xalqaro shartnomasida Oʻzbekiston Respublikasining geografik koʻrsatkichlar toʻgʻrisidagi qonunchiligida nazarda tutilganidan boshqacha qoidalar belgilangan boʻlsa, xalqaro shartnoma qoidalari qoʻllaniladi.

Tovarni muayyan geografik obyekt hududidan kelib chiqqan tovar sifatida identifikatsiyalovchi belgi geografik koʻrsatkich deb eʼtirof etilib, unda tovarning sifati, nom qozonganligi yoki boshqa xususiyatlari (bundan buyon matnda tovarning xususiyatlari deb yuritiladi) uning geografik jihatdan kelib chiqishiga sezilarli darajada bogʻliq boʻladi. Mazkur geografik obyekt hududida tovarni ishlab chiqarishning tovarning xususiyatlarini shakllantirishga jiddiy taʼsir koʻrsatadigan bosqichlaridan loaqal bittasi amalga oshirilishi kerak.

Geografik koʻrsatkichlarni huquqiy jihatdan muhofaza qilish uni ushbu Qonunda belgilangan tartibda roʻyxatdan oʻtkazish asosida, shuningdek Oʻzbekiston Respublikasining xalqaro shartnomalariga muvofiq amalga oshiriladi.

Chet el geografik koʻrsatkichlarini Oʻzbekiston Respublikasi hududida muhofaza qilish faqat tegishli belgi oʻzi kelib chiqqan mamlakatda muhofaza qilingan taqdirdagina amalga oshiriladi.

Agar geografik koʻrsatkichni roʻyxatdan oʻtkazgan shaxs muayyan sifati, nom qozonganligi yoki boshqa xususiyatlari sezilarli darajada uning geografik kelib chiqishiga bogʻliq boʻlgan tovarni ishlab chiqarayotgan boʻlsa, mazkur shaxs ushbu geografik koʻrsatkichdan foydalanish huquqini oladi.

Ushbu Qonunda belgilangan tartibda roʻyxatdan oʻtkazilgan geografik koʻrsatkichdan foydalanish huquqi xuddi shu geografik obyektda joylashgan va xuddi shunday xususiyatlarga ega boʻlgan tovar ishlab chiqarayotgan boshqa yuridik yoki jismoniy shaxsga ham berilishi mumkin.

Oʻzbekiston Respublikasi Adliya vazirligi (bundan buyon matnda Vazirlik deb yuritiladi) geografik koʻrsatkichlarni huquqiy jihatdan muhofaza qilish sohasidagi vakolatli davlat organidir.

Vazirlik:

geografik koʻrsatkichlarni huquqiy jihatdan muhofaza qilish va ulardan foydalanish sohasidagi yagona davlat siyosatini shakllantirish hamda amalga oshirishda ishtirok etadi;

geografik koʻrsatkichlarni va geografik koʻrsatkichdan foydalanish huquqini roʻyxatdan oʻtkazishga doir talabnomalarni koʻrib chiqish uchun qabul qiladi, ular yuzasidan davlat ekspertizasi oʻtkazilishini tashkil etadi;

geografik koʻrsatkichlarni va geografik koʻrsatkichdan foydalanish huquqini roʻyxatdan oʻtkazishni amalga oshiradi;

Geografik koʻrsatkichlarning davlat reyestrini (bundan buyon matnda reyestr deb yuritiladi) yuritadi;

geografik koʻrsatkichdan foydalanish huquqi toʻgʻrisida guvohnoma beradi;

geografik koʻrsatkichni roʻyxatdan oʻtkazish va geografik koʻrsatkichlardan foydalanish huquqini berish toʻgʻrisidagi rasmiy maʼlumotlarni eʼlon qiladi;

qonunchilikka muvofiq boshqa vakolatlarni ham amalga oshiradi.

Oʻzbekiston Respublikasi Adliya vazirligi huzuridagi “Intellektual mulk markazi” davlat muassasasi (bundan buyon matnda Davlat muassasasi deb yuritiladi) geografik koʻrsatkichlarni va geografik koʻrsatkichdan foydalanish huquqini roʻyxatdan oʻtkazishga doir talabnomalarni koʻrib chiqadi hamda ular yuzasidan davlat ekspertizasini oʻtkazadi.

Geografik koʻrsatkich muayyan geografik obyektda joylashgan va ushbu obyektning nomidan oʻzi ishlab chiqarayotgan tovarni belgilash uchun foydalanayotgan bir necha yuridik yoki jismoniy shaxsning (alohida hollarda, agar boshqa shaxslar mavjud boʻlmasa yoxud ular talabnomani berishda ishtirok etish istagini bildirmasa, bitta shaxsning) talabnomasiga koʻra roʻyxatdan oʻtkazilishi mumkin.

Geografik koʻrsatkichni roʻyxatdan oʻtkazish uchun talabnoma:

ushbu moddaning birinchi qismida koʻrsatilgan yuridik va (yoki) jismoniy shaxslarning manfaatlarini ifodalash uchun vakolatli, birlashma shaklida tashkil etilgan nodavlat notijorat tashkiloti (bundan buyon matnda birlashma deb yuritiladi) tomonidan;

tegishli geografik obyekt joylashgan hududdagi mahalliy ijro etuvchi hokimiyat organi tomonidan ham berilishi mumkin.

Geografik koʻrsatkichni yoki geografik koʻrsatkichdan foydalanish huquqini roʻyxatdan oʻtkazish uchun talabnoma (bundan buyon matnda talabnoma deb yuritiladi) yuridik yoki jismoniy shaxs (bundan buyon matnda talabnoma beruvchi deb yuritiladi) tomonidan bevosita yoxud uning patent vakili yoki ishonchli vakili tomonidan davlat axborot tizimlari orqali beriladi.

Talabnoma berilgan sana talabnoma Vazirlikka kelib tushgan sanaga qarab belgilanadi.

Talabnoma berilganidan keyin Vazirlik talabnoma haqidagi maʼlumotlarni talabnoma kelib tushgan paytdan eʼtiboran bir ish kuni ichida oʻz rasmiy veb-saytiga joylashtiradi.

Talabnoma beruvchi tovar kelib chiqqan joy nomi uchun talabnomani ekspertiza natijalari boʻyicha qaror qabul qilinguniga qadar geografik koʻrsatkichga doir talabnoma etib oʻzgartirishga haqli.

Roʻyxatdan oʻtkazilgan tovar kelib chiqqan joy nomi tovar kelib chiqqan joy nomidan foydalanish huquqi toʻgʻrisidagi guvohnoma egasining (egalarining) arizasiga koʻra geografik koʻrsatkich etib oʻzgartirilishi mumkin.

Tovar kelib chiqqan joy nomining geografik koʻrsatkich etib oʻzgartirish bilan bogʻliq ishlarni yuritish tovar kelib chiqqan joy nomidan foydalanish huquqi toʻgʻrisidagi guvohnoma egasi (egalari) tomonidan mustaqil ravishda, patent vakili yoki ishonchli vakil orqali amalga oshirilishi mumkin.

Oʻzbekiston Respublikasidan tashqarida doimiy yashaydigan jismoniy shaxslar va chet el yuridik shaxslari geografik koʻrsatkichlarni roʻyxatdan oʻtkazishga hamda geografik koʻrsatkichdan foydalanish huquqi toʻgʻrisidagi guvohnomani berishga doir ishlarni, shuningdek bu ishlar bilan bogʻliq boʻlgan yuridik ahamiyatga molik boshqa harakatlarni Vazirlikda roʻyxatdan oʻtkazilgan patent vakillari orqali amalga oshiradi.

Patent vakilining vakolatlari ishonchnoma bilan tasdiqlanadi.

Oʻzbekiston Respublikasida doimiy yashaydigan, lekin vaqtinchalik uning hududidan tashqarida boʻlgan jismoniy shaxslar Oʻzbekiston Respublikasi doirasidagi yozishmalar uchun manzilni koʻrsatgan taqdirda, geografik koʻrsatkichlarni roʻyxatdan oʻtkazishga va geografik koʻrsatkichdan foydalanish huquqi toʻgʻrisidagi guvohnomani berishga doir ishlarni hamda bu ishlar bilan bogʻliq boʻlgan yuridik ahamiyatga molik boshqa harakatlarni patent vakilisiz olib borishi mumkin.

Talabnoma bitta geografik koʻrsatkichga taalluqli boʻlishi kerak.

Talabnomada quyidagilar koʻrsatilishi kerak:

geografik koʻrsatkichni yoki geografik koʻrsatkichdan foydalanish huquqini roʻyxatdan oʻtkazish toʻgʻrisidagi ariza;

talabnomada koʻrsatilgan belgi yoki, agar reyestrda roʻyxatdan oʻtkazilgan boʻlsa, geografik koʻrsatkich;

qaysi tovar turi uchun geografik koʻrsatkichni yoki geografik koʻrsatkichdan foydalanish huquqini roʻyxatdan oʻtkazish soʻralayotgan boʻlsa, oʻsha tovar turining nomi;

geografik obyektning chegaralaridagi tovar ishlab chiqariladigan joy;

tovarning xususiyatlari u ishlab chiqarilayotgan joyga bogʻliq ekanligiga taalluqli maʼlumotlar;

tovarning geografik jihatdan kelib chiqishiga, mazkur geografik obyekt uchun xos boʻlgan tabiiy sharoitlarga va (yoki) inson omillariga sezilarli darajada bogʻliq boʻlgan tovar xususiyatlarining tavsifi, shu jumladan tovarni ishlab chiqarish uchun foydalaniladigan boshlangʻich materialning tavsifi, tovarning fizik, kimyoviy, mikrobiologik, organoleptik yoki badiiy xususiyatlari;

agar Oʻzbekiston Respublikasi Vazirlar Mahkamasi tomonidan tasdiqlanadigan geografik koʻrsatkichlarni roʻyxatdan oʻtkazish boʻyicha davlat xizmati koʻrsatishga doir maʼmuriy reglamentda (bundan buyon matnda maʼmuriy reglament deb yuritiladi) nazarda tutilgan boʻlsa, talabnomada bayon etilgan qoidalarga va tovarning aniq xususiyatlariga rioya etilganligini tasdiqlovchi vakolatli inspeksiya organlarining hamda laboratoriyalarning nomi va joylashgan yeri (pochta manzillari).

Talabnomani topshirishda patent boji toʻlanishi va talabnomaga quyidagilar ilova qilinishi kerak:

talabnoma patent vakili yoki ishonchli vakil orqali berilgan taqdirda talabnoma beruvchining ishonchnomasi;

agar talabnoma beruvchi Oʻzbekiston Respublikasi hududida tovarlar ishlab chiqarayotgan shaxs boʻlsa, talabnoma beruvchining mazkur geografik obyektda joylashganligini va xususiyatlari ushbu geografik obyekt bilan sezilarli darajada bogʻliq boʻlgan tovar ishlab chiqarayotganligini tasdiqlovchi hujjatlar;

agar talabnoma beruvchi Oʻzbekiston Respublikasi hududidan tashqarida tovarlar ishlab chiqarayotgan shaxs boʻlsa, geografik obyekt joylashgan mamlakatda talabnomada bayon etilgan geografik koʻrsatkichdan foydalanish huquqini tasdiqlovchi hujjat.

Geografik koʻrsatkichni roʻyxatdan oʻtkazish uchun talabnoma birlashma tomonidan berilgan taqdirda, ushbu birlashmaga kiruvchi shaxslar tegishli xususiyatlarga ega boʻlgan tovarni ishlab chiqarayotganligini tasdiqlovchi hujjatlar ilova qilinadi.

Ilgari roʻyxatdan oʻtkazilgan geografik koʻrsatkichdan foydalanish huquqini roʻyxatdan oʻtkazishga doir talabnomaga talabnoma beruvchi reyestrda koʻrsatilgan xususiyatlarga ega boʻlgan tovar ishlab chiqarayotganligini tasdiqlovchi hujjatlar ilova qilinadi.

Talabnomani rasmiylashtirish uchun zarur boʻlgan hujjatlarga doir talablar maʼmuriy reglamentda belgilanadi.

Quyidagi belgilar geografik koʻrsatkich sifatida roʻyxatdan oʻtkazilmaydi:

tovar qaysi geografik obyekt chegarasida dastlab ishlab chiqarilgan yoki fuqarolik muomalasiga kiritilgan va ishlab chiqarilish joyi bilan bogʻliq boʻlmagan muayyan turdagi tovarning belgisi sifatida Oʻzbekiston Respublikasida umumiy isteʼmolga kiritilgan boʻlsa, oʻsha geografik obyektning belgisi;

ayni bir turdagi tovarga nisbatan geografik koʻrsatkich yoki tovar kelib chiqqan joy nomi sifatida roʻyxatdan oʻtkazilgan belgi;

nisbatan ilgariroq ustuvorlikka ega boʻlgan tovar belgisi yoki xizmat koʻrsatish belgisi bilan bir xil yoxud unga aynan oʻxshash boʻlgan belgi, agar bunday geografik koʻrsatkichdan foydalanish tovar yoki uni tayyorlovchi xususida isteʼmolchini chalgʻitsa;

oʻsimlik navining yoki hayvon zotining nomini ifodalovchi belgi, agar bunday geografik koʻrsatkichdan foydalanish tovar xususida isteʼmolchini chalgʻitsa;

tovar yoki uni tayyorlovchi xususida isteʼmolchini chalgʻitadigan belgi;

ushbu Qonunning 11-moddasida nazarda tutilgan talablarga muvofiq boʻlmagan tovarga nisbatan geografik koʻrsatkich sifatida roʻyxatdan oʻtkazish uchun talabnoma berilgan belgi.

Talabnomaning davlat ekspertizasi Davlat muassasasi tomonidan amalga oshiriladi hamda u rasmiy ekspertizani va talabnomada ifodalangan belgining ekspertizasini oʻz ichiga oladi.

Talabnoma beruvchi talabnoma davlat ekspertizasidan oʻtkazilishi davrida bu talabnoma yuzasidan qaror qabul qilinguniga qadar oʻz tashabbusi bilan talabnoma materiallarini tuzatishga, aniqlashtirishga yoki ularni talabnomani mohiyatan oʻzgartirmaydigan materiallar bilan toʻldirishga haqli.

Davlat ekspertizasini oʻtkazish jarayonida qoʻshimcha materiallarsiz ekspertiza oʻtkazish mumkin boʻlmasa, Davlat muassasasi talabnoma beruvchidan bunday materiallarni soʻrab olishga haqli.

Davlat ekspertizasining soʻroviga koʻra qoʻshimcha materiallar soʻrov talabnoma beruvchiga joʻnatilgan sanadan eʼtiboran uch oy ichida taqdim etilishi kerak. Talabnoma beruvchining iltimosiga koʻra mazkur muddat koʻpi bilan olti oyga uzaytirilishi mumkin. Agar talabnoma beruvchi soʻralayotgan qoʻshimcha materiallarni yoki ularni taqdim etish muddatini uzaytirish toʻgʻrisidagi iltimosnomani koʻrsatilgan muddatda taqdim etmasa, talabnoma chaqirib olingan deb hisoblanadi.

Talabnoma beruvchi tomonidan oʻtkazib yuborilgan muddatlar talabnoma beruvchining mazkur muddatlar tugaganidan ikki oydan kechiktirmay bergan iltimosnomasiga binoan Davlat muassasasi tomonidan tiklanishi mumkin.

Talabnomani davlat ekspertizasidan oʻtkazish tartibi maʼmuriy reglamentda belgilanadi.

Talabnomaning rasmiy ekspertizasi talabnoma Vazirlikka berilgan sanadan eʼtiboran oʻn besh kunlik muddatda amalga oshiriladi.

Rasmiy ekspertiza chogʻida talabnomaning mazmuni, zarur hujjatlarning mavjudligi, shuningdek ularning belgilangan talablarga muvofiqligi tekshiriladi.

Talabnoma beruvchiga rasmiy ekspertiza natijalariga koʻra Davlat muassasasining talabnomani koʻrib chiqish uchun qabul qilish toʻgʻrisidagi yoxud uni rad etish haqidagi qarori maʼlum qilinadi.

Talabnomada ifodalangan belgining ekspertizasi talabnoma koʻrib chiqish uchun qabul qilinganligi toʻgʻrisidagi qarorga muvofiq, mazkur qaror qabul qilinganidan keyin bir oy ichida Davlat muassasasi tomonidan oʻtkaziladi.

Talabnomada ifodalangan belgining ekspertizasi chogʻida talabnomada ifodalangan belgining ushbu Qonun 4, 5, 7 va 11-moddalari qoidalariga muvofiqligi tekshiriladi.

Talabnomada ifodalangan belgining ekspertizasi natijalariga koʻra Davlat muassasasining geografik koʻrsatkichni yoki geografik koʻrsatkichdan foydalanish huquqini roʻyxatdan oʻtkazish haqidagi yoxud uni roʻyxatdan oʻtkazishni rad etish toʻgʻrisidagi qarori qabul qilinadi, talabnoma beruvchi bu haqda xabardor qilinadi.

Talabnoma beruvchi davlat ekspertizasi natijalari ustidan Oʻzbekiston Respublikasi Adliya vazirligining Apellyatsiya kengashiga (bundan buyon matnda Apellyatsiya kengashi deb yuritiladi) qaror qabul qilingan sanadan eʼtiboran uch oy ichida shikoyat berishga haqli.

Davlat ekspertizasi natijalari ustidan Apellyatsiya kengashiga shikoyat berish tartibi Vazirlik tomonidan belgilanadi.

Talabnoma beruvchi Apellyatsiya kengashining qarori ustidan qaror qabul qilingan sanadan eʼtiboran olti oy ichida sudga shikoyat berishga haqli.

Talabnoma beruvchi talabnomadan uni koʻrib chiqishning istalgan bosqichida, lekin geografik koʻrsatkichni yoki geografik koʻrsatkichdan foydalanish huquqini roʻyxatdan oʻtkazish sanasidan kechiktirmay voz kechishi yoki uni chaqirib olishi mumkin.

Davlat ekspertizasi natijalari asosida Vazirlik geografik koʻrsatkichni yoki geografik koʻrsatkichdan foydalanish huquqini reyestrda roʻyxatdan oʻtkazishni patent boji toʻlanganda avtomatik tarzda amalga oshiradi.

Reyestrga kiritiladigan maʼlumotlar tarkibi maʼmuriy reglamentda belgilanadi.

Geografik koʻrsatkich yoki geografik koʻrsatkichdan foydalanish huquqi roʻyxatdan oʻtkazilganligi toʻgʻrisidagi maʼlumotlar, shu jumladan tovarning xususiyatlari toʻgʻrisidagi axborot Vazirlikning oʻz rasmiy veb-saytiga ham joylashtiriladigan rasmiy axborotnomasida eʼlon qilinadi. Eʼlon qilinadigan maʼlumotlarning tarkibi Vazirlik tomonidan belgilanadii.

Geografik koʻrsatkichdan foydalanish huquqi toʻgʻrisidagi guvohnoma (bundan buyon matnda guvohnoma deb yuritiladi) uning egasining geografik koʻrsatkichdan guvohnomada koʻrsatilgan tovar turiga nisbatan foydalanish huquqini tasdiqlaydi.

Guvohnoma geografik koʻrsatkichdan foydalanish huquqi reyestrda roʻyxatdan oʻtkazilganidan keyin Vazirlik tomonidan yagona QR-kod (matrik shtrixli kod) qoʻyilgan, elektron shaklda rasmiylashtirilgan holda, avtomatik tarzda beriladi. Guvohnomaning shakli va unda koʻrsatiladigan maʼlumotlar tarkibi Vazirlik tomonidan belgilanadi.

Geografik koʻrsatkich ushbu Qonun talablariga javob beradigan tovarni ishlab chiqarish imkoniyati mavjud boʻlgan butun vaqt davomida muhofaza qilinadi.

Guvohnoma talabnoma berilgan sanadan eʼtiboran oʻn yil davomida amal qiladi.

Guvohnomaning amal qilish muddati guvohnoma amal qilayotgan oxirgi yil ichida uning egasi tomonidan berilgan arizaga koʻra har safar oʻn yilga uzaytirilishi mumkin.

Ushbu moddaning birinchi qismida koʻrsatilgan arizani topshirishda patent boji toʻlanadi va arizaga quyidagilar ilova qilinishi kerak:

patent vakili yoki ishonchli vakil orqali ariza berilgan taqdirda talabnoma beruvchining ishonchnomasi;

geografik koʻrsatkichdan foydalanish huquqiga ega boʻlgan shaxs mazkur geografik obyektda ekanligini va reyestrda koʻrsatilgan xususiyatlarga ega boʻlgan tovarni ishlab chiqarayotganligini tasdiqlovchi hujjat.

Guvohnomaning amal qilish muddatini uzaytirish haqidagi yozuv ariza berilgan sanadan eʼtiboran uch kun ichida reyestrga kiritiladi.

Ariza berishning ushbu modda birinchi qismida koʻrsatilgan muddati guvohnomaning amal qilish muddati tugaganidan keyin olti oy ichida guvohnoma egasi bergan iltimosnomaga koʻra uzaytiriladi.

Guvohnomaning egasi Vazirlikni oʻz nomi, familiyasi, ismi yoki otasining ismi oʻzgarganligi toʻgʻrisida, geografik koʻrsatkichga taalluqli boshqa oʻzgartishlar toʻgʻrisida xabardor qiladi.

Ushbu oʻzgartishlar toʻgʻrisidagi yozuv Vazirlik tomonidan guvohnomaga va reyestrga kiritiladi.

Agar guvohnoma ushbu Qonunda belgilangan talablarni buzgan holda berilgan boʻlsa, ushbu guvohnoma uning butun amal qilish muddati ichida haqiqiy emas deb topilishi mumkin.

Guvohnoma Apellyatsiya kengashining yoki sudning qarori asosida haqiqiy emas deb topiladi.

Geografik koʻrsatkichning roʻyxatdan oʻtkazilganligi:

tovarni reyestrda koʻrsatilgan xususiyatlar bilan ishlab chiqarishning imkoniyati yoʻqligi munosabati bilan;

chet el yuridik yoki jismoniy shaxslari tovar kelib chiqqan mamlakatda mazkur geografik koʻrsatkichga doir huquqini yoʻqotganligi munosabati bilan Apellyatsiya kengashining qarori asosida bekor qilinadi.

Guvohnomaning amal qilishi uning amal qilish muddati oʻtganligi munosabati bilan tugatiladi.

Guvohnomaning amal qilishi:

guvohnoma egasining Vazirlikka bergan arizasi;

guvohnoma egasi geografik koʻrsatkichdan foydalanish huquqini yoʻqotganligi munosabati bilan Apellyatsiya kengashining qarori;

sudning qarori asosida muddatidan ilgari tugatiladi.

Guvohnomaning egasiga geografik koʻrsatkichdan qonunga zid boʻlmagan har qanday usulda foydalanish, shu jumladan:

ishlab chiqarilayotgan, sotuvga taqdim etilayotgan, sotilayotgan, koʻrgazmalarda va yarmarkalarda namoyish etilayotgan yoki boshqacha tarzda Oʻzbekiston Respublikasi hududida fuqarolik muomalasiga kiritilayotgan yoxud shu maqsadda saqlanayotgan yoki tashilayotgan yoxud Oʻzbekiston Respublikasi hududiga olib kirilayotgan tovarlarda, tovarlarning yorliqlarida, oʻrovlarida;

tovarlarni fuqarolik muomalasiga kiritish bilan bogʻliq boʻlgan blankalarda, hisobvaraqlarda, boshqa hujjatlarda va bosma nashrlarda;

tovarlarni sotish toʻgʻrisidagi takliflarda, shuningdek eʼlonlarda, peshlavhalarda va reklamada foydalanish huquqi tegishlidir.

Birlashma tomonidan geografik koʻrsatkich roʻyxatdan oʻtkazilgan taqdirda, bunday geografik koʻrsatkichdan foydalanish huquqi, basharti ushbu geografik koʻrsatkichdan reyestrda koʻrsatilgan xususiyatlarga ega boʻlgan tovarga nisbatan foydalanilsa, ushbu birlashma aʼzosi boʻlgan har bir shaxsga beriladi.

Litsenziya shartnomasi asosida geografik koʻrsatkichdan foydalanish huquqini boshqa shaxsga berishga, bunday huquqdan oʻzganing foydasiga voz kechish toʻgʻrisida bitimlar tuzishga va geografik koʻrsatkichdan foydalanish huquqini berishga yoʻl qoʻyilmaydi.

Quyidagilar geografik koʻrsatkichdan qonunga xilof ravishda foydalanish deb eʼtirof etiladi:

roʻyxatdan oʻtkazilgan geografik koʻrsatkichdan foydalanish huquqiga ega boʻlmagan shaxslar tomonidan undan foydalanish, hatto bunda, agar tovar ishlab chiqarilgan haqiqiy joy koʻrsatilgan boʻlsa yoki geografik koʻrsatkichdan uni tarjima qilgan holda yoxud “xildagi”, “turdagi”, “oʻxshatib ishlangan” degan va boshqa shunga oʻxshash soʻzlar bilan qoʻshib foydalanilayotgan boʻlsa ham;

roʻyxatdan oʻtkazilgan geografik koʻrsatkichdan undan foydalanish huquqiga ega boʻlgan shaxslarning reyestrda koʻrsatilgan xususiyatlarga ega boʻlmagan yoxud geografik obyekt chegarasidan tashqarida ishlab chiqarilgan tovarga nisbatan foydalanishi;

roʻyxatdan oʻtkazilgan geografik koʻrsatkichga oʻxshash belgidan tovar ishlab chiqarilgan joy yoki tovarning xususiyatlari xususida isteʼmolchilarni chalgʻitadigan tarzda har qanday tovarlar uchun foydalanish.

Geografik koʻrsatkichdan qonunga xilof ravishda foydalanilgan yoki u bilan adashtirib yuborish darajasida oʻxshash boʻlgan belgilardan foydalanilgan tovarlar, tovarlarning yorliqlari, oʻrovlari kontrafakt hisoblanadi.

Guvohnoma egasi geografik koʻrsatkich bilan bir qatorda tovarda yoki uning oʻrovida qoʻllanilgan belgi Oʻzbekiston Respublikasida roʻyxatdan oʻtkazilgan geografik koʻrsatkich ekanligini bildiradigan, aylana ichiga olingan, lotin alifbosidagi “GI” harflari tarzidagi ogohlantiruvchi tamgʻa qoʻyishi mumkin.

Geografik koʻrsatkichlarni yoki geografik koʻrsatkichdan foydalanish huquqini roʻyxatdan oʻtkazish bilan bogʻliq boʻlgan yuridik ahamiyatga molik harakatlarni amalga oshirganlik uchun patent bojlari olinadi.

Patent bojlarining miqdorlari va ularni toʻlash muddatlari, ularni toʻlashdan ozod qilish, toʻlovlarning miqdorini kamaytirish yoki ularni qaytarib berish asoslari, shuningdek patent bojlaridan foydalanish tartibi qonunchilikda belgilanadi.

Guvohnomalarning egalari tovarlarning reyestrda koʻrsatilgan xususiyatlarga muvofiqligini taʼminlashi shart.

Oʻzbekiston Respublikasi Adliya vazirligi va (yoki) tegishli vazirlik, idora yoki boshqa tashkilot qaysi tovarlarga nisbatan geografik koʻrsatkich roʻyxatdan oʻtkazilgan boʻlsa, oʻsha tovarlarning xususiyatlari saqlab qolinishi ustidan nazoratni amalga oshiradi, shu jumladan mazkur geografik obyekt uchun xos boʻlgan sharoitlar yoʻqolganligi toʻgʻrisida hamda geografik koʻrsatkich oʻziga nisbatan roʻyxatdan oʻtkazilgan, reyestrda koʻrsatilgan xususiyatlarga ega boʻlgan tovarlarni ishlab chiqarish mumkin emasligi haqida xulosa beradi.

Birlashmalar geografik koʻrsatkich bilan tamgʻalangan va ushbu birlashmaga kiruvchi shaxslar tomonidan ishlab chiqariladigan tovarlarning xususiyatlariga rioya etilishi ustidan nazoratni amalga oshirishga haqli. Davlat bunday birlashmalarni qonunchilikda belgilangan tartibda qoʻllab-quvvatlashi mumkin.

Geografik koʻrsatkich bilan tamgʻalangan tovarlarni sertifikatlashtirish qonunchilikda belgilangan tartibda amalga oshiriladi.

Oʻzbekiston Respublikasining yuridik va jismoniy shaxslari geografik koʻrsatkichni belgilangan tartibda boshqa davlatlarda roʻyxatdan oʻtkazishga haqli.

Chet el yuridik va jismoniy shaxslari ushbu Qonunda nazarda tutilgan huquqlardan Oʻzbekiston Respublikasining yuridik va jismoniy shaxslari bilan teng ravishda yoki oʻzarolik prinsipi asosida foydalanadi.

Geografik koʻrsatkichlarni huquqiy jihatdan muhofaza qilish va ulardan foydalanish bilan bogʻliq nizolar qonunchilikda belgilangan tartibda hal etiladi.

Geografik koʻrsatkichlar toʻgʻrisidagi qonunchilikni buzganlikda aybdor shaxslar belgilangan tartibda javobgar boʻladi.

1. Oʻzbekiston Respublikasining 2001-yil 30-avgustda qabul qilingan “Tovar belgilari, xizmat koʻrsatish belgilari va tovar kelib chiqqan joy nomlari toʻgʻrisida”gi 267-II-sonli Qonuniga (Oʻzbekiston Respublikasi Oliy Majlisining Axborotnomasi, 2001-yil, № 9-10, 178-modda; 2002-yil, № 9, 165-modda; Oʻzbekiston Respublikasi Oliy Majlisi palatalarining Axborotnomasi, 2007-yil, № 9, 418-modda; 2011-yil, № 12/2, 364-modda; 2012-yil, № 12, 336-modda; 2017-yil, № 4, 137-modda, № 9, 510-modda; 2020-yil, № 1, 1-modda, № 10, 593-modda; 2021-yil, 4-songa ilova, № 8, 801-modda) quyidagi oʻzgartish va qoʻshimcha kiritilsin:

1) 10-modda birinchi qismi 13-bandining toʻrtinchi xatboshisi quyidagi tahrirda bayon etilsin:

“qonunga muvofiq muhofaza qilinadigan geografik koʻrsatkichlar va tovar kelib chiqqan joy nomlari boʻlgan belgilar bilan adashtirib yuborish darajasida bir xil yoki ularga aynan oʻxshash boʻlgan belgilar, bu belgilar har qanday tovarlarga nisbatan shunday koʻrsatkichdan yoki nomdan foydalanish huquqiga ega boʻlgan shaxs nomiga roʻyxatdan oʻtkazilayotgan tovar belgisiga muhofaza qilinmaydigan qism sifatida kiritilgan hollar bundan mustasno”.

2) 11-modda quyidagi mazmundagi beshinchi xatboshi bilan toʻldirilsin:

“shu turdagi tovarga nisbatan tovar kelib chiqqan joy nomi yoki geografik koʻrsatkich sifatida roʻyxatdan oʻtkazilgan belgilar”.

2. Oʻzbekiston Respublikasining 2004-yil 3-dekabrda qabul qilingan “Oʻzbekiston Respublikasi Savdo-sanoat palatasi toʻgʻrisida”gi 712-II-sonli Qonuni (Oʻzbekiston Respublikasining 2018-yil 9-iyulda qabul qilingan OʻRQ-483-sonli Qonuni tahririda) (Oʻzbekiston Respublikasi Oliy Majlisi palatalarining Axborotnomasi, 2018-yil, № 7, 428-modda; 2019-yil, № 11, 791-modda, № 12, 891-modda; 2020-yil, № 1, 1-modda; 2021-yil, 4-songa ilova) 21-moddasi birinchi qismining oʻn ikkinchi xatboshisi “xizmat koʻrsatish belgilarini” degan soʻzlardan keyin “geografik koʻrsatkichlarni” degan soʻzlar bilan toʻldirilsin.

3. Oʻzbekiston Respublikasining 2006-yil 18-sentabrda qabul qilingan “Firma nomlari toʻgʻrisida”gi OʻRQ-51-sonli Qonuni (Oʻzbekiston Respublikasi Oliy Majlisi palatalarining Axborotnomasi, 2006-yil, № 9, 493-modda; 2021-yil, 4-songa ilova) 4-moddasi ikkinchi qismining beshinchi xatboshisi quyidagi tahrirda bayon etilsin:

“belgilangan tartibda qonunchilik bilan muhofaza qilinadigan geografik koʻrsatkichlar va tovar kelib chiqqan joyning nomlari bilan, shunday koʻrsatkichdan yoki nomdan foydalanish huquqiga ega boʻlgan shaxs nomiga roʻyxatdan oʻtkazish hollari bundan mustasno, adashtirib yuborish darajasida bir xil yoki ularga oʻxshash boʻlgan belgilar ham koʻrsatilmasligi kerak”.

4. Oʻzbekiston Respublikasining 2020-yil 6-yanvarda qabul qilingan “Davlat boji toʻgʻrisida”gi OʻRQ-600-sonli Qonuniga (Oʻzbekiston Respublikasi Oliy Majlisi palatalarining Axborotnomasi, 2020-yil, № 1, 1-modda, № 3, 201-modda, № 5, 298-modda, № 10, 593-modda, № 12, 691-modda; 2021-yil, № 1, 13-modda, 4-songa ilova, № 7, 661-modda, № 8, 800, 803-moddalar, № 10, 968-modda) quyidagi qoʻshimcha va oʻzgartishlar kiritilsin:

1) 3-modda ikkinchi qismining uchinchi xatboshisi “xizmat koʻrsatish belgilariga” degan soʻzlardan keyin “geografik koʻrsatkichlarga” degan soʻzlar bilan toʻldirilsin;

2) 5-moddaning 9-bandi “xizmat koʻrsatish belgilari” degan soʻzlardan keyin “geografik koʻrsatkichlar” degan soʻzlar bilan toʻldirilsin;

3) 23-moddaning:

birinchi qismi “xizmat koʻrsatish belgilari” degan soʻzlardan keyin “geografik koʻrsatkichlar” degan soʻzlar bilan toʻldirilsin;

yettinchi qismi “xizmat koʻrsatish belgilarini” degan soʻzlardan keyin “geografik koʻrsatkichlarni” degan soʻzlar bilan toʻldirilsin;

4) ilovaning:

a) 12-bandi:

nomi “xizmat koʻrsatish belgilari” degan soʻzlardan keyin “geografik koʻrsatkichlar” degan soʻzlar bilan toʻldirilsin;

“a” kichik bandining oʻn beshinchi xatboshisi quyidagi tahrirda bayon etilsin:

“geografik koʻrsatkichni va tovar kelib chiqqan joy nomini, ulardan foydalanish huquqini roʻyxatdan oʻtkazishga talabnoma, ilgari roʻyxatdan oʻtkazilgan geografik koʻrsatkichdan va tovar kelib chiqqan joy nomidan foydalanish huquqini berish uchun talabnoma berish va davlat ekspertizasidan oʻtkazish”;

“b” kichik bandi:

ikkinchi xatboshisi quyidagi tahrirda bayon etilsin:

“tovar belgisini, geografik koʻrsatkichni va tovar kelib chiqqan joy nomini roʻyxatdan oʻtkazish, geografik koʻrsatkichdan va tovar kelib chiqqan joy nomidan foydalanish huquqini berish, tovar belgisini Oʻzbekiston Respublikasida hammaga maʼlum tovar belgilari roʻyxatiga kiritish”;

beshinchi xatboshisidagi “tovar kelib chiqqan joy nomlari” degan soʻzlar “geografik koʻrsatkichlar va tovar kelib chiqqan joy nomlari” degan soʻzlar bilan almashtirilsin;

“v” kichik bandining oʻn oltinchi xatboshisidagi “tovar kelib chiqqan joy nomidan” degan soʻzlar “geografik koʻrsatkichdan va tovar kelib chiqqan joy nomidan” degan soʻzlar bilan almashtirilsin;

“d” kichik bandining:

ikkinchi xatboshisidagi “tovar kelib chiqqan joy nomini” degan soʻzlar “geografik koʻrsatkichni hamda tovar kelib chiqqan joy nomini” degan soʻzlar bilan almashtirilsin;

beshinchi xatboshisidagi “tovar kelib chiqqan joy nomidan” degan soʻzlar “geografik koʻrsatkichdan hamda tovar kelib chiqqan joy nomidan” degan soʻzlar bilan almashtirilsin;

“e” kichik bandining:

ikkinchi xatboshisidagi “tovar kelib chiqqan joy nomiga” degan soʻzlar “geografik koʻrsatkichga va tovar kelib chiqqan joy nomlariga” degan soʻzlar bilan almashtirilsin;

beshinchi xatboshisidagi “tovar kelib chiqqan joy nomiga” degan soʻzlar “geografik koʻrsatkichga va tovar kelib chiqqan joy nomlariga” degan soʻzlar bilan almashtirilsin;

oltinchi xatboshisidagi “tovar kelib chiqqan joy nomiga” degan soʻzlar “geografik koʻrsatkichga va tovar kelib chiqqan joy nomlariga” degan soʻzlar bilan almashtirilsin;

toʻqqizinchi xatboshisidagi “tovar kelib chiqqan joy nomiga” degan soʻzlar “geografik koʻrsatkichga va tovar kelib chiqqan joy nomlariga” degan soʻzlar bilan almashtirilsin;

b) 14-bandi:

“v” kichik bandining:

beshinchi xatboshisidagi “tovar kelib chiqqan joy nomidan” degan soʻzlar “geografik koʻrsatkichdan va tovar kelib chiqqan joy nomidan” degan soʻzlar bilan almashtirilsin;

sakkizinchi xatboshisidagi “tovarlarning kelib chiqish joyi nomidan” degan soʻzlar “geografik koʻrsatkichdan va tovar kelib chiqqan joy nomidan” degan soʻzlar bilan almashtirilsin;

“g” kichik bandining birinchi xatboshisidagi “tovar kelib chiqqan joy nomini” degan soʻzlar “geografik koʻrsatkichni va tovar kelib chiqqan joy nomini” degan soʻzlar bilan almashtirilsin.

Oʻzbekiston Respublikasi Adliya vazirligi va manfaatdor tashkilotlar ushbu Qonunning ijrosini, ijrochilarga yetkazilishini hamda mohiyati va ahamiyati aholi oʻrtasida tushuntirilishini taʼminlasin.

Oʻzbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin;

davlat boshqaruvi organlari ushbu Qonunga zid boʻlgan oʻz normativ-huquqiy hujjatlarini qayta koʻrib chiqishlari va bekor qilishlarini taʼminlasin.

Ushbu Qonun rasmiy eʼlon qilingan kundan eʼtiboran kuchga kiradi.