Importni tartibga solish tizimini yanada takomillashtirish, davlat ehtiyojlari uchun oziq-ovqat tovarlari importi bo‘yicha operatsiyalar samaradorligini oshirish maqsadida Vazirlar Mahkamasi qaror qiladi:

1. Quyidagilar:

“O‘zbektenderkonsalting” tenderlar o‘tkazuvchi agentlik to‘g‘risidagi Nizom 1-ilovaga muvofiq;

2. Vazirlar Mahkamasining 1996-yil 1-oktabrdagi 342-son qarori bilan tasdiqlangan Import kontraktlarini Tashqi iqtisodiy aloqalar vazirligida ro‘yxatdan o‘tkazish tartibining davlat ehtiyojlari uchun oziq-ovqat tovarlari importi bo‘yicha kontraktlarni ro‘yxatdan o‘tkazishga oid qismi o‘z kuchini yo‘qotgan deb hisoblansin.

3. Mazkur qarorning bajarilishini nazorat qilish Vazirlar Mahkamasining Tashqi iqtisodiy faoliyatni muvofiqlashtirish departamentiga yuklansin.

1. O‘zbekiston Respublikasi Tashqi iqtisodiy aloqalar, investitsiyalar va savdo vazirligi huzuridagi “O‘zbektenderkonsalting” tenderlar o‘tkazuvchi agentlik, keyingi o‘rinlarda “Agentlik” deb ataladi, O‘zbekiston Respublikasi Tashqi iqtisodiy aloqalar, investitsiyalar va savdo vazirligiga qarashli tashkilot hisoblanadi.

2. Agentlik tovarlar (ishlar va xizmatlar)ni xarid qilish, sotish yuzasidan tender savdolari, tanlovlar o‘tkazish bo‘yicha ixtisoslashtirilgan tashkilot hisoblanadi.

1. Quyidagilar Agentlikning asosiy vazifalari hisoblanadi:

O‘zbekiston Respublikasining iqtisodiy manfaatlarini ta’minlash;

davlat ehtiyojlari uchun oziq-ovqat asosiy turlarini xarid qilish bo‘yicha savdolar, tanlovlar o‘tkazishga doir uslubiy va normativ hujjatlarni ishlab chiqish O‘zbekiston Respublikasi Vazirlar Mahkamasining topshiriqlari bo‘yicha;

bevosita mahsulot ishlab chiqaruvchilar va tovar (ishlar va xizmatlar) yetkazib beruvchilarni tanlov oldidan saralash;

tender qatnashchilari uchun teng tanlov shartlarini ta’minlash;

mahsulot yetkazib beruvchilarni oldindan tanlash, tushayotgan takliflarni ekspert baholash, reklama ishlarini tashkil etish.

1. Agentlik yuridik shaxs hisoblanadi, alohida mol-mulkka, mustaqil balansga, bank muassasalaridan birida schyotlarga ega bo‘ladi, o‘z nomidan shartnomalar tuzishga, mulkiy va shaxsiy nomulkiy huquqlarni sotib olishga hamda o‘z zimmasiga majburiyatlar olishga, sudlarda da’vogar va javobgar bo‘lishga haqlidir.

2. Agentlik o‘z majburiyatlari bo‘yicha o‘ziga tegishli butun mol-mulk bilan javob beradi.

3. Agentlik o‘z faoliyatini tenderlarni o‘tkazishga tayyorgarlik ko‘rish va o‘tkazishning xolisligi prinsiplariga muvofiq amalga oshiradi, O‘zbekiston Respublikasi Konstitutsiyasiga, O‘zbekiston Respublikasi qonunlariga, O‘zbekiston Respublikasi Oliy Majlisi palatalarining qarorlariga, O‘zbekiston Respublikasi Prezidentining farmonlari, qarorlari va farmoyishlariga, O‘zbekiston Respublikasi Vazirlar Mahkamasining qarorlari va farmoyishlariga, O‘zbekiston Respublikasi Tashqi iqtisodiy aloqalar, investitsiyalar va savdo vazirining buyruqlariga, O‘zbekiston Respublikasining xalqaro shartnomalariga, shuningdek mazkur Nizomga amal qiladi;

4. Agentlik o‘z faoliyatini to‘la xo‘jalik mustaqilligi shartlarida amalga oshiradi.

5. Agentlikning moliyaviy-xo‘jalik faoliyat bo‘yicha boshqa sheriklar bilan o‘zaro munosabatlari shartnoma asosida amalga oshiriladi.

6. Agentlik O‘zbekiston Respublikasi Davlat gerbi tasviri tushirilgan, o‘z nomi o‘zbek va ingliz tillarida yozilgan muhrga, rasmiy ish qog‘ozlariga va tashqi identifikatsiyalashning boshqa vositalariga ega bo‘ladi.

Agentlik ko‘rsatib o‘tilgan vazifalarni ta’minlash uchun O‘zbekiston Respublikasi qonun hujjatlariga muvofiq quyidagi funksiyalarni amalga oshiradi:

tovarlar (ishlar va xizmatlar) yetkazib berish yuzasidan savdolar uchun tender hujjatlarini ishlab chiqadi;

tovarlar (ishlar va xizmatlar)ni potensial yetkazib beruvchilarni tanlov oldidan saralaydi;

tenderlar tayyorlaydi va ularning o‘tkazilishini bevosita tashkil etadi;

O‘zbekiston Respublikasida va chet elda tenderlar o‘tkazish shartlari va tartibiga doir axborot faoliyatini amalga oshiradi;

tenderlar o‘tkazish bo‘yicha chet el ish tajribasini va tenderlar o‘tkazish sohasidagi xizmatlarning boshqa turlarini o‘rganadi;

davlat iste’molchilari uchun davlat ehtiyojlari uchun xarid qilishga oid normativ hujjatlarni qabul qilish va ularning amal qilishi bo‘yicha konsalting xizmatlari ko‘rsatadi.

1. Agentlik o‘z funksiyalarini amalga oshirish uchun quyidagilarga haqlidir:

ayirboshlash shartlarida yoki tijorat asosida tenderlar o‘tkazish bo‘yicha axborot berish (sotib olish) to‘g‘risida tenderlar o‘tkazish bo‘yicha boshqa xorijiy agentliklar bilan bitimlar tuzish;

vazirliklar, davlat qo‘mitalari, idoralar, davlat hokimiyati mahalliy organlari, O‘zbekiston Respublikasi va xorijiy davlatlarning yuridik shaxslaridan o‘z vazifalarini amalga oshirish uchun Agentlikka zarur bo‘lgan axborotni belgilangan tartibda olish;

o‘z axborot xabarnomalari va boshqa axborot mahsulotini nashr etish va O‘zbekiston Respublikasida va chet elda tarqatish;

tenderlar o‘tkazilishi haqidagi axborotni chet el va mamlakatimiz tashkilotlariga shartnoma asosida berish;

kreditlar olish, o‘z nomidan shartnomalar tuzish, mulkiy va shaxsiy nomulkiy huquqlarni sotib olish, sudda, xo‘jalik sudida va xolis hakamlar sudida da’vogar va javobgar bo‘lish;

tenderlar o‘tkazish bo‘yicha axborotni tarqatish uchun Tashqi iqtisodiy aloqalar, investitsiyalar va savdo vazirligining roziligi bilan mintaqaviy bo‘limlar tashkil etish;

O‘zbekiston Respublikasi qonun hujjatlariga muvofiq xo‘jalik faoliyatini, shu jumladan mazkur Nizom bilan belgilangan Agentlik maqsadlari va vazifalariga zid bo‘lmagan tashqi iqtisodiy faoliyatni amalga oshirish.

2. Agentlik mazkur Nizomda belgilangan vazifalarni hal etish uchun faoliyatning O‘zbekiston Respublikasi qonun hujjatlari bilan taqiqlanmagan boshqa turlarini amalga oshirish huquqiga egadir.

1. Agentlik O‘zbekiston Respublikasi Tashqi iqtisodiy aloqalar, investitsiyalar va savdo vazirligiga hisob beradi.

2. Agentlikka O‘zbekiston Respublikasi Tashqi iqtisodiy aloqalar, investitsiyalar va savdo vaziri tomonidan lavozimga tayinlanadigan va lavozimdan ozod qilinadigan Bosh direktor rahbarlik qiladi.

3. Agentlik tuzilmasi va shtatlari, shuningdek mansabdor shaxslarga haq to‘lash tizimi Agentlik Direktori tomonidan tasdiqlanadi.

4. Agentlik Direktori mazkur Nizom bilan unga berilgan vakolatlarga muvofiq Agentlik faoliyatiga rahbarlik qiladi va Agentlikka yuklangan vazifalar bajarilishi uchun shaxsan javob beradi.

5. Agentlik Direktori O‘zbekiston Respublikasining amaldagi qonun hujjatlariga, mazkur Nizomga va O‘zbekiston Respublikasi Tashqi iqtisodiy aloqalar, investitsiyalar va savdo vazirligining normativ hujjatlariga muvofiq:

Agentlikka rahbarlik qiladi va uning joriy faoliyati uchun javob beradi;

yuridik va jismoniy shaxslar, shu jumladan xorijiy yuridik va jismoniy shaxslar bilan shartnomalar tuzadi;

Agentlikning barcha xizmatlari va bo‘linmalari tomonidan bajarilishi majburiy bo‘lgan buyruqlar, farmoyishlar, yo‘riqnomalar chiqaradi;

Agentlik nomidan ishonchnomasiz ish ko‘radi, barcha respublika organlari, respublika korxonalari va tashkilotlarida, shuningdek boshqa davlatlarda o‘z vakolati doirasida tender faoliyatini o‘tkazish masalalari bo‘yicha Agentlik nomidan vakillik qiladi;

Agentlik mol-mulkiga egalik qiladi;

ishonchnomalar beradi;

mazkur Nizomga muvofiq Agentlik faoliyatining boshqa masalalarini ko‘rib chiqadi va hal etadi.

6. Agentlik direktori O‘zbekiston Respublikasi Tashqi iqtisodiy aloqalar, investitsiyalar va savdo vaziriga:

amaldagi qonun hujjatlariga muvofiq Agentlikning tarkibiy birliklarini, bo‘limlarini va unga qarashli boshqa korxonalar va tashkilotlarni tashkil etish, qayta tashkil etish va tugatish;

Agentlik tuzilmasi va shtatlarini takomillashtirish, uning tarkibiy birliklari, bo‘limlari va unga qarashli boshqa korxonalar va tashkilotlarning xodimlari sonini va ish haqini belgilash;

xorijiy mutaxassislarni O‘zbekiston Respublikasining amaldagi qonun hujjatlarida nazarda tutilgan tartibda va ular bilan kontraktlar imzolash asosida ishga qabul qilish bo‘yicha takliflar kiritadi

1. Agentlik amalga oshirilayotgan faoliyat bo‘yicha O‘zbekiston Respublikasining amaldagi qonun hujjatlariga muvofiq hisob va hisobotni amalga oshiradi.

2. Agentlikning operatsiya yili 1-yanvardan boshlanadi va 31-dekabrda tamom bo‘ladi. Har bir yil tamom bo‘lgandan keyin tasdiqlash uchun Tashqi iqtisodiy aloqalar, investitsiyalar va savdo vazirligiga taqdim etiladigan balans hamda foyda va zararlar schyoti tuziladi.

3. Agentlik faoliyatini hujjatlar orqali taftish qilish va tekshirishni mustaqil auditorlik tashkilotlari va qonun hujjatlariga muvofiq bunday tekshirishlarni amalga oshirishga vakil qilingan nazorat qiluvchi boshqa organlar amalga oshiradi.

Agentlikning mol-mulki va mablag‘lari quyidagilardan iborat bo‘ladi:

Agentlikning to‘liq xo‘jalik tasarrufida bo‘lgan asosiy fondlar va aylanma mablag‘lar, shu jumladan unga qarashli tarkibiy bo‘linmalarga foydalanish uchun berilgan asosiy fondlar va aylanma mablag‘lar;

tenderlar o‘tkazish bo‘yicha axborot xizmatlari va boshqa xizmatlar ko‘rsatishdan, Agentlik mahsulotlarini mamlakatimiz va chet el korxonalari, tashkilotlariga hamda xususiy shaxslarga sotishdan olingan daromadlar;

aksiyalar va qimmatli qog‘ozlarga dividendlar, o‘ziga qarashli korxonalar va qo‘shma korxonalar ustav sarmoyalariga ulushlar;

depozit va boshqa moliyaviy ulushlar va operatsiyalar bo‘yicha foizlar;

yuridik shaxslarning, shu jumladan xorijiy yuridik shaxslarning tekin badallari.

Agentlik mol-mulki, shuningdek O‘zbekiston Respublikasi qonun hujjatlari bilan taqiqlanmagan boshqa manbalardan ham shakllanishi mumkin.

Agentlik faoliyati O‘zbekiston Respublikasi qonun hujjatlariga muvofiq O‘zbekiston Respublikasi Tashqi iqtisodiy aloqalar, investitsiyalar va savdo vazirligining qaroriga ko‘ra to‘xtatiladi.