So‘nggi yillarda neft va gaz tarmog‘i korxonalarini moliyaviy sog‘lomlashtirish va tarmoqda raqobatni rivojlantirish uchun qulay shart-sharoitlarni yaratish bo‘yicha muayyan ishlar olib borilmoqda.

O‘zbekiston Respublikasi Prezidentining “2017 — 2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha harakatlar strategiyasini “Yoshlarni qo‘llab-quvvatlash va aholi salomatligini mustahkamlash yili”da amalga oshirishga oid Davlat dasturi to‘g‘risida” 2021-yil 3-fevraldagi PF-6155-son Farmoni ijrosini ta’minlash hamda Davlat kafolati ishtirokisiz xorijiy investitsiyalarni jalb qilish, “O‘zbekneftgaz” AJni moliyaviy sog‘lomlashtirish maqsadida Vazirlar Mahkamasi qaror qiladi:

1. Quyidagilar:

a) “Fitch Ratings” va “S&P Global Ratings” xalqaro reyting agentliklari tomonidan “O‘zbekneftgaz” AJga O‘zbekiston Respublikasining suveren reytingi “VV-” (barqaror) darajasidagi kredit reytinglari berilganligi;

“DeGolyer & MacNaughton” (AQSh) kompaniyasi tomonidan uglevodorod zaxiralarini baholash bo‘yicha xalqaro standartlarga (PRMS) muvofiq “O‘zbekneftgaz” AJ konlarining 2017 — 2020-yillar uchun uglevodorod zaxiralari auditi o‘tkazilganligi;

“Ernst & Young” (Buyuk Britaniya) xalqaro auditorlik kompaniyasi tomonidan “Uzbekneftgaz” AJning 2017 — 2020-yillar uchun moliyaviy hisobotning xalqaro standartlariga (MHXS) muvofiq konsolidatsiyalashgan moliyaviy hisoboti auditi o‘tkazilganligi;

b) “O‘zbekneftgaz” AJning xalqaro obligatsiyalarini chiqarish va joylashtirish doirasida korporativ va xalqaro obligatsiyalar reytinglarini olish uchun “S&P Global Ratings”, “Fitch Ratings”, “Moody’s Investor’s Service” reyting agentliklari hamda yuridik xizmatlar ko‘rsatish uchun “White & Case LLP” yuridik firmasi bilan tegishli bitimlar imzolanganligi;

v) “O‘zbekneftgaz” AJ tomonidan eng yaxshi takliflarni tanlab olish natijalari asosida:

xalqaro obligatsiyalarni chiqarish va joylashtirishni tashkillashtirish uchun “Bank GPB Intemational S.A.”, “Citigroup Global Markets Limited”, “J.P. Morgan Securities plc.” va “MUFG Securities EMEA plc.” kompaniyalari (keyingi o‘rinlarda — tashkilotchi kompaniyalar) tanlanganligi;

xalqaro obligatsiyalarni chiqarish va joylashtirish doirasida ishonchli vakil — “BNY Mellon Corporate Trustee Services Limited”, to‘lov agenti — “The Bank of New York Mellon (London Branch)”, listing va ro‘yxatga oluvchi agent — “The Bank of New York Mellon SA/NV (Dublin Branch)” kompaniyalari tanlab olinganligi;

g) xalqaro tajriba hamda respublikada amalga oshirilgan tegishli emissiyalarning natijalaridan kelib chiqqan holda, “Uzbekneftgaz” AJ tomonidan xalqaro obligatsiyalarni London fond birjasida (The London Stock Exchange) joylashtirish rejalashtirilganligi ma’lumot uchun qabul qilinsin.

2. Quyidagilar:

Energetika vazirligi va “O‘zbekneftgaz” AJning — 2021-yil noyabr oyida 700 million AQSh dollari miqdorigacha xalqaro obligatsiyalarni chiqarish va joylashtirishni tashkillashtirish to‘g‘risidagi;

Moliya vazirligi va “Uzbekneftgaz” AJning — xalqaro obligatsiyalarni chiqarish va joylashtirishdan tushgan mablag‘larni Moliya vazirligi G‘aznachiligida “Uzbekneftgaz” AJning g‘aznachilik hisobraqamiga o‘tkazish hamda jamiyat ehtiyojlariga ishlatish yo‘nalishlarini Moliya vazirligi bilan kelishgan holda belgilash to‘g‘risidagi takliflari ma’qullansin.

Bunda, “O‘zbekneftgaz” AJ tomonidan:

mavjud qarz bitimlarida (shartnomalarida), shuningdek ushbu qarorda ko‘zda tutilgan xalqaro obligatsiyalarni chiqarish uchun emissiya risolasida qabul qilingan moliyaviy shart va talablar (kovenantlar) buzilmasligi va tegishli davr mobaynida bajarilishi;

xalqaro obligatsiyalarni chiqarish va joylashtirishda zarur hisoblanadigan rasmiy hujjatlarda (shu jumladan, emissiya risolasida) jamiyatning barcha faoliyat yo‘nalishlari hamda berilgan kafolatlari bilan bog‘liq bo‘lgan ma’lumotlarning yoritib berilishi ta’minlansin.

3. “Uzbekneftgaz” AJga, istisno tariqasida, xalqaro obligatsiyalarni chiqarish va joylashtirish doirasida to‘g‘ridan to‘g‘ri muzokaralar asosida hamda Iqtisodiy taraqqiyot va kambag‘allikni qisqartirish vazirligi huzuridagi “Loyihalar va import kontraktlarni kompleks ekspertiza qilish markazi” DUKdan ekspertizadan va ro‘yxatdan o‘tkazmasdan:

a) quyidagi tashkilotlar bilan shartnomalarni va ularga qo‘shimcha kelishuvlarni imzolashga:

“Ernst & Young” xalqaro auditorlik tashkiloti bilan “O‘zbekneftgaz” AJning 2021-yil moliyaviy hisobotlarini tashqi auditdan o‘tkazish va auditorlik tashknlotning komfort xatini (comfort letter) berish xizmatlarini bajarish bo‘yicha;

tashkilotchi kompaniyalar yoki ularning affillangan shaxslari bilan xizmatlar ko‘rsatish bo‘yicha;

xalqaro obligatsiyalarni chiqarish va joylashtirish doirasida ishonchli vakil — BNY Mellon Corporate Trustee Services Limited, to‘lov agenti — The Bank of New York Mellon (London Branch), listing va ro‘yxatga oluvchi agent — The Bank of New York Mellon SA/NV (Dublin Branch) kompaniyalari bilan tegishli protsessual xizmatlar ko‘rsatish bo‘yicha;

London fond birjasi (The London Stock Exchange) bilan xalqaro obligatsiyalarni joylashtirish bo‘yicha;

b) tashkilotchi kompaniyalar tomonidan jalb qilingan yuridik konsultantlar, virtual ma’lumotlar xonalari provayderlari, tarjimonlar xizmatlari va ushbu jarayonlar uchun zarur bo‘lgan boshqa xizmatlar bo‘yicha moliyaviy xarajatlarni tashkilotchi kompaniyalar taqdim etgan hujjatlarga muvofiq to‘lab berishga ruxsat berilsin.

4. Moliya vazirligi, Energetika vazirligi, Davlat aktivlarini boshqarish agentligi va “Uzbekneftgaz” AJ qonunchilikda belgilangan tartibda “O‘zbekneftgaz” AJning xalqaro obligatsiyalarini chiqarish va joylashtirish yuzasidan korporativ boshqaruv organlarida tegishli hujjatlarning rasmiylashtirilishini ta’minlasin.

5. Mazkur qarorning bajarilishini nazorat qilish O‘zbekiston Respublikasi Bosh vazirining moliya-iqtisodiyot va kambag‘allikni qisqartirish masalalari bo‘yicha o‘rinbosari — iqtisodiy taraqqiyot va kambag‘allikni qisqartirish vaziri J.A. Qo‘chqorov, energetika vaziri A.S. Sultanov va “Uzbekneftgaz” AJ boshqaruvi raisi M.R. Abdullayev zimmasiga yuklansin.