Qishloq xo‘jaligida islohotlarni yangi sifat bosqichiga olib chiqish, aholining oziq-ovqat xavfsizligini ta’minlash, qishloq xo‘jaligi mahsulotlari yetishtirishning barcha tashkiliy bo‘g‘inlari va bosqichlarini uzluksiz moliyalashtirish, Moliya vazirligi huzuridagi Qishloq xo‘jaligini davlat tomonidan qo‘llab-quvvatlash jamg‘armasining resurs bazasini mustahkamlash maqsadida:

1. Qishloq xo‘jaligini davlat tomonidan qo‘llab-quvvatlash bilan bog‘liq xarajatlarni moliyalashtirish uchun Tiklanish va taraqqiyot jamg‘armasi hisobidan Moliya vazirligiga Qishloq xo‘jaligini davlat tomonidan qo‘llab-quvvatlash jamg‘armasi uchun 100 million AQSH dollari ekvivalentidagi mablag‘lar milliy valyutada 5 yil muddatga foizsiz ajratilsin.

2. Bosh vazir o‘rinbosarlari J.A. Qo‘chqorov va Sh.M. G‘aniyev Qishloq xo‘jaligini davlat tomonidan qo‘llab-quvvatlash jamg‘armasi hisobidan qishloq xo‘jaligi mahsulotlarini yetishtirish, qayta ishlash va qishloq xo‘jaligi texnikasi parkini yangilash bilan bog‘liq tadbirlarning o‘z vaqtida moliyalashtirilishini ta’minlasin.

3. O‘zbekiston Respublikasi Prezidentining ayrim qarorlariga ilovaga muvofiq o‘zgartirishlar kiritilsin.

4. Mazkur qarorning ijrosini nazorat qilish O‘zbekiston Respublikasining Bosh vaziri A.N. Aripov zimmasiga yuklansin.

1. O‘zbekiston Respublikasi Prezidentining 2021-yil 27-martdagi “Oilaviy tadbirkorlikni rivojlantirish dasturlari doirasida amalga oshiriladigan qo‘shimcha chora-tadbirlar to‘g‘risida”gi PQ-5041-son qarorining 5-bandi quyidagi tahrirda bayon etilsin:

“5. Moliya vazirligi mazkur qarorning 4-bandi asosida Tiklanish va taraqqiyot jamg‘armasi tomonidan ajratiladigan 1,5 trln so‘m kredit resurslarining tijorat banklari tomonidan qaytarilmagan qismida O‘zbekiston Respublikasi respublika budjeti hisobidan 2026-yilda qoplanishini ta’minlasin.

Bunda, Tiklanish va taraqqiyot jamg‘armasiga qoplangan mablag‘lar miqdoridagi vakolatli banklarning majburiyatlari Moliya vazirligi foydasiga qayta rasmiylashtiriladi”.

2. O‘zbekiston Respublikasi Prezidentining 2021-yil 26-maydagi “Hududlarda maktabgacha ta’lim xizmatlarini kengaytirish bo‘yicha qo‘shimcha chora-tadbirlar to‘g‘risida”gi PQ-5125-son qarorining 2-bandida:

ikkinchi xatboshidagi “2022-2023-yillarda” so‘zlari “2026-yilda” so‘zlari bilan almashtirilsin;

uchinchi xatboshidagi “davlat aktivlarini xususiylashtirishdan tushadigan daromadlar” so‘zlari “O‘zbekiston Respublikasi respublika budjeti mablag‘lari” so‘zlari bilan almashtirilsin.