Respublika aholisining turmush darajasini yanada oshirish va fuqarolarga ijtimoiy madadni kuchaytirish maqsadida:

1. 2005-yilning 1-mayidan boshlab budjet muassasalari va tashkilotlari xodimlarining ish haqi, barcha turdagi pensiyalar va ijtimoiy nafaqalar, oliy oʻquv yurtlari talabalarining, oʻrta maxsus, kasb-hunar oʻquv yurtlari oʻquvchilarining stipendiyalari 1,2 baravar oshirilsin.

2. 2005-yilning 1-mayidan boshlab Oʻzbekiston Respublikasi hududida eng kam:

ish haqi — oyiga 7835 soʻm;

yoshga doir pensiyalar — oyiga 15505 soʻm;

yagona tarif setkasi boʻyicha boshlangʻich (nolinchi) razryad — oyiga 7835 soʻm;

bolalikdan nogironlarga beriladigan nafaqa — oyiga 15505 soʻm;

zarur ish stajiga ega boʻlmagan keksa yoshdagi va mehnatga layoqatsiz fuqarolarga beriladigan nafaqa oyiga 9390 soʻm miqdorida belgilansin.

3. 2005-yilning 1-mayidan boshlab Oʻzbekiston Respublikasi Prezidentining 2003-yil 27-martdagi PF-3227-sonli Farmoni bilan uy-joy kommunal xizmatlarga haq toʻlash boʻyicha oylik kompensatsiya pul toʻlovlari joriy etilgan budjet tashkilotlari xodimlaridan ayrim toifalarining ish haqi oʻrta hisobda 1,35 baravar oshirilsin va mazkur kompensatsiya toʻlovlari bekor qilinsin, jumladan mazkur Farmonning 1-bandiga muvofiq 1,2 baravar oshirilsin, qolgan qismi esa — bekor qilinadigan kompensatsiya pul toʻlovlari hisobidan amalga oshirilsin.

4. 2005-yilning 1-mayidan boshlab uy-joy kommunal xizmatlar haqini toʻlash boʻyicha oylik kompensatsiya pul toʻlovlari eng kam ish haqiga nisbatan tabaqalashtirilgan miqdorlarda beriladigan shaxslar imtiyozli toifalarining yangilangan roʻyxati ilovaga* muvofiq tasdiqlansin.

5. Belgilab qoʻyilsinki, ish haqiga qoʻshiladigan ustama va qoʻshimcha haqlarning barcha turlari, shuningdek pensiyalar, ikki yoshgacha boʻlgan bolalarni tarbiyalayotgan onalarga, bolali oilalarga beriladigan nafaqalar hamda eng kam ish haqiga nisbatan belgilangan kompensatsiya va boshqa toʻlovlar 2005-yilning 1-mayidan boshlab mazkur Farmonda belgilangan eng kam ish haqi miqdoridan kelib chiqqan holda amalga oshiriladi.

6. Oʻzbekiston Respublikasi Mehnat va aholini ijtimoiy muhofaza qilish vazirligi vazirliklar, idoralar, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari, budjetdan moliyalanadigan tashkilot hamda muassasalar bilan birgalikda pensiyalar, nafaqalar, stipendiyalar, budjet muassasalari va tashkilotlari xodimlarining mansab maoshlari miqdorini mazkur Farmondan kelib chiqqan holda oʻz vaqtida qayta hisoblab chiqishni taʼminlasin.

7. Budjet muassasalari va tashkilotlari xodimlarining ish haqi, pensiyalar, nafaqa va stipendiyalarning oshirilishi bilan bogʻliq xarajatlar Respublika Davlat budjeti va Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi hisobidan amalga oshirilsin.

8. Xoʻjalik hisobidagi korxona va tashkilotlar 2005-yilning 1-mayidan boshlab mazkur Farmonda belgilangan eng kam ish haqiga muvofiq ishlab chiqarish samaradorligi oshirilgan va mehnat sarfi kamaytirilgan taqdirda ish haqi miqdorini oshirsin.

9. Quyidagilar:

Oʻzbekiston Respublikasi Prezidentining 2004-yil 1-iyuldagi PF-3450-son Farmoni;

Oʻzbekiston Respublikasi Prezidentining 2003-yil 27-martdagi PF-3227-son Farmoni ilovasi oʻz kuchini yoʻqotgan deb hisoblansin.

10. Oʻzbekiston Respublikasi Adliya vazirligi bir oy muddatda qonun hujjatlariga mazkur Farmondan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin.

11. Mazkur Farmon matbuotda eʼlon qilinsin.