Aholi salomatligini muhofaza qilish va boshqa sohalarda tovarlarni (ishlarni, xizmatlarni) yetkazib berishda uzluksizlikni taʼminlash, shuningdek, Oʻzbekiston Respublikasining “Davlat xaridlari toʻgʻrisida”gi Qonunining samarali ijrosini tashkil etish hamda davlat xaridlarini amalga oshirishni tartibga solishni takomillashtirish maqsadida Vazirlar Mahkamasi qaror qiladi:

1. Quyidagilar:

a) “Davlat xaridlari toʻgʻrisida”gi Qonunga muvofiq Oʻzbekiston Respublikasi Prezidentining farmonlari va qarorlarida, shuningdek, Oʻzbekiston Respublikasi Vazirlar Mahkamasining qarorlarida tovarning (ishning, xizmatning) davlat xaridini toʻgʻridan-toʻgʻri shartnoma asosida amalga oshirishga ruxsat berilsa, shartnoma va shartnomaga oid qoʻshimcha kelishuvlar Iqtisodiy taraqqiyot va kambagʻallikni qisqartirish vazirligi huzuridagi “Loyihalar va import kontraktlarini kompleks ekspertiza qilish markazi” davlat unitar korxonasida (keyingi oʻrinlarda — Kompleks ekspertiza qilish markazi) kompleks ekspertizadan oʻtkazilishi lozimligi, bundan qonunchilikda belgilangan hollar mustasno ekanligi nazarda tutilganligi;

b) Oʻzbekiston Respublikasi Prezidentining “Oʻzbekiston Respublikasining “Davlat xaridlari toʻgʻrisida”gi Qonunini amalga oshirish chora-tadbirlari toʻgʻrisida” 2018-yil 27-sentabrdagi PQ-3953-son qarori bilan tasdiqlangan Davlat buyurtmachilari tomonidan toʻgʻridan-toʻgʻri shartnomalar boʻyicha xarid qilinadigan tovarlar (ishlar, xizmatlar) roʻyxati tasdiqlanganligi, ushbu roʻyxat asosida davlat buyurtmachilari tovarlar (ishlar, xizmatlar) toʻgʻridan-toʻgʻri shartnomalar boʻyicha xarid qilishi mumkinligi belgilanganligi maʼlumot uchun qabul qilinsin.

2. Belgilansinki, Oʻzbekiston Respublikasi Prezidentining 2018-yil 27-sentabrdagi PQ-3953-son qarori bilan tasdiqlangan Davlat buyurtmachilari tomonidan toʻgʻridan-toʻgʻri shartnomalar boʻyicha xarid qilinadigan tovarlar (ishlar, xizmatlar) roʻyxatining:

2, 3, 4, 7, 11, 13, 14, 16, 18, 22, 26, 27-bandlari boʻyicha tegishligiga koʻra barcha davlat buyurtmachilari tomonidan;

shuningdek, ushbu qarorning 2-bandi ikkinchi xatboshisida nazarda tutilgan bandlarga qoʻshimcha ravishda 5-6, 9, 12, 17, 20-21, 23, 25, 29, 30, 34, 38-bandlari boʻyicha Oʻzbekiston Respublikasi Sogʻliqni saqlash vazirligi, Sanitariya epedimiologik osoyishtalik va jamoat salomatligi xizmati, Oʻzbekiston Respublikasi Prezidenti Administratsiyasi huzuridagi Tibbiyot bosh boshqarmasi va ularning tizimiga kiruvchi tashkilotlar, Davlat tibbiy sugʻurtasi jamgʻarmasi, shuningdek, davlat tibbiyot tashkilotlari tomonidan tovarning (ishning, xizmatning) davlat xaridini toʻgʻridan-toʻgʻri shartnoma asosida amalga oshirishda shartnoma va shartnomaga oid qoʻshimcha kelishuvlar Kompleks ekspertiza qilish markazida ekspertizadan oʻtkazilmaydi.

3. Oʻzbekiston Respublikasi Moliya vazirligi huzuridagi Davlat moliyaviy nazorati inspeksiyasi va hududiy boshqarmalari Davlat buyurtmachilari tomonidan Davlat budjetidan ajratilayotgan mablagʻlarning maqsadli ishlatilishi ustidan tizimli nazorat oʻrnatsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari — iqtisodiy taraqqiyot va kambagʻallikni qisqartirish vaziri J.A. Qoʻchqorov va Oʻzbekiston Respublikasi moliya vaziri T.A. Ishmetov zimmasiga yuklansin.