O‘zbekiston Respublikasi Vazirlar Mahkamasining 2001-yil 4-oktabrdagi 400-son qaroriga muvofiq “O‘rta maxsus, kasb-hunar ta’limi tizimida rahbar va o‘qituvchilarning bo‘sh lavozimlarini egallash uchun ularni tanlov asosida tanlab olish to‘g‘risida”gi Nizomni tasdiqlash haqida qaror:

1. “O‘rta maxsus, kasb-hunar ta’limi tizimida rahbar va o‘qituvchilarning bo‘sh lavozimlarini egallash uchun ularni tanlov asosida tanlab olish to‘g‘risida”gi Nizom ilovaga muvofiq tasdiqlansin.

2. Mazkur Nizom barcha o‘rta maxsus, kasb-hunar ta’limi hududiy boshqarmalari, akademik litsey va kasb-hunar kollejlariga yetkazilsin.

3. Mazkur Nizom O‘zbekiston Respublikasi Adliya vazirligi tomonidan ro‘yxatdan o‘tkazilgan kundan boshlab 10 kun o‘tgandan keyin kuchga kiradi.

Mazkur Nizom O‘zbekiston Respublikasi Vazirlar Mahkamasining 2001-yil 4-oktabrdagi 400-son “O‘rta maxsus, kasb-hunar ta’limi muassasalari uchun pedagog kadrlar tayyorlash tizimini takomillashtirish chora-tadbirlari to‘g‘risida”gi va 1998-yil 13-maydagi 204-son “O‘zbekiston Respublikasida o‘rta maxsus, kasb-hunar ta’limini tashkil etish chora-tadbirlari to‘g‘risida”gi qarorlari asosida ishlab chiqilgan bo‘lib, o‘rta maxsus, kasb-hunar ta’limi tizimidagi akademik litsey va kasb-hunar kollejlari (ta’lim muassasalari)dagi bo‘sh (vakant) rahbar, pedagog va muhandis-pedagog (rahbar va o‘qituvchi) lavozimlariga tanlov o‘tkazish tartibini belgilaydi.

Tanlov ta’lim muassasalariga zamonaviy talablarga javob beruvchi yuqori malakali, chuqur kasbiy bilimga, ijodiy va ilmiy potensialga, yuksak axloqiy va ma’naviy sifatlarga ega bo‘lgan kadrlarni saralab olish maqsadida o‘tkaziladi.

1. Ta’lim muassasalarining rahbar va o‘qituvchi lavozimlariga nomzodlar tanlov asosida qabul qilinadilar. Tanlov bo‘sh (vakant) lavozimlarga e’lon qilinadi.

2. Tanlov mazkur Nizom asosida tuziladigan ta’lim muassasalari rahbar va o‘qituvchi lavozimlariga tanlov o‘tkazish komissiyasi (Tanlov komissiyasi) tomonidan o‘tkaziladi.

3. Ta’lim muassasalariga soatbay haq to‘lash asosida ishga qabul qilinayotgan shaxslar direktor buyrug‘i bilan tanlovsiz rasmiylashtiriladi.

4. Akademik litseylarning:

direktori va direktor o‘rinbosarlari lavozimlariga o‘tkazilayotgan tanlovda (asosan umumta’lim fanlari yoki pedagogika fanlari bo‘yicha) ilmiy daraja (ilmiy unvon)ga ega bo‘lgan shaxslar hamda pedagogik soha bo‘yicha magistr yoki diplomli mutaxassislar ham ishtirok etishlari mumkin;

o‘qituvchi lavozimiga o‘tkazilayotgan tanlovda ilmiy daraja (ilmiy unvon)li yoki pedagogik mutaxassislik bo‘yicha magistr, diplomli mutaxassis va pedagogik yo‘nalish bo‘yicha bakalavrlar ishtirok etishlari mumkin.

5. Kasb-hunar kollejlarining:

direktori va direktor o‘rinbosarlari lavozimlariga o‘tkazilayotgan tanlovda ilmiy daraja (ilmiy unvon)li yoki pedagogik (kasbiy-ta’lim) yohud ta’lim muassasasining yo‘nalishi bo‘yicha magistr, diplomli mutaxassislar ishtirok etishlari mumkin;

umumta’lim fanlar bo‘yicha o‘qituvchi bo‘sh o‘rinlarini egallash uchun tanlovda ilmiy daraja (ilmiy unvon)li yoki pedagogik mutaxassislik bo‘yicha magistr, diplomli mutaxassis va bakalavrlar ishtirok etishlari mumkin;

maxsus fan va kasbiy ta’lim (amaliyot) o‘qituvchilari lavozimlariga o‘tkazilayotgan tanlovda ta’lim muassasasi yo‘nalishi va ixtisosliklariga mos keladigan ilmiy daraja (ilmiy unvon)li yoki magistr, diplomli mutaxassis va bakalavrlar ishtirok etadilar. Ayrim xalq hunarmandchiligi, sport va madaniyat yo‘nalishlaridagi kasb-hunar kollejlarining kasbiy ta’lim (amaliyot) o‘qituvchi lavozimlarini egallash uchun tanlovda ishlab chiqarish korxonalarining yuqori razryadli xodimlari va milliy hunarmandchilik ustalari, shuningdek sport ustasi yoki madaniyat sohasida unvonga ega o‘rta yoki o‘rta maxsus ma’lumotli shaxslar ham ishtirok etishlari mumkin.

6. Akademik litsey yoki kasb-hunar kollejiga aylantirilayotgan boshqa turdagi ta’lim muassasalarining rahbarlari va o‘qituvchilari tanlovda umumiy asosda ishtirok etadilar.

7. Direktor va direktor o‘rinbosarlari lavozimlarini egallash uchun o‘tkazilayotgan tanlovda nomzodlar o‘z-o‘zini tavsiya etish (arizasiga binoan) yoki bo‘ysunuvida ta’lim muassasasi bo‘lgan vazirlik yoki idora tomonidan tavsiya etish yo‘li bilan ishtirok etadilar;

o‘qituvchi lavozimini egallash uchun o‘tkazilayotgan tanlovda nomzodlar arizalariga binoan ishtirok etadilar.

8. Sud hukmiga ko‘ra pedagogik faoliyat bilan shug‘ullanishi man etilgan shaxslar tanlovga qo‘yilmaydilar.

9. Ta’lim muassasalari rahbarlari va o‘qituvchilarini tanlovdan o‘tkazish bo‘yicha taxminiy test savollari majmui va tanlov o‘tkazish grafigi O‘zbekiston Respublikasi Vazirlar Mahkamasi huzuridagi Davlat test markazi bilan kelishilgan holda O‘zbekiston Respublikasi Oliy va o‘rta maxsus ta’lim vazirligi O‘rta maxsus, kasb-hunar ta’limi markazi (Markaz) tomonidan ishlab chiqiladi.

10. Bo‘sh (vakant) rahbar lavozimlariga tanlov Markaz va uning hududiy boshqarmalari, o‘qituvchi lavozimlariga ta’lim muassasalari rahbariyati tomonidan markaziy yoki mahalliy matbuot orqali 2 oy oldin e’lon qilinadi.

11. Tanlov e’lon qilinganidan keyin 45 kun davomida:

direktor lavozimiga tanlovda ishtirok etishni hohlagan nomzodlarning arizalari yoki bo‘ysunuvida ta’lim muassasalari bo‘lgan vazirlik, idoralar, shuningdek ta’limni boshqaruvchi davlat organlarining tavsiyanomalari o‘rta maxsus, kasb-hunar ta’limi hududiy boshqarmalari orqali Markazga;

direktor o‘rinbosarlari lavozimlariga tanlovda ishtirok etishni xohlagan nomzodlarning arizalari yoki bo‘ysunuvida ta’lim muassasalari bo‘lgan vazirlik, idoralar, shuningdek ta’limni boshqaruvchi davlat organlarining tavsiyanomalari o‘rta maxsus, kasb-hunar ta’limi hududiy boshqarmasiga;

o‘qituvchi lavozimiga tanlovda ishtirok etishni xohlagan nomzodlarning arizalari ta’lim muassasasiga taqdim etiladi.

12. Ariza yoki tavsiyanomalarga quyidagi hujjatlar ilova qilinadi:

so‘rovnoma (kadrlarni hisobga olish varaqasi) va tarjimai hol;

ma’lumoti haqidagi hujjatning nusxasi;

ilmiy daraja va ilmiy unvonlari haqidagi hujjatlarning nusxalari (mavjud bo‘lsa);

ilmiy-uslubiy ishlar va ixtirolar ro‘yxati (mavjud bo‘lsa);

4 x 6 o‘lchamdagi 4 dona fotosurat.

Bundan tashqari:

direktor, direktor o‘rinbosari lavozimlariga nomzodning ta’lim muassasasiga bo‘lajak rahbarlik faoliyati bo‘yicha ixtiyoriy shaklda yozilgan rejasi (konsepsiya).

13. Direktor lavozimiga tanlov o‘tkazish uchun Markaz rahbarining buyrug‘i bilan Markaz huzurida;

direktor o‘rinbosari lavozimiga tanlov o‘tkazish uchun o‘rta maxsus, kasb-hunar ta’limi hududiy boshqarmalari boshliqlarining buyruqlari bilan ushbu boshqarmalar huzurida;

o‘qituvchi lavozimlariga tanlov o‘tkazish uchun ta’lim muassasalari direktorlarining buyruqlari bilan ta’lim muassasalari huzurida tanlov komissiyalari tuziladi.

14. Tanlov komissiyasi hujjatlarni o‘rganib nomzodlarni tanlovda qatnashishga tavsiya etadi.

15. Tanlov komissiyasi 7 kishidan iborat tuziladi va komissiya faoliyati uni a’zolarining kamida 5 nafari qatnashgan taqdirda vakolatli hisoblanadi. Markaz bo‘ysunuvida bo‘lmagan ta’lim muassasalarining rahbar va o‘qituvchilarini tanlovdan o‘tkazishda tanlov komissiyalarining tarkibiga tegishli vazirlik yoki idoralarning 3 nafar vakillari kiritiladi.

16. Tanlov komissiyasi ochiq ovoz berish asosida va ko‘pchilik ovoz bilan tanlov bo‘yicha yakuniy xulosa qabul qiladi. Ovozlar teng bo‘lgan taqdirda komissiya raisining ovozi hal qiluvchi hisoblanadi.

17. Tanlov natijalariga ko‘ra tanlangan direktorlar Bosh vazir o‘rinbosari O‘zbekiston Respublikasi Vazirlar Mahkamasining Ijtimoiy kompleksi rahbari tomonidan O‘zbekiston Respublikasi Prezidentining Tashkiliy-kadrlar ishlari bo‘yicha Davlat maslahatchisi xizmati bilan birgalikda ishlab chiqilgan va tasdiqlangan akademik litseylar va kasb-hunar kollejlarining tanlovdan o‘tgan direktorlarini tayinlash tartibiga muvofiq tayinlanadilar.

18. Direktor o‘rinbosarlari lavozimlariga komissiya tomonidan tanlab olingan nomzodlar bilan o‘rta maxsus, kasb-hunar ta’limi hududiy boshqarmasi yoki tegishlicha bo‘ysunuvida ta’lim muassasasi bo‘lgan vazirlik yoki idora belgilangan tartibda mehnat shartnomasini tuzadi va buyruq bilan rasmiylashtiradi.

19. O‘qituvchi lavozimiga tanlab olingan nomzodlar bilan ta’lim muassasasi direktori belgilangan tartibda mehnat shartnomasini tuzadi va buyruq bilan rasmiylashtiradi.

20. Tanlov komissiyasi xulosasidan norozi bo‘lgan shaxslar yuqori turuvchi organga yoki sudga shikoyat qilishlari mumkin.