Zamonaviy talablarga mos keladigan yuqori malakali kadrlarni tayyorlash jarayonini sifat jihatidan yangi bosqichga ko‘tarish, nodavlat ta’lim tashkilotlarini qo‘llab-quvvatlash va ta’lim jarayonida yoshlar ishtiroki uchun qo‘shimcha shart-sharoitlar yaratish maqsadida:

1. Nodavlat ta’lim tashkilotlarini davlat tomonidan qo‘llab-quvvatlashning quyidagi choralari joriy etilsin:

2021-yil 1-avgustdan 2024-yil 1-yanvarga qadar ta’lim jarayonida foydalaniladigan bino va inshootlar ijara to‘lovi xarajatlarining 50 foizigacha, biroq davlat ko‘chmas mulk obyektlaridan foydalanganlik uchun ijara to‘lovining qonunchilikda belgilangan minimal stavkasining 50 foiz miqdoridan ko‘p bo‘lmagan miqdorda davlat budjeti mablag‘lari hisobidan qoplab berish. Bunda, ushbu tartib Toshkent va Samarqand shaharlarida joylashgan va ta’lim jarayonida foydalaniladigan bino va inshootlarga tatbiq qilinmaydi.

Ta’lim sifatini nazorat qilish davlat inspeksiyasi (U. Tashkenbayev) Moliya vazirligi (T. Ishmetov), Davlat aktivlarini boshqarish agentligi (A. Ortiqov) bilan birgalikda bir oy muddatda nodavlat ta’lim tashkilotlariga ijara to‘lovi xarajatlarining bir qismini qoplab berish tartibi to‘g‘risidagi nizomni tasdiqlash uchun Vazirlar Mahkamasiga kiritsin. Bunda, mazkur to‘lovlarning yillik summasi har chorakda teng ulushlarda to‘lab berilishi nazarda tutilsin.

2. Belgilansinki, 2021-yil 1-iyuldan 2024-yil 1-yanvarga qadar vazirlik va idoralar tizimidagi kollej va texnikumlarning bino va inshootlarida (Toshkent va Samarqand shaharlaridan tashqari) faoliyatini amalga oshiradigan nodavlat ta’lim tashkilotlari:

ijara to‘lovidan ozod etiladi (saqlash va kommunal to‘lovlar bo‘yicha xarajatlar bundan mustasno);

ta’lim jarayoni natijasida olingan, o‘zlari ishlab chiqargan mahsulotlarni (ish va xizmatlarni) ta’lim tashkilotlari uchun nazarda tutilgan imtiyozlar (qo‘shilgan qiymat solig‘i va foyda solig‘i bo‘yicha) tatbiq etilgan holda realizatsiya qilish huquqiga ega.

3. Xalq ta’limi vazirligi (Sh. Shermatov), Oliy va o‘rta maxsus ta’lim vazirligi (A. Toshkulov), tizimida davlat umumiy o‘rta, professional va oliy ta’lim muassasalari mavjud bo‘lgan vazirlik va idoralar Davlat aktivlarini boshqarish agentligi (A. Ortiqov) bilan birgalikda darsdan bo‘sh vaqtlarda, shu jumladan yozgi ta’til vaqtida quyidagi davlat mulki obyektlarining nodavlat ta’lim tashkilotlariga ijaraga berilishini ta’minlasin:

maktabdan tashqari ta’lim kurslarini, shuningdek, kadrlarni tayyorlash va qayta tayyorlash kurslarini tashkil etish uchun davlat umumiy o‘rta va oliy ta’lim muassasalari bo‘sh maydonlarini;

aholining kompyuter savodxonligi bo‘yicha kurslar tashkil etish uchun qishloq joylarda joylashgan davlat umumiy o‘rta va professional ta’lim muassasalaridagi kompyuter sinflarini.

Bunda, mazkur bandning uchinchi xatboshisida belgilangan kurslarni tashkil etish uchun nodavlat ta’lim tashkilotlari tomonidan jalb qilingan o‘qituvchilarning ish haqi xarajatlarining bir qismi oyiga bazaviy hisoblash miqdorining 6 barobarigacha miqdorida tegishli mahalliy budjetlar hisobidan 2024-yil 1-yanvarga qadar kompensatsiya qilinadi.

4. O‘zbekiston Respublikasi Prezidentining 2021-yil 19-maydagi “O‘zbekiston Respublikasida xorijiy tillarni o‘rganishni ommalashtirish faoliyatini sifat jihatidan yangi bosqichga olib chiqish chora-tadbirlari to‘g‘risida”gi PQ-5117-son qarori bilan qishloq hududlarida xorijiy tillarni o‘qitish faoliyatini tashkil etish uchun tadbirkorlik subyektlariga 50 mln so‘mgacha mahalliy budjet mablag‘lari hisobidan bir martalik subsidiya ajratish amaliyoti yo‘lga qo‘yilganligi ma’lumot uchun qabul qilinsin.

Xorijiy tillarni o‘rganishni ommalashtirish agentligi (S. Obidov) Moliya vazirligi (J. Abruyev), Ta’lim sifatini nazorat qilish davlat inspeksiyasi (U. Tashkenbayev) bilan birgalikda bir oy muddatda hududlarda xorijiy tillarni o‘qitish faoliyatini tashkil etish uchun tadbirkorlik subyektlariga subsidiyalar ajratish tartibini Vazirlar Mahkamasiga kiritsin.

5. Belgilab qo‘yilsinki, 2021-yil 1-oktabrdan boshlab soliq to‘lovchi tomonidan tegishli xalqaro uyushmaga a’zo bo‘lish uchun a’zolik badallariga hamda qayta tayyorlash va malakasini oshirish uchun nodavlat ta’lim tashkilotlariga yo‘naltiriladigan o‘zining ish haqi va boshqa daromadlari summasi jismoniy shaxslardan olinadigan daromad solig‘idan ozod qilinadi.

Bunda, mazkur soliq imtiyozlari bazaviy hisoblash miqdorining 8 barobarigacha bo‘lgan summaga, shuningdek, o‘quv kursidan muvaffaqiyatli o‘tgan hamda tegishli xalqaro uyushma a’zosi sifatida a’zolik badallari to‘lovini va ko‘rsatilgan xizmatlar uchun to‘lovni tasdiqlovchi hujjat mavjud bo‘lganda qo‘llaniladi.

Moliya vazirligi (T. Ishmetov) ikki oy muddatda mazkur bandning birinchi xatboshisi bilan joriy qilinayotgan tartibni amaliyotda to‘liq qo‘llash uchun tegishli qonun loyihasini Vazirlar Mahkamasiga kiritsin.

6. Moliya vazirligi hamda Oliy va o‘rta maxsus ta’lim vazirligining Toshkent davlat iqtisodiyot universiteti huzurida Moliyaviy hisobot va auditning xalqaro standartlari bo‘yicha innovatsion malaka oshirish resurs markazini (keyingi o‘rinlarda — Moliyaviy hisobot bo‘yicha resurs markazi), shuningdek, Buxgalteriya hisobi va soliqlar bo‘yicha nodavlat malaka oshirish resurs markazini (keyingi o‘rinlarda — Buxgalteriya hisobi bo‘yicha resurs markazi) tashkil etish to‘g‘risidagi takliflari ma’qullansin hamda quyidagilar ularning asosiy vazifalari etib belgilansin:

soha mutaxassislari va professor-o‘qituvchilarning malakasini oshirish;

tegishli ta’lim yo‘nalishlari va magistratura mutaxassisliklari talabalari amaliyotini tashkil etish va tegishli sharoitlar yaratish;

soha mutaxassislari, professor-o‘qituvchilar va talabalarni tegishli darsliklar bilan ta’minlash;

o‘quv qo‘llanmalarini davlat tili va boshqa tillarga tarjima qilish;

masofaviy o‘qitishdan keng foydalanish, elektron kutubxona (elektron kitoblar, video darsliklar, taqdimotlar va testlar) tashkil etish va uning adabiyotlar fondini boyitish;

zarur ta’lim muhitini yaratish maqsadida axborot resurslaridan bepul foydalanishni ta’minlash.

7. Belgilab qo‘yilsinki:

Moliyaviy hisobot bo‘yicha resurs markazining Vasiylik kengashi tarkibi Moliya vazirligi, Toshkent davlat iqtisodiyot universiteti va Toshkent moliya instituti, buxgalterlar va auditorlarning respublika jamoat birlashmalari rahbar va xodimlaridan tashkil topadi;

Moliyaviy hisobot bo‘yicha resurs markazining Vasiylik kengashi oliy ta’lim muassasalari va nodavlat ta’lim tashkilotlarida pedagogik mahoratni oshirish hamda talabalar, amaliyotchi mutaxassislarda ilg‘or amaliy ko‘nikmalarni shakllantirish bo‘yicha ushbu markaz tomonidan amalga oshiriladigan chora-tadbirlar rejasini har yili tasdiqlaydi;

Buxgalteriya hisobi va soliqlar bo‘yicha resurs markazi Moliya vazirligi tomonidan nodavlat ta’lim tashkilotlari o‘rtasida o‘tkaziladigan tanlov natijalari bo‘yicha tashkil qilinadi.

Moliya vazirligi (T. Ishmetov):

Oliy va o‘rta maxsus ta’lim vazirligi (A. Toshkulov) bilan birgalikda Moliyaviy hisobot bo‘yicha resurs markazi va Buxgalteriya hisobi bo‘yicha resurs markazi faoliyatini 2021-2022-yillar davomida to‘liq yo‘lga qo‘ysin hamda ularni yuqori malakali kadrlar bilan to‘ldirish choralarini ko‘rsin;

2021-2022-yillar davomida Moliyaviy hisobot bo‘yicha resurs markazi hamda Buxgalteriya hisobi bo‘yicha resurs markaziga yuklatilgan vazifalarni amalga oshirish uchun 500 million so‘mdan mablag‘ ajratsin. Bunda, 2021-yil xarajatlari respublika budjetining qo‘shimcha daromadlari hisobidan qoplanadi.

8. Oliy va o‘rta maxsus ta’lim vazirligi Moliya vazirligi va Innovatsion rivojlanish vazirligi bilan birgalikda 2022-yil yakuniga qadar Toshkent davlat iqtisodiyot universiteti, Toshkent moliya instituti, Moliya vazirligi huzuridagi o‘quv markazi hamda Samarqand iqtisodiyot va servis institutini buxgalteriya hisobi va audit sohasidagi xalqaro tashkilotlarning akkreditatsiyasidan o‘tkazish choralarini ko‘rsin.

Belgilansinki:

buxgalteriya hisobi va audit sohasida o‘quv dasturlari va o‘qituvchilarni xalqaro tashkilotlarning akkreditatsiyasidan o‘tkazishga tayyorlash doirasida yuqoridagi oliy ta’lim muassasalarining har biriga 2022-yilda 100 million so‘mdan mablag‘ ajratiladi;

Toshkent davlat iqtisodiyot universiteti, Toshkent moliya instituti va Samarqand iqtisodiyot va servis instituti xalqaro akkreditatsiyadan o‘tgan taqdirda, ularning moddiy-texnik bazasini rivojlantirish uchun 2023-yilda 1 milliard so‘mdan bir martalik rag‘batlantirish mablag‘lari ajratiladi.

Moliya vazirligi (T. Ishmetov) ushbu bandda nazarda tutilgan xarajatlarni moliyalashtirish uchun tegishli mablag‘larni 2022 — 2023-yillarda Davlat budjeti parametrlarida nazarda tutsin.

9. Ta’lim sifatini nazorat qilish davlat inspeksiyasi manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritsin.

10. Mazkur qarorning ijrosini samarali tashkil etishga mas’ul va shaxsiy javobgar etib xalq ta’limi vaziri Sh. Shermatov, oliy va o‘rta maxsus ta’lim vaziri A. Toshkulov, moliya vaziri T. Ishmetov, Ta’lim sifatini nazorat qilish davlat inspeksiyasi boshlig‘i U. Tashkenbayev belgilansin.

Qaror ijrosini muhokama qilib borish, ijro uchun mas’ul idoralar faoliyatini muvofiqlashtirish va nazorat qilish Bosh vazir o‘rinbosari J.A. Qo‘chqorov zimmasiga yuklansin.

Amalga oshirilayotgan chora-tadbirlar natijadorligi yuzasidan 2022-yil 1-yanvargacha O‘zbekiston Respublikasi Prezidentiga axborot berilsin.