Qonunchilikka o‘zgartirish va qo‘shimchalar kiritilganligi, shuningdek, sud amaliyotida masalalar kelib chiqqanligi munosabati bilan, “Sudlar to‘g‘risida”gi Qonunning 17-moddasiga asosan, O‘zbekiston Respublikasi Oliy sudi Plenumi qaror qiladi:

O‘zbekiston Respublikasi Oliy sudi Plenumining quyidagi qarorlariga o‘zgartirish va qo‘shimchalar kiritilsin:

1. O‘zbekiston Respublikasi Oliy sudi Plenumining “Ma’muriy ishlar bo‘yicha sud xarajatlarini undirish amaliyoti haqida” 2019-yil 25-oktabrdagi 20-sonli qarori:

3-bandi 2-kichik bandining birinchi xatboshisi quyidagi tahrirda bayon qilinsin:

“beriladigan apellatsiya va kassatsiya shikoyatlaridan:”;

21, 22-bandlaridagi “, nazorat” so‘zi chiqarib tashlansin.

2. O‘zbekiston Respublikasi Oliy sudi Plenumining “Ma’muriy organlar va ular mansabdor shaxslarining qarorlari, harakatlari (harakatsizligi) ustidan shikoyat qilish to‘g‘risidagi ishlarni ko‘rib chiqish bo‘yicha sud amaliyoti haqida” 2019-yil 24-dekabrdagi 24-sonli qarori:

13-bandi:

birinchi xatboshisidagi “tuman (shahar)” degan so‘zlar “tumanlararo” degan so‘z bilan almashtirilsin;

quyidagi mazmundagi to‘rtinchi va beshinchi xatboshilar bilan to‘ldirilsin:

“Yirik investor bo‘lmagan investorning investitsiya faoliyati bilan bog‘liq da’vo arizalari (shikoyatlari) javobgar joylashgan erdagi tumanlararo ma’muriy sudga yoki Qoraqalpog‘iston Respublikasi ma’muriy sudiga, viloyatlar va Toshkent shahar ma’muriy sudlariga taqdim etilishi mumkin.

Yirik investorning investitsiya faoliyati bilan bog‘liq da’vo arizalari (shikoyatlari), shuningdek, tovar va moliya bozorlaridagi raqobat sohasidagi munosabatlardan kelib chiqadigan da’vo arizalari tumanlararo ma’muriy sudga yoki O‘zbekiston Respublikasi Oliy sudiga taqdim etilishi mumkin”;

to‘rtinchi xatboshisi tegishincha oltinchi xatboshi deb hisoblansin.

3. O‘zbekiston Respublikasi Oliy sudi Plenumining “Sudlar tomonidan ma’muriy huquqbuzarlik to‘g‘risidagi ishlarni ko‘rishni tartibga soluvchi qonunlarni qo‘llashning ayrim masalalari to‘g‘risida” 2018-yil 30-noyabrdagi 35-sonli qarori:

2-bandining birinchi xatboshisidagi “Ma’muriy sudga” degan so‘zlar “Jinoyat ishlari bo‘yicha sudga” degan so‘zlar bilan almashtirilsin;

30-bandidagi “ma’muriy ishlar bo‘yicha sudlov hay’ati” degan so‘zlar “jinoyat ishlari bo‘yicha sudlov hay’ati” degan so‘zlar bilan, “ma’muriy sudlar” degan so‘zlar “sudlar” degan so‘z bilan almashtirilsin.

4. O‘zbekiston Respublikasi Oliy sudi Plenumining “Fuqarolik holati dalolatnomalari yozuvlaridagi xatoliklarni belgilashni tartibga soluvchi qonunchilikning sudlar tomonidan qo‘llanishi haqida” 1992-yil 13-noyabrdagi 5-sonli qarori:

muqaddimasi quyidagi tahrirda bayon etilsin:

“O‘zbekiston Respublikasining protsessual qonunlariga o‘zgartirishlar kiritilganligi, shuningdek, sudlarda tushuntirish berilishi lozim bo‘lgan masalalar kelib chiqayotganligi munosabati bilan, O‘zbekiston Respublikasi Oliy sudi Plenumi qaror qiladi:”;

1-bandining birinchi xatboshisi quyidagi tahrirda bayon etilsin:

“1. Tushuntirilsinki, sudlar fuqarolik holati dalolatnomalari yozuvlaridagi xatoliklarni belgilash to‘g‘risidagi arizalarni, agar dastlabki yozuvlar saqlangan yoki tiklangan bo‘lsa, shuningdek, ularga farzandlikka olish, otalikni belgilash, familiyasi, ismi, otasining ismini o‘zgartirish, voyaga yetmagan bolaning familiyasini o‘zgartirish munosabati bilan ushbu yozuvlarga fuqarolik holati dalolatnomalarini yozish organlari tomonidan o‘zgartirishlar kiritilgan yoxud fuqarolik holati dalolatnomalari yozuvlarida jiddiy tafovutlar bo‘lsa, O‘zbekiston Respublikasi Fuqarolik kodeksining 38-moddasi, O‘zbekiston Respublikasi Oila kodeksining 228-moddasiga muvofiq, shuningdek, O‘zbekiston Respublikasi Vazirlar Mahkamasining 2016-yil 14-noyabrdagi 387-sonli qarori bilan tasdiqlangan Fuqarolik holati dalolatnomalarini qayd etish qoidalariga binoan ko‘radi”;

4-bandi chiqarib tashlansin.