Xorazm viloyati Xiva shahrining madaniy va turistik infratuzilmasini rivojlantirish orqali aholi va turistlar uchun qo‘shimcha qulay shart-sharoitlar yaratish, turistlar oqimini ko‘paytirishga va ularning hududda bo‘lish muddatlarini uzaytirishga imkon beruvchi xizmatlar sifatini va turizm yo‘nalishlarini takomillashtirish, shuningdek, investitsiya jozibadorligini oshirish maqsadida Vazirlar Mahkamasi qaror qiladi:

1. Xorazm viloyati hokimligining Xiva shahar hokimligida yuridik shaxs tashkil etmagan holda Xiva shahar infratuzilmasini rivojlantirish jamg‘armasini (keyingi o‘rinlarda — Jamg‘arma) tashkil etish to‘g‘risidagi taklifi ma’qullansin.

2. O‘zbekiston Respublikasi Moliya vazirligi 2021-yilda Jamg‘armaga boshlang‘ich resurs sifatida O‘zbekiston Respublikasi respublika budjetidan 5 mlrd so‘m miqdoridagi mablag‘ ajratilishini ta’minlasin.

Belgilansinki, Jamg‘armaga ajratiladigan ushbu mablag‘dan foydalanish O‘zbekiston Respublikasi Moliya vazirligi bilan kelishilgan holda Vazirlar Mahkamasi tomonidan tasdiqlanadigan yillik manzilli dasturga asosan amalga oshiriladi.

3. Jamg‘arma mablag‘larini shakllantirish manbalari etib quyidagilar hisoblansin:

mazkur qarorning 2-bandida ko‘rsatilgan O‘zbekiston Respublikasi respublika budjetidan ajratiladigan 5 mlrd so‘m miqdoridagi bir martalik moliyaviy yordam;

Xiva shahar budjetining qo‘shimcha manbalari;

bo‘sh turgan mablag‘larni tijorat banklarining depozitlariga joylashtirishdan olinadigan daromadlar;

xalqaro moliya institutlarining grantlari va kreditlari hamda donor tashkilotlar mablag‘lari;

jismoniy va yuridik shaxslar, shu jumladan, O‘zbekiston Respublikasi norezidentlari tomonidan amalga oshirilgan homiylik xayriyalari;

qonunchilik hujjatlari bilan taqiqlanmagan boshqa manbalar.

4. Quyidagilar Jamg‘arma mablag‘laridan moliyalashtiriladigan asosiy yo‘nalishlar etib belgilansin:

“Ichan-qal’a” va “Dishan-qal’a” hamda boshqa madaniy meros obyektlarining me’moriy qiyofasini restavratsiya qilish va ta’mirlash-tiklash;

obodonlashtirish va ko‘kalamzorlashtirish, tashqi yoritish tizimlarini, shuningdek, hududning sug‘orish tizimlarini yaxshilash va yer osti suvlari sathini pasaytirish;

ichimlik suvi, oqova suv, aloqa, elektr energiyasi va tabiiy gaz tarmoqlari hamda avtomobil yo‘llari va ijtimoiy soha obyektlarini qurish, rekonstruksiya qilish va ta’mirlash;

doimiy faoliyat yurituvchi kompleks ko‘ngilochar dasturlarni yaratish, turistlarga xizmat ko‘rsatish bo‘yicha qo‘shimcha infratuzilma obyektlarining holatini yaxshilash va moddiy-texnika bazasini mustahkamlash;

Xiva shahrining jamoat joylarida (maydonlar, xiyobonlar, bog‘lar va hokazo) kichik arxitektura shakllarini o‘rnatish;

zamonaviy talablarni hisobga olib, mavjud infratuzilmalarni takomillashtirish hamda yangi infratuzilma obyektlarini barpo etish.

5. Xiva shahar infratuzilmasini rivojlantirish jamg‘armasini shakllantirish va uning mablag‘laridan foydalanish tartibi to‘g‘risidagi nizom ilovaga muvofiq tasdiqlansin.

6. O‘zbekiston Respublikasi Moliya vazirligi Jamg‘arma mablag‘laridan maqsadli foydalanilishi ustidan nazorat qilinishini ta’minlasin.

7. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari A.J. Ramatov, O‘zbekiston Respublikasi Bosh vaziri o‘rinbosari — turizm va sport vaziri A.A. Abduhakimov va Xorazm viloyati hokimi F.U. Ermanov zimmasiga yuklansin.

1. Mazkur Nizom Xiva shahar infratuzilmasini rivojlantirish jamg‘armasini (keyingi o‘rinlarda — Jamg‘arma) shakllantirish va uning mablag‘laridan foydalanish tartibini belgilaydi.

2. Jamg‘arma Xiva shahar hokimligida yuridik shaxs tashkil etmagan holda mablag‘lardan keyinchalik Xiva shahrida joylashgan madaniy va turistik obyektlarning infratuzilmasini yaxshilash va zamonaviy talablarni hisobga olib, tasdiqlangan dasturlarga muvofiq mavjud infratuzilmalarni takomillashtirish hamda yangi infratuzilma obyektlarini barpo etishda foydalanish uchun ularning jamlanishini ta’minlash maqsadida tashkil etiladi.

3. Jamg‘arma mablag‘lari Jamg‘armaning belgilangan tartibda ochiladigan milliy va chet el valyutasidagi shaxsiy g‘azna hisobvaraqlarida jamlanadi.

4. Quyidagilar Jamg‘arma mablag‘larini shakllantirish manbalari hisoblanadi:

boshlang‘ich resurs sifatida 2021-yilda O‘zbekiston Respublikasi respublika budjetidan ajratiladigan 5 mlrd so‘m miqdoridagi bir martalik moliyaviy yordam;

Xiva shahar budjetining qo‘shimcha manbalari;

bo‘sh turgan mablag‘larni tijorat banklarining depozitlariga joylashtirishdan olinadigan daromadlar;

xalqaro moliya institutlarining grantlari va kreditlari hamda donor tashkilotlar mablag‘lari;

jismoniy va yuridik shaxslar, shu jumladan, O‘zbekiston Respublikasi norezidentlari tomonidan amalga oshirilgan homiylik xayriyalari;

qonunchilik hujjatlari bilan taqiqlanmagan boshqa manbalar.

5. Quyidagilar Jamg‘arma mablag‘laridan moliyalashtiriladigan asosiy yo‘nalishlar hisoblanadi:

“Ichan-qal’a” va “Dishan-qal’a” hamda boshqa madaniy meros obyektlarining me’moriy qiyofasini restavratsiya qilish va ta’mirlash-tiklash;

obodonlashtirish va ko‘kalamzorlashtirish, tashqi yoritish tizimlarini, shuningdek, hududning sug‘orish tizimlarini yaxshilash va yer osti suvlari sathini pasaytirish;

ichimlik suvi, oqova suv tarmoqlarini hamda avtomobil yo‘llarini qurish, rekonstruksiya qilish va ta’mirlash;

elektr energiyasi va tabiiy gaz tarmoqlarini qurish, rekonstruksiya qilish va ta’mirlash;

aloqa tarmoqlarini, ijtimoiy soha obyektlarini qurish, rekonstruksiya qilish va ta’mirlash;

doimiy faoliyat yurituvchi kompleks ko‘ngilochar dasturlarni yaratish, turistlarga xizmat ko‘rsatish bo‘yicha qo‘shimcha infratuzilma obyektlarining holatini yaxshilash va moddiy-texnika bazasini mustahkamlash hamda xalq deputatlari shahar Kengashi tomonidan tasdiqlangan shahar infratuzilmasi bilan bog‘liq masalalar;

Xiva shahrining jamoat joylarida (maydonlar, xiyobonlar, bog‘lar va hokazo) kichik arxitektura shakllarini o‘rnatish;

zamonaviy talablarni hisobga olib, tasdiqlangan dasturlarga muvofiq mavjud infratuzilmalarni takomillashtirish hamda yangi infratuzilma obyektlarini barpo etish bo‘yicha ishlarni moliyalashtirish.

6. Xiva shahar hokimligi Jamg‘arma mablag‘larini tasarruf etuvchi hisoblanadi.

7. Jamg‘arma mablag‘laridan:

mukofotlar, qo‘shimcha haq va ustamalar, rag‘batlantiruvchi to‘lovlar to‘lashga, shuningdek, qonunchilik hujjatlarida nazarda tutilgan qo‘shimcha moddiy rag‘batlantirishga;

qarz mablag‘lari jalb qilish, garov yoki majburiyatlar bajarilishini ta’minlashning boshqa usuli sifatida foydalanishga, Jamg‘arma mablag‘lari hisobidan boshqa yuridik va jismoniy shaxslar foydasiga moliyaviy kafolatlar va kafilliklar berishga, shuningdek, ssudalar va kreditlar berishga yo‘l qo‘yilmaydi.

8. Xiva shahar hokimligi tomonidan ushbu Nizomning 5-bandida belgilangan tadbirlarni O‘zbekiston Respublikasi Davlat budjetidan Jamg‘armaga ajratiladigan mablag‘lar hisobidan amalga oshirishni ta’minlash bo‘yicha yillik manzilli dastur (keyingi o‘rinlarda — Manzilli dastur) loyihasi ishlab chiqiladi.

Manzilli dastur loyihasi O‘zbekiston Respublikasi Moliya vazirligi bilan majburiy tartibda kelishiladi va tasdiqlash uchun Vazirlar Mahkamasiga kiritiladi.

9. O‘zbekiston Respublikasi Davlat budjetidan Jamg‘armaga ajratiladigan mablag‘lardan O‘zbekiston Respublikasi Moliya vazirligi bilan kelishilgan holda Vazirlar Mahkamasi tomonidan tasdiqlanadigan Manzilli dasturga muvofiq foydalaniladi.

10. Xiva shahar hokimligi Manzilli dasturda belgilangan xarajatlardan kelib chiqib Jamg‘armaning daromadlar va xarajatlar smetasi (keyingi o‘rinlarda — Smeta) loyihasini ishlab chiqadi va Moliya vazirligi bilan kelishgan holda tasdiqlaydi.

11. Jamg‘arma mablag‘laridan foydalanish (O‘zbekiston Respublikasi Davlat budjetidan Jamg‘armaga ajratiladigan mablag‘lardan tashqari) Xiva shahar hokimligi tomonidan tasdiqlanadigan daromadlar va xarajatlar smetasiga muvofiq amalga oshiriladi.

Bunda mablag‘lar O‘zbekiston Respublikasi Prezidenti va Hukumati hujjatlari bilan tasdiqlanadigan hamda Xiva shahar hokimligi tomonidan shakllantiriladigan va xalq deputatlari Xiva shahar kengashi tomonidan tasdiqlanadigan tegishli dasturlar asosida ajratiladi.

12. Smetaga qat’iy amal qilgan holda Manzilli dastur va boshqa tegishli dasturlar bajarilishini ta’minlash uchun zarur mablag‘larni ajratish to‘g‘risida Xiva shahar hokimining farmoyishi qabul qilinadi.

Bunda Xiva shahar hokimining farmoyishi asosida Xiva shahar hokimligi buxgalteri tomonidan to‘lov topshiriqnomalari rasmiylashtiriladi va pul mablag‘lari sarflanishi uchun Xiva shahar moliya boshqarmasiga taqdim etiladi.

13. Smetaning daromadlar qismi moliya yili boshiga Jamg‘arma mablag‘lari qoldig‘i hamda kelgusi yilda tushishi kutilayotgan mablag‘lar prognozi ko‘rsatkichlaridan tarkib topadi.

14. Jamg‘armaning joriy yilda sarflanmagan mablag‘lari olib qo‘yilmaydi va keyingi yilga o‘tkaziladi.

15. Jamg‘arma mablag‘lari harakati va ulardan foydalanilishi hisobi Xiva shahar hokimligi tomonidan alohida yuritiladi va yillik hisobotlar tuziladi.

Xiva shahar hokimi va hokimlik buxgalteri buxgalteriya hisobi to‘g‘ri yuritilishi, Jamg‘armaga mablag‘lar tushishi va ulardan foydalanilishi to‘g‘risidagi hisobotlarni tuzish va taqdim etish bo‘yicha belgilangan tartibda javobgar hisoblanadi.

16. Jamg‘arma mablag‘laridan to‘g‘ri foydalanilishi ustidan nazorat qilish O‘zbekiston Respublikasi Moliya vazirligi hamda xalq deputatlari shahar Kengashi tomonidan amalga oshiriladi.

17. Ushbu Nizom talablari buzilishida aybdor bo‘lgan shaxslar qonunchilik hujjatlarida belgilangan tartibda javob beradilar.