Xalq xoʻjaligining sellyulozaga boʻlgan ehtiyojini qondirish, uning importini kamaytirish va mahalliy xomashyo resurslaridan oqilona foydalanish maqsadida Vazirlar Mahkamasi qaror qiladi:

1. “Oʻzbekmebel” davlat-aksionerlik birlashmasining:

joriy yil oxirigacha sholi poxoli va bugʻdoy somonidan bir yilda 10 ming tonna sellyuloza ishlab chiqaruvchi quvvatlarni tashkil etish;

Angren “Sanoatkartonsavdo” ishlab chiqarish-savdo birlashmasining bir qancha sexlarini koʻp rangli serjilo karton qutilar ishlab chiqarishga moslashtirib qayta jihozlash toʻgʻrisidagi taklifiga rozilik berilsin.

2. “Oʻzbekmebel” davlat-aksionerlik birlashmasi, “Oʻzogʻirmashsanoat” instituti ikki oy muddatda Angren “Sanoatkartonsavdo” ishlab chiqarish-savdo birlashmasini uning quvvatlaridan sellyulozani qayta ishlashda foydalanish maqsadida rekonstruksiya qilishning texnik-iqtisodiy asoslashlarini, 1996-yil 1-yanvargacha esa loyiha-smeta hujjatlarni ishlab chiqsin.

“Sanoatkartonsavdo” ishlab chiqarish-savdo birlashmasini loyihalashtirish va rekonstruksiya qilish ishlarini, amalda bajarilgan ish hajmlari boʻyicha haq toʻlagan holda (loyiha-smeta hujjatlari tasdiqlangunga qadar), bir yoʻla amalga oshirishga istisno tariqasida ruxsat etilsin.

3. Pul-kredit siyosati boʻyicha komissiya (Hamidov) joriy yil oxirigacha “Sanoatkartonsavdo” ishlab chiqarish-savdo birlashmasida sellyuloza va undan mahsulot ishlab chiqarishga oid xarajatlarni mablagʻ bilan taʼminlash uchun “Oʻzbekmebel” davlat-aksionerlik birlashmasiga 210 mln soʻm miqdorida kredit ajratish masalasini koʻrib chiqsin. Kredit obyekt foydalanishga topshirilgan vaqtdan boshlab 5 yil mobaynida ilovaga* muvofiq toʻlanadi. Komissiya zarur materiallar, butlovchi qismlar va asbob-uskunalarni import boʻyicha xarid qilish uchun respublika valyuta birjasida 130 mln soʻmni “Oʻzbekmebel” davlat-aksionerlik birlashmasiga koʻrsatib oʻtilgan mablagʻlar hisobidan erkin muomaladagi valyutaga almashtirishni nazarda tutsin.

4. Amalga oshirilayotgan loyihaning davlat ahamiyatiga ega ekanligini hisobga olib Angren “Sanoatkartonsavdo” ishlab chiqarish-savdo birlashmasi tomonidan ajratilgan kreditni toʻlashga yoʻnaltiradigan foyda, shuningdek “Tarx” ilmiy-ishlab chiqarish birlashmasining mazkur loyihada nazarda tutilgan asbob-uskunalarni ishlab chiqarishga investitsiya qilinadigan foydasi istisno tariqasida 5 yil muddatga (1996 — 2000-yillar) soliqdan ozod qilinsin.

5. “Oʻzbekmebel” birlashmasi Qoraqalpogʻiston Respublikasi Vazirlar Kengashi, sholi ekuvchi viloyatlar hokimliklari va “Oʻzogʻirmashsanoat” instituti bilan birgalikda ikki oy muddatda sholi poxolidan bir yilda 20 — 25 ming tonna sellyuloza ishlab chiqarish quvvatiga ega boʻlgan zavodni joylashtirish masalasini ishlab chiqsin.

6. “Oʻzistiqbolstat” davlat qoʻmitasi tegishli viloyatlar hokimliklari bilan birgalikda 1996-yildan boshlab balansda Angren “Sanoatkartonsavdo” ishlab chiqarish-savdo birlashmasida sellyuloza ishlab chiqarish uchun zarur boʻlgan miqdorda sholi poxoli va bugʻdoy somonidan foydalanilishini nazarda tutsin.

7. Oʻzbekiston Respublikasi Davlat tabiatni muhofaza qilish qoʻmitasi sholi poxoli va bugʻdoy somonidan sellyuloza olishning yangi texnologiyasini belgilangan tartibda davlat ekologiya ekspertizasidan oʻtkazsin.

8. Mazkur qarorning bajarilishini nazorat qilish Bosh vazirning oʻrinbosarlari M.3. Usmonov va R.R. Yunusov zimmasiga yuklansin.