Vazirlar Mahkamasi qaror qiladi:

1. O‘zbekiston Respublikasi kichik hajmli kemalar bo‘yicha davlat inspeksiyasi O‘zbekiston Respublikasi Davlat jismoniy tarbiya va sport qo‘mitasi huzuridagi Respublika ko‘p ixtisosli tez harakat qilish markazidan O‘zbekiston Respublikasi Davlat tabiatni muhofaza qilish qo‘mitasi bo‘ysunishiga berilsin.

2. O‘zbekiston Respublikasi kichik hajmli kemalar bo‘yicha davlat inspeksiyasi mustaqil inspeksiya huquqi bilan O‘zbekiston Respublikasi Davlat tabiatni muhofaza qilish qo‘mitasi huzuridagi Respublika hayvonot va o‘simlik dunyosini muhofaza qilish va ulardan oqilona foydalanish davlat inspeksiyasi (Davlat biologiya nazorati) tarkibiga kiritilsin.

3. O‘zbekiston Respublikasi kichik hajmli kemalar bo‘yicha davlat inspeksiyasi to‘g‘risidagi ilova qilinayotgan nizom tasdiqlansin.

4. O‘zbekiston SSR Ministrlar Sovetining 1984-yil 8-iyundagi 303-son (O‘zSSR QT, № 6, 28-modda) va 1990-yil apreldagi 172-son qarorlari o‘z kuchini yo‘qotgan deb hisoblansin.

1 O‘zbekiston Respublikasi kichik hajmli kemalar bo‘yicha davlat inspeksiyasi mustaqil inspeksiyasi bilan O‘zbekiston Respublikasi Davlat tabiatni muhofaza qilish qo‘mitasi huzuridagi Respublika hayvonot va o‘simlik dunyosini muhofaza qilish va ulardan oqilona foydalanish davlat inspeksiyasi tarkibiga kiradi.

2. Suzishning xavfsizligini ta’minlash, huquq-targ‘ibotni mustahkamlash va atrof tabiiy muhitni muhofaza qilish maqsadida O‘zbekiston Respublikasi va Qoraqalpog‘iston Respublikasining barcha suv akvatoriyalarida suzish vositalaridan hamda ularning to‘xtash bazalaridan to‘g‘ri foydalanilishini nazorat qilish O‘zbekiston Respublikasi kichik hajmli kemalar bo‘yicha davlat inspeksiyasining bosh vazifasi hisoblanadi.

3. O‘zbekiston Respublikasi kichik hajmli kemalar bo‘yicha davlat inspeksiyasi o‘z vazifalarini dvigatelning quvvati va yuk ko‘tarishidan qat’i nazar, davlat, jamoa, xususiy, chet el korxonalari, muassasalari, tashkilotlariga (maxsus topshiriqli harbiy suzish vositalaridan tashqari), shuningdek, fuqarolarga tegishli bo‘lgan barcha o‘zi yurar va tirkaladigan kemalar (zemsnaryadlar, katyerlar, motorli, sport, eshkakli, dam beriladigan qayiqlar) ga nisbatan amalga oshiradi.

4. O‘zbekiston Respublikasi kichik hajmli kemalar bo‘yicha davlat inspeksiyasi va uning mansabdor shaxslari o‘z faoliyatlaridagi O‘zbekiston Respublikasi qonunchiligining o‘zlariga tegishli barcha aktlariga, shuningdek, Qoraqalpog‘iston Respublikasi hududida Qoraqalpog‘iston Respublikasi qonunchiligiga amal qiladilar hamda o‘z ishlarida faoliyati suv havzalarida huquq-tartibotni ta’minlash va atrof tabiiy muhitni muhofaza qilish bilan bog‘liq bo‘lgan davlat va jamoat tashkilotlari bilan o‘zaro hamkorlik qiladilar.

5. O‘zbekiston Respublikasi kichik hajmli kemalar bo‘yicha davlat inspeksiyasi:

O‘zbekiston Respublikasi kichik hajmli kemalar bo‘yicha davlat inspeksiyasi boshqarmasi;

Qoraqalpog‘iston Respublikasi va viloyatlarning kichik hajmli kemalar bo‘yicha davlat inspeksiyalari;

g‘avvos-texnika nazorati bo‘limlari, uchastkalari, guruhlari, O‘quv-uslubiyat markazi, ro‘yxatga olish va imtihon komissiyalari;

patrul xizmati, texnik ko‘riklar o‘tkazish uchun diagnostika stansiyalari va inspeksiyaga yuklatilgan vazifalarni amalga oshirish uchun zarur bo‘lgan boshqa bo‘linmalardan iborat tarkibda tashkil etilgan.

O‘zbekiston Respublikasi kichik hajmli kemalar bo‘yicha davlat inspeksiyasi huzurida yuridik va jismoniy shaxslarga har xil xizmatlar ko‘rsatish bo‘yicha korxonalar va tashkilotlar tashkil etiladi.

6. O‘zbekiston Respublikasi kichik hajmli kemalar bo‘yicha davlat inspeksiyasi o‘ziga yuklatilgan vazifalarga muvofiq:

korxonalar, muassasalar, tashkilotlar va fuqarolar tomonidan suzish vositalaridan va ularning to‘xtash bazalaridan foydalanishning belgilangan qoidalariga rioya qilinishi ustidan davlat nazoratini amalga oshiradi, bu qoidalarni hamda suzishning xavfsizligiga va atrof tabiiy muhit muhofazasiga oid boshqa normativlar va talablarning buzilishini aniqlaydi va ularga barham beradi.

tasniflaydi va texnika nazoratini amalga oshiradi, boshlang‘ich va yillik tekshiruvlar va maxsus ko‘riklar o‘tkazadi;

kemaga bog‘liq ravishda yo‘lovchilar soni, muayyan quvvat va dvigatellar soni, paruslarning yo‘l qo‘yilishi mumkin bo‘lgan maydoni, to‘lqinning balandligi, botish, suv usti borti, qutqarish va yong‘inga qarshi vositalar, belgi berish chiroqlari, navigatsiya va boshqa asbob-uskunalar bilan jihozlanganlik bo‘yicha majburiy shartlar, me’yorlar va texnik talablarni belgilaydi.

ro‘yxatdan o‘tkazadi va hisob-kitobni yuritadi, bort nomyerlari beradi hamda kema egalari bilan kemalarning nomlarini kelishadi;

kema chiptalari beradi va ularning hisobotini yuritadi;

kema haydovchilari tayyorlash kurslari va maktablarini ro‘yxatdan o‘tkazadi, imtihonlar oladi va attestatsiya qiladi, kemalarni boshqarish huquqini beruvchi guvohnoma beradi;

suzish vositalarini, bazalarni va suzish vositalaridan foydalanishni ta’minlovchi boshqa me’yoriy-texnik hujjatlarni texnikaviy boshlang‘ich va yillik tekshiruvlar va maxsus ko‘riklardan o‘tkazish hajmini belgilovchi talablar va normativlarni ishlab chiqadi va tasdiqlaydi;

bu talablar va normativlarga barcha korxonalar, muassasalar tashkilotlar va fuqarolar rioya etishlari ustidan nazoratni amalga oshiradi;

suzish vositalari va ularning bazalari bilan bog‘liq avariyalar va hodisalarni belgilangan tartibda hisobga olishni yuritadi, ularning yuz berishi sabablari va shart-sharoitlarini tahlil qiladi, bu sabablar va shart-sharoitlarni bartaraf etish chora-tadbirlarini ko‘radi;

suzish xavfsizligi darajasini oshirish bo‘yicha takliflar ishlab chiqadi, ularni belgilangan tartibda davlat organlariga kiritadi va ro‘yobga chiqishiga ko‘maklashadi;

suzish vositalari, ularning to‘xtash bazalari, gidrologiya inshootlari, kemalar qatnaydigan yo‘llarning texnik holati hamda cho‘kkan kemalarni ko‘tarib olish ishlarini olib boradi;

suzish vositalari avariyaga uchrashining oldini olish ishlarini nazorat qiladi hamda o‘g‘rincha ovlashga, ovchilik va baliq, ovlash qoidalarini boshqa buzishlarga qarshi kurashda, shuningdek, atrof tabiiy muhitni muhofaza qilishda ishtirok etadi;

suzish vositalaridan foydalanishda ularning xavfsizligini ta’minlashga tegishli bo‘lgan texnik reglamentlar yoki standartlar, suzish vositalari va ularning dvigatellarining loyihalari va konstruksiyalari bo‘yicha xulosalar beradi, yangi kema texnikasi namunasini sinab ko‘rish va uni qabul qilib olishda qatnashadi, suzish bazalari va ularning bazalaridan foydalanish shartlarini hamda ular konstruksiyasidagi kamchiliklarni o‘rganadi, kemalar, asbob-uskunalar va mexanizmlarning mustahkamligini oshirishga oid takliflarni ishlab chiqadi;

Qonunchilik va suzish xavfsizligini tushuntirish va targ‘ib qilish, suzish vositalaridan to‘g‘ri foydalanish va atrof tabiiy muhitni muhofaza qilish ishlarini tashkil etadi, ana shu maqsadlarda ommaviy axborot vositalaridan foydalanadi;

Kemalar va ularning bazalaridan foydalanganlik uchun undiriladigan qonunchilikda belgilangan yig‘imlarning, shuningdek, suv havzalarida va atrof tabiiy muhitni muhofaza qilish borasida huquq-tartibot buzilganligi uchun suzish vositalari egalari tomonidan jarimalar to‘lanishini nazorat qiladi;

suzish vositalarini, ularning to‘xtash joylarini, motorlarni tuzatish-qurilish ishlari bilan shug‘ullanadi, shuningdek, tashkilotlar va aholiga o‘z tarkibiy bo‘linmalari orqali boshqa xizmatlar ko‘rsatadi.

7. O‘zbekiston Respublikasi kichik hajmli kemalar bo‘yicha davlat inspeksiyasi o‘ziga yuklatilgan vazifalar va majburiyatlarni amalga oshirish maqsadida quyidagi huquqlarga ega bo‘ladi:

suzish vositalaridan dvigatelning quvvati va soniga, paruslar maydoniga, harakat tezligiga ko‘ra foydalanish rejalarida mahalliy sharoitlarni hisobga olgan holda qo‘shimcha cheklashlar belgilash;

holati ishlatish xavfsizligiga va atrof tabiiy muhit muhofazasiga xavf soluvchi kichik kemalardan, ularning bazalaridan, gidrologiya inshootlaridan, kemalar qatnaydigan yo‘llardan foydalanishni taqiqlash;

kema haydovchilarning suzish vositalaridan foydalanish qoidalarini bilishlarini tekshirish, shuningdek, kemalarni boshqarishga yaroqli ekanliklarini aniqlash uchun ularni tibbiy tekshiruvga yo‘llash;

tashkilotlarga va aholiga ko‘rsatilgan barcha xizmatlar uchun preyskurantga muvofiq tegishli haq undirish;

suzish vositalari va ularning bazalaridan foydalanish qoidalarini buzishda aybdor bo‘lgan shaxslarni ma’muriy javobgarlikka tortish.

8. O‘zbekiston Respublikasi kichik kemalar bo‘yicha davlat inspeksiyasining mansabdor shaxslari (davlat inspektorlari, shtatsiz inspektorlar, inspeksiya boshlig‘i va uning o‘rinbosari, Qoraqalpog‘iston Respublikasi va viloyatlar inspeksiyalarining boshliqlari) quyidagi huquqlarga ega bo‘ladilar:

mast holatdagi, boshqarish huquqini beruvchi guvohnomaga ega bo‘lmagan, kemani haydash qoidalarini qo‘pol ravishda buzgan shaxslarni kemani boshqarishdan chetlatish, zarurat bo‘lganda musodara qilingan kemalar va dvigatellarni kema egalari hisobidan tayanch punktlari bazalariga topshirish;

avariyaga yo‘l qo‘ygan yoki kemalardan foydalanish qoidalarini buzgan kema egasi yoki kema haydovchisini vaziyatni aniqlash va yuz bergan voqeani tekshirish uchun voqea yuz bergan joyga yoki inspeksiyaga chaqirish;

ro‘yxatdan o‘tish, hisobga olish, texnika nazorati qoidalarini, shuningdek, suzish vositalaridan va ularning to‘xtash bazalaridan foydalanish qoidalarini buzgan shaxslarga belgilangan tartibda bayonnomalar tuzish;

kechiktirish mumkin bo‘lmagan hollarda qoidani buzishlarning oldini olish va qoidani buzuvchini ushlash, aziyat chekkanlarni eng yaqin davolash muassasalariga keltirish uchun tashkilotlarga va fuqarolarga tegishli bo‘lgan kemalar, transportdan, telefonlardan foydalanish, shuningdek, suzish vositalari va ularning to‘xtash bazalariga , suv o‘rtasida joylashgan dam olish tegralariga hamda tasarrufida suv akvatoriyasi bo‘lgan tashkilotlarga kirish.

9. O‘zbekiston Respublikasi kichik hajmli kemalar bo‘yicha davlat inspeksiyasi boshlig‘i:

inspeksiyaning butun faoliyatiga rahbarlik qiladi, joylardagi davlat inspeksiyalari to‘g‘risidagi nizom, tuzilma, shtat jadvali o‘z aylanma mablag‘lari smetasini, ko‘rsatiladigan xizmatlarning baholari preyskurantini, maxsus kiyim-bosh berish va uni kiyib yurish tartibi to‘g‘risidagi nizomni, suzish vositalaridan va ularning to‘xtash joylaridan foydalanish, ro‘yxatdan o‘tkazish va texnika nazorati qoidalarini, kema haydovchilarini attestatsiya qilishni tasdiqlaydi ;

yil choraklari balanslari va hisobotlar asosida budjet bilan o‘zaro munosabatlarni o‘zgartirmagan holda o‘z aylanma mablag‘larining ortiqchasini taqsimlaydi;

Davlat inspeksiyasining davlat inspektorlari toifasiga tegishli bo‘lgan lavozimlari ro‘yxatini belgilaydi;

shtatsiz inspektorlar to‘g‘risidagi nizomni va ularning tarkibini ko‘rib chiqadi va tasdiqlaydi;

doimiy ishlovchi malaka va imtihon komissiyalarining ish tartibini belgilaydi.

10. O‘zbekiston Respublikasi kichik hajmli kichik kemalar bo‘yicha davlat inspeksiyasi yuridik shaxs hisoblanadi va o‘zini o‘zi qoplash asoslarida faoliyat ko‘rsatadi.

Davlat inspeksiyasining daromadlari o‘zining huquqiy majburiyatlariga va unga yuklatilgan vazifalarga muvofiq bajarilgan ishlardan hamda tashkilotlarga va aholiga ko‘rsatilgan xizmatlardan tushgan tushumlardan iborat bo‘ladi. Ularning 10 foizi ishlab chiqarishni rivojlantirish uchun O‘zbekiston Respublikasi Davlat tabiatni muhofaza qilish qo‘mitasi huzuridagi Respublika hayvonot va o‘simlik dunyosini muhofaza qilish va ulardan oqilona foydalanish davlat inspeksiyasiga ajratiladi.

11. O‘zbekiston Respublikasi kichik hajmli kemalar bo‘yicha davlat inspeksiyasi o‘z nomi O‘zbekiston Respublikasining davlat tilida yozilgan gerbli muhrga, vimpel va emblemaga, maxsus kiyim-bosh va tabel qurolga ega bo‘ladi.

O‘zbekiston Respublikasi kichik hajmli kemalar bo‘yicha davlat inspeksiyasini mablag‘ bilan ta’minlash va uning moddiy-texnika ta’minoti amaldagi qonunchilikka muvofiq amalga oshiriladi.