Toʻqimachilik sanoatini rivojlantirishda yagona texnika siyosatini olib borish, paxta tolasidan samarali foydalanish, eksport imkoniyatlarini koʻpaytirish maqsadida Vazirlar Mahkamasi qaror qiladi:

1. Andijon, Qashqadaryo, Fargʻona va Xorazm viloyatlari hokimliklarining, Turkiyaning “Yazeks” korporatsiyasi texnikaviy koʻmagida qurilayotgan toʻqimachilik majmuilari muassislari va aksionyerlarining (ilovaga muvofiq) toʻqimachilik majmuilarining yuridik shaxs maqomini saqlab qolgan holda belgilangan tartibda “Oʻzbekyengilsanoat” davlat uyushmasi va “Mahalliy sanoat” davlat korporatsiyasi tarkibiga kirishlari haqidagi takliflari qabul qilinsin.

Samarqand viloyatida ustav jamgʻarmasida Turkiya tomonining ulushi 51 foiz boʻlgan paxta tolasini qayta ishlovchi “Samjinteks” Oʻzbekiston-Turkiya qoʻshma korxonasi qurilishi tugallanayotganligi maʼlumot uchun qabul qilinsin.

2. Andijon, Qashqadaryo, Fargʻona va Xorazm viloyatlari hokimliklari (Obidov, Xidirov, Islomov, Jumaniyozov) “Oʻzbekyengilsanoat” davlat uyushmasi (Ismoilov) va “Mahalliy sanoat” davlat korporatsiyasi (Qozoqxonov) bilan birgalikda ilovada sanab oʻtilgan toʻqimachilik majmuilarining 1995-1996-yillarda ishga tushirilishini taʼminlasinlar, buning uchun:

bajarilgan qurilish ishlari, yetkazib berilgan texnologik asbob-uskunalar va xoʻjaliklardan olingan paxta tolasi uchun tegishli xoʻjalik tashkilotlari va boshqa tashkilotlar oʻrtasidagi oʻzaro hisob-kitoblarni bir oy muddatda amalga oshirsinlar;

toʻqimachilik majmuilari aksionerlik jamiyatlari muassislari va aʼzolarining hamda viloyatlarning boshqa xoʻjalik tuzilmalarining mablagʻlarini (ularga aksiyalar sotish ham shu jumlaga kiradi) qidirib topsinlar va obyektlar qurilishi tugallanishiga yoʻnaltirsinlar;

“Anteks”, “Quva” va “Qashteks” ochiq turdagi aksionerlik jamiyatlarining paxta tolasiga boʻlgan ehtiyojini aniqlasinlar va xoʻjaliklar ixtiyorida qoladigan hajmlar hisobiga 1994-1995-yillar hosilidan ularga belgilangan tartibda paxta tolasi ajratsinlar. Ajratilgan paxta tolasini sotish, sotishdan olingan mablagʻlarning 30 foizi majburiy ravishda Markaziy bankka sotilgan, qolgan qismidan tegishli toʻqimachilik majmuilarini butlash uchun yetishmayotgan texnologik asbob-uskunalarni sotib olishda foydalanilgan holda, Oʻzbekiston Respublikasi Tashqi iqtisodiy aloqalar vazirligi orqali amalga oshirilsin.

3. Pul-kredit siyosati boʻyicha respublika komissiyasi Vazirlar Mahkamasining toʻqimachilik majmuilari qurilishini tugallashga yetishmayotgan mablagʻlarni qoplash uchun kredit resurslarini belgilangan tartibda qidirib topsin va zarur boʻlsa “Oʻzbekyengilsanoat” davlat uyushmasiga va “Mahalliy sanoat” davlat korporatsiyasiga ajratsin.

4. “Oʻzbekyengilsanoat” davlat uyushmasi, “Mahalliy sanoat” davlat korporatsiyasi ularga berilgan vakolatlarga muvofiq yagona texnika siyosati olib borish, marketing, jahon bozorida raqobatga bardoshli mahsulotlar ishlab chiqarishni tashkil etish, mutaxassislar tayyorlash va ishlab chiqarishni ular bilan taʼminlash boʻyicha toʻqimachilik majmuilarining faoliyatini muvofiqlashtirsinlar.

5. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari I.H. Joʻrabekov zimmasiga yuklansin.

“Qashteks” ochiq turdagi aksionerlik jamiyati (Qashqadaryo viloyati)

“Gurlan” ochiq turdagi aksionerlik jamiyati (Xorazm viloyati)

“Quva” ochiq turdagi aksionerlik jamiyati (Fargʻona viloyati)

“Anteks” ochiq turdagi aksionerlik jamiyati (Andijon viloyati)