O‘zbek — Turkman xalqlarining qadimiy tarixi va madaniyati, mushtarak maqsadlari, hamjihatlikdagi taraqqiyotini yorqin ifodalaydigan Xorazm viloyatidagi “O‘zbek — Turkman do‘stlik uyi” va “Ulli hovli” majmuasini yuqori darajada saqlash va samarali boshqarish, majmuaning sayyohlik salohiyatini oshirish va bu erda qardosh xalqning o‘zaro uyg‘unlikdagi etnografik madaniyatini targ‘ib etish uchun zarur shart-sharoitlar yaratish maqsadida Vazirlar Mahkamasi qaror qiladi:

1. O‘zbekiston Respublikasi Madaniyat vazirligi, Xorazm viloyati hokimligi va Turizmni rivojlantirish davlat qo‘mitasining:

O‘zbekiston Respublikasi Madaniyat vazirligining Xorazm viloyati Madaniyat boshqarmasi tarkibida davlat muassasasi shaklidagi “O‘zbek — Turkman do‘stlik uyi” va “Ulli hovli” majmuasi” direksiyasini (keyingi o‘rinlarda — Direksiya) tashkil etish;

Urganch tumani G‘oybu qishlog‘i “Turkmanlar” mahallasi hududidagi “O‘zbek — Turkman do‘stlik uyi” va “Ulli hovli” majmuasida joylashgan bino va inshootlarni Direksiyaga operativ boshqaruv huquqi asosida tekin berish to‘g‘risidagi takliflari ma’qullansin.

O‘zbekiston Respublikasi Madaniyat vazirligi va Xorazm viloyati hokimligi bir oy muddatda mazkur qarorning 1-bandi uchinchi xatboshisida ko‘rsatilgan bino va inshootlarni tegishli hududi bilan birgalikda topshirish, Direksiya esa qabul qilib olish choralarini ko‘rsin.

2. Quyidagilar Direksiyaning asosiy vazifalari etib belgilansin:

majmuaning ilmiy konsepsiyasini ishlab chiqish va uni amalga oshirish, majmuada o‘zbek — turkman xalqlarining do‘stligi mavzusini, uning dastlabki ko‘rinishi va o‘sha davr muhitini aks ettiruvchi doimiy ekspozitsiya — ko‘rgazma yaratish;

majmuadagi obyektlarda madaniy-ma’rifiy, etnografik tadbirlar, ilmiy anjumanlar, festivallar, tanlovlar, yarmarkalar, sayillar tashkil etish;

majmuada qardosh xalqlar haqida batafsil ma’lumotlar bazasini yaratish va uni muntazam yangilab borish, unga oid kitob va to‘plamlar, video va foto hujjatlar kabi boshqa manbalarni izlash, to‘plash, o‘rganish va targ‘ib qilish hamda axborot-resurs markazi faoliyatini samarali yo‘lga qo‘yish;

majmuaning tarixiy ko‘rinishini saqlagan hududda zarur infratuzilmani shakllantirish, xizmat turini kengaytirish va sifatini oshirish, bu erda dam olish va mazmunli hordiq chiqarish uchun qulay shart-sharoitlar yaratish, majmuani madaniy etnografik turistik markazga aylantirish.

3. O‘zbekiston Respublikasi Madaniyat vazirligi bir oy muddatda:

Direksiyaning tuzilmasi va ustavini ishlab chiqsin hamda belgilangan tartibda tasdiqlasin;

Direksiyaning shtatlar jadvalini ishlab chiqish va tasdiqlash, malakali xodimlar bilan ta’minlash va uning samarali faoliyat olib borishi bilan bog‘liq boshqa zarur chora-tadbirlarni amalga oshirsin.

Belgilab qo‘yilsinki, Direksiya xodimlar shtat birliklarini belgilash tartibi hamda mehnatga haq to‘lash va rag‘batlantirish shartlari bo‘yicha O‘zbekiston Respublikasi Madaniyat vazirligi tizimidagi ko‘rgazma va galereyalarga tenglashtiriladi.

4. Quyidagilar Direksiyani moliyalashtirish manbalari etib belgilansin:

Xorazm viloyati mahalliy budjeti mablag‘lari;

Direksiyaning asosiy faoliyatidan tushadigan mablag‘lar;

jismoniy va yuridik shaxslarning homiylik xayriyalari;

qonunchilik hujjatlari bilan taqiqlanmagan boshqa manbalar.

5. Xorazm viloyati hokimligi Direksiyaning moddiy-texnika bazasini yaratish, shu jumladan, zarur jihozlar bilan ta’minlash hamda Direksiyani saqlash xarajatlari uchun zarur mablag‘larni 2021-yilda Xorazm viloyati mahalliy budjeti parametrlarida nazarda tutilgan mablag‘lar doirasida ajratsin.

O‘zbekiston Respublikasi Moliya vazirligi 2022-yildan boshlab O‘zbekiston Respublikasi Davlat budjeti parametrlarini shakllantirishda Direksiyani saqlash xarajatlari uchun zarur mablag‘larni nazarda tutsin.

6. Mazkur qarorning bajarilishini nazorat qilish O‘zbekiston Respublikasi Bosh vazirining ijtimoiy rivojlantirish masalalari bo‘yicha o‘rinbosari B.A. Musayev zimmasiga yuklansin.