Oʻzbekiston Respublikasi Prezidentining “Gʻalaba bogʻi” yodgorlik majmuasi faoliyatini tashkil etish chora-tadbirlari toʻgʻrisida” 2020-yil 9-sentabrdagi PQ-4820-son qarori ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Gʻalaba bogʻi” yodgorlik majmuasi faoliyatini tashkil etish chora-tadbirlari toʻgʻrisida” 2020-yil 9-sentabrdagi PQ-4820-son qarorining 1-bandiga muvofiq Oʻzbekiston Respublikasi Mudofaa vazirligi huzuridagi “Gʻalaba bogʻi” yodgorlik majmuasi huzurida yuridik shaxs maqomiga ega boʻlmagan “Gʻalaba bogʻi” yodgorlik majmuasini rivojlantirish jamgʻarmasi tashkil etilganligi maʼlumot uchun qabul qilinsin.

2. Oʻzbekiston Respublikasi Mudofaa vazirligi huzuridagi “Gʻalaba bogʻi” yodgorlik majmuasi huzuridagi “Gʻalaba bogʻi” yodgorlik majmuasini rivojlantirish jamgʻarmasining mablagʻlarini shakllantirish va ulardan foydalanish tartibi toʻgʻrisidagi nizom 1-ilovaga muvofiq tasdiqlansin.

3. Vazirlar Mahkamasining 2017-yil 11-dekabrdagi 975-son qarori bilan tasdiqlangan Oʻzbekiston Respublikasi Davlat budjeti hisobidan moliyalashtiriladigan muzeylar, ularning filial va boʻlimlari roʻyxatiga 2-ilovaga muvofiq qoʻshimcha kiritilsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari — iqtisodiy taraqqiyot va kambagʻallikni qisqartirish vaziri J.A. Qoʻchqorov va Oʻzbekiston Respublikasi mudofaa vaziri B.N. Kurbanov zimmasiga yuklansin.

1. Mazkur Nizom Oʻzbekiston Respublikasi Mudofaa vazirligi huzuridagi “Gʻalaba bogʻi” yodgorlik majmuasi huzuridagi “Gʻalaba bogʻi” yodgorlik majmuasini rivojlantirish jamgʻarmasi (keyingi oʻrinlarda — Jamgʻarma) mablagʻlarini shakllantirish va ulardan foydalanish, Jamgʻarma mablagʻlarini boshqarish, shuningdek, hisob va hisobotini yuritish tartibini belgilaydi.

2. Jamgʻarma yuridik shaxs hisoblanmaydi va uning mablagʻlari Oʻzbekiston Respublikasi Mudofaa vazirligi huzuridagi “Gʻalaba bogʻi” yodgorlik majmuasining (keyingi oʻrinlarda — Majmua) budjetdan tashqari mablagʻlarini saqlash uchun depozit hisobvaragʻida jamlanadi hamda ushbu Nizomda belgilangan maqsadlarga sarflanadi.

3. Jamgʻarma mablagʻlaridan foydalanish Oʻzbekiston Respublikasi mudofaa vazirining madaniy ishlar boʻyicha maslahatchisi — “Gʻalaba bogʻi” yodgorlik majmuasi boshligʻi tomonidan tasdiqlangan va Toshkent harbiy okrugi moliya xizmatida belgilangan tartibda roʻyxatga olinadigan yillik daromadlar va xarajatlar smetasi asosida amalga oshiriladi.

4. Jamgʻarma faoliyatini boshqarish va nazorat qilish Majmua boshligʻi tomonidan amalga oshiriladi.

5. Yil oxirida Jamgʻarma mablagʻlarining qoldiqlari Oʻzbekiston Respublikasi Davlat budjeti daromadiga kiritilmaydi va kelgusi moliya yili uchun Jamgʻarmaning daromadlar va xarajatlar smetasini tuzishda hisobga olinadi.

6. Jamgʻarma mablagʻlari quyidagilar hisobiga shakllantiriladi:

Majmuaga va uning obyektlariga kirish uchun chiptalar sotishdan tushgan mablagʻlar;

Majmua mulkini belgilangan tartibda ijaraga berishdan tushgan mablagʻlar;

tijorat banklarining depozit hisobvaraqlariga joylashtirilgan vaqtinchalik boʻsh turgan mablagʻlarga hisoblangan foizlardan tushgan daromadlar;

belgilangan tartibda tuziladigan shartnomalarga muvofiq koʻrgazmalar tashkil etishdan va boshqa xizmatlar koʻrsatishdan tushgan mablagʻlar;

yuridik va jismoniy shaxslar, shu jumladan, Oʻzbekiston Respublikasi norezidentlari tomonidan amalga oshirilgan homiylik xayriyalari;

qonunchilik hujjatlari bilan taqiqlanmagan boshqa manbalar.

Majmua mulkini ijaraga berishdan tushgan mablagʻlar toʻliq Majmuaning moddiy-texnik bazasini mustahkamlash va rivojlantirishga yoʻnaltiriladi.

Majmua tarkibiy boʻlinmalari tomonidan oʻtkaziladigan tadbirlarda qatnashish, Majmua hududiga va muzeyga kirish uchun chiptalar narxi, shuningdek, Majmua hududida jismoniy va yuridik shaxslar tomonidan oʻtkaziladigan tadbirlar uchun tarif Oʻzbekiston Respublikasi Mudofaa vazirligi tomonidan tegishli hududdagi muzeylar va boshqa madaniyat muassasalari (tashkilotlar) tomonidan koʻrsatiladigan oʻxshash xizmatlar uchun belgilangan oʻrtacha narxlarni qoʻllagan holda shakllantiriladi.

7. Jamgʻarma mablagʻlaridan quyidagi maqsadlarda:

a) 75 foizdan kam boʻlmagan miqdorda:

Majmuaning moddiy-texnika bazasini mustahkamlash tadbirlari uchun, shu jumladan:

modernizatsiya qilish, joriy va mukammal taʼmirlash hamda xarid qilish boʻyicha tadbirlarni moliyalashtirish uchun;

xoʻjalik va texnik (tashkiliy) mol-mulkni, mebel, kompyuter texnikasi, ilmiy va maxsus adabiyotlar hamda boshqa moddiy-texnik vosita (mulk)larni xarid qilishni, adabiyotlar chop etishni, tegishli rejalar doirasida oʻtkaziladigan tadbirlarni, xalqaro harbiy va harbiy-texnik hamkorlik tadbirlarini moliyalashtirish uchun;

bayram tadbirlarini, koʻngilochar va madaniy tadbirlarni moliyalashtirish uchun;

Majmuaning faoliyatini amalga oshiruvchi tarkibiy boʻlinmalarga yuklangan funksiyalarni amalga oshirish va vazifalarni bajarishga yoʻnaltirilgan boshqa qoʻshimcha tadbirlar uchun;

b) 25 foizdan koʻp boʻlmagan miqdorda:

harbiy xizmatchilar (xodimlar), Qurolli Kuchlar ishchi va xizmatchilarini moddiy ragʻbatlantirish boʻyicha tadbirlarni moliyalashtirish uchun, shu jumladan:

harbiy xizmatchilar (xodimlar), Qurolli Kuchlar ishchi va xizmatchilari, boshqa davlat organlari va tashkilotlari xodimlari hamda xorijiy davlatlar vakillarini taqdirlash uchun gulchambarlar, guldastalar, esdalik sovgʻalari, qimmatbaho sovgʻalar va hokazolar xarid qilish uchun;

Majmuaning faoliyatini amalga oshiruvchi tarkibiy boʻlinmalariga yuklangan funksiyalarni amalga oshirish va vazifalarni bajarishga yoʻnaltirilgan boshqa qoʻshimcha tadbirlar uchun foydalaniladi.

8. Jamgʻarmaning daromadlar va xarajatlar smetasi Oʻzbekiston Respublikasi mudofaa vazirining madaniy ishlar boʻyicha maslahatchisi — “Gʻalaba bogʻi” yodgorlik majmuasi boshligʻi tomonidan tasdiqlanadi va Toshkent harbiy okrugi moliya xizmatida belgilangan tartibda roʻyxatga olinadi.

9. Jamgʻarmadan mablagʻlar ajratish va ularni sarflash daromadlar va xarajatlar smetasi Toshkent harbiy okrugi moliya xizmatida roʻyxatga olinganidan soʻng amalga oshiriladi.

10. Jamgʻarmaning daromadlar va xarajatlar smetasiga kiritiladigan oʻzgartirishlar belgilangan tartibda Toshkent harbiy okrugi moliya xizmatida roʻyxatga olinadi.

11. Yuridik va jismoniy shaxslar tomonidan koʻrsatilgan homiylik xayriyalarining toʻliq summasi, agar homiy bilan aniq maqsadlar uchun yoʻnaltirilishi kelishilmagan boʻlsa, Majmuaning faoliyatini amalga oshiruvchi tarkibiy boʻlinmalarning moddiy-texnika bazasini mustahkamlash uchun sarflanadi.

12. Jamgʻarmaning kassa xarajatlari tasdiqlangan daromadlar va xarajatlar smetasining parametrlari doirasida amalga oshiriladi.

13. Jamgʻarma mablagʻlarini hisobga olish belgilangan tartibda va Oʻzbekiston Respublikasi Mudofaa vazirligining budjetdan tashqari mablagʻlari roʻyxati asosida yuritiladi.

14. Jamgʻarma mablagʻlaridan foydalanish yuzasidan hisobot belgilangan tartibda Majmua boshligʻi tomonidan Toshkent harbiy okrugi moliya xizmatiga taqdim etiladi.

15. Majmua boshligʻi va moliya boʻlimi boshligʻi quyidagilar uchun javobgar hisoblanadilar:

Jamgʻarma mablagʻlarining qonuniy va maqsadli yoʻnaltirilishi;

Jamgʻarma mablagʻlarining tasdiqlangan daromadlar va xarajatlar smetasiga qatʼiy muvofiq ravishda sarflanishi;

Jamgʻarma mablagʻlari boʻyicha xarajatlarning toʻgʻri hisobga olinishi;

Jamgʻarma mablagʻlaridan oqilona foydalanilishi;

yuridik va jismoniy shaxslar (yetkazib beruvchilar) bilan tuziladigan shartnomalarning asosli va qonunchilik hujjatlariga muvofiq rasmiylashtirilishi va tuzilishi;

tovarlar (ishlar, xizmatlar) yetkazib berilishini tasdiqlaydigan birlamchi hujjatlar va boshqa hujjatlarning ishonchliligi.

16. Jamgʻarma mablagʻlarining toʻgʻri shakllantirilishi va ulardan foydalanilishini nazorat qilish Oʻzbekiston Respublikasi Mudofaa vazirligining Moliya-iqtisod bosh boshqarmasi va Nazorat-taftish boshqarmasi, shuningdek, qonunchilik hujjatlariga muvofiq boshqa nazorat organlari tomonidan amalga oshiriladi.

17. Ushbu Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Vazirlar Mahkamasining 2017-yil 11-dekabrdagi 975-son qarori bilan tasdiqlangan Oʻzbekiston Respublikasi Davlat budjeti hisobidan moliyalashtiriladigan muzeylar, ularning filial va boʻlimlari roʻyxatiga quyidagi mazmundagi 12 va 13-pozitsiyalar qoʻshilsin: