“Advokatura toʻgʻrisida”gi Oʻzbekiston Respublikasi Qonuniga muvofiq hamda advokatlik byurolari, advokatlik hayʼatlar advokatlik firmalarini roʻyxatdan oʻtkazishni tartibga solish, shuningdek advokatlik faoliyati bilan shugʻullanish huquqini beruvchi litsenziyalar berishni tartibga solish maqsadida Vazirlar Mahkamasi qaror qiladi:

1. Advokatlik byurolari, hayʼatlari, firmalarini davlat roʻyxatidan oʻtkazish hamda Oʻzbekiston Respublikasi fuqarolariga advokatlik faoliyati bilan shugʻullanish huquqini beruvchi litsenziyalarni berish tartibi toʻgʻrisidagi ilova qilinayotgan Nizom tasdiqlansin.

2. Belgilansinki, advokatlik byurolari, hayʼatlari, firmalari davlat roʻyxatidan oʻtkazilganligi, shuningdek ular qayta roʻyxatdan oʻtkazilganligi uchun quyidagi idoralarda davlat boji toʻlanadi:

roʻyxatdan oʻtkazilganligi uchun — eng kam oylik ish haqining 10 baravari miqdorida;

qayta roʻyxatdan oʻtkazilganligi uchun — roʻyxatdan oʻtkazilganlik uchun toʻlanadigan summaning 20 foizi.

Litsenziya berilganligi uchun quyidagi miqdorlarda davlat boji toʻlanadi

“Advokatura toʻgʻrisida”gi Oʻzbekiston Respublikasi Qonuni kuchga kirgan paytda advokatlar hayʼati aʼzosi hisoblangan shaxslar uchun — eng kam oylik ish haqining besh baravari miqdorida;

birinchi marta advokatlik faoliyati bilan shugʻullanish xohishini bildirgan shaxslar uchun — eng kam oylik ish haqining besh baravari miqdorida;

litsenziya dublikati berilganligi uchun — litsenziya berilganligi uchun belgilangan davlat boji miqdorining 50 foizi.

3. Belgilansinki, advokatlik faoliyati bilan shugʻullanish huquqini beruvchi litsenziyani olish xohishini bildirgan fuqarolar malaka komissiyalari ishi bilan bogʻliq boʻlgan xarajatlarni qoplash maqsadida malaka imtihoni topshirishdan oldin quyidagi miqdorlarda yigʻim toʻlaydilar:

“Advokatura toʻgʻrisida”gi Oʻzbekiston Respublikasi Qonuni kuchga kirgan paytda advokatlar hayʼati aʼzosi hisoblangan shaxslar — eng kam oylik ish haqining 50 foizi;

birinchi marta advokatlik faoliyati bilan shugʻullanish xohishini bildirgan shaxslar — bir oylik eng kam oylik ish haqi miqdorida.

4. Mazkur qarorning bajarilishini nazorat qilish Oʻzbekiston Respublikasi Adliya vaziri S. Mirsafoyev zimmasiga yuklansin.

Mazkur Nizom bilan advokatlik byurolari, hayʼatlar va firmalarini roʻyxatdan oʻtkazish, shuningdek advokatlik faoliyati bilan shugʻullanish huquqini beruvchi litsenziyalarni berish tartibga solinadi.

1. “Advokatura toʻgʻrisida”gi Oʻzbekiston Respublikasi Qonuniga muvofiq advokatlik byurolari, hayʼatlari va firmalarini roʻyxatdan oʻtkazish Qoraqalpogʻiston Respublikasi Adliya vazirligi, viloyatlar, Toshkent shahar adliya boshqarmalari (keyingi oʻrinlarda — adliya organlari deb ataladi) tomonidan amalga oshiriladi.

2. Adliya organlari Davlat roʻyxatidan oʻtkazilishi kerak boʻlgan advokaturaning tashkiliy tuzilmalari quyidagilar hisoblanadi:

advokatlar hayʼati;

advokatlik firmasi;

advokatlik byurosi.

3. Advokatlik hayʼatlari firmalari va byurolari davlat roʻyxatidan oʻtkazilishi uchun davlat tilida bajarilgan quyidagi hujjatlarni taqdim etadilar:

davlat roʻyxatidan oʻtkazish toʻgʻrisidagi ariza;

advokatlik byurosi tashkil etish toʻgʻrisidagi qaror (advokatlik faoliyati bilan shugʻullanish huquqini beruvchi litsenziyani oluvchi shaxsning arizasi), advokatlik firmasi, hayʼatining taʼsis shartnomasi va ustavi tasdiqlanganligi toʻgʻrisida taʼsis majlisi bayoni;

taʼsis shartnomasining tasdiqlangan nusxalari;

advokatlik byurosi, firmasi yoxud hayʼatining muassislari (sheriklar) tomonidan tasdiqlangan ustavi ikki nusxada (ip oʻtkazib bogʻlangan va tartib raqami qoʻyilgan holda);

muhr va burchakli shtampning (mavjud advokatlar hayʼati uchun muhr va burchakli shtamp ottiski), emblema yoki gerb boʻlgan taqdirda ularning ham ikki nusxadagi namunasi eskizi;

advokatlik byurosi, hayʼati va firmasi roʻyxatdan oʻtkazilganligi uchun davlat bojining belgilangan miqdori toʻlanganligidan dalolat beruvchi bank toʻlov hujjati.

Roʻyxatdan oʻtkazish advokatlik byurosi, firmasi, hayʼati joylashgan joydagi tegishli adliya organi tomonidan amalga oshiriladi.

Advokatlik byurosini roʻyxatdan oʻtkazishda taʼsis yigʻilishi va taʼsis shartnomasi bayoni talab qilinmaydi.

4. “Advokatura toʻgʻrisida”gi Oʻzbekiston Respublikasi Qonuni kuchga kirgunga qadar oʻz faoliyatini amalga oshiruvchi advokatlar hayʼati ularning ustavlari advokatlar hayʼati umumiy yigʻilishlari tomonidan tasdiqlangandan, barcha zarur hujjatlar taqdim etilganidan keyin, taʼsis yigʻilishi va taʼsis shartnomasi bayoni bundan istisnodir, tegishli adliya organlarida hisobga olinadi.

Advokatlar hayʼati maʼlumotlarining hisobga qoʻyilishi davlat roʻyxatidan oʻtkazishga tenglashtiriladi, buning tasdigʻi sifatida belgilangan namunadagi guvohnoma beriladi.

Ushbu holda davlat boji belgilangan miqdorda va tartibda toʻlanadi.

5. Taʼsis hujjatlariga oʻzgartirish va qoʻshimchalar kiritilsa, shuningdek advokatlik byurosi, hayʼati va firmasi qayta tashkil etilsa u qayta roʻyxatdan oʻtkaziladi.

6. Advokatlik byurolari, hayʼatlari, firmalarini davlat roʻyxatidan oʻtkazganlik va qayta roʻyxatdan oʻtkazganlik, shuningdek advokatlik faoliyati bilan shugʻullanish huquqini beruvchi litsenziyalar berganlik uchun undiriladigan mablagʻlar Sudlar va adliya organlarini rivojlantirish jamgʻarmasiga oʻtkaziladi.

7. Advokatlik byurosi, hayʼati, firmasini davlat roʻyxatidan oʻtkazish hamda muhrlar va shtamplar namunalari eskizlarini, emblema va gerb boʻlgan taqdirda ularning namunalari eskizlarini tasdiqlash zarur hujjatlar ilova qilingan holda ariza olingan paytdan boshlab 20 ish kunidan kechikmay amalga oshiriladi.

Roʻyxatdan oʻtkazish uchun taqdim etilgan hujjatlar amaldagi qonun hujjatlariga zid boʻlgan taqdirda roʻyxatdan oʻtkazishni amalga oshiruvchi organ tomonidan bir hafta muddatda ariza beruvchiga taqdim etilgan hujjatlarni amaldagi qonun hujjatlariga muvofiqlashtirish toʻgʻrisida tavsiya beriladi, tavsiya bajarmagan taqdirda ariza beruvchiga yozma xulosa beriladi, unda roʻyxatdan oʻtkazish rad etilishining sababi aniq dalillanadi.

Davlat roʻyxatidan oʻtkazish rad etilishining sabablari ariza beruvchi tomonidan asossiz deb topilganda yoxud roʻyxatdan oʻtkazish belgilangan muddatlarda amalga oshirilmaganda ariza beruvchi roʻyxatdan oʻtkazish rad etilishi toʻgʻrisidagi qaror ustidan Oʻzbekiston Respublikasi Adliya vazirligiga yoki sudga murojaat qilishga haqlidir.

8. Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari tomonidan davlat roʻyxatidan oʻtkazilgan advokatlik byurolari, hayʼatlari va firmalari reyestri yuritiladi (1-ilova).

Advokatlik byurolari, firmalari, hayʼatlarini davlat roʻyxatidan oʻtkazish reyestrlarini yuritish tartibi Oʻzbekiston Respublikasi Adliya vazirligi tomonidan belgilanadi.

9. Roʻyxatdan oʻtkazilgan advokatlik byurosi, advokatlar hayʼati va advokatlik firmasiga quyidagi hujjatlar beriladi:

tegishli adliya organining roʻyxatdan oʻtkazish toʻgʻrisidagi qarori — ikki nusxada;

advokatlik byurosi, firmasi, hayʼatining roʻyxatdan oʻtkazilgan ustavi — 1 nusxada;

roʻyxatdan oʻtkazish toʻgʻrisidagi guvohnoma (2-ilova).

Advokatlik byurosi, hayʼati, firmasi roʻyxatdan oʻtkazilgan kundan boshlab yuridik shaxs maqomiga ega boʻladi.

Hujjatlarni berish haftada kamida ikki marta amalga oshiriladi.

10. Roʻyxatdan oʻtkazilgan advokatlik byurosi, advokatlar hayʼati va advokatlik firmasi bankda hisob-kitob schyoti ochilgandan keyin bir hafta muddatda statistika organlarida va oʻzlari joylashgan joy boʻyicha soliq organlarida belgilangan tartibda hisobda turishga majburdirlar.

11. Advokatlik byurosi, hayʼatlari va firmalarini tashkil etish, faoliyati, qayta tashkil etish va tugatish tartibi, tuzilmasi shtatlari, funksiyalari, mablagʻlarni taqsimlash tartibi, rahbar organlar vakolati, ularni saylash tartibi va advokatlik byurosi, hayʼatlari va firmalari faoliyatiga tegishli boʻlgan boshqa masalalar ularning ustavlari bilan tartibga solinadi.

12. Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari roʻyxatdan oʻtkazuvchi organlar sifatida advokatlik byurolari, advokatlar hayʼatlari va advokatlik firmalari tomonidan oʻz taʼsis shartnomalari va ustavlariga rioya etilishi ustidan nazoratni amalga oshiradi. Oʻzbekiston Respublikasining qonun hujjatlari buzilishi aniqlangan taqdirda adliya organlari advokatlik byurolari, hayʼatlari, firmalariga aniqlangan qonunbuzarlik holatlarini bartaraf etish toʻgʻrisida yozma koʻrsatma kiritishga haqlidir. Roʻyxatdan oʻtkazish tartibi buzilgan taqdirda, shuningdek taʼsis hujjatlari talablariga rioya etilmagan taqdirda (ustavda nazarda tutilmagan faoliyat turlari bilan shugʻullanish) roʻyxatdan oʻtkazuvchi organ advokatlik byurosi, advokatlar hayʼatlari va advokatlik firmasidan xoʻjalik sudi orqali eng kam ish haqining 200 baravari miqdorida jarima undirishga haqlidir.

Jarima Sudlar va adliya organlarini rivojlantirish jamgʻarmasiga oʻtkaziladi. Adliya organlari bunday daʼvo bilan xoʻjalik sudiga murojaat qilganlari taqdirda davlat boji toʻlashdan ozod etiladi.

Agar advokatlik byurosi, hayʼati, firmasi ulardan jarima undirilgandan keyin amaldagi qonun hujjatlarini buzishni davom ettirsalar hamda taʼsis hujjatlarida belgilangan vakolatlardan tashqariga chiqsalar, roʻyxatdan oʻtkazuvchi organ ular toʻgʻrisida xoʻjalik sudiga daʼvo bilan murojaat qilishga haqlidir.

13. Advokatlar hayʼati va advokatlik firmasi yuqori organi tugatish toʻgʻrisida qaror qabul qilingandan keyin adliya organiga tegishli hujjat taqdim etiladi, Advokatlar hayʼati va advokatlik firmasini tugatishni roʻyxatdan oʻtkazish bunday holda ushbu tuzilmalar boshqaruvi yuqori organi majlisi bayoni asosida amalga oshiriladi.

Advokatlik byurosini tugatishni roʻyxatga olish mazkur byuro muassis advokatning arizasi yoxud adliya organi uning litsenziyasini bekor qilish toʻgʻrisidagi qarori asosida amalga oshiriladi.

14. Advokatlik byurolari, hayʼatlari va firmalari adliya organlariga statistika hisobotlarini Oʻzbekiston Respublikasi Adliya vazirligi tomonidan belgilangan shakl boʻyicha va muddatlarda taqdim etadilar.

15. “Advokatura toʻgʻrisida”gi Oʻzbekiston Respublikasi Qonuniga muvofiq advokatlik faoliyati bilan shugʻullanish huquqini beruvchi litsenziya malaka komissiyasining qarori asosida Oʻzbekiston Respublikasining oliy yuridik maʼlumotga ega boʻlgan, malaka imtihoni topshirgan fuqarosiga berilishi mumkin.

Litsenziyalar Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari (keyingi oʻrinlarda – adliya organlari) tomonidan beriladi.

Litsenziyalar litsenziya talabgori yashaydigan joydagi adliya organlari tomonidan beriladi.

16. Litsenziya talabgori litsenziya olish uchun malaka imtihoni topshirgan kundan boshlab oʻn kun mobaynida familiyasi, ismi, otasining ismi, fuqaroning shaxsini tasdiqlovchi hujjat maʼlumotlari, litsenziyalanadigan faoliyat turini koʻrsatgan holda litsenziya berish toʻgʻrisida arizani bevosita yoxud pochta aloqa vositasi orqali adliya organiga taqdim etadi. Arizaga malaka komissiyasining qarori ilova qilinadi.

Litsenziya olish uchun adliya organiga taqdim etilgan hujjatlar roʻyxat boʻyicha qabul qilinadi, roʻyxatning nusxasi hujjatlar qabul qilingan sana toʻgʻrisida belgi qoʻyilgan holda ariza beruvchiga yuboriladi (topshiriladi) va adliya organi tomonidan roʻyxatdan oʻtkaziladi.

Litsenziya talabgoridan ushbu Nizomda nazarda tutilmagan hujjatlarni taqdim etishni talab qilishga yoʻl qoʻyilmaydi.

17. Litsenziya olishga daʼvogarlik qiluvchi shaxsning arizasiga muvofiq u malaka imtihonini muvaffaqiyatli topshirganidan keyin adliya organi imtihon topshirilgandan keyin yigirma kuni ichida malaka komissiyasining masʼul kotibi tomonidan taqdim etilgan hujjatlar asosida litsenziya berish toʻgʻrisidagi masalani koʻrib chiqadi.

Ariza berish muddatlari ariza beruvchi tomonidan uzrli sabablarga koʻra oʻtkazib yuborilgan, shuningdek tushgan hujjat-qoʻshimcha, shu jumladan, mustaqil ekspertizadan oʻtkazilgan alohida hollarda adliya organi rahbari ushbu muddatni uzaytirishi mumkin, biroq 10 ish kunidan ortiq emas.

18. Adliya organi quyidagi hollarda litsenziya berishni rad etish huquqiga egadir:

litsenziya talabgori tomonidan zarur darajada rasmiylashtirilmagan hujjatlar taqdim etilganda;

litsenziya talabgori tomonidan taqdim etilgan hujjatlarda ishonchsiz va buzilgan maʼlumotlar mavjud boʻlganda;

litsenziya talabgori litsenziya talablari va shartlariga muvofiq boʻlmaganda, shu jumladan belgilangan tartibda uning layoqatsiz yoki layoqati cheklangan deb eʼtirof etilgan taqdirda, shuningdek sudlanganligi qaytarib olinmagan yoki olib tashlanmagan taqdirda.

Boshqa sabablar, shu jumladan maqsadga muvofiq emasligi tufayli litsenziya berishni rad etishga ruxsat berilmaydi.

Litsenziya talabgori adliya organining litsenziya berishni rad etish toʻgʻrisidagi qarori, shuningdek adliya organining mansabdor shaxsi xatti-harakatlari (harakatsizligi) yuzasidan Oʻzbekiston Respublikasi Adliya vazirligiga yoki sudga shikoyat qilish huquqiga egadir.

Litsenziya berishni rad etish toʻgʻrisida qaror qabul qilingandan keyin rad etish toʻgʻrisidagi bildirishnoma litsenziya talabgoriga 3 kun mobaynida rad etishning aniq sabablari va litsenziya talabgori koʻrsatib oʻtilgan sabablarni bartaraf etib hujjatlarni takroran koʻrib chiqishga taqdim etishi uchun yetarli boʻlgan muddat koʻrsatilgan holda yozma shaklda yuboriladi (topshiriladi).

Litsenziya berishni rad etish uchun asos boʻlgan sabablar litsenziya talabgori tomonidan bartaraf etilgan taqdirda, hujjatlarni qayta koʻrib chiqish adliya organi tomonidan litsenziya talabgorining arizasi barcha zarur hujjatlar bilan birgalikda olingan kundan boshlab oʻn kundan ortiq boʻlmagan muddatda amalga oshiriladi. Litsenziya berish rad etilganligi toʻgʻrisidagi bildirishnomada koʻrsatilgan muddat oʻtgandan keyin berilgan ariza yangidan berilgan ariza hisoblanadi.

19. Litsenziya berishga qaror qilinganligi toʻgʻrisidagi bildirishnomada litsenziya talabgoriga bank hisob raqami rekvizitlari, davlat boji toʻlash muddati koʻrsatilgan holda yozma shaklda yuboriladi (topshiriladi).

Litsenziya berish litsenziya talabgori tomonidan davlat boji toʻlaganligini tasdiqlovchi hujjat taqdim etilganda amalga oshiriladi.

Agar litsenziat litsenziya berish toʻgʻrisida qaror qabul qilinganligi haqidagi bildirishnoma yuborilgan (topshirilgan) vaqtdan boshlab uch oy mobaynida adliya organiga litsenziya berilganligi uchun davlat boji toʻlanganligini tasdiqlovchi hujjatni taqdim etmasa adliya organi koʻrsatilgan litsenziyani bekor qilishga haqlidir.

Advokatlik faoliyati bilan shugʻullanish huquqini beruvchi litsenziya belgilangan shaklda (3-ilova) beriladi va Oʻzbekiston Respublikasining butun hududida amal qiladi.

Beriladigan litsenziyaga roʻyxatdan oʻtkazish tartib raqami beriladi va u mana shu tartib raqami bilan advokatlik faoliyati bilan shugʻullanish huquqini beruvchi litsenziyalar Davlat reyestrlariga (4-ilova) kiritiladi. Litsenziya adliya organi (rahbari oʻrinbosari) tomonidan imzolanadi va ushbu organning muhri bilan tasdiqlanadi. Reyestrni saqlash muddati — 75 yil.

Litsenziya blanki qatʼiy hisobda turadi, egasi yozilmagan qimmatli qogʻoz darajasida himoyalangan boʻladi, hisobga olish seriyasiga va uning tartib raqamiga ega boʻladi, bunda seriya abbreviaturasi mazkur litsenziya berilayotgan hududga tegishlilikni koʻrsatadi. Litsenziyalar blanklarini saqlash va hisobga olish tartibi Oʻzbekiston Respublikasi Adliya vazirligi tomonidan tasdiqlanadi.

20. Advokatlik faoliyati bilan shugʻullanish huquqini beruvchi litsenziyani berishda “Advokatura toʻgʻrisida”gi Oʻzbekiston Respublikasi Qonuni kuchga kirgan paytda advokatlar hayʼati aʼzosi hisoblangan shaxslar eng kam oylik ish haqining ikki baravari miqdorida davlat boji toʻlaydilar, birinchi marta advokatlik faoliyati bilan shugʻullanish xohishini bildirgan shaxslar esa eng kam oylik ish haqining besh baravari miqdorida davlat boji toʻlaydilar.

21. Litsenziya yoʻqotilgan taqdirda uning dublikati berilishi mumkin, Advokatlik faoliyati bilan shugʻullanish huquqini beruvchi litsenziyaning dublikati berilganligi uchun litsenziya berilgani uchun belgilangan davlat boji umumiy miqdorining 50 foizi miqdorida haq undiriladi.

22. Advokatlik faoliyati bilan shugʻullanish huquqini beruvchi litsenziyani olgan shaxslar (keyingi oʻrinlarda advokat deb ataladi) “Advokatura toʻgʻrisida”gi Oʻzbekiston Respublikasi Qonunining 5-moddasida nazarda tutilgan advokatlik faoliyati turini amalga oshirishga, shuningdek Oʻzbekiston Respublikasi fuqarolariga, ajnabiy fuqarolarga, fuqaroligi boʻlmagan shaxslarga, mulkchilik shakllaridan qatʼi nazar, korxonalar, muassasalar, tashkilotlarga, agar bu toʻgʻridan toʻgʻri Qonun bilan taqiqlanmagan boʻlsa, boshqa huquqiy yordam koʻrsatishi mumkin.

23. Advokat kasb-kor faoliyatini amalga oshirishda quyidagi huquqlarga ega boʻladi:

tegishli masalalarni hal etish vakolatiga kiradigan barcha organlar, korxonalar, muassasalar va tashkilotlarda jismoniy va yuridik shaxslarning topshirigʻiga koʻra ularning manfaatlarining ifodalash va huquqlarini himoya qilish;

sudlarda, shuningdek maʼmuriy huquqiy munosabatlar toʻgʻrisidagi ishlarni koʻruvchi organlarda hisobot sifatida foydalanishi mumkin boʻlgan faktlar toʻgʻrisidagi maʼlumotlarni yigʻish;

huquqiy yordam koʻrsatish munosabati bilan davlat organlari, korxonalar, muassasalar, tashkilotlar va jamoat birlashmalaridan maʼlumotnomalar, tavsifnomalar va boshqa zarur hujjatlarni soʻrash va olish;

huquqiy yordam koʻrsatish uchun zarur boʻlgan masalalar boʻyicha mijozning roziligi bilan ekspertlarning yozma xulosalarini, mutaxassislarning maʼlumotnoma-maslahatlarini soʻrash va olish;

toʻplangan materiallarni sudlarga va unga ishonganning yoki uning himoyasi ostidagining ishini koʻrib chiquvchi davlat organlariga taqdim etish;

mansabdor shaxslarga iltimosnoma va shikoyat qilish hamda ulardan sababi asoslangan yozma javoblar olish;

qonun hujjatlarida nazarda tutilgan boshqa harakatlarni bajarish.

24. Advokat oʻzining kasb-kor faoliyatida amaldagi qonun hujjatlari talablariga rioya etishi, unga huquqiy yordam soʻrab murojaat qilgan jismoniy va yuridik shaxslarning huquqlari va qonuniy manfaatlarini himoya qilishda qonunda nazarda tutilgan vositalar va usullardan foydalanishi shart.

25.Advokat advokatlik sirini saqlashi shart. Mijozning advokatga yordam soʻrab murojaat qilishi faktining oʻzi, mijoz yordam soʻrab murojaat qilgan masalalar, mijoz advokatdan maslahatlar va tushuntirishlarning mohiyati, advokatning mijoz bilan suhbati mazmuniga tegishli boʻlib qolgan barcha maʼlumotlar advokatlik siri hisoblanadi.

26. Advokatlarning kasb-kor huquqlari, shaʼni va qadr-qiymati qonun tomonidan qoʻriqlanadi.

Advokat oʻz kasb-kor vazifalarini bajarayotganda unga koʻrsatishning istalgan shakllariga yoʻl qoʻyilmaydi.

27. Advokatlar mehnatiga haq toʻlash mijoz bilan advokat oʻrtasida erkin tuziladigan kelishuv (shartnoma) asosida amalga oshiriladi.

28. Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari litsenziya beruvchi organlar sifatida advokat tomonidan litsenziya talablari va shartlariga rioya etilishi, shu jumladan advokatlik faoliyatini belgilovchi qonun hujjatlariga, advokatlik etikasi qoidalariga rioya etilishini, shuningdek advokatlarning kasb tayyorgarligini nazorat qiladilar.

Advokat “Advokatura toʻgʻrisida”gi Oʻzbekiston Respublikasi Qonuni talablariga rioya etmagan, advokatlik faoliyatini amalga oshirishdan bosh tortgan, shuningdek 6 oydan ortiq vaqt davomida litsenziyada nazarda tutilmagan faoliyat turi bilan shugʻullanmagan taqdirda adliya organi malaka komissiyasiga unga nisbatan intizomiy jazo choralari qoʻllash toʻgʻrisidagi masalani hal etishi uchun taqdimnoma kiritadi.

29. Advokatlik faoliyatini bundan keyin amalga oshirishga toʻsqinlik qiluvchi holatlarning xususiyatiga bogʻliq ravishda adliya organlari litsenziyaning amal qilishini toʻxtatish yoki toʻxtatib turish yoxud bekor qilish huquqiga ega boʻladilar.

30. Litsenziyaning amal qilishini toʻxtatib turish mazkur Nizomning 31-bandida nazarda tutilgan holat mavjud boʻlgan davrda advokatlik faoliyati bilan shugʻullanish huquqi taqiqlanishini anglatadi.

31. Litsenziyaning amal qilishi quyidagi hollarda adliya organi qaroriga koʻra toʻxtatib turilishi mumkin:

advokat jinoiy javobgarlikka tortilgan taqdirda u aybdor sifatida javobgarlikka tortilgan paytdan boshlab va sudning hukmi qonuniy kuchga kirguncha qadar yoxud oqlovchi asoslarga koʻra uni jinoiy javobgarlikdan ozod qilish toʻgʻrisida qaror qabul qilingungacha;

advokatlik faoliyatini amalga oshiruvchi shaxsning familiyasi, ismi yoki otasining ismi oʻzgarganda litsenziyani qayta rasmiylashtirish muddatiga;

advokat tomonidan uning aniqlangan qonun buzilishlarini bartaraf etishni talab etuvchi adliya organining qarori bajarilmaganda.

Litsenziyaning amal qilishi adliya organi tomonidan advokatning qonun hujjatlarini, advokatlik etikasi qoidalarini buzganligi aniqlangan taqdirda intizomiy jazo chorasi sifatida malaka komissiyasining qarori asosida ham toʻxtatib turilishi mumkin.

Adliya organi litsenziyaning amal qilishi toʻxtatib turilishiga sabab boʻlgan holatlar advokat tomonidan bartaraf etish uchun muddat belgilaydi. Koʻrsatilgan muddat 6 oydan ortiq boʻlmasligi kerak, advokat jinoiy javobgarlikka tortilgan hollar bundan mustasno.

Litsenziyaning amal qilishi toʻxtatib turilishiga sabab boʻlgan holatlar advokat tomonidan bartaraf etilganda adliya organi koʻrsatilgan holatlar bartaraf etilganligining tasdigʻi olingan kundan boshlab oʻn kun muddatda litsenziyaning amal qilishini tiklash toʻgʻrisida qaror qabul qilishi shart.

32. Litsenziyaning amal qilishi toʻxtatilishi mazkur Nizomning 33-bandida nazarda tutilgan holatlar boshlanishi bilan bogʻliq boʻlganda advokatlik faoliyatini amalga oshirish taqiqlanishini anglatadi.

33. Litsenziyaning amal qilishi adliya organi tomonidan quyidagi hollarda toʻxtatiladi:

advokat litsenziyaning amal qilishini toʻxtatish toʻgʻrisida ariza bilan murojaat qilganda, biroq ilgari qabul qilingan topshiriq bajarilgandan keyin, agar mijoz oʻz soʻzida turib olsa;

belgilangan tartibda huquqiy layoqati cheklangan yoki advokat huquqiy layoqatsiz deb eʼtirof etilganda;

adliya organi belgilagan muddatda litsenziyaning amal qilishini toʻxtatib turishga sabab boʻlgan holatlar advokat tomonidan bartaraf etilmaganda;

adliya organining litsenziya berish toʻgʻrisidagi qarorining noqonuniy ekanligi aniqlanganda;

advokatga nisbatan chiqarilgan sudning ayblov hukmi qonuniy kuchga kirganda;

advokat Oʻzbekiston Respublikasi fuqaroligidan chiqqanda.

Litsenziyaning amal qilishi adliya organi tomonidan litsenziya talablari va shartlari advokat tomonidan muntazam yoki bir marta qoʻpol ravishda buzilgan taqdirda intizomiy jazo chorasi sifatida malaka komissiyasining qarori asosida ham toʻxtatilishi mumkin.

Litsenziyaning amal qilishi sudning qaroriga koʻra ham toʻxtatilishi mumkin.

Litsenziyaning amal qilishi uning amal qilishini toʻxtatish toʻgʻrisida qaror qabul qilingan sanadan boshlab toʻxtatiladi.

34. Litsenziyaning bekor qilinishi mazkur bandda nazarda tutilgan asoslar boʻyicha litsenziyaning haqiqiy emasligi eʼlon qilinishi bilan bogʻliq boʻlganda advokatlik faoliyatini amalga oshirish taqiqlanishini anglatadi.

Adliya organi tomonidan litsenziya quyidagi asoslarda bekor qilinadi:

advokatning arizaga koʻra;

advokat litsenziya berish toʻgʻrisida qaror qabul qilinganligi toʻgʻrisida bildirishnoma yuborilgan (topshirilgan) vaqtdan boshlab uch oy mobaynida adliya organiga litsenziya berilganligi uchun davlat boji toʻlanganligini tasdiqlovchi hujjatni taqdim etmagan taqdirda;

qalbaki hujjatlardan foydalangan holda litsenziya olish holati aniqlangan taqdirda.

Litsenziya sudning qaroriga koʻra ham bekor qilinishi mumkin.

Litsenziyaning bekor qilish toʻgʻrisidagi qaror, qaror berilgan sanadan boshlab amal qiladi.

Litsenziyaning bekor qilinishi advokatning kasbiy faoliyatini bajarishda uning harakatlari noqonuniyligini eʼtirof etmaydi”.

35. Adliya organlari litsenziyaning amal qilishi toʻxtatib turilishi, toʻxtatilishi yoki uning bekor qilinishi toʻgʻrisidagi qaror qabul qilingan kundan boshlab 3 kun muddatda bu haqda advokatni xabardor qiladilar.

Bunday holda advokat litsenziya bekor qilinganligi toʻgʻrisida adliya organining qarori haqida oʻz mijozlarini darhol xabardor qilishi va 10 kun mobaynida litsenziyani uni bergan organga qaytarishi shart.

36. Litsenziyaning amal qilishi toʻxtatib turilishi, toʻxtatilishi yoki uning bekor qilinishi toʻgʻrisidagi qarorga adliya organi rahbari (rahbarning oʻrinbosari) imzo chekadi.

37. Litsenziyaning amal qilishi toʻxtatib turilishi, toʻxtatilishi yoki uning bekor qilinishi toʻgʻrisidagi qaror ustidan bunday qaror olingan paytdan boshlab bir oy muddatda Oʻzbekiston Respublikasi Adliya Vazirligiga yoki sudga shikoyat qilinishi mumkin.

38. Litsenziyaning amal qilishi toʻxtatilishi yoki uning bekor qilinishi toʻgʻrisidagi axborot adliya organi tomonidan litsenziyasining amal qilishi toʻxtatilgan yoki litsenziyasi bekor qilingan shaxslarning koʻrib chiqilayotgan ishlarda qatnashishiga yoʻl qoʻymaslik maqsadida sud-tergov organlariga maʼlumot uchun yuboriladi.

39. Adliya organlari yilning har choragida berilgan, bekor qilingan va amal qilishi toʻxtatib turilgan, toʻxtatilgan litsenziyalar toʻgʻrisida maʼlumotlarni Oʻzbekiston Respublikasi Adliya vazirligiga taqdim etadi. Oʻzbekiston Respublikasi Adliya vazirligi Oʻzbekiston Respublikasi hududida advokatlik faoliyati bilan shugʻullanish huquqini beruvchi barcha litsenziyalarning yigʻma reyestrini yuritadi.