O‘zbekiston Respublikasi Prezidentining “Sudlar faoliyatini yanada takomillashtirish va odil sudlov samaradorligini oshirishga doir qo‘shimcha chora-tadbirlar to‘g‘risida” 2020-yil 24-iyuldagi PF-6034-son Farmoniga muvofiq, shuningdek sudyalarning pensiya ta’minoti shartlari, me’yorlari va tartibini yanada takomillashtirish maqsadida Vazirlar Mahkamasi qaror qiladi:

1. O‘zbekiston Respublikasi Prezidentining “Sudlar faoliyatini yanada takomillashtirish va odil sudlov samaradorligini oshirishga doir qo‘shimcha chora-tadbirlar to‘g‘risida” 2020-yil 24-iyuldagi PF-6034-son Farmonining 6-bandiga muvofiq:

O‘zbekiston Respublikasi Oliy sudi apparati rahbari, boshqarma boshliqlariga nisbatan Oliy sud sudyalari uchun belgilangan, Oliy sudning boshqaruv xodimlari tarkibiga kiritilgan boshqa xodimlariga nisbatan esa, viloyat sudlari sudyalari uchun belgilangan mehnatga haq to‘lash va moddiy rag‘batlantirish shartlari tatbiq etilganligi;

bunda, qayd etilgan shartlar faqat muqaddam sudyalik lavozimida ishlagan shaxslarga nisbatan qo‘llanilishi, ushbu shaxslarning shu lavozimlarda ishlagan vaqti sudyalik stajiga qo‘shilishi va pensiya tayinlashda hisobga olinishi belgilanganligi ma’lumot uchun qabul qilinsin.

2. Vazirlar Mahkamasining 2019-yil 9-yanvardagi 11-son qarori (O‘zbekiston Respublikasi QT, 2019-y., 1-son, 1-modda) bilan tasdiqlangan Sudyalar va ularning oila a’zolari pensiya ta’minoti shartlari, me’yorlari hamda tartibi to‘g‘risidagi nizomga o‘zgartirishlar va qo‘shimcha kiritilsin.

3. O‘zbekiston Respublikasi Moliya vazirligi manfaatdor vazirlik va idoralar bilan birgalikda o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

4. Mazkur qaror 2021-yil 1-yanvardan boshlab kuchga kiradi.

5. Ushbu qarorning bajarilishini nazorat qilish O‘zbekiston Respublikasi Bosh vazirining moliya-iqtisodiyot va kambag‘allikni qisqartirish masalalari bo‘yicha o‘rinbosari — O‘zbekiston Respublikasi iqtisodiy taraqqiyot va kambag‘allikni qisqartirish vaziri J.A. Qo‘chqorov zimmasiga yuklatilsin.

1. 3-bandning “v” kichik bandi “Yosh” ustunidagi “50 yoshdan 60 yoshgacha” so‘zlari “50 yosh va undan oshganda” so‘zlari bilan almashtirilsin.

2. 4-band quyidagi tahrirda bayon etilsin:

“4. Sudya lavozimidagi ish stajiga ega bo‘lgan va ushbu Nizomning 30-bandida nazarda tutilgan lavozimlarda ishlagan shaxslar ham, mazkur lavozimlarda uzluksiz bo‘lganligidan qat’i nazar, ushbu bandda belgilangan tartibda pensiya olish huquqiga ega”.

3. 30-bandda:

a) ikkinchi, uchinchi va beshinchi xatboshilar quyidagi tahrirda bayon etilsin:

“shaxsning O‘zbekiston Respublikasi Oliy Majlisi Qonunchilik palatasi, Senati, O‘zbekiston Respublikasi Prezidenti yoki Hukumatining qarorlari bilan lavozimda bo‘lgan davri;

shaxsning O‘zbekiston Respublikasi Oliy Majlisi Qonunchilik palatasi yoki Senati a’zosi etib saylangan (tayinlangan) davri;

harbiy xizmatchilar, ichki ishlar idoralari boshliqlar va oddiy xodimlar tarkibidan bo‘lgan shaxslarning yuridik ixtisoslik bo‘yicha xizmati davri, shuningdek, prokuratura idoralarida darajali unvonlar (harbiy unvonlar)ga ega xodimlarning ishlagan davri”;

b) quyidagi mazmundagi oltinchi va yettinchi xatboshilar qo‘shilsin:

“ilgari sudya lavozimida ishlagan shaxslarning O‘zbekiston Respublikasi Oliy sudi apparati rahbari, boshqarma boshlig‘i yoki Oliy sudning boshqaruv xodimlari tarkibiga kiritilgan boshqa lavozimlarda ishlagan davri;

O‘zbekiston Respublikasi Sudyalar oliy kengashi huzuridagi Sudyalar oliy maktabiga ishga jalb qilingan va malaka darajalariga ega bo‘lgan sudyalar va ularga tenglashtirilgan shaxslarning Sudyalar oliy maktabida ishlagan davri hisobga olinadi”;

v) oltinchi va yettinchi xatboshilar tegishlicha sakkizinchi va to‘qqizinchi xatboshilar deb hisoblansin.

4. 49-bandning uchinchi xatboshisidagi “3-bandi “g” kichik bandiga” so‘zlari “3-bandi “v” kichik bandiga” so‘zlari bilan almashtirilsin.