Respublika iste’mol bozorini yanada to‘ldirish, xususiy tadbirkorlikni rivojlantirishni rag‘batlantirish va milliy valyutaning ichki almashinuvchanligini kengaytirish maqsadida Vazirlar Mahkamasi qaror qiladi:

1. Belgilab qo‘yilsinki, 1995-yil 1-noyabrdan boshlab O‘zbekiston Respublikasi Markaziy banki patentlarini yuridik va jismoniy shaxslarga berish, shuningdek, patent egalariga so‘mlarni vakil qilingan banklar orqali erkin muomaladagi valyutaga almashtirish ular tomonidan respublikaga keltiriladigan tovarlar turlariga bog‘liq bo‘lmagan holda amalga oshiriladi. Vazirlar Mahkamasining 1995-yil 25-iyuldagi 287-son qarori bilan belgilangan ro‘yxatga muvofiq O‘zbekiston Respublikasiga import qilish (keltirish) taqiqlangan yoki zarur litsenziyalarsiz yoxud ruxsatnomalarsiz keltirilgan buyumlar bundan mustasno.

2. O‘zbekiston Respublikasi Markaziy banki, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari patent egalari sonini keskin ko‘paytirish va ularning respublikaga keltirilgan tovarlarni aholiga sotishdan olingan so‘mlardagi tushumlari o‘z vaqtida almashtirib berilishini ta’minlasinlar.

3. Vazirlar Mahkamasining 1994-yil 23-noyabrdagi 566-son qarori bilan tasdiqlangan, import qilinishi respublika valyuta bozorida imtiyozli almashtirish huquqini beruvchi oziq-ovqat va nooziq-ovqat tovarlar ro‘yxati (2, 3-ro‘yxatlar), Vazirlar Mahkamasining 1995-yil 23-martdagi 94-son qarorining 1 va 2-bandlari, shuningdek, Vazirlar Mahkamasining 1995-yil 19-apreldagi 135-son qaroriga 2-ilova o‘z kuchini yo‘qotgan deb hisoblansin.

4. Markaziy bank bir hafta muddatda o‘zining me’yoriy hujjatlarini ushbu qarorga muvofiqlashtirsin.

5. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosarlari B.S. Hamidov, M.Z. Usmonov va Markaziy bank Boshqaruvi raisi F.M. Mullajonov zimmasiga yuklansin.