O‘zbekiston Respublikasining 2020-yil 21-iyulda qabul qilingan “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi O‘RQ-629-son Qonuniga muvofiq, shuningdek, respublika hududlarida yo‘l harakati xavfsizligini ta’minlash, yo‘l-transport hodisalarining oldini olish, huquqbuzarliklarni o‘z vaqtida aniqlash va ularga barham berishni ta’minlaydigan yo‘l harakatini avtomatlashtirilgan tartibga solish tizimini kengaytirish, bu borada jamoatchilik nazoratini amalga oshirishda fuqarolarga qo‘shimcha qulayliklar yaratish maqsadida Vazirlar Mahkamasi qaror qiladi:

1. Vazirlar Mahkamasining “Yo‘l harakati xavfsizligi sohasidagi huquqbuzarliklarga qarshi kurashish samaradorligini oshirishga doir qo‘shimcha chora-tadbirlar to‘g‘risida” 2018-yil 20-sentabrdagi 747-son qaroriga ilovaga muvofiq o‘zgartirish va qo‘shimchalar kiritilsin.

2. O‘zbekiston Respublikasi Ichki ishlar vazirligi manfaatdor vazirliklar va idoralar bilan birgalikda o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

3. Mazkur qarorning bajarilishini nazorat qilish O‘zbekiston Respublikasi ichki ishlar vaziri P.R. Bobojonov zimmasiga yuklansin.

1. 1-band quyidagi tahrirda bayon qilinsin:

“1. Jismoniy va yuridik shaxslarning avtotransport vositalariga o‘rnatilgan videoregistratorlar, shuningdek, videokuzatuv va tasvirga olish texnika vositalari hamda mobil qurilmalar orqali qayd etilgan huquqbuzarlik holatlari to‘g‘risidagi videoyozuvlarni qabul qilish, ko‘rib chiqish hamda ularni taqdim etgan shaxslarni rag‘batlantirish tartibi to‘g‘risidagi nizom ilovaga muvofiq tasdiqlansin”.

2. 4-bandga quyidagi mazmundagi “a¹”-kichik band qo‘shilsin:

“a¹) 2021-yil 1-yanvardan boshlab videoregistratorlar bilan birga videokuzatuv va tasvirga olish texnika vositalari hamda mobil qurilmalar orqali qayd etilgan huquqbuzarlik holatlari aks etgan videoyozuvlar maxsus avtomatlashtirilgan foto va video qayd etish texnika vositalari orqali qayd etilgan videoyozuvlarga tenglashtiriladi hamda O‘zbekiston Respublikasining Ma’muriy javobgarlik to‘g‘risidagi kodeksida belgilangan tartibda ko‘rib chiqiladi”.

3. Qarorga ilovada:

a) Nomiga “videoregistratorlar” so‘zidan keyin “shuningdek, videokuzatuv va tasvirga olish texnika vositalari hamda mobil qurilmalar” so‘zlari qo‘shilsin;

b) 1-banddagi “videoregistratorlar (keyingi o‘rinlarda — videoregistratorlar deb ataladi)” so‘zlari “videoregistratorlar, shuningdek, videokuzatuv va tasvirga olish texnika vositalari hamda mobil qurilmalar (keyingi o‘rinlarda — videotexnika vositalari deb ataladi)” so‘zlari bilan almashtirilsin;

v) 2-bobning nomidagi “videoregistratorlar” so‘zi “videotexnika vositalari” so‘zlari bilan almashtirilsin;

g) 3-banddagi “videoregistratorlar” va “jarima.uz veb-sayti” so‘zlari tegishli ravishda “videotexnika vositalari” va “ejarima.uz veb-sayti” so‘zlari bilan almashtirilsin;

d) 4-bandning birinchi xatboshidagi “Videoregistrator” so‘zi “Videotexnika vositalari” so‘zlari bilan almashtirilsin;

e) 3-bob nomidagi “Videoregistratorlar” so‘zi “Videotexnika vositalari” so‘zlari bilan almashtirilsin;

j) 7-bandda:

“Jismoniy va yuridik shaxslarning avtotransport vositalariga o‘rnatilgan videoregistratorlar” so‘zlari “videotexnika vositalari” so‘zlari bilan almashtirilsin;

quyidagi mazmundagi ikkinchi xatboshi qo‘shilsin:

“Videotexnika vositalari orqali qayd etilgan huquqbuzarlik holatlari to‘g‘risidagi videoyozuvlarni qabul qilish, ko‘rib chiqish hamda ularni taqdim etgan shaxslarni rag‘batlantirish ushbu Nizomga ilovaga muvofiq sxema asosida amalga oshiriladi”;

z) 9-bandning birinchi xatboshidagi “videoregistratorlar” so‘zi “videotexnika vositalari” so‘zlari bilan almashtirilsin;

i) 10-banddagi “Videoregistratorlar” so‘zi “Videotexnika vositalari” so‘zlari bilan almashtirilsin.

k) Nizomga ilovada:

nomidagi “videoregistratorlar” so‘zi “videoregistratorlar, shuningdek, videokuzatuv va tasvirga olish texnika vositalari hamda mobil qurilmalar” so‘zlari bilan almashtirilsin;

matnidagi “Videoregistrator” so‘zi “Videotexnika vositalari” so‘zlari bilan almashtirilsin.