Respublikaning turli mintaqalari sharoitlarida manzarali bog‘dorchilikni rivojlantirishning yagona strategiyasini ishlab chiqish va amalga oshirish, tuproq-iqlim sharoitlarini hisobga olgan holda o‘stirishning yangi texnologiyalarini joriy etish, shuningdek manzarali o‘simliklar etishtirishga ixtisoslashayotgan xo‘jalik yurituvchi subyektlar faoliyatini muvofiqlashtirish maqsadida Vazirlar Mahkamasi qaror qiladi:

1. O‘zbekiston Respublikasi Qishloq va suv xo‘jaligi vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarining O‘zbekiston o‘rmon xo‘jaligi ilmiy-tadqiqot instituti negizida O‘zbekiston Respublikasi Qishloq va suv xo‘jaligi vazirligining O‘rmon xo‘jaligi bosh boshqarmasi huzurida Manzarali bog‘dorchilik va o‘rmon xo‘jaligi respublika ilmiy-ishlab chiqarish markazini tashkil etish to‘g‘risidagi taklifi qabul qilinsin.

2. Quyidagilar Manzarali bog‘dorchilik va o‘rmon xo‘jaligi respublika ilmiy-ishlab chiqarish markazining asosiy vazifalari etib belgilansin:

ichki va tashqi bozor ehtiyojini o‘rganish asosida respublika manzarali bog‘dorchiligini rivojlantirishning yagona strategiyasini ishlab chiqish va amalga oshirish;

manzarali o‘simliklar ko‘chatlarini o‘stirishning ilmiy asoslarini hamda istiqbolli texnologiyalarini ishlab chiqish va joriy etish;

manzarali o‘simliklar ko‘chatlarini sertifikatsiyalash va standartlashtirishning yagona tizimini ishlab chiqish va joriy qilishni tashkil etish;

mintaqalarning tuproq-iqlim sharoitlarini hisobga olgan holda manzarali o‘simliklarni rayonlashtirish bo‘yicha tavsiyalar ishlab chiqish;

turli xo‘jalik yurituvchi subyektlarga manzarali o‘simliklar o‘stirishda ilmiy-metodik va ishlab chiqarish yordami ko‘rsatish.

3. Quyidagilar:

Navoiy va Xorazm viloyatlari hokimliklari huzuridagi ixtisoslashtirilgan bog‘dorchilik va gulchilik korxonalari, shuningdek Nukus ixtisoslashtirilgan o‘rmon xo‘jaligi korxonasi hamda respublika viloyatlaridagi 1-ilovaga muvofiq o‘rmon xo‘jaliklarining ishlab chiqarish uchastkalari Manzarali bog‘dorchilik va o‘rmon xo‘jaligi respublika ilmiy-ishlab chiqarish markazi tasarrufiga;

tugatilayotgan O‘zbekiston o‘rmon xo‘jaligi ilmiy-tadqiqot institutining bolalar bog‘chasi Qishloq va suv xo‘jaligi vazirligi tasarrufiga berilsin.

4. Quyidagilar:

Qishloq va suv xo‘jaligi vazirligining O‘rmon xo‘jaligi bosh boshqarmasi huzuridagi Manzarali bog‘dorchilik va o‘rmon xo‘jaligi respublika ilmiy-ishlab chiqarish markazining tashkiliy tuzilmasi 2-ilovaga muvofiq;

Manzarali bog‘dorchilik va o‘rmon xo‘jaligi respublika ilmiy-ishlab chiqarish markazining xodimlarining cheklangan umumiy soni 64 nafar, shu jumladan boshqaruv xodimlari soni 7 nafar bo‘lgan ijro etuvchi apparati tuzilmasi 3-ilovaga muvofiq tasdiqlansin.

5. O‘zbekiston Respublikasi Qishloq va suv xo‘jaligi vazirligi bir oy muddatda:

Manzarali bog‘dorchilik va o‘rmon xo‘jaligi respublika ilmiy-ishlab chiqarish markazi ustavini belgilangan tartibda ishlab chiqsin va tasdiqlasin, shuningdek uning davlat ro‘yxatidan o‘tkazilishini ta’minlasin;

Navoiy va Xorazm viloyatlari hokimliklari bilan birgalikda ixtisoslashtirilgan bog‘dorchilik va gulchilik o‘rmon xo‘jaligi korxonalarining Manzarali bog‘dorchilik va o‘rmon xo‘jaligi respublika ilmiy-ishlab chiqarish markazi tarkibiga berilishini ta’minlasin.

6. Manzarali bog‘dorchilik va o‘rmon xo‘jaligi respublika ilmiy-ishlab chiqarish markazi hamda uning tarkibiga kiruvchi tashkilotlarning faoliyati xo‘jalik faoliyatidan olingan daromadlar, o‘rmon xo‘jaligi tadbirlariga budjetdan ajratilgan mablag‘lar hamda qonun hujjatlarida taqiqlanmagan boshqa manbalar hisobiga moliyalashtiriladi.

7. O‘zbekiston Respublikasi Qishloq va suv xo‘jaligi vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari ikki oy muddatda 2010-yilgacha bo‘lgan davrda manzarali bog‘dorchilikni rivojlantirishga doir aniq tadbirlarni ishlab chiqsinlar va tasdiqlasinlar.

8. O‘zbekiston Respublikasi Adliya vazirligi Qishloq va suv xo‘jaligi vazirligi bilan birgalikda bir oy muddatda qonun hujjatlariga ushbu qarordan kelib chiqadigan o‘zgartirish va qo‘shimchalar bo‘yicha Vazirlar Mahkamasiga takliflar kiritsin.

9. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov zimmasiga yuklansin.