O‘zbekiston Respublikasi Prezidentining “Raqamli iqtisodiyot va elektron hukumatni keng joriy etish chora-tadbirlari to‘g‘risida” 2020-yil 28-apreldagi PQ-4699-son qarori ijrosini ta’minlash, shuningdek, zamonaviy axborot texnologiyalarini joriy etish orqali davlat boshqaruvi organlari, mahalliy ijro etuvchi hokimiyat organlari, davlat korxonalari, muassasalari, tashkilotlari, sud va huquqni muhofaza qiluvchi organlar (keyingi o‘rinlarda — davlat organlari va tashkilotlari) tomonidan yuridik va jismoniy shaxslar nomiga yo‘llanuvchi xat-xabarlar, xabarnomalar, chaqiruv qog‘ozlari va boshqa yuridik hujjatlarni pochta aloqasi obyektlari tarmog‘i orqali yetkazib berish jarayonini takomillashtirish maqsadida Vazirlar Mahkamasi qaror qiladi:

1. O‘zbekiston Respublikasi Prezidentining “Raqamli iqtisodiyot va elektron hukumatni keng joriy etish chora-tadbirlari to‘g‘risida” 2020-yil 28-apreldagi PQ-4699-son qaroriga muvofiq O‘zbekiston Respublikasi Axborot texnologiyalari va kommunikatsiyalarini rivojlantirish vazirligi tomonidan Davlat organlari va tashkilotlari tomonidan yo‘llanuvchi xat-xabarlarni yetkazib berish, yetkazilganligini tasdiqlash, ma’lumotlarni saqlash va hisobga olishning yagona milliy tizimi (keyingi o‘rinlarda — Yagona milliy tizim) yaratilganligi ma’lumot uchun qabul qilinsin.

2. Quyidagilarni nazarda tutuvchi Davlat organlari va tashkilotlari tomonidan yo‘llanuvchi xat-xabarlarni yetkazib berish, yetkazilganligini tasdiqlash, ma’lumotlarni saqlash va hisobga olishning yagona milliy tizimi to‘g‘risidagi nizom ilovaga muvofiq tasdiqlansin:

xat-xabarlarni yetkazib berish, yetkazilganligini tasdiqlash, ma’lumotlarni saqlash va hisobga olishning yagona milliy tizimi bo‘yicha umumiy qoidalar;

yagona milliy tizim orqali pochta jo‘natmalarini yuborish tartibi;

yagona milliy tizim orqali pochta jo‘natmalarini yetkazish tartibi;

axborot xavfsizligini ta’minlash tartibi.

3. “O‘zbekiston pochtasi” aksiyadorlik jamiyati Yagona milliy tizim operatori etib belgilansin.

4. O‘zbekiston Respublikasi Axborot texnologiyalari va kommunikatsiyalarini rivojlantirish vazirligi:

bir oy muddatda Yagona milliy tizimdan foydalanilgan holda pochta jo‘natmalarini yetkazib berish nazorat muddatlarini tasdiqlasin;

doimiy ravishda pochta jo‘natmalarining xavfsizligi va yozishmalar siri ta’minlangan holda qabul qiluvchilarga belgilangan muddatlarida yetkazib berilishini nazoratga olsin.

5. Vazirliklar, idoralar, mahalliy ijro etuvchi hokimiyat organlari, boshqa davlat organlari va tashkilotlari:

O‘zbekiston Respublikasi Axborot texnologiyalari va kommunikatsiyalarini rivojlantirish vazirligi bilan birgalikda idoraviy axborot tizimlarini Yagona milliy tizim bilan integratsiya qilish orqali jismoniy va yuridik shaxslar nomiga pochta jo‘natmalarini ushbu tizimdan foydalanilgan holda yuborishni joriy etsin;

har yili kelgusi yil uchun xarajatlar smetasini shakllantirishda pochta jo‘natmalarini Yagona milliy tizimdan foydalangan holda yuborish uchun mablag‘lar nazarda tutilishini ta’minlasin;

yuridik va jismoniy shaxslar nomiga yo‘llanuvchi huquqiy jihatdan ahamiyatli bo‘lmagan xat-xabarlarni yetkazib berish jarayonini bosqichma-bosqich to‘liq elektron shaklga o‘tkazish choralarini ko‘rsin.

6. O‘zbekiston Respublikasi Axborot texnologiyalari va kommunikatsiyalarini rivojlantirish vazirligi manfaatdor vazirliklar va idoralar bilan birgalikda o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

7. Ushbu qarorning bajarilishini nazorat qilish O‘zbekiston Respublikasi Bosh vazirining maslahatchisi — IT-texnologiyalar, telekommunikatsiyalar va innovatsion faoliyatni rivojlantirish masalalari departamenti boshlig‘i O.M. Umarov hamda O‘zbekiston Respublikasi axborot texnologiyalari va kommunikatsiyalarini rivojlantirish vaziri Sh.M. Sadikov zimmasiga yuklansin.

1. Ushbu Nizom davlat boshqaruvi organlari, mahalliy ijro etuvchi hokimiyat organlari, davlat tashkilotlari, sud va huquqni muhofaza qiluvchi organlar (keyingi o‘rinlarda — davlat organlari va tashkilotlari) tomonidan jismoniy va yuridik shaxslar nomiga yo‘llanuvchi xat-xabarlar, xabarnomalar, chaqiruv qog‘ozlari va boshqa yuridik hujjatlarni (keyingi o‘rinlarda — pochta jo‘natmalari) Yagona milliy tizimdan foydalanilgan holda pochta aloqasi obyektlari tarmog‘i orqali yetkazib berish tartibini belgilaydi.

2. Ushbu Nizom talablari davlat organlari va tashkilotlari tomonidan o‘zaro almashinuvchi, shu jumladan, “Ijro.gov.uz” ijro intizomi idoralararo yagona elektron tizimi orqali elektron almashinuvchi xat-xabarlar va hujjatlarga, sud va huquqni muhofaza qiluvchi organlarning jinoyat, ma’muriy, fuqarolik hamda iqtisodiy ishlar, tergovga qadar tekshiruv, xizmat tekshiruvi va shu kabi to‘plangan hujjatlariga hamda davlat sirlari yoki tarqatilishi qonun bilan cheklanuvchi boshqa ma’lumotlarga ega hujjatlarga, shuningdek, xorijiy davlatlarga yo‘llanadigan pochta jo‘natmalariga, bundan tashqari yuridik va jismoniy shaxslarning o‘z xohishlariga ko‘ra javob xatlarini ularning elektron pochta manziliga yuborilishini so‘rab qilgan murojaatlariga nisbatan tatbiq etilmaydi.

3. Mazkur Nizomda quyidagi asosiy tushunchalar qo‘llaniladi:

pochta aloqasi bog‘lamalari — pochta yo‘nalishlarining kesishgan yoki tutashgan punktida joylashgan, biriktirilgan hududda pochta jo‘natmalarini jo‘natish va yetkazib berish (topshirish), pochtaga ishlov berish va uning almashinuvi bo‘yicha o‘zaro bog‘liq vazifalar bajarilishini ta’minlovchi pochta aloqasi obyekti;

pochta aloqasi obyektlari — pochta aloqasi operatorlarining alohida bo‘linmalari (pochtamtlar, pochta aloqasi bog‘lamalari, bo‘limlari, punktlari, shuningdek, boshqa bo‘linmalar);

Yagona milliy tizim — xat-xabarlar, xabarnomalar, chaqiruv qog‘ozlari va boshqa yuridik hujjatlarning elektron tarzda qabul qilinishi hamda tegishli pochta aloqasi bog‘lamasi tomonidan qog‘oz ko‘rinishida chop etilib, ko‘rsatilgan manzillar bo‘yicha pochta aloqasi obyektlari tarmog‘i orqali yetkazib berilishini, yetkazilganligini tasdiqlashni, ma’lumotlarni saqlash va hisobga olishni ta’minlovchi axborot tizimi;

qabul qiluvchi — xat-xabarlar, xabarnomalar, chaqiruv qog‘ozlari va boshqa yuridik hujjatlar yuborilgan yuridik yoki jismoniy shaxs.

4. Davlat organlari va tashkilotlari tomonidan quyidagi pochta jo‘natmalari Yagona milliy tizim orqali yo‘llanadi:

yuridik va jismoniy shaxslar nomiga yuboriluvchi xat-xabarlar, shu jumladan, ular tomonidan yo‘llangan murojaatlarga yozilgan javob xatlari;

to‘lov xabarnomalari va bildirishnomalar;

chaqiruv qog‘ozlari, sud xabarnomalari va protsessual hujjatlar;

davlat xizmatlarini ko‘rsatishning natijalari;

ma’muriy huquqbuzarlik sodir etganlik uchun jarimaga tortish to‘g‘risidagi qarorlar.

5. Yagona milliy tizimdan foydalanilgan holda pochta jo‘natmalarini yetkazib berish va tizim orqali ko‘rsatiluvchi qo‘shimcha xizmatlar Yagona milliy tizim operatori tomonidan shartnoma asosida amalga oshiriladi.

6. Pochta jo‘natmalarini Yagona milliy tizim orqali yetkazib berish ushbu Nizomga ilovaga muvofiq sxema bo‘yicha amalga oshiriladi.

7. Davlat organlari va tashkilotlarida mavjud axborot tizimlarini, shu jumladan, elektron hujjat aylanishi tizimlarini Yagona milliy tizimga integratsiya qilish orqali pochta jo‘natmalarini yuborish amalga oshiriladi.

Yagona milliy tizim, shuningdek, “Ijro.gov.uz” ijro intizomi idoralararo yagona elektron tizimiga integratsiya qilinadi, davlat organlari va tashkilotlariga ushbu tizimdan foydalangan holda Yagona milliy tizim orqali pochta jo‘natmalarini yuborish imkoniyati yaratiladi.

8. Davlat organlari va tashkilotlarida pochta jo‘natmalarini elektron shaklda Yagona milliy tizim orqali yuborishning imkoniyati bo‘lmagan hollarda ushbu davlat organlari va tashkilotlarining xohishiga ko‘ra pochta jo‘natmalari Yagona milliy tizim operatorining pochta aloqasi obyektlarida qog‘oz ko‘rinishda qabul qilinishi mumkin. Qog‘oz ko‘rinishida qabul qilingan pochta jo‘natmalari Yagona milliy tizim operatori tomonidan qo‘shimcha haq evaziga elektron shaklga o‘tkazilib Yagona milliy tizimga kiritiladi.

9. Yagona milliy tizimga elektron tarzda tushgan (o‘zaro kelishilgan formatdagi) pochta jo‘natmalarini yuklash va keyingi ishlov berish jarayonida davlat organlari va tashkilotlariga berilgan shtrix koddan foydalaniladi, shuningdek, pochta jo‘natmalari avtomatik ravishda tegishli manzillar bo‘yicha pochta aloqasi bog‘lamalariga tarqatiladi.

10. Tegishli pochta aloqasi bog‘lamalariga elektron shaklda tushgan pochta jo‘natmalari qog‘oz ko‘rinishida chop etilib, boshqa pochta jo‘natmalaridan farqlanib turadigan maxsus pochta konvertiga joylashtiriladi yoki konvertsiz ko‘rsatilgan manzillar bo‘yicha jo‘natiladi va qabul qiluvchilarga nazorat muddatlarida yetkazib beriladi.

11. Pochta jo‘natmalarini qabul qiluvchilarga topshirish qonunchilikda belgilangan talablarga muvofiq amalga oshiriladi.

12. Agar qabul qiluvchi uning nomiga keladigan pochta jo‘natmalarini elektron shaklda olish to‘g‘risida pochta aloqasi obyektlariga yozma ravishda murojaat qilgan bo‘lsa, u holda pochta jo‘natmasi elektron shaklda qabul qiluvchi tomonidan ko‘rsatilgan elektron pochta manziliga yuborilishi mumkin.

13. Pochta jo‘natmalari yetkazib berilganligi yoki yetkazib berilmaganligi sabablari va boshqa ma’lumotlar tegishli pochta aloqasi bog‘lamasi tomonidan Yagona milliy tizimga muntazam ravishda kiritilib boriladi.

14. Har bir pochta jo‘natmasi to‘g‘risidagi ma’lumot unga taqdim qilingan shtrix kod orqali Yagona milliy tizimdan onlayn kuzatib borilishi mumkin.

15. Qog‘oz ko‘rinishida chop etilgan pochta jo‘natmalarini qabul qiluvchilarga yetkazib berishning imkoniyati bo‘lmagan hollarda ushbu pochta jo‘natmalari pochta aloqasi bog‘lamasida olti oy davomida saqlanadi.

Saqlash muddati tugaganidan so‘ng hujjatlar ularni jo‘natgan korxonalar, muassasalar va tashkilotlarning talablariga binoan qaytariladi, talab qilib olinmagan xat-xabarlar va hujjatlar tegishli dalolatnoma tuzilib, yo‘q qilinadi.

16. Davlat organlari va tashkilotlari tomonidan elektron shaklda yuborilgan pochta jo‘natmalari qachon va kimga topshirilganligi yoki topshirilmaganligi sabablari hamda pochta jo‘natmalarining elektron shakldagi ma’lumotlari Yagona milliy tizimda bir yil davomida saqlanadi.

Tizimda saqlash muddati tugaganidan so‘ng ushbu pochta jo‘natmalarining elektron shakldagi ma’lumotlari dasturiy ravishda arxivlanib, belgilangan muddatda saqlash uchun idoraviy arxivga topshiriladi.

17. Yagona milliy tizim operatori tizim orqali pochta aloqasi xizmatlarini ko‘rsatishda foydalaniladigan axborot tizimlari va axborot resurslarining axborot xavfsizligini, tizimda shaxsga doir ma’lumotlar, shuningdek, pochta jo‘natmalaridagi ma’lumotlarning muhofaza qilinishini ta’minlaydi.

18. Yagona milliy tizimda saqlanadigan pochta jo‘natmalaridan faqat ularni yuborgan davlat organlari va tashkilotlarining, shuningdek, qabul qiluvchining roziligi bilan ushbu pochta jo‘natmalariga ishlov berish, ularni yuborish va olish uchun foydalaniladi, bundan qonunchilik hujjatlarida belgilangan holatlar mustasno.

19. Ushbu Nizom talablarini buzganlikda aybdor bo‘lgan shaxslar qonunchilik hujjatlarida belgilangan tartibda javob beradilar.

20. Ushbu Nizom bilan tartibga solingan masalalar bo‘yicha paydo bo‘ladigan nizolar qonunchilik hujjatlarida belgilangan tartibda hal etiladi.