O‘zbekiston Respublikasi Prezidentining 1996-yil 31-oktabrdagi “Inson huquqlari bo‘yicha O‘zbekiston Respublikasi Milliy markazini tuzish to‘g‘risida”gi Farmoniga muvofiq Vazirlar Mahkamasi qaror qiladi:

1. Inson huquqlari bo‘yicha O‘zbekiston Respublikasi Milliy markazi to‘g‘risidagi Nizom 1-ilovaga muvofiq:

2. Maqomi, mehnatga haq to‘lash, ijtimoiy-maishiy, tibbiy va transport xizmati ko‘rsatish shartlari borasida Inson huquqlari bo‘yicha O‘zbekiston Respublikasi Milliy markazi direktori O‘zbekiston Respublikasi vaziriga, direktor o‘rinbosari — O‘zbekiston Respublikasi vazirining birinchi o‘rinbosariga tenglashtirilsin.

Milliy markaz xodimlariga yagona tarif setkasi va mehnatga haq to‘lash shartlari bo‘yicha davlat hokimiyati va boshqaruvining rahbar xodimlari, mutaxassislari va xizmatchilari uchun belgilangan razryadlar joriy etilsin.

Toshkent shahar hokimligi 1997-yil 1-yanvargacha O‘zbekiston Xalq demokratik partiyasi Markaziy kengashi bilan kelishgan holda Inson huquqlari bo‘yicha O‘zbekiston Respublikasi Milliy markazini Mustaqillik maydoni, 5-uy, 3-korpusga joylashtirish masalasini hal qilsin, bino va unga tutash hududni rekonstruksiya qilish va tuzatishni amalga oshirsin.

4. O‘zbekiston Respublikasi Moliya vazirligi:

Inson huquqlari bo‘yicha O‘zbekiston Respublikasi Milliy markazini joylashtirish, tuzatish ishlarini amalga oshirish, Milliy markazni ofis mebeli, kompyuter texnikasi, kichik bosmaxona bilan ta’minlash, o‘zbek, ingliz va rus tillarida “O‘zbekistonda demokratiyalash va inson huquqlari” jurnalini va boshqa bosma mahsulotlarni nashr etish, qog‘oz sotib olish bilan bog‘liq xarajatlarni qoplash uchun mablag‘ ajratsin;

xorijiy ekspertlarni kontrakt bo‘yicha ishga taklif etish, Inson huquqlari bo‘yicha Milliy markaz mutaxassislarining chet ellarda tajriba orttirishi, malaka oshirishi, ularning xalqaro anjumanlarda ishtirok etishi, shuningdek davriy nashrlarga obuna bo‘lish, kompyuter dasturlari, xorijiy mamlakatlarda nashr etiladigan adabiyotlarni sotib olish, “Internet” xalqaro tarmog‘i hamda boshqa axborot-kompyuter tarmoqlari xizmatidan foydalanish uchun har yili milliy va xorijiy valyutada zarur mablag‘lar ajratsin.

5. O‘zbekiston Respublikasi Aloqa vazirligi Inson huquqlari bo‘yicha O‘zbekiston Respublikasi Milliy markazini telefon va telefaks, shu jumladan hukumat ATS aloqasi bilan ta’minlasin.

6. Moliya vazirligi, “Toshshaharyo‘lovchitrans” uyushmasi Inson huquqlari bo‘yicha O‘zbekiston Respublikasi Milliy markaziga xizmat ko‘rsatish uchun ikkita yengil avtomobil xarajatlariga zarur limitlar va bitta mikroavtobus xarid qilishga mablag‘ ajratsinlar.

7. O‘zbekiston Respublikasi Davlat matbuot qo‘mitasi:

Inson huquqlari bo‘yicha O‘zbekiston Respublikasi Milliy markazini respublikada inson huquqlari bo‘yicha nashr etiladigan bosma asarlar va kitob mahsulotlarining nazorat nusxalarini (1 nusxa) bepul oladigan tashkilotlar ro‘yxatiga kiritsin;

Inson huquqlari bo‘yicha O‘zbekiston Respublikasi Milliy markaziga “O‘zbekistonda demokratiyalash va inson huquqlari” jurnalini va inson huquqlari sohasida boshqa bosma mahsulotlarni nashr etishda ko‘maklashsin.

8. Tashqi ishlar vazirligi va Adliya vazirligi Inson huquqlari bo‘yicha O‘zbekiston Respublikasi Milliy markaziga inson huquqlari sohasidagi xorijiy va xalqaro tashkilotlar bilan aloqa o‘rnatishda yordam ko‘rsatsinlar.

9. O‘zbekiston Respublikasi Adliya vazirligi, Tashqi ishlar vazirligi va Ichki ishlar vazirligi, Xalq ta’limi vazirligi, Oliy va o‘rta maxsus ta’lim vazirligi, Prokuraturasi va Oliy Sudi, Milliy axborot agentligi, “O‘zteleradio” kompaniyasi Inson huquqlari bo‘yicha O‘zbekiston Respublikasi Milliy markaziga inson huquqlarini qo‘llab-quvvatlash va himoya qilish masalalariga oid ma’lumotlar, takliflar, xulosalar va boshqa zarur materiallarni taqdim etsinlar.

10. Mazkur qarorning bajarilishini nazorat qilish O‘zbekiston Respublikasi Prezidentining Davlat maslahatchisi B.H. G‘ulomov zimmasiga yuklansin.

1. Inson huquqlari bo‘yicha O‘zbekiston Respublikasi Milliy markazi (keyingi o‘rinlarda Markaz deb ataladi) xalqaro huquqning inson huquqlari va erkinliklari sohasida umume’tirof etilgan prinsiplari va me’yorlarini, O‘zbekiston Respublikasi Konstitutsiyasi qoidalarini va qonunlarini, O‘zbekiston Respublikasi Prezidentining farmonlarini, davlat siyosatini amalga oshirish bo‘yicha davlatga qarashli tahlil, maslahat, idoralararo muvofiqlashtirish organi hisoblanadi.

2. Markaz o‘z faoliyatida O‘zbekiston Respublikasi Konstitutsiyasiga va qonunlariga, O‘zbekiston Respublikasi Vazirlar Mahkamasining qarorlariga, shuningdek xalqaro huquqning umume’tirof etilgan prinsiplari va me’yorlariga amal qiladi, o‘z faoliyatini mazkur Nizom bilan belgilangan vazifalar va funksiyalardan kelib chiqqan holda amalga oshiradi.

3. Quyidagilar Markazning asosiy vazifalari va funksiyalari hisoblanadi:

fuqarolarning huquq va erkinliklari sohasida milliy harakat rejasini ishlab chiqish;

inson huquqlari sohasida O‘zbekiston Respublikasining xalqaro va milliy tashkilotlar bilan hamkorligini rivojlantirish;

O‘zbekiston Respublikasida inson huquqlariga rioya etilishi va bu huquqlarning muhofaza qilinishi yuzasidan milliy ma’ruzalar tayyorlash;

inson huquqlarini muhofaza qilish va qo‘shma loyihalarni amalga oshirish masalalari bo‘yicha xalqaro va hukumatga qarashli bo‘lmagan tashkilotlar bilan o‘zaro hamkorlik qilish;

inson huquqlari sohasida davlatlararo ikki tomonlama va ko‘p tomonlama bitimlarni ishlab chiqish va ekspert baholash hamda ularni kelishishda qatnashish;

davlat hokimiyati va boshqaruv organlariga, shuningdek inson huquqlari bo‘yicha jamoat birlashmalariga maslahatlar berib turish faoliyatini amalga oshirish;

davlat organlarining inson huquqlarini rag‘batlantirish va muhofaza qilish sohasida ta’lim berish, targ‘ibot, o‘quv-uslubiy adabiyotlarni nashr etish borasidagi faoliyatini muvofiqlashtirish;

fuqarolarning huquq va erkinliklarini amalga oshirish va rivojlantirish bo‘yicha ma’lumotlarning axborot bazasini barpo etish;

fuqarolarning huquq va erkinliklarini rivojlantirish yuzasidan sotsiologik tadqiqotlar o‘tkazish va ularda qatnashish;

davlat organlarining inson huquqlariga rioya etish va bu huquqlarni muhofaza qilish sohasidagi faoliyatini takomillashtirish yuzasidan ularga tavsiyalar tayyorlash;

inson huquqlari va erkinliklarini muhofaza qilish bo‘yicha milliy dasturlarni ishlab chiqish;

aholining huquqiy madaniyatini shakllantirish strategiyasini ishlab chiqish;

inson huquqlarini rag‘batlantirish va muhofaza qilish sohasida jamoatchilik tashabbuslarini rag‘batlantirish va muvofiqlashtirish;

inson huquqlari bo‘yicha adabiyotlar, teleko‘rsatuvlar va radioeshittirishlar, shuningdek “O‘zbekistonda demokratiyalash va inson huquqlari” davriy nashrini tayyorlash va chiqarish;

milliy, mintaqaviy va xalqaro darajalarda inson huquqlariga rioya etish va ularni muhofaza qilish sohasida ilmiy tadqiqotlar tashkil etish;

inson huquqlari bo‘yicha o‘qitish, dasturlar tayyorlash, konferensiyalar, seminarlar va o‘quv kurslarini birgalikda tashkil etish sohasida xalqaro hamkorlikni amalga oshirish;

inson huquqlari sohasida hukumatga qarashli bo‘lmagan jamoat, huquqni muhofaza qilish tashkilotlari va siyosiy partiyalar bilan hamkorlik qilish;

O‘zbekiston Respublikasi Hukumatining insonning huquqlari va asosiy erkinliklariga rioya qilish, muhofaza qilish va rag‘batlantirish bo‘yicha faoliyati to‘g‘risida aholini, shuningdek xalqaro jamoatchilikni ommaviy axborot vositalari orqali xabardor qilish.

4. Markaz quyidagi huquqlarga egadir:

inson huquqlari bo‘yicha xalqaro va xorijiy milliy tashkilotlar bilan hamkorlik qilish;

inson huquqlari to‘g‘risida axborot tayyorlash va tarqatish masalalari bo‘yicha xorijiy davlatlarning vakolatxonalari, xalqaro tashkilotlar bilan, O‘zbekiston Respublikasida akkreditatsiya qilingan va shu erdagi missiyalar bilan bevosita o‘zaro hamkorlik qilish;

davlat va jamoat birlashmalariga, O‘zbekiston Respublikasining chet eldagi vakolatxonalariga so‘rovlar yuborish hamda inson huquqlari sharoitlarini rag‘batlantirish va muhofaza qilish bo‘yicha axborot, taklif, xulosa va boshqa zarur materiallarni majburiy tartibda olish;

inson huquqlarini muhofaza qilishning ahvolini tadqiq etish bo‘yicha muvofiqlashtirish kengashi va boshqa kengashlar, ekspert komissiyalari tashkil etish;

inson huquqlari sohasida axborot-tahlil materiallari tayyorlash bo‘yicha olimlar, mutaxassislardan vaqtinchalik ishchi guruhlar tashkil etish;

inson huquqlari sohasidagi takliflarni maslahatlashish, o‘rganish va tayyorlash uchun ham Vatanimiz, ham chet el olimlari, mutaxassislari va ekspertlarini jalb etish;

inson huquqlari sharoitlarini rag‘batlantirish va muhofaza qilish masalalari bo‘yicha dasturlar ishlab chiqishga ko‘maklashish;

jahon hamjamiyatida O‘zbekiston Respublikasida inson huquqlari to‘g‘risidagi axborotni nashr etish va tarqatish;

O‘zbekiston Respublikasining BMTdagi vakolatxonasidan va boshqa xalqaro tashkilotlardan inson huquqlari bo‘yicha masalalarning ko‘rib chiqilishi va qabul qilingan qarorlar to‘g‘risidagi axborotlarni majburiy tartibda olish;

xalqaro va milliy huquqiy muhofaza qilish tashkilotlari bilan zarur axborotlarni ayirboshlash;

inson huquqlari bo‘yicha xalqaro anjumanlarda qatnashish, Markaz mutaxassislarini chet elga xizmat safariga va o‘qishga yuborish;

O‘zbekiston Respublikasining qonunlari va normativ hujjatlarini, davlat hokimiyati va boshqaruv organlari, vazirliklar, davlat qo‘mitalaridan zarur yo‘riqnoma, hisobot, axborot va tahliliy materiallarni majburiy tartibda tekin olish.

5. Markaz yuridik shaxs hisoblanadi, o‘z nomi yozilgan muhrga, shtamplariga, blanklarga va belgilangan tartibda ro‘yxatdan o‘tkazilgan boshqa rekvizitlariga ega bo‘ladi.

Markaz o‘z faoliyatini ta’minlash uchun O‘zbekiston Respublikasining banklarida va chet elda milliy va xorijiy valyutada schyotlar ochishi mumkin.

6. Markaz respublika budjetidan ajratiladigan mablag‘lardan, shuningdek turli ixtiyoriy badallardan ta’minlanadigan davlat notijorat muassasasi hisoblanadi,

7. Aniq muammolarni hal etish uchun tashkil etiladigan bo‘limlar va kotibiyat Markazning asosiy tarkibiy bo‘linmalari hisoblanadi.

Markaz tuzilmasida kutubxona, ilmiy-axborot fondi, tahririyat nashriyot bo‘limi faoliyat ko‘rsatadi.

Markaz faoliyati doirasida Markaz tomonidan ta’sis etiladigan tahrir hay’ati va davriy nashrlar tahririyati tuziladi.

8. Markazga O‘zbekiston Respublikasi Prezidentining Farmoni bilan tayinlanadigan va ozod etiladigan direktor va uning O‘zbekiston Respublikasi Vazirlar Mahkamasi tomonidan tayinlanadigan va ozod etiladigan o‘rinbosari boshchilik qiladi.

Markaz direktori maqomi, mehnatga haq to‘lash, ijtimoiy-maishiy ta’minot, tibbiy va transport xizmati ko‘rsatish sharoitlari bo‘yicha O‘zbekiston Respublikasi vaziriga, direktor o‘rinbosari — O‘zbekiston Respublikasi vazirining birinchi o‘rinbosariga tenglashtiriladi.

9. Markaz direktori:

Markaz faoliyatiga rahbarlik qiladi;

Oliy Majlis palatalari qo‘mitalari va komissiyalari, Vazirlar Mahkamasi bo‘limlari, vazirliklar va idoralar bilan o‘zaro hamkorlik qiladi hamda davlat hokimiyati va boshqaruvining barcha respublika va mahalliy organlarida, xorijiy mamlakatlarning inson huquqlari masalalari bo‘yicha xalqaro va milliy tashkilotlarida Markaz nomidan vakillik qiladi;

Oliy Majlis palatalari majlislarida, palatalar qo‘mitalari va komissiyalarining, Vazirlar Mahkamasining, vazirliklar va idoralar hay’atlarining, Fanlar akademiyasi Prezidiumining, ilmiy va o‘quv yurtlari ilmiy kengashlarining inson huquqlari masalalari bo‘yicha majlislarida qatnashadi;

Markaz vakolatiga taalluqli masalalar bo‘yicha qarorlar qabul qiladi;

Markaz bo‘linmalari bajarishi majburiy bo‘lgan buyruqlar va farmoyishlar chiqaradi, ko‘rsatmalar beradi;

xorijiy davlatlar va xalqaro tashkilotlar vakillari bilan muzokaralar olib boradi;

Markaz zimmasiga yuklangan vazifalarning bajarilishi va uning o‘z funksiyalarini amalga oshirishi uchun shaxsan javob beradi, xizmatlar rahbarlarining javobgarligi darajasini belgilaydi;

Markaz xarajatlari smetasini tasdiqlaydi;

belgilangan xodimlar soni va ish haqi fondi doirasida Markazning shtatlar jadvalini tasdiqlaydi;

Markaz mutaxassislarini xorijiy mamlakatlarga xizmat safarlariga yuborish to‘g‘risida qaror qabul qiladi;

Markazning tarkibiy bo‘linmalari to‘g‘risidagi nizomni tasdiqlaydi;

Markaz xodimlari o‘rtasida lavozim vazifalarini taqsimlaydi;

Markaz nomidan shartnomalar, bitimlar, shu jumladan mehnat bo‘yicha ham, tuzadi;

mehnat qonunchiligi normalariga binoan Markaz xodimlarini ishga qabul qiladi va ishdan bo‘shatadi;

Markaz xodimlarini moddiy rag‘batlantirish va taqdirlash shaklini aniqlaydi, Markazning yuqori malakali mutaxassislariga va ma’muriy xodimlariga moddiy rag‘batlantirish maxsus fondi hisobidan tarif stavkasining 100 foizigacha miqdorda har yillik ustama belgilaydi;

inson huquqlari sohasida tadqiqotlarni tashkil etish uchun konsultantlar, ekspertlar va mutaxassislarni, shu jumladan xorijiy mamlakatlardan, jalb etishning turli iqtisodiy shakllaridan, chunonchi, xorijiy mutaxassislar uchun kontraktlar bo‘yicha erkin muomaladagi valyutada haq to‘lash shaklidan foydalanadi;

Markaz mablag‘larini tasarruf etadi, mol-mulkni boshqarish bo‘yicha qarorlar qabul qiladi, moliya, to‘lov-hisob-kitob hujjatlarini va boshqa hujjatlarni imzolaydi, ishonchnomalar beradi;

Markaz faoliyatining boshqa masalalarini ko‘rib chiqadi va hal qiladi.

10. Direktor o‘rinbosari Markaz faoliyatining eng muhim yo‘nalishlariga tashkiliy va uslubiy rahbarlikni amalga oshiradi, o‘ziga biriktirilgan tarkibiy bo‘linmalar ishiga rahbarlik qiladi.

11. Markazning mol-mulki asosiy fondlar (binolar, inshootlar, asbob-uskunalar, transport vositalari va shu kabilar)dan, aylanma mablag‘lardan, shuningdek mablag‘ bilan ta’minlashning barcha manbalari hisobiga sotib olingan moliyaviy resurslar va boshqa moddiy boyliklardan iborat bo‘ladi.

Markaz mol-mulkining qiymati uning mustaqil balansida aks ettiriladi.

12. Markaz mablag‘lari:

Markazning ustavdagi faoliyatini amalga oshirish uchun zarur bo‘lgan budjet ajratmalari;

O‘zbekiston Respublikasi qonun hujjatlari bilan taqiqlanmagan boshqa manbalar hisobiga shakllanadi.

13 Markaz faoliyatidan olingan daromadlarga, shuningdek xayriya, homiylik va xolisona tushumlar hisobiga sotib olingan mol-mulklar Markazning o‘z mulki hisoblanadi.

14. Markaz xorijiy mamlakatlarga jo‘nab ketayotgan o‘z xodimlariga xizmat safari va boshqa xarajatlarni xorijiy valyutada to‘lash huquqiga ega.

15. Markaz asosiy fondlarni va aylanma mablag‘larni, boshqa moddiy boyliklarni yuridik shaxslarga ijaraga berish va sotish, shuningdek ularni qonunda belgilangan tartibda balansdan chiqarish huquqiga ega.

16. Markaz o‘z majburiyatlari bo‘yicha o‘ziga biriktirilgan, amaldagi qonunchilikka muvofiq to‘lov undirib olinishi mumkin bo‘lgan mol-mulk bilan javob beradi.

17. Majburiy to‘lovlar to‘langandan keyin Markaz ixtiyorida qoladigan mablag‘lar Markazning moddiy-texnika bazasini mustahkamlashga yo‘naltiriladi.

18. Markaz o‘z faoliyati natijalarining operativ va buxgalteriya hisobini amalga oshiradi, statistik hisobotni yuritadi, hisobot ma’lumotlarining va balans hisob-kitoblarining to‘g‘riligini ta’minlaydi.

19. Markazni tugatish yoki qayta tashkil qilish (qo‘shish, birlashtirish, bo‘lish, ajratish, qayta barpo etish) O‘zbekiston Respublikasi Prezidenti qaroriga binoan amalga oshiriladi.