Qishloq xo‘jaligidagi iqtisodiy islohotlarni yanada chuqurlashtirish, sut sektorini jadal rivojlantirish, fermer va dehqon xo‘jaliklari, sut mahsulotlarini qayta ishlash korxonalarining moliyaviy barqarorligini oshirish, shuningdek, xalqaro qishloq xo‘jaligini rivojlantirish jamg‘armasi bilan hamkorlikni kengaytirish maqsadida:

1. Quyidagilar inobatga olinsin:

2015-yil 15-sentabrda Xalqaro qishloq xo‘jaligini rivojlantirish jamg‘armasi (keyingi o‘rinlarda — XQXRJ) Boshqaruv kengashi O‘zbekiston Respublikasiga 17,0 million maxsus qarz olish huquqlari (keyingi o‘rinlarda — MQOH), ya’ni 23,87 million AQSH dollariga ekvivalent miqdorda kredit ajratishni ma’qullaganligi, ushbu kreditning qaytarish muddati 25 yil bo‘lib, shundan 5 yili imtiyozli davr hisoblanadi. Shuningdek, O‘zbekistonning sut sanoatida qo‘shilgan qiymat zanjirini rivojlantirish loyihasi (keyingi o‘rinlarda — loyiha) uchun 0,5 million MQOH, ya’ni 0,7 million AQSH dollariga ekvivalent grant ajratish ham tasdiqlandi;

Loyihaning umumiy qiymati 40,567 million AQSH dollariga ekvivalent bo‘lib, shundan O‘zbekiston Respublikasining loyiha amalga oshirilishiga qo‘shgan hissasi 15,99 million AQSH dollariga ekvivalentni tashkil etadi. Bunga quyidagilar kiradi: 0,430 million AQSH dollari — soliq va boshqa majburiy to‘lovlar bo‘yicha berilgan imtiyozlar hamda boshqa xarajatlar, 8,32 million AQSH dollari — loyiha ishtirokchilari (benefitsiyarlari) tomonidan qo‘shilgan hissa va 7,24 million AQSH dollari — loyiha ishtirokchisi bo‘lgan tijorat banklarining ulushi;

loyihani amalga oshirish muddati 6 yil (2017-2023-yil 31-martgacha) etib belgilandi.

2. Belgilansinki:

loyiha Jizzax va Qashqadaryo viloyatlarida amalga oshiriladi;

loyihani o‘z vaqtida va samarali amalga oshirish uchun mas’ul ijro etuvchi organ O‘zbekiston Respublikasi Veterinariya va chorvachilikni rivojlantirish Davlat qo‘mitasi hisoblanadi;

loyihani amalga oshirishni muvofiqlashtirish va boshqarish, shuningdek, loyihani amalga oshirish davrida monitoring va hisobotlarni yuritish funksiyalari O‘zbekiston Respublikasi Veterinariya va chorvachilikni rivojlantirish Davlat qo‘mitasiga yuklatiladi;

Kredit liniyasini boshqarish, XQXRJ krediti mablag‘larini o‘zlashtirish va maqsadli ishlatish, shuningdek, subloyihalarning monitoringi va hisobot yuritish bo‘yicha mas’uliyat ishtirokchi tijorat banklariga yuklatiladi.

3. Quyidagilar:

“O‘zbekiston Respublikasi sut sektorida qo‘shilgan qiymat zanjirini rivojlantirish” loyihasining asosiy texnik-iqtisodiy parametrlari 1-ilovaga* muvofiq;

“O‘zbekiston Respublikasi sut sektorida qo‘shilgan qiymat zanjirini rivojlantirish” loyihasi bo‘yicha Xalqaro qishloq xo‘jaligini rivojlantirish jamg‘armasining kreditga xizmat ko‘rsatish sxemasi 2-ilovaga* muvofiq;

“O‘zbekiston Respublikasi sut sektorida qo‘shilgan qiymat zanjirini rivojlantirish” loyihasi doirasida qishloq xo‘jaligini rivojlantirish xalqaro jamg‘armasining qarzini to‘lash, unga bo‘lgan foizlar va komissiyalarni to‘lash prognoz jadvali 3-ilovaga* muvofiq tasdiqlansin.

4. O‘zbekiston Respublikasi Qishloq xo‘jaligi vazirligi Moliya vazirligi va Markaziy bank bilan birgalikda bir oy muddatda loyiha doirasida XQXRJ kreditidan foydalanish tartibi to‘g‘risidagi nizomni tasdiqlasin, unda kreditni qayta moliyalashtirish tartibi, muddatlari va shartlari, subloyihalarni tanlash mezonlari va ularni baholash tartiblari belgilansin.

5. O‘zbekiston Respublikasi Veterinariya va chorvachilikni rivojlantirish Davlat qo‘mitasi raisi, Jizzax va Qashqadaryo viloyatlari hokimlari zimmasiga loyiha tadbirlarini samarali amalga oshirish uchun zarur shart-sharoitlarni ta’minlash, o‘z vaqtida tayyorlanishni tashkil etish hamda O‘zbekiston Respublikasi XQXRJ tartib-taomillari va qonun hujjatlari talablariga muvofiq zarur hisobot va hujjatlarni taqdim etish uchun shaxsiy javobgarlik yuklansin.

6. O‘zbekiston Respublikasi moliya vaziriga O‘zbekiston Respublikasi nomidan quyidagilarga imzo qo‘yish vakolati berilsin:

XQXRJ bilan moliyalashtirish shartnomasi;

O‘zbekiston Respublikasi Veterinariya va chorvachilikni rivojlantirish Davlat qo‘mitasi va ishtirok etuvchi tijorat banklari bilan XQXRJ qarzini qayta kreditlash to‘g‘risidagi bitim, shuningdek zarurat bo‘lganda unga tegishli o‘zgartirishlarga.

7. O‘zbekiston Respublikasi Adliya vazirligi belgilangan tartibda O‘zbekiston Respublikasi va XQXRJ o‘rtasidagi qarz bitimi bo‘yicha yuridik xulosa taqdim etsin.

8. Quyidagilar ozod qilinsin:

XQXRJ krediti hisobidan loyiha doirasida xarid qilinadigan tovarlar (ishlar, xizmatlar) va transport vositalari bojxona to‘lovlaridan (bojxona yig‘imlaridan tashqari), qo‘shilgan qiymat solig‘idan, majburiy ajratmalar va davlat maqsadli fondlariga yig‘imlardan;

O‘zbekiston Respublikasi norezident jismoniy shaxslarning jismoniy shaxslardan olinadigan daromad solig‘idan olinadigan daromadlari.

Belgilansinki, ushbu bandda nazarda tutilgan imtiyozlarning amal qilishi fermer xo‘jaliklari va qishloq xo‘jaligi korxonalari tomonidan loyihaning qayta moliyalashtiriladigan mablag‘lari hisobidan sotib olinadigan tovarlarga (ishlarga, xizmatlarga) ham tatbiq etiladi.

Ushbu imtiyozlar taqdim etilishi natijasida ozod bo‘lgan mablag‘lar O‘zbekiston Respublikasining loyiha amalga oshirilishiga qo‘shgan hissasi sifatida hisoblanadi.

9. O‘zbekiston Respublikasi Tashqi ishlar vazirligi Veterinariya va chorvachilikni rivojlantirish Davlat qo‘mitasining buyurtmanomalari bo‘yicha loyihani amalga oshirishda ishtirok etayotgan xorijiy mutaxassislarga kirish vizalari konsullik va boshqa yig‘imlar undirilmasdan rasmiylashtirilishini ta’minlasin.

10. O‘zbekiston Respublikasi Ichki ishlar vazirligi Veterinariya va chorvachilikni rivojlantirish Davlat qo‘mitasining buyurtmanomalari bo‘yicha loyihani amalga oshirishda ishtirok etayotgan xorijiy mutaxassislarning davlat boji undirilmasdan ko‘p martalik vizalar berilishi va uzaytirilishini, shuningdek O‘zbekiston Respublikasida vaqtincha ro‘yxatdan o‘tkazilishi va uzaytirilishini ta’minlasin.

11. Mazkur qarorning ijrosini nazorat qilish O‘zbekiston Respublikasining Bosh vaziri A.N. Aripov zimmasiga yuklansin.