Paxta tozalash sanoati oldida turgan vazifalar uning samaradorligini sifat jihatidan oshirish, ishlab chiqarish quvvatlarini innovatsion yangilash, texnik va texnologik modernizatsiya qilish, tarmoq raqobatbardoshligini mustahkamlash, zamonaviy paxtachilik va to‘qimachilik klasterlarini yaratish, ilg‘or texnologiyalarni keng joriy etish zarurati bilan belgilanadi va shundan kelib chiqadi.

Mahalliy paxta mahsulotlarining raqobatbardoshligini ta’minlashga qaratilgan sanoat ishlab chiqarish quvvatlarini modernizatsiya qilish va texnologik yangilash jarayonlarining samaradorligi bevosita fan-texnika taraqqiyotining ilg‘or yutuqlari, innovatsion ishlanmalar va yuqori texnologiyali “nou-xau”larni faol o‘zlashtirishga bog‘liq.

Paxta tozalash sanoatiga innovatsion texnologiyalarni joriy etish, idoralararo ilmiy-tadqiqot va tajriba-konstruktorlik ishlarini muvofiqlashtirish, xalqaro ilmiy-texnikaviy hamkorlik dasturlarida ishtirok etishni ta’minlash va soha xodimlarining malakasini oshirishni tashkil etish masalalari “O‘zpaxtasanoat” aksiyadorlik jamiyati (keyingi o‘rinlarda — “O‘zpaxtasanoat” AJ) tarkibiga kiruvchi “Paxtasanoat ilmiy markazi” aksiyadorlik jamiyati (keyingi o‘rinlarda — “Paxtasanoat ilmiy markazi” AJ) vakolatiga kiradi.

“Paxtasanoat ilmiy markazi” AJning ko‘p yillik faoliyati davomida sohada qo‘llaniladigan asosiy texnologiyalar va laboratoriya jihozlari ishlab chiqilib, paxta tozalash korxonalari faoliyati uchun zarur ishlab chiqarish va normativ-metodik asoslar shakllantirildi.

Shu bilan birga, “Paxtasanoat Ilmiy markazi” AJdagi ishlarning holatini o‘rganish natijalari ko‘plab hal etilmagan muammo va kamchiliklar to‘planib qolganligini ko‘rsatib, uning faoliyatini tubdan takomillashtirish zarurligini ko‘rsatadi:

birinchidan, ilmiy tadqiqot ishlarida foydalaniladigan laboratoriya va nazorat-o‘lchov vositalarining asosiy qismi o‘tgan asrning 60-70 yillarida xarid qilingan bo‘lib, zamonaviy talablar va xalqaro standartlarga javob bermaydi;

ikkinchidan, ishlab chiqarish bo‘linmalarining texnologik asbob-uskunalari va mashinalari 50 yildan ortiq faoliyat yuritib kelgan, ma’naviy va jismonan eskirgan, texnik imkoniyatlari uskunalarning yuqori texnologiyali va murakkab eksperimental modellarini ishlab chiqarishga imkon bermaydi;

uchinchidan, muhim ilmiy yo‘nalishlarni amalga oshirishda turg‘unlik kuzatilmoqda, malakali ilmiy kadrlar chiqib ketmoqda. Moliyalashtirishdagi tizimli muammolar, moddiy-texnika resurslarining taqchilligi, to‘laqonli ilmiy tadqiqotlar olib borish uchun shart-sharoitlarning yetarli emasligi keyingi yillarda muhim ilmiy natijalarning yo‘qligiga, yangi texnik yechimlar va ishlanmalarning yetarlicha tezkorlik bilan joriy etilmaganiga olib keldi;

to‘rtinchidan, ixtisoslashgan tashkilotlar bilan idoralararo hamkorlik darajasi pastligicha qolmoqda; innovatsion texnologiyalar va qurilmalarni yaratish sohasida xalqaro ilmiy markazlar bilan hamkorlikda ish deyarli yo‘q;

beshinchidan, kadrlar malakasini oshirishning amaldagi tizimi eskirgan ta’lim standartlari va usullariga, “Paxtasanoat Ilmiy markazi” AJ o‘quv-axborot resurs markazlari ishini tashkil etishga yondashuvlarga asoslanadi, soha xodimlarini ishdan to‘xtovsiz interfaol o‘qitish imkoniyatlarini cheklaydi.

“Paxtasanoat ilmiy markazi” AJ faoliyatini tubdan takomillashtirish, ilmiy salohiyatidan samarali foydalanish uchun zarur shart-sharoitlarni yaratish, mahalliy paxta mahsulotlari sifati va raqobatbardoshligini oshirish, shuningdek, O‘zbekiston Respublikasi Prezidentining 2017-yil 28-noyabrdagi “Paxtachilik tarmog‘ini boshqarish tizimini tubdan takomillashtirish chora-tadbirlari to‘g‘risida”gi PQ-3408-son qarori ijrosini samarali ta’minlash maqsadida:

1. “Paxtasanoat Ilmiy Markazi” AJ faoliyatining asosiy yo‘nalishlari etib quyidagilar belgilansin:

tarmoqni rivojlantirishning dolzarb ilmiy muammolarini hal etish, respublika paxta tozalash sanoatida yagona davlat ilmiy-texnika siyosatini ishlab chiqish va amalga oshirishda ishtirok etish;

paxta xomashyosini birlamchi qayta ishlash va ekish chigitini tayyorlashni takomillashtirish sohasida ilmiy-texnikaviy va innovatsion faoliyatni amalga oshirish;

respublikada ilmiy, loyiha-konstruktorlik va ta’lim tashkilotlari tomonidan amalga oshirilayotgan ilmiy-tadqiqot va tajriba-konstruktorlik ishlarini muvofiqlashtirish;

yetakchi xorijiy ilmiy-tadqiqot institutlari bilan hamkorlikda innovatsiyalar va texnologiyalar transferi markazlarini tashkil etish, innovatsion texnologiyalar va qurilmalarni yaratish sohasida xorijiy hamkorlar bilan birgalikdagi ishlarni kengaytirish;

paxta tozalash sanoatida mahalliy ilm-fanni talab qiluvchi, yuqori mahsuldor va raqobatbardosh texnologik asbob-uskunalarni yaratish va joriy etish doirasida ilmiy-tadqiqot va tajriba-konstruktorlik, tajriba-konstruktorlik ishlarini amalga oshirish, ilmiy tadqiqotlardan tayyor ilmiy-texnika mahsulotigacha bo‘lgan to‘liq innovatsion siklni amalga oshirishni ta’minlash;

tegishli o‘quv kurslari va seminarlar o‘tkazish orqali soha mutaxassislarini qayta tayyorlash va ularning malakasini oshirishni tashkil etish.

2. “O‘zpaxtasanoat” AJ tomonidan ishlab chiqilgan:

“Paxtasanoat Ilmiy Markazi” AJ tashkiliy tuzilmasi 1-ilovaga* muvofiq;

“Paxtasanoat Ilmiy markazi” AJ ijro apparati tuzilmasi 2-ilovaga* muvofiq tasdiqlansin.

3. Quyidagilar:

2018 — 2020-yillarda O‘zbekiston Respublikasida paxta xomashyosini birlamchi qayta ishlash texnikasi va texnologiyasini rivojlantirish bo‘yicha tadbirlar dasturi (keyingi o‘rinlarda — Dastur) 3-ilovaga* muvofiq;

Tajriba paxta tozalash zavodlarida ishlab chiqarilgan paxta tolasining ustama to‘lovidan ulgurji ro‘yxat narxigacha bo‘lgan mablag‘larni shakllantirish va ulardan foydalanish tartibi to‘g‘risidagi nizom 4-ilovaga* muvofiq tasdiqlansin.

Tasdiqlangan Dasturni amalga oshirish bo‘yicha ishlarni muvofiqlashtirish “O‘zpaxtasanoat” AJga, uni amalga oshirish bo‘yicha asosiy tashkilotning vakolatlari va funksiyalari hamda ixtisoslashtirilgan tashkilotlar bilan o‘zaro hamkorlik qilish “Paxtasanoat ilmiy markazi” AJ zimmasiga yuklansin.

4. “Paxtasanoat Ilmiy markazi” AJ faoliyatini moliyalashtirish manbalari sifatida mazkur qaror bilan tasdiqlangan Dasturni amalga oshirish uchun paxta tozalash tajriba korxonalari tomonidan ishlab chiqarilgan paxta tolasining ulgurji narxiga (QQSsiz) 5 foizli ustama mablag‘lari, xo‘jalik faoliyatidan olingan mablag‘lar, O‘zbekiston Respublikasining Innovatsion rivojlanish vazirligining grantlari, kadrlar tayyorlash jamg‘armasi mablag‘lari, shuningdek qonunchilik hujjatlarida taqiqlanmagan boshqa manbalar belgilansin.

5. O‘zbekiston Respublikasi Innovatsion rivojlanish vazirligi mazkur qaror bilan tasdiqlangan Dasturning ustuvor yo‘nalishlarini amalga oshirishni jadallashtirishga, Dasturda belgilangan fundamental, amaliy va innovatsion loyihalarni, keng ko‘lamli idoralararo ishlarni belgilangan tartibda tanlov asosida tanlash orqali davlat ilmiy-texnika dasturlariga bosqichma-bosqich kiritilishini ta’minlashga har tomonlama ko‘maklashsin.

6. Mazkur qarorning ijrosini nazorat qilish O‘zbekiston Respublikasi Bosh vazirining o‘rinbosari — “O‘zagrotexsanoatxolding” AJ boshqaruvi raisi N.S. Otajonov va “O‘zpaxtasanoat” AJ boshqaruvi raisi A.I. Maqsudov zimmasiga yuklatilsin.