Namangan viloyati qishloq xoʻjaligi texnikasi parkining texnika bilan taʼminlanganligini oshirish orqali agrotexnika ishlarini oʻz vaqtida va sifatli amalga oshirish, shuningdek, qishloq xoʻjaligi tovar ishlab chiqaruvchilariga mexanizatsiyalashtirilgan xizmatlar koʻrsatish darajasini oshirish maqsadida:

1. Oʻzbekiston Respublikasi Qishloq va suv xoʻjaligi vazirligi tomonidan Namangan viloyati hokimligi va “Oʻzagrotexsanoatxolding” AJ bilan birgalikda viloyatdagi qishloq xoʻjaligi texnikasi parki oʻrganilib, uning natijalariga koʻra yangi qishloq xoʻjaligi texnikasi yetkazib berishga boʻlgan ehtiyoj va ularni moliyalashtirish manbalari aniqlanganligi maʼlumot uchun qabul qilinsin.

2. Oʻzbekiston Respublikasi Qishloq va suv xoʻjaligi vazirligi, “Oʻzagrotexsanoatxolding” AJ va Namangan viloyati hokimligi tomonidan ishlab chiqilgan quyidagi prognoz parametrlari tasdiqlansin:

2018-2019-yillarda Namangan viloyatining Chust, Pop va Kosonsoy tumanlari fermer xoʻjaliklari va mashina-traktor parklariga qishloq xoʻjaligi texnikasini lizing asosida yetkazib berish 1-ilovaga* muvofiq;

2018-2019-yillarda Namangan viloyatining Chust, Pop va Kosonsoy tumanlari fermer xoʻjaliklari va mashina-traktor parklariga qishloq xoʻjaligi texnikalarini lizing asosida yetkazib berishni moliyalashtirish 2 — 5-ilovalariga* muvofiq tasdiqlansin.

Belgilansinki, qishloq xoʻjaligi texnikasini yetkazib berishni moliyalashtirish Oʻzbekiston Respublikasi Vazirlar Mahkamasi huzuridagi Qishloq xoʻjaligi mahsulotlarini davlat xaridi va qishloq xoʻjaligini texnika bilan jihozlashni maqsadli moliyalashtirish jamgʻarmasi (keyingi oʻrinlarda Jamgʻarma deb ataladi) mablagʻlari, tijorat banklarining kreditlari va qishloq xoʻjaligi korxonalarining oʻz mablagʻlari hisobidan amalga oshiriladi.

3. Jamgʻarma qishloq xoʻjaligi texnikasini “Oʻzagrolizing” AJ orqali lizing asosida yetkazib berishni moliyalashtirish uchun ushbu qarorga 1 — 5-ilovalarga* muvofiq zarur hajmdagi mablagʻlarning:

2018-yilda yetkazib berilishi nazarda tutilgan texnika boʻyicha 2018-yil 1-dekabrgacha boʻlgan muddatda;

2019-yilda yetkazib berilishi nazarda tutilgan texnika boʻyicha 2019-yil 1-dekabrgacha boʻlgan muddatda yillik 50 foizdan yuqori boʻlmagan foiz stavkasida belgilangan tartibda ajratilishini taʼminlasin.

4. Namangan viloyati hokimligi va “Oʻzagrotexsanoatxolding” AJ 2017-yil 1-dekabrga qadar va 2018-yil 1-dekabrga qadar mazkur qarorning 1 — 5-ilovalariga muvofiq 2018 va 2019-yillarda qishloq xoʻjaligi texnikasini lizing asosida yetkazib berish yuzasidan lizing shartnomalarini tuzishni tugallasin hamda lizing oluvchilar tomonidan avans toʻlovlari toʻlanishini taʼminlasin;

“Oʻzagrolizing” AJ Namangan viloyati lizing oluvchilar bilan lizing shartnomalarini tuzishda lizing loyihalarini Jamgʻarma mablagʻlari hisobidan moliyalashtirishda lizing muddatini:

fermer xoʻjaliklari uchun — 12 yilgacha;

“Namangan Agroservis MTP” MCHJ uchun — 10 yilgacha boʻlishini nazarda tutsin.

Belgilansinki, Jamgʻarma mablagʻlari lizing shartnomasi mavjud boʻlgan, lizing obyekti qiymatining kamida 20 foizi avans toʻlovi amalda toʻlangan taqdirda qishloq xoʻjaligi texnikasini lizing asosida yetkazib berishni moliyalashtirishga yoʻnaltiriladi.

5. “Oʻzagrotexsanoatxolding” AJ:

ushbu qarorga muvofiq qishloq xoʻjaligi texnikasini oʻz vaqtida ishlab chiqarish va yetkazib berishni taʼminlasin;

Oʻzbekiston Respublikasi Adliya vazirligi hamda boshqa manfaatdor vazirlik va idoralar bilan birgalikda bir oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida belgilangan tartibda Vazirlar Mahkamasiga takliflar kiritsin.

6. Mazkur qarorning bajarilishini nazorat qilish Bosh vazir oʻrinbosari — “Oʻzagrotexsanoatxolding” AJ boshqaruvi raisi N.S. Otajonov, Oʻzbekiston Respublikasi Bosh vazirining oʻrinbosari — qishloq va suv xoʻjaligi vaziri Z.T. Mirzayev zimmasiga yuklansin.