Respublika koʻmir tarmogʻini boshqarishni yanada takomillashtirish va samaradorligini oshirish, isteʼmolchilarni koʻmir mahsulotlari bilan uzluksiz taʼminlash, shuningdek, koʻmir sanoati korxonalarini modernizatsiya qilish, texnik va texnologik jihatdan qayta jihozlash boʻyicha strategik dasturlarni oʻz vaqtida va sifatli amalga oshirish maqsadida:

1. Oʻzbekiston Respublikasi Prezidentining 2017-yil 13-iyundagi PQ-3054-son qarori bilan 2017 — 2021-yillarda koʻmir qazib chiqarish korxonalarini yangidan qurish va ishlab turganlarini modernizatsiya qilish boʻyicha investitsiya loyihalarini amalga oshirishni nazarda tutuvchi 2017 — 2021-yillarda koʻmir sanoatini yanada rivojlantirish va modernizatsiya qilish dasturi (keyingi oʻrinlarda — Dastur) tasdiqlanganligi;

koʻmir tarmogʻini boshqarishning amaldagi tizimi va “Oʻzbekkoʻmir” AJ rahbariyati koʻmir tarmogʻini rivojlantirish va Dasturni amalga oshirish boʻyicha belgilangan vazifalarning oʻz vaqtida va samarali bajarilishini, shuningdek respublika aholisini va ijtimoiy obyektlarni koʻmir mahsulotlari bilan talab qilingan hajmlarda va sifatli taʼminlanmaganligi, buning natijasida tarmoq faoliyatiga nisbatan koʻplab jiddiy eʼtirozlar va shikoyatlar yuzaga kelganligi maʼlumot uchun qabul qilinsin.

2. Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi, Iqtisodiyot vazirligi va moliya vazirligining “Oʻzbekenergo” AJ, “Oʻzbekiston temir yoʻllari” AJning “Oʻzbekkoʻmir” AJ va “Shargʻunkoʻmir” AJni “Oʻzbekiston temir yoʻllari” AJ tarkibiga oʻtkazish toʻgʻrisidagi taklifiga rozilik berilsin.

4. “Oʻzbekkoʻmir” AJning asosiy vazifalari va faoliyat yoʻnalishlari etib quyidagilar belgilansin:

koʻmir konlarini qazish, xomashyo bazasini kengaytirish va undan oqilona foydalanish, koʻmir sanoati korxonalarini rivojlantirish va modernizatsiya qilish;

ishlab chiqarishni yanada diversifikatsiya qilish, koʻmir qazib olish va yetkazib berish hajmlarini koʻpaytirish, tarmoqqa zamonaviy yuqori texnologik asbob-uskunalarni keng joriy etishga yoʻnaltirilgan tarmoqda yagona texnika siyosatini olib borish;

koʻmir sanoatini rivojlantirish boʻyicha joriy, oʻrta muddatli va uzoq muddatli prognozlarni, maqsadli ilmiy-texnik, iqtisodiy va ijtimoiy dasturlarni ishlab chiqish;

innovatsion texnologiyalarni yaratish va joriy etish, mahsulotlarning yangi raqobatdosh turlarini oʻzlashtirish, mahsulotlarning energiya va resurslar sarfini kamaytirishga qaratilgan ilmiy tadqiqotlarni qoʻllab-quvvatlash va ragʻbatlantirish;

ishlab chiqarishni mahalliylashtirish darajasini yanada chuqurlashtirish, mahalliy xomashyo resurslaridan ustuvor foydalanish asosida tarmoqlararo sanoat kooperatsiyasini kengaytirish, import oʻrnini bosishni taʼminlash;

faol investitsiya siyosatini olib borish, tarmoqqa toʻgʻridan toʻgʻri xorijiy investitsiyalarni jalb etish, shuningdek, aksiyadorlik jamiyatini strategik boshqarishda aksiyadorlarning rolini kuchaytirish, loyiha ishlarini takomillashtirish;

koʻmir sanoatining samarali ishlashini tashkil etishga qodir boʻlgan, korporativ boshqaruvning zamonaviy usullarini egallagan muhandis-texnik va boshqaruv kadrlarining malakasini oshirish va ularni qayta tayyorlashga koʻmaklashish.

5. “Oʻzbekkoʻmir” AJ va “Shargʻunkoʻmir” AJni “Oʻzbekiston temir yoʻllari” AJ tarkibiga oʻtkazish ishlarini tashkil etish va koʻmir sanoati korxonalarini moliyaviy sogʻlomlashtirish boʻyicha takliflar tayyorlash boʻyicha Ishchi komissiya (keyingi oʻrinlarda — Komissiya) 3-ilovaga* muvofiq tarkibda tashkil etilsin.

6. Komissiya (Ramatov) zimmasiga:

“Oʻzbekkoʻmir” AJ va “Shargʻunkoʻmir” AJni “Oʻzbekiston temir yoʻllari” AJ tarkibiga oʻtkazish mexanizmi boʻyicha takliflar tayyorlash;

koʻmir tarmogʻi korxonalarining joriy iqtisodiy va moliyaviy ahvolini oʻrganish va tahlil qilish;

koʻmir tarmogʻining investitsiya loyihalarini amalga oshirish uchun “Oʻzbekenergo” AJ va “Oʻzbekkoʻmir” AJ tomonidan jalb etilgan aktivlar va majburiyatlarni, shu jumladan kreditlarni xatlovdan oʻtkazish;

koʻmir tarmogʻining investitsiya loyihalarini amalga oshirish uchun jalb etilgan kredit mablagʻlarini, shu jumladan, istisno tariqasida, jamgʻarib boriladigan pensiya tizimi mablagʻlari hisobidan qaytarish manbalarini aniqlash;

koʻmir tarmogʻini modernizatsiya qilish boʻyicha amalga oshirilgan, amalga oshirilayotgan va ishlab chiqilayotgan loyihalarni hisobga olgan holda koʻmir narxlarining shakllanishini va koʻmirning ulgurji-sotish narxiga maxsus ustama miqdorini tahlil qilish;

qazib olishning toʻliqligini va qazib olinadigan hamda isteʼmolchilarga yetkazib beriladigan koʻmirning sifatini taʼminlaydigan qazib olish va ishlab chiqarish texnologiyasiga rioya etish boʻyicha ilgari qabul qilingan qarorlar va topshiriqlarning bajarilishini tanqidiy tahlil qilish;

oʻrganish va tahlil natijalari boʻyicha “Oʻzbekkoʻmir” AJ va “Shargʻunkoʻmir” AJni qonun hujjatlarida belgilangan tartibda “Oʻzbekiston temir yoʻllari” AJ tarkibiga oʻtkazish, shuningdek, koʻmir tarmogʻi korxonalarini moliyaviy sogʻlomlashtirish chora-tadbirlari toʻgʻrisidagi hukumat qarori loyihasini bir oy muddatda Vazirlar Mahkamasiga kiritish vazifalari yuklatilsin.

7. “Oʻzbekiston temir yoʻllari” AJ ijro etuvchi apparati tuzilmasiga “Oʻzbekiston temir yoʻllari” AJ boshqaruvi raisining sanoat ishlab chiqarishi masalalari boʻyicha oʻrinbosari qoʻshimcha lavozimi kiritilsin.

8. “Oʻzbekiston temir yoʻllari” AJ “Oʻzbekenergo” AJ boshqa manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov, Oʻzbekiston Respublikasi Bosh vazirining oʻrinbosari Gʻ.I. Ibragimov va “Oʻzbekkoʻmir” AJ boshqaruvi raisi zimmasiga yuklansin.