“O‘zbekneftgaz” AJning geologiya-qidiruv ishlari uchun yuqori texnologiyali uskunalarni sotib olish” investitsiya loyihasi (keyingi o‘rinlarda — investitsiya loyihasi)ni amalga oshirishni jadallashtirish, geologiya-qidiruv ishlarini yanada kengaytirish va samaradorligini oshirish, uglevodorod hom ashyosi zaxiralarini ko‘paytirish, shuningdek, valyuta mablag‘lari sarf-harajatlarini optimallashtirishni ta’minlash maqsadida:

1. Ma’lumot uchun qabul qilinsinki, investitsiya loyihasini amalga oshirish doirasida:

O‘zbekiston Respublikasi Prezidentining ““O‘zbekneftgaz” AJning geologiya-qidiruv ishlari uchun yuqori texnologiyali uskunalarni sotib olish” investitsiya loyihasini amalga oshirish chora-tadbirlari to‘g‘risida” 2016-yil 20-iyuldagi PQ-2564-sonli qarori bilan investitsiya loyihasining texnik-iqtisodiy hisob-kitobi tasdiqlangan bo‘lib, unda jami qiymati 138,98 million AQSH dollari miqdoridagi 117 ta geofizik va burg‘ulash uskunalarini xarid qilish nazarda tutiladi;

“O‘zbekneftgaz” AJ tomonidan geofizik va burg‘ulash uskunalari miqdori 96 tagacha optimallashtirildi, uning natijalariga ko‘ra narxlarni optimallashtirish bo‘yicha ishlab chiqaruvchi zavodlar (ularning vakillari) bilan to‘g‘ridan-to‘g‘ri muzokaralar olib borildi hamda kiymatning 45 million AQSH dollariga qadar kamaytirilganini hisobga olgan holda geofizik va burg‘ulash uskunalarini yetkazib berish to‘g‘risida “O‘zburg‘uneftgaz” va “O‘zbekgeofizika” aksiyadorlik jamiyatlari bilan import shartnomalari (keyingi o‘rinlarda — import shartnomalari) tuzildi.

2. “O‘zbekneftgaz” AJ, O‘zbekiston Respublikasi Tiklanish va taraqqiyot jamg‘armasi hamda “O‘zsanoatqurilishbank” ATB ilovaga* muvofiq ro‘yxat bo‘yicha import shartnomalarini moliyalashtirish ochilishini ta’minlasin, bular bo‘yicha “O‘zbekiston Respublikasi Prezidenti huzuridagi Loyiha boshqaruvi milliy agentligi qoshidagi Loyihalar va import shartnomalarini kompleks ekspertizadan o‘tkazish markazi” DUKning o‘rnatilgan tartibda berilgan ijobiy xulosalari mavjud.

Belgilansinki, import shartnomalari qiymatining 75 foizini to‘lash O‘zbekiston Respublikasi Tiklanish va taraqqiyot jamg‘armasining krediti hisobidan, qolgan 25 foizini to‘lash esa “O‘zbekneftgaz AJ”ning shaxsiy mablag‘lari hisobidan amalga oshiriladi.

3. “O‘zbekneftgaz AJ”:

import shartnomalari o‘z vaqtida bajarilishi ustidan nazoratni ta’minlasin;

2018-yilning 20-noyabriga kadar investitsiya loyihasining tuzatilgan texnik-iktisodiy hisob-kitobini belgilangan tartibda O‘zbekiston Respublikasi Vazirlar Mahkamasiga kiritsin.

4. Mazkur qarorning ijrosini nazorat qilish O‘zbekiston Respublikasi Bosh vazirining o‘rinbosari — “O‘zbekneftgaz” AJ boshqaruvi raisi A.S. Sultonov zimmasiga yuklansin.