Oʻzbekiston Respublikasi Prezidenti tomonidan 2017-yil 14-fevralda qabul qilingan R-4849-sonli farmoyishi — “2017 — 2021-yillarda Oʻzbekiston Respublikasining rivojlanishining beshta ustuvor yoʻnalishi boʻyicha Harakatlar strategiyasini amalga oshirishga doir tashkiliy chora-tadbirlar toʻgʻrisida” ijrosini taʼminlash, shuningdek, “Strategiya rivojlanishi” markazining moddiy-texnik bazasini mustahkamlashga davlat tomonidan koʻmaklashish maqsadida, Oʻzbekiston Respublikasi Vazirlar Mahkamasi qaror qiladi:

1. Maʼlumot uchun qabul qilinsinki, Oʻzbekiston Respublikasi Harbiy sudi tomonidan 2015-yil 27-noyabr va 2016-yil 12-avgustdagi hukmlariga asosan, ilovada koʻrsatilgan roʻyxat boʻyicha avtotransport vositalari davlat daromadiga oʻtkazilgan.

2. Oʻzbekiston Respublikasi Adliya vazirligi, Xususiylashtirish, demonopolizatsiya va raqobatni rivojlantirish boʻyicha davlat qoʻmitasi, Moliya vazirligi va Iqtisodiyot vazirligining mazkur qarorga ilovada koʻrsatilgan avtotransport vositalarini istisno tariqasida “Strategiya rivojlanishi” markazining mulkiga begʻaraz topshirish toʻgʻrisidagi taklifiga rozilik berilsin.

3. “Strategiya rivojlanishi” markazi ushbu qarorga ilovada koʻrsatilgan avtotransport vositalarini belgilangan tartibda qabul qilib olishi va ularning samarali foydalanilishini taʼminlashi lozim.

4. Belgilab qoʻyilsinki, agar Oʻzbekiston Respublikasi Harbiy sudi tomonidan 2015-yil 27-noyabr va 2016-yil 12-avgustda chiqarilgan hukmlar bekor qilinsa yoki oʻzgartirilsa, ushbu qarorga ilovada koʻrsatilgan avtotransport vositalariga nisbatan hibsdan ozod qilish (roʻyxatdan chiqarish) toʻgʻrisida sud qarori qabul qilinsa, ularni asl holida qaytarish yoki ularning qiymatini qoplash toʻgʻrisida qaror chiqarilsa, “Strategiya rivojlanishi” markazi ushbu avtotransport vositalarini belgilangan tartibda qaytarishi yoki sud qarorida koʻrsatilgan shaxsga ularning qiymatini toʻliq qoplab berishi shart.

5. Ushbu qarorning ijrosini nazorat qilish Oʻzbekiston Respublikasi Vazirlar Mahkamasi huzuridagi Yoshlar siyosati, madaniyat, axborot tizimlari va telekommunikatsiya masalalari boʻyicha Axborot-tahlil departamentiga yuklatilsin.