O‘zbekiston Respublikasi Qurolli Kuchlari harbiylari va xodimlarini hamda ularning oila a’zolarini ijtimoiy himoyasini yanada qo‘llab-quvvatlash va ma’naviy-ruhiy holatini mustahkamlash maqsadida:

1. O‘zbekiston Respublikasi Prezidentining 2018-yil 14-maydagi “O‘zbekiston Respublikasi Qurolli Kuchlari harbiylari va ularning oila a’zolarini ijtimoiy qo‘llab-quvvatlashga oid qo‘shimcha chora-tadbirlar to‘g‘risida”gi PQ-3726-son qaroriga ilovaga muvofiq o‘zgartirish va qo‘shimchalar kiritilsin.

2. O‘zbekiston Respublikasi Milliy gvardiyasi manfaatdor vazirlik va idoralar bilan birgalikda bir oy muddatda qonun hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritsin.

3. Mazkur qarorning ijrosini nazorat qilish O‘zbekiston Respublikasining Bosh vaziri A.N. Aripov va O‘zbekiston Respublikasi Prezidenti huzuridagi Xavfsizlik kengashi kotibi V.V. Mahmudov zimmasiga yuklansin.

1. Nomlanishi “harbiylari” so‘zidan keyin “va uning tarkibiga kiruvchi vazirlik hamda idoralarning xodimlari” so‘zlari bilan to‘ldirilsin.

2. 1-band quyidagi tahrirda bayon etilsin:

“Shunday tartib o‘rnatilsinki, unga muvofiq quyidagi oliy ta’lim muassasalari bakalavriatiga (ikkinchi va undan keyingi oliy ta’limdan tashqari) qabul qilish uchun 2018/2019 o‘quv yilidan boshlab O‘zbekiston Respublikasi Qurolli Kuchlari tarkibiga kiruvchi vazirlik va idoralarning (keyingi o‘rinlarda — vazirlik va idoralar) xizmatdagi ofitserlari, shartnoma bo‘yicha xizmat qilayotgan serjantlar va oddiy askarlar tarkibi farzandlari uchun besh foizli kvota, 2020/2021 o‘quv yilidan boshlab O‘zbekiston Respublikasi Milliy gvardiyasining amaldagi shartnoma bo‘yicha xizmat qilayotgan ofitserlar, serjantlar va oddiy askarlar tarkibi xamda xodimlari (keyingi o‘rinlarda — Milliy gvardiya harbiylari va xodimlari) farzandlari uchun ikki foizli kvota ajratiladi:

respublika oliy ta’lim muassasalariga — davlat granti asosida oliy ta’lim muassasalariga umumiy belgilangan qabul ko‘rsatkichlari kvotasidan tashqari;

respublika harbiy oliy ta’lim muassasalariga — kursantlarning umumiy qabul sonidan”.

3. 2-bandda:

“a” kichik bandi “(keyingi o‘rinlarda — harbiy xizmatchilar)” so‘zlaridan keyin “shuningdek, Milliy gvardiya xodimlarining” so‘zlari bilan to‘ldirilsin;

“b” kichik bandi quyidagi tahrirda bayon etilsin:

“b) ajratilgan besh foizli kvota chegarasida harbiy xizmatchilarning farzandlarini, shuningdek, ajratilgan ikki foizli kvota chegarasida Milliy gvardiyaning xizmatdagi harbiylari va xodimlarining farzandlarini qabul qilish tanlov asosida amalga oshiriladi hamda joylar O‘zbekiston Respublikasi Vazirlar Mahkamasi huzuridagi Davlat test markazi tomonidan o‘tkaziladigan test sinovlari natijalari bo‘yicha to‘plangan ballardan kelib chiqqan holda, navbatdagi ketma-ketlik tartibiga muvofiq taqsimlanadi”;

“v” kichik bandi “harbiy xizmatchilarga” so‘zlaridan keyin “(Milliy gvardiya xodimlariga)” so‘zlari bilan, “harbiy xizmatchilarning” so‘zlaridan keyin “(Milliy gvardiya xodimlarining)” so‘zlari bilan to‘ldirilsin.

4. 3-band quyidagi tahrirda bayon etilsin:

“3. O‘zbekiston Respublikasi Qurolli Kuchlari tarkibiga kiruvchi vazirliklar va idoralar o‘rtasida oliy ta’lim muassasalariga besh foizli qabul kvotasining umumiy har yili taqsimlanadigan joylari quyidagi nisbatda taqsimlansin:

Mudofaa vazirligi — 45 foiz;

Ichki ishlar vazirligi — 10 foiz;

Favqulodda vaziyatlar vazirligi — 13 foiz;

Davlat xavfsizlik xizmati — 28 foiz;

O‘zbekiston Respublikasi Prezidentining davlat xavfsizlik xizmati — 2 foiz;

O‘zbekiston Respublikasi Elektron texnologiyalarni rivojlantirish markazi — 2 foiz”.

5. 4-band quyidagi tahrirda bayon etilsin:

“4. Belgilansinki, 2018/2019 o‘quv yilidan boshlab harbiy xizmat majburiyatini (xizmat majburiyatini) bajarishda halok bo‘lgan, shuningdek, harbiy xizmat majburiyatini (xizmat majburiyatini) bajarishda yarador bo‘lishi natijasida nogiron bo‘lib qolgan, kontuziya, shikast olgan yoki kasalliklarga duchor bo‘lgan Qurolli Kuchlar tarkibiga kiruvchi vazirlik va idoralarning ofitserlari, shartnoma bo‘yicha xizmat qilayotgan serjantlar va oddiy askarlar tarkibidagi harbiy xizmatchilar va Milliy gvardiya xodimlarining farzandlari vazirliklar yoki idoralarning tegishli tavsiyanomalari asosida belgilangan qabul kvotalaridan tashqari davlat granti asosida oliy ta’lim muassasalarining bakalavriatiga (ikkinchi va undan keyingi oliy ta’limdan tashqari) tanlovsiz qabul qilinadilar”.