Oʻzbekiston Respublikasi Prezidentining “Qurilish-montaj ishlari sifatini tubdan yaxshilash va qurilishni nazorat qilish tizimini takomillashtirish choralari toʻgʻrisida” 2020-yil 5-fevraldagi PQ-4586-son qarori ijrosini taʼminlash maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi Qurilish vazirligi huzuridagi Qurilish sohasida nazorat inspeksiyasi toʻgʻrisidagi nizom 1-ilovaga;

Oʻzbekiston Respublikasi Qurilish vazirligi huzuridagi Qurilish sohasida hududiy nazorat inspeksiyalari toʻgʻrisidagi namunaviy nizom 2-ilovaga muvofiq tasdiqlansin.

2. Oʻzbekiston Respublikasi Hukumatining 3-ilovaga muvofiq ayrim qarorlariga oʻzgartirishlar va qoʻshimcha kiritilsin.

3. Oʻzbekiston Respublikasi Qurilish vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari A.J. Ramatov va Oʻzbekiston Respublikasi qurilish vaziri B.I. Zakirov zimmasiga yuklansin.

1. Ushbu Nizom Oʻzbekiston Respublikasi Qurilish vazirligi huzuridagi Qurilish sohasida nazorat inspeksiyasining (keyingi oʻrinlarda — Inspeksiya) maqomi, asosiy vazifalari, funksiyalari, huquqlari va javobgarligi, faoliyatini tashkil etish, rahbarlarining funksional vazifalari, huquqlari va javobgarligini, shuningdek, Inspeksiya xodimlarini moddiy ragʻbatlantirish tartibini belgilaydi.

Inspeksiya qurilish va shaharsozlik sohasida davlat nazoratini amalga oshiradi (yoʻl qurilishi obyektlari va hududiy nazorat inspeksiyasidan roʻyxatdan oʻtmagan obyektlar bundan mustasno).

2. Inspeksiya davlat boshqaruvi organi hisoblanadi va oʻz faoliyatida Oʻzbekiston Respublikasi Qurilish vazirligiga hisobot beradi.

3. Inspeksiya oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, shuningdek, ushbu Nizomga va boshqa qonun hujjatlariga, shu jumladan Qurilish vazirligining qarorlari va buyruqlariga amal qiladi.

4. Inspeksiya oʻz faoliyatini davlat boshqaruvi organlari, xoʻjalik birlashmalari, mahalliy davlat hokimiyati organlari va boshqa tashkilotlar bilan oʻzaro hamkorlikda amalga oshiradi.

5. Inspeksiyaning oʻz vakolatlari doirasida qabul qilgan qarorlari davlat boshqaruvi organlari, xoʻjalik birlashmalari, mahalliy ijro etuvchi hokimiyat organlari, shuningdek, yuridik va jismoniy shaxslar tomonidan bajarilishi majburiydir.

6. Inspeksiya yuridik shaxs hisoblanadi, Oʻzbekiston Respublikasining Davlat gerbi tasviri tushirilgan va oʻz nomi davlat tilida yozilgan muhr va blankalarga, mustaqil balansga, Oʻzbekiston Respublikasi Moliya vazirligi Gʻaznachiligida shaxsiy gʻazna hisobvaraqlariga, shu jumladan xorijiy valyutadagi bank hisobvaraqlariga ega boʻladi.

7. Inspeksiyaning rasmiy nomi:

a) davlat tilida:

toʻliq nomi — Oʻzbekiston Respublikasi Qurilish vazirligi huzuridagi Qurilish sohasida nazorat inspeksiyasi;

qisqartirilgan nomi — Qurilish nazorati inspeksiyasi;

b) rus tilida:

toʻliq nomi — Inspeksiya po kontrolyu v sfere stroitelstva pri Ministerstve stroitelstva RespublikiUzbekistan;

qisqartirilgan nomi — Inspeksiya stroitelnogo nadzora;

v) ingliz tilida:

toʻliq nomi — Inspectorate for Control in the Construction Field at the Ministry of Construction of the Republic of Uzbekistan;

qisqartirilgan nomi — Construction Supervision Inspectorate.

8. Inspeksiyaning manzili (pochta manzili): Toshkent shahri, Shayxontohur tumani, Abay koʻchasi, 6-uy.

9. Inspeksiya tizimiga Inspeksiyaning markaziy apparati va hududiy inspeksiyalari kiradi.

10. Quyidagilar Inspeksiyaning asosiy vazifalari hisoblanadi:

aholi punktlari kompleks qurilishlarini, shaharsozlik toʻgʻrisidagi qonunlar, shaharsozlik meʼyorlari, qoidalari va standartlarga rioya qilinishini, qurilish sohasida texnik jihatdan tartibga solishga doir normativ hujjatlar talablariga rioya etilishi boʻyicha davlat nazoratini amalga oshirish;

tashkiliy-huquqiy shaklidan qatʼi nazar, obyektlarda bino va inshootlarning zilzilaga bardoshliligiga taʼsir qiluvchi, shuningdek, inson salomatligi va hayotiga tahdid soluvchi sifatsiz qurilish materiallari va buyumlar qoʻllanilishi yuzasidan davlat nazoratini amalga oshirish;

aholi punktlarining tasdiqlangan bosh rejalariga Qoraqalpogʻiston Respublikasi Vazirlar Kengashi, viloyatlar va Toshkent shahar, tuman va shahar hokimliklari, hududiy qurilish boshqarmalarning qatʼiy amal qilishi yuzasidan davlat nazoratini amalga oshirish;

buyurtmachining texnik nazorati va loyiha tashkilotlarining mualliflik nazoratini, pudratchining ichki nazorat tizimini olib borilishi ustidan davlat nazoratini amalga oshirish;

yangi qurilayotgan bino va inshootlarning seysmik jihatdan zaifligini baholash uchun zarur boʻlgan axborotni oʻz ichiga olgan elektron texnik pasportlarni shakllantirish va platformaga kiritilishini taʼminlash hamda mavjud binolar va inshootlarning instrumental-texnik tekshiruvdan oʻtkazilishini nazoratga olish.

11. Inspeksiya oʻziga yuklangan vazifalarni bajarish uchun quyidagi funksiyalarni amalga oshiradi:

a) aholi punktlari kompleks qurilishlarini, shaharsozlik toʻgʻrisidagi qonunlar, shaharsozlik meʼyorlari, qoidalari va standartlarga rioya qilinishini, qurilish sohasida texnik jihatdan tartibga solishga doir normativ hujjatlar talablariga rioya etilishi boʻyicha davlat nazoratini amalga oshirish sohasida:

hududiy qurilish sohasidan nazorat inspeksiyalari tomonidan aholi punktlarida qurilish-montaj ishlarini olib boruvchilar, jumladan buyurtmachi, pudratchi va loyiha tashkilotlari tomonidan qurilish sohasidagi shaharsozlik hujjatlariga rioya etish qoidalariga amal qilinishini nazorat qiladi;

qurilish-montaj ishlarining bajarilishida shaharsozlik meʼyorlari, qoidalari va standartlarga rioya qilinishini qurilish sohasida texnik jihatdan tartibga solishga doir normativ hujjatlar talablariga rioya etilishi boʻyicha taʼsirchan nazorat oʻrnatadi;

jismoniy va yuridik shaxslar tomonidan qurilishda shaharsozlik toʻgʻrisidagi qonun hujjatlariga, shaharsozlik norma va qoidalariga, davlat standartlarga rioya etishlari yuzasidan nazorat oʻrnatadi va tahliliy maʼlumotlarni yuritadi;

b) tashkiliy-huquqiy shakllaridan qatʼi nazar, obyektlarda bino va inshootlarning zilzilaga bardoshliligiga taʼsir qiluvchi, shuningdek, inson salomatligi va hayotiga tahdid soluvchi sifatsiz qurilish materiallari va buyumlar qoʻllanilishi yuzasidan davlat nazoratini amalga oshirish sohasida:

qurilish obyektlarida qurilish materiallari, buyumlari, konstruksiyalari va bajarilayotgan qurilish-montaj ishlari sifatini tekshirish uchun shaharsozlik faoliyati subyektlaridan belgilangan tartibda loyiha, texnologik va ijro hujjatlari, shuningdek, boshqa zarur maʼlumotlarni soʻraydi va oladi;

qurilish obyektlaridagi avariya va nosozliklar boʻyicha ogohlantirish tadbirlari oʻz vaqtida oʻtkazilishini nazorat qiladi;

v) aholi punktlarining tasdiqlangan bosh rejalariga Qoraqalpogʻiston Respublikasi Vazirlar Kengashi, viloyatlar va Toshkent shahar, tuman va shahar hokimliklari, hududiy qurilish boshqarmalari tomonidan qatʼiy amal qilishi yuzasidan davlat nazoratini amalga oshirish sohasida:

aholi punktlarining tasdiqlangan bosh rejalariga asosan qurilish obyektlarini joylashtirilishiga qatʼiy amal qilinishini nazoratga oladi;

g) buyurtmachining texnik nazorati, loyiha tashkilotlarining mualliflik nazoratini va pudratchining ichki nazorat tizimini olib borilishi ustidan davlat nazoratini amalga oshirish sohasida:

hududiy nazorat inspeksiyalaridan roʻyxatdan oʻtgan qurilish obyektlarida buyurtmachining texnik nazorati, loyiha tashkilotlarining mualliflik nazorati va pudratchining ichki nazorati olib borilishini tanlab nazorat qiladi;

qurilish obyektlarida buyurtmachi, loyiha tashkiloti va pudrat tashkilotlari tomonidan olib boriladigan nazorat ishlari yetarli tashkil etilmaganligi uchun ularning mansabdor shaxslariga nisbatan shaharsozlik toʻgʻrisidagi qonun hujjatlarining buzilishiga oid maʼmuriy huquqbuzarliklar toʻgʻrisidagi ishlarni qoʻrib chiqadi.

d) yangi qurilayotgan bino va inshootlarning seysmik jihatdan zaifligini baholash uchun zarur boʻlgan axborotni oʻz ichiga olgan elektron texnik pasportlarni shakllantirish va platformaga kiritilishini taʼminlash hamda mavjud binolar va inshootlarning instrumental-texnik tekshiruvdan oʻtkazilishini nazoratga olish sohasida:

seysmik faol zonalarda qurilishi rejalashtirilayotgan barcha turdagi binolar va inshootlarning, shuningdek, koʻp qavatli turar joylarning seysmik jihatdan zaifligini baholash uchun zarur boʻlgan axborotni oʻz ichiga olgan elektron texnik pasportlarning buyurtmachilar tomonidan rasmiylashtirilishini tashkillashtiradi va muvofiqlashtiradi;

Oʻzbekiston Respublikasida qurilayotgan binolar va inshootlarning zilzilabardoshligini taʼminlaydi, shuningdek, instrumental-texnik tekshiruvdan oʻtkazish hamda zilzilabardoshligini oshirish uchun zarur choralar koʻradi.

12. Inspeksiya oʻziga yuklangan vazifalar va funksiyalarni amalga oshirishda quyidagi huquqlarga ega:

bino va inshootlarning zilzilaga bardoshligiga taʼsir qiluvchi, shuningdek, inson salomatligi va hayotiga tahdid soluvchi konstruktiv buzilishlar aniqlangan holatlarda, qurilish-montaj ishlarini toʻxtatib turish va demontaj ishlarini amalga oshirishni talab qilish;

yuridik va jismoniy shaxslarga huquqbuzarliklarni bartaraf qilish uchun mos ravishda, biroq 60 kundan ortiq boʻlmagan muddatni belgilagan holda, aniqlangan huquqbuzarliklarni bartaraf etish boʻyicha ijro etilishi majburiy boʻlgan yozma koʻrsatmalar berish;

qonun hujjatlarida nazarda tutilgan qurilish sohasidagi ruxsat berish tartib-taomillariga rioya qilinmagan hamda aniqlangan huquqbuzarliklarni bartaraf etish boʻyicha kamida ikkita koʻrsatma bajarilmagan taqdirda qurilish-montaj ishlarini toʻxtatib qoʻyish va demontaj ishlarini amalga oshirish toʻgʻrisidagi daʼvo bilan sudga murojaat qilish;

loyihalashtirish va qurilish sohasida faoliyatni amalga oshirish uchun litsenziyalar va ruxsat beruvchi hujjatlarni toʻxtatib turish, tugatish va bekor qilish masalalarini hal qilish yuzasidan tegishli idoralar va tashkilotlarga taqdimnomalar yuborish;

obyektlarda bino va inshootlarning zilzilaga bardoshligiga taʼsir qiluvchi, shuningdek, inson salomatligi va hayotiga tahdid soluvchi sifatsiz qurilish materiallari va buyumlar qoʻllanilgani aniqlangan hollarda, qurilish materiallari va buyumlari ishlab chiqarish, sotish va qoʻllashni toʻxtatib turish haqida tegishli organ va tashkilotlarga taqdimnomalar yuborish;

Qoraqalpogʻiston Respublikasi Vazirlar Kengashi, viloyatlar va Toshkent shahar, tuman (shahar) hokimliklari va hududiy inspeksiyalar tomonidan shaharsozlik faoliyatiga oid qonun hujjatlariga zid ravishda qabul qilingan qarorlarni bekor qilish boʻyicha ularga taqdimnomalar kiritish;

qurilishda nazorat ishlari natijalarini tahlil qilish, umumlashtirish hamda monitoringini olib borish boʻyicha hududiy inspeksiyalarga tegishli koʻrsatmalar berish;

oʻz vakolatiga kiruvchi masalalarni hal etish uchun zarur boʻlgan maʼlumotlarni vazirliklar, idoralar, xoʻjalik birlashmalari, mahalliy hokimiyat va boshqaruv organlari hamda tashkilotlardan belgilangan tartibda olish;

shaharsozlik faoliyati sohasida eng muhim muammolarni koʻrib chiqish boʻyicha idoralararo komissiya tarkibida ishtirok etish;

Inspeksiyaga huquqbuzarlik holati boʻyicha eʼtiroz bildirilgan hollarda ishni koʻrib chiqish uchun sudga taqdim etish tartibini saqlab qolgan holda, shaharsozlik toʻgʻrisidagi qonun hujjatlarining buzilishiga oid maʼmuriy huquqbuzarliklar toʻgʻrisidagi ishlarni koʻrib chiqish;

buyurtmachining texnik nazorati va loyiha tashkilotlarining mualliflik nazorati olib borilishi yuzasidan hududiy inspeksiyalar tomonidan bajarilgan ishlar monitoringini yuritish;

tasdiqlangan bosh rejalarga amal qilinishi monitoringini yuritish, loyihalashtirish va qurilish-montaj ishlari boʻyicha amalga oshirilayotgan ishlarning tahliliy maʼlumotlarini yuritish;

qurilish-montaj ishlarining nazorati toʻgʻrisidagi maʼlumotlarni toʻplash va tahlil qilish;

qurilish sohasidagi qonunchilik faoliyati samaradorligini oshirib borishda ishtirok etish;

shaharsozlik faoliyatining normativ-huquqiy bazasini yanada takomillashtirish, qurilish meʼyorlari va qoidalari ishlab chiqilishida ishtirok etish hamda Qurilish vazirligiga takliflar kiritish;

qurilish obyektlarida tasdiqlangan loyiha hujjatlari, amalga oshirilayotgan qurilish-montaj ishlari hamda qoʻllanilayotgan qurilish materiallari va buyumlari boʻyicha shaharsozlik normalari va qoidalari hamda standartlariga rioya etilishi ustidan nazoratni amalga oshirish va tahliliy maʼlumotlarni yuritish;

hududiy inspeksiyalar tomonidan har oylik bajarilgan ishlar yuzasidan hisobotlarni umumlashtirish;

qurilish sohasidagi nazorat faoliyatida bajarilgan ishlar yuzasidan elektron axborot tizimini tashkil etish;

Inspeksiya va hududiy inspeksiyalarning inspektorlarini oʻqitish, professional tayyorlash, qayta tayyorlash va kasbiy malakasini oshirish uchun Qurilish vazirligi huzuridagi oliy oʻquv yurtlarining arxitektura-qurilish yoʻnalishidagi mutaxassislarni qayta tayyorlash va ularning malakasini oshirish markazida qurilish nazorati faoliyatiga doir oʻqishlarini tashkil etish;

qurilish sohasida xorijiy davlatlar mutaxassislarini jalb qilgan holda tajriba almashish va inspeksiya xodimlarining malakasini oshirishni tashkil etish;

Inspeksiya va hududiy inspeksiyalar inspektorlarini qonunchilikda belgilangan tartibda attestatsiyadan oʻtkazishni tashkil etish va ularning natijalariga koʻra tegishli sertifikatlar berish;

hududiy inspeksiyalarni zamonaviy sinov laboratoriya oʻlchov asboblari bilan taʼminlashga koʻmaklashish;

qurilish sohasida davlat nazorati faoliyatidagi normativ-huquqiy bazani takomillashtirishda ishtirok etish;

Inspeksiya va hududiy inspeksiyalar ish faoliyatida foydalanishi uchun uslubiy va metodik qoʻllanmalar, yoʻriqnomalar ishlab chiqish va tasdiqlash;

Inspeksiyaga jismoniy va yuridik shaxslar tomonidan kelib tushgan murojaatlarni oʻzining vakolati doirasida qonun hujjatlarida belgilangan tartibda koʻrib chiqish;

qurilish sohasiga oid uchrashuv, yigʻilish va oʻquv seminarlarini tashkil etish va oʻtkazish.

13. Inspeksiya:

unga yuklangan vazifalar va funksiyalarni samarali bajarish, shuningdek, qurilish-montaj ishlari va qurilish sohasida davlat nazoratini samarali amalga oshirish;

Qurilish vazirligiga Inspeksiya tomonidan kiritiladigan normativ-huquqiy hujjatlar va boshqa hujjatlar loyihalari, shuningdek, Inspeksiya tomonidan qabul qilinadigan qarorlarning sifati va pirovard natijalari uchun javob beradi.

14. Inspeksiyaga Oʻzbekiston Respublikasi Bosh vazirining taqdimnomasiga koʻra, Oʻzbekiston Respublikasi Prezidenti tomonidan lavozimga tayinlanadigan va lavozimdan ozod etiladigan qurilish vaziri oʻrinbosari — Inspeksiya boshligʻi rahbarlik qiladi.

Inspeksiya boshligʻi boshqaruv xodimlarining belgilangan cheklangan soni va mehnatga haq toʻlash fondi doirasida, zaruratga koʻra, Inspeksiya shtat birliklariga oʻzgartirish kiritish, obyektlar sonidan kelib chiqqan holda hududiy inspeksiyalar tuzilmasi va shtat birliklari normativlarini hamda hududiy inspeksiyalarning xarajatlar smetasini tasdiqlash huquqiga ega.

15. Inspeksiya boshligʻi qurilish vaziri bilan kelishilgan holda lavozimga tayinlanadigan va lavozimdan ozod etiladigan ikki nafar oʻrinbosarga, shu jumladan bir nafar birinchi oʻrinbosarga ega boʻladi.

Inspeksiya boshligʻi boʻlmagan davrda, boshliq vazifasini uning oʻrinbosarlaridan biri bajaradi.

Inspeksiya boshligʻi:

laboratoriya va binolarni texnik koʻrikdan oʻtkazish xizmatlari qiymatini aniqlash metodikasini tasdiqlaydi;

hududiy inspeksiyalar faoliyatini muvofiqlashtirish, shu jumladan moddiy — texnika bazasini tashkil etishda amaliy yordam beradi;

hududiy inspeksiyalar boshliqlarini qurilish vaziri bilan kelishilgan holda lavozimga tayinlaydi va lavozimidan ozod qiladi;

hududiy inspeksiyalar komplaens-nazorat boʻyicha mutaxassislarni lavozimga tayinlaydi va lavozimdan ozod qiladi;

Inspeksiya va hududiy inspeksiyalar xodimlari uchun majburiy boʻlgan buyruqlar chiqarish va koʻrsatmalar berish hamda ularning bajarilishining nazoratini tashkil etadi;

Inspeksiya xodimlarining faoliyatini ragʻbatlantirish uchun tegishli buyruqlar chiqaradi;

inspektorlik vakant lavozimlariga taklif qilinayotgan nomzodlarning qurilish sohasida kamida 5 yillik ish tajribasiga ega, mutaxassisligi boʻyicha muxandis-quruvchi, arxitektor, muxandis-gidrotexnik, malakali, amaliy tajribaga ega ekanligi, yuqori darajali kasbiy va maʼnaviy-axloqiy sifatlarga ega boʻlishi kafolatlanganligini taʼminlaydi.

16. Inspeksiya boshligʻi qonun hujjatlariga muvofiq boshqa vakolatlarni ham amalga oshiradi.

17. Quyidagilar Inspeksiya boshligʻining asosiy funksional vazifalari hisoblanadi:

Qurilishni nazorat qilish sohasida Oʻzbekiston Respublikasi Konstitutsiyasi va qonunlari, boshqa normativ-huquqiy hujjatlar talablariga rioya qilish;

Inspeksiya faoliyatiga umumiy rahbarlik qilish, Oʻzbekiston Respublikasi Prezidenti, Vazirlar Mahkamasining qarorlari va boshqa qonun hujjatlari bilan Inspeksiyaga yuklangan vazifalar va funksiyalarning bajarilishini tashkil etish;

Oʻzbekiston Respublikasi Prezidentining hujjatlari va Vazirlar Mahkamasining qarorlari bilan tasdiqlangan Inspeksiya faoliyatini yanada takomillashtirish boʻyicha konsepsiyalar, kompleks dasturlar va tadbirlar ijrosini taʼminlash;

Oʻzbekiston Respublikasi Prezidenti, Oʻzbekiston Respublikasining Bosh vaziri va uning oʻrinbosarlari va maslahatchilarining topshiriqlari sifatli va toʻliq ijro etilishini taʼminlash;

Inspeksiya faoliyatini rejalashtirish, Inspeksiyaning choraklik ish rejalarini tasdiqlash, ularning bajarilishini nazorat qilish;

Oʻzbekiston Respublikasi Prezidenti, Vazirlar Mahkamasi va Qurilish vazirligining qarorlari va topshiriqlari ijrosi taʼminlanishi va monitoringi olib borilishining amaliy tizimini tashkil etish;

Inspeksiya faoliyatida ijro intizomini mustahkamlash boʻyicha kompleks amaliy chora-tadbirlarni amalga oshirish, qonun hujjatlari talablariga muvofiq topshiriqlar oʻz vaqtida va sifatli bajarilishi uchun markaziy apparatning mansabdor shaxslari va hududiy inspeksiyalar rahbarlarining shaxsiy javobgarligini oshirish chora-tadbirlarini koʻrish;

Inspeksiya markaziy apparati va hududiy inspeksiyalar xodimlarini qayta tayyorlash va malakasini oshirish tizimini tashkil etish;

qonun hujjatlariga muvofiq Inspeksiya tizimida lavozimga tayinlash va lavozimdan ozod qilish, shuningdek, kadrlarni tanlash va joy-joyiga qoʻyish, ularning samarali faoliyati uchun zarur shart-sharoitlar yaratish, kadrlar zaxirasini shakllantirish;

normativ-huquqiy hujjatlar loyihalarini keyinchalik qonun hujjatlarida belgilangan tartibda Vazirlar Mahkamasiga kiritish uchun sifatli ishlab chiqishni tashkil etish va Qurilish vazirligiga kiritish;

Inspeksiya rahbarlari va xodimlarining xizmat safarlarini Oʻzbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish choralari toʻgʻrisida” 2014-yil 5-martdagi PQ-2142-son va “Xorijiy xizmat safarlarida samarali boʻlish va Oʻzbekiston Respublikasiga xorijiy delegatsiyalar tashrifini tashkil etishda mansabdor shaxslarning shaxsiy javobgarligini yanada oshirish chora-tadbirlari toʻgʻrisida” 2017-yil 3-avgustdagi PQ-3170-son qarorlari talablariga muvofiq amalga oshirish va tashkil qilish, xizmat safarlarining asoslanganligi, samaradorligi va natijadorligini, xizmat safarlariga ajratiladigan mablagʻlardan maqsadli va oqilona foydalanishni taʼminlash;

hududiy inspeksiyalar faoliyatining samaradorligi va natijadorligining tanqidiy tahlilini muntazam ravishda oʻtkazish, ularning hisobotlarini Inspeksiya majlislarida eshitish, yakunlari boʻyicha zarur hollarda ularni belgilangan tartibda intizomiy javobgarlikka tortish choralarini koʻrish;

Inspeksiya xodimlarini ragʻbatlantirish va intizomiy javobgarlikka tortish masalalarini belgilangan tartibda hal qilish, ularning egallab turgan lavozimlariga muvofiqligi masalasini koʻrib chiqish, shaxsiy javobgarligini oshirish choralarini koʻrish;

Inspeksiya xodimlarining Odob-axloq qoidalarini tasdiqlash, shuningdek, ularga rioya qilinishini taʼminlash;

“Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq Inspeksiya tizimida korrupsiya va boshqa huquqbuzarliklarning oldini olish choralarini qabul qilish, shuningdek, huquqiy amaliyot va qonun hujjatlarini takomillashtirish choralarini ishlab chiqish va amalga oshirish yoʻli bilan ularning yuzaga kelishiga yordam beruvchi sabablar va shart-sharoitlarni aniqlash, tahlil qilish, bartaraf qilish;

Inspeksiya va uning tarkibiy boʻlinmalari ishini tashkil qilishning zamonaviy shakllarini joriy qilishni taʼminlash;

“Elektron hukumat toʻgʻrisida”gi Oʻzbekiston Respublikasi Qonunini amalga oshirish doirasida zamonaviy axborot-kommunikatsiya texnologiyalaridan foydalanish, shu jumladan, Inspeksiyaning axborot tizimi samaradorligi va sifatini oshirish;

“Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi Qonuni, Vazirlar Mahkamasining 2018-yil 7-maydagi 341-son qarori bilan tasdiqlangan Davlat organlarida, davlat muassasalarida va davlat ishtirokidagi tashkilotlarda jismoniy va yuridik shaxslarning murojaatlari bilan ishlash tartibi toʻgʻrisidagi namunaviy nizomda belgilangan muddatlar va tartibda jismoniy va yuridik shaxslarning murojaatlarini koʻrib chiqish boʻyicha samarali ishlarni tashkil qilish, aholi bilan toʻgʻridan-toʻgʻri va ochiq muloqotni yoʻlga qoʻyish, shaxsan qabul qilishni tizimli ravishda oʻtkazish, shu jumladan jismoniy shaxslar va yuridik shaxslarning vakillarini joyning oʻziga chiqib qabul qilish;

jismoniy va yuridik shaxslarning Oʻzbekiston Respublikasi Prezidentining Virtual qabulxonasidan tushayotgan murojaatlarini oʻz vaqtida va toʻlaqonli koʻrib chiqishni taʼminlash maqsadida Oʻzbekiston Respublikasi Prezidentining Xalq qabulxonalari bilan samarali ishlashni tashkil qilish, ularning faoliyatida Inspeksiya xodimlari va rahbarlarining faol ishtirokini taʼminlash;

davlat siri va maxfiy maʼlumotlar sirasiga kiradigan maʼlumotlar bilan ishlashda qonun hujjatlari talablariga rioya qilish;

markaziy apparatning tarkibiy boʻlinmalari va hududiy inspeksiyalar toʻgʻrisidagi nizomlarni, lavozim yoʻriqnomalarini va Inspeksiyaning boshqa ichki hujjatlarini belgilangan tartibda tasdiqlash;

Inspeksiya xodimlari tomonidan bajarilishi majburiy boʻlgan buyruqlar chiqarish va koʻrsatmalar berish, shuningdek, ularning ijrosini belgilangan tartibda nazorat qilish;

Inspeksiya markaziy apparatining tasdiqlangan tuzilmasiga belgilangan shtatdagi xodimlar soni va mehnatga haq toʻlash fondi doirasida oʻzgartirishlar kiritish.

Inspeksiya boshligʻi qonun hujjatlarida nazarda tutilgan boshqa funksional vazifalarni ham amalga oshiradi.

18. Quyidagilar Inspeksiya boshligʻi oʻrinbosarlarining asosiy funksional vazifalari hisoblanadi:

Oʻzbekiston Respublikasi Konstitutsiyasi va qonunlari, shuningdek, normativ-huquqiy hujjatlar talablariga rioya qilish;

Inspeksiya boshligʻining oʻrinbosarlari Inspeksiya boshligʻi vaqtincha boʻlmaganda, uning vazifalarini bajarish;

Inspeksiyaning oʻzi mutasaddilik qiladigan tarkibiy boʻlinmalari faoliyatini muvofiqlashtirish, nazorat qilish va bevosita boshqarish, ularning xodimlari oʻrtasida vazifalarni taqsimlash;

Inspeksiya faoliyatining oʻzi mutasaddilik qiladigan yoʻnalishlari boʻyicha Oʻzbekiston Respublikasi Prezidentining hujjatlari, Vazirlar Mahkamasining qarorlari bilan tasdiqlangan Inspeksiyaning faoliyatini yanada takomillashtirish boʻyicha konsepsiyalar, kompleks dasturlar va tadbirlarning bajarilishini tanqidiy va chuqur tahlil qilish;

oʻzi mutasaddilik qiladigan tarkibiy boʻlinmalar tomonidan reja koʻrsatkichlarining soʻzsiz bajarilishini taʼminlash choralarini koʻrish, boʻlinmalar rahbarlarining hisobotlarini muntazam ravishda eshitish va ushbu koʻrsatkichlarga erishish uchun ularning shaxsiy masʼuliyatini oshirish;

oʻzi mutasaddilik qiladigan tarkibiy boʻlinmalar rahbarlarining ish rejalarini tasdiqlash, ularning bajarilishi yuzasidan nazoratni taʼminlash;

oʻzi mutasaddilik qiladigan tarkibiy boʻlinmalar faoliyatida ijro intizomini mustahkamlash boʻyicha kompleks amaliy chora-tadbirlarni bajarish, shuningdek, tarkibiy boʻlinmalar rahbarlarining shaxsiy masʼuliyatini oshirish chora-tadbirlarini koʻrish;

Vazirlikning Inspeksiya faoliyatiga taalluqli buyruqlari, Inspeksiya buyruqlari va topshiriqlarining oʻz vaqtida va sifatli bajarilishini taʼminlash;

oʻzi mutasaddilik qiladigan tarkibiy boʻlinmalarda xodimlarni tanlash va joy-joyiga qoʻyish boʻyicha Inspeksiya boshligʻiga takliflar kiritish;

oʻzi mutasaddilik qiladigan tarkibiy boʻlinmalar rahbarlari faoliyati samaradorligi va natijadorligini muntazam ravishda tanqidiy tahlil qilish;

oʻzi mutasaddilik qiladigan tarkibiy boʻlinmalar rahbarlari va xodimlarini ragʻbatlantirish va intizomiy javobgarlikka tortish boʻyicha Inspeksiya boshligʻiga takliflar kiritish;

huquqni qoʻllash amaliyotini va qonun hujjatlarini takomillashtirishga doir chora-tadbirlarni ishlab chiqish va amalga oshirish orqali “Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq korrupsiya va boshqa huquqbuzarliklarning oldini olish choralarini koʻrish, shuningdek, ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish;

“Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi Qonuni, Vazirlar Mahkamasining 2018-yil 7-maydagi 341-son qarori bilan tasdiqlangan Davlat organlarida, davlat muassasalarida va davlat ishtirokidagi tashkilotlarda jismoniy va yuridik shaxslarning murojaatlari bilan ishlash tartibi toʻgʻrisidagi namunaviy nizomda belgilangan muddatlar va tartibda jismoniy va yuridik shaxslarning murojaatlarini koʻrib chiqish boʻyicha samarali ishni tashkil qilish, aholi bilan toʻgʻridan-toʻgʻri va ochiq muloqotni yoʻlga qoʻyish, shaxsan qabul qilishni tizimli ravishda oʻtkazish, shu jumladan, jismoniy shaxslar va yuridik shaxslarning vakillarini joyning oʻziga chiqib qabul qilish;

jismoniy va yuridik shaxslarning Oʻzbekiston Respublikasi Prezidentining Virtual qabulxonasidan tushayotgan murojaatlarini oʻz vaqtida va toʻlaqonli koʻrib chiqishni taʼminlash maqsadida Oʻzbekiston Respublikasi Prezidentining Xalq qabulxonalari bilan samarali ishlashni tashkil qilish, ularning faoliyatida Inspeksiya xodimlari va rahbarlarining faol ishtirokini taʼminlash;

davlat siriga kiritilgan maʼlumotlar va maxfiy axborot bilan ishlashda qonun hujjatlari talablariga rioya qilish.

19. Quyidagilar Inspeksiya markaziy apparati rahbarlarining asosiy funksional vazifalari hisoblanadi:

Oʻzbekiston Respublikasi Konstitutsiyasi va qonunlariga, shuningdek, boshqa normativ-huquqiy hujjatlarga rioya etish;

tarkibiy boʻlinmalar faoliyatiga bevosita rahbarlik qilish, tarkibiy boʻlinmalarga yuklangan vazifalar va funksiyalar bajarilishini tashkil etish;

oʻz vakolatlari doirasida hududiy inspeksiyalarning faoliyatini muvofiqlashtirish;

Oʻzbekiston Respublikasi Prezidenti va Vazirlar Mahkamasining qarorlari va topshiriqlari ijrosini taʼminlash, Inspeksiya tarkibiy boʻlinmalari xodimlarining ijro intizomini mustahkamlash boʻyicha kompleks amaliy chora-tadbirlarni amalga oshirish, shuningdek, Oʻzbekiston Respublikasi Prezidentining “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Oʻzbekiston Respublikasi Vazirlar Mahkamasi va uning kotibiyatlari, davlat boshqaruvi organlari, xoʻjalik birlashmalari, shuningdek, barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son va “Davlat organlari va tashkilotlarida ijro intizomini yanada mustahkamlash chora tadbirlari toʻgʻrisida” 2018-yil 5-oktabrdagi PQ-3962-son qarorlariga, shuningdek, Vazirlar Mahkamasining “Ijro intizomini mustahkamlash chora-tadbirlari toʻgʻrisida” 1999-yil 12-yanvardagi 12-son qaroriga muvofiq topshiriqlarning oʻz vaqtida va sifatli bajarilishi uchun tarkibiy boʻlinmalar xodimlarining shaxsiy masʼuliyatini oshirish choralarini koʻrish;

Inspeksiyaning bayonnoma qarorlari, qurilish vazirining va Inspeksiya rahbariyatining buyruqlari va topshiriqlari oʻz vaqtida va sifatli bajarilishini taʼminlash;

tarkibiy boʻlinmalarning ish rejalari ishlab chiqilishini, ularda koʻrsatilgan vazifalar va chora-tadbirlarning oʻz vaqtida va sifatli bajarilishini taʼminlash;

tarkibiy boʻlinmalarga yuklangan vazifalarni nazorat qilish va muvofiqlashtirish, Inspeksiyaning hududiy boʻlinmalari faoliyatida amaliy va uslubiy yordam koʻrsatish;

mutasaddilik qilinadigan tarkibiy boʻlinmalarda kadrlarni tanlash va joy-joyiga qoʻyish boʻyicha Inspeksiya boshligʻiga takliflar kiritish, ularning kasbiy mahorati, layoqati, amaliy tajribasi, ishchanlik va maʼnaviy-axloqiy sifatlari yuqori darajasining kafolatlanganligini taʼminlash, ularning kasbiy malakasini oshirish chora-tadbirlarini qabul qilish;

tarkibiy boʻlinmalarning xodimlari faoliyati samaradorligini tanqidiy tahlil qilib borish, yigʻilishlarda ularning hisobotlarini eshitish, natijalar boʻyicha zarur chora-tadbirlarni qabul qilish;

xizmat safarlarini Oʻzbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish chora-tadbirlari toʻgʻrisida” 2014-yil 5-martdagi PQ-2142-son va “Xorijiy xizmat safarlarida boʻlishning samaradorligi va xorijiy delegatsiyalarning Oʻzbekiston Respublikasiga tashrifini tashkil etish uchun mansabdor shaxslarning shaxsiy javobgarligini yanada oshirish chora-tadbirlari toʻgʻrisida” 2017-yil 3-avgustdagi PQ-3170-son qarorlari talablariga toʻliq muvofiq ravishda amalga oshirish, xizmat safarlarining asoslanganligi, samaradorligi va natijadorligini, xizmat safarlari xarajatlari uchun ajratiladigan mablagʻlardan maqsadli va oqilona foydalanishni taʼminlash;

Inspeksiya xodimlarining odob-axloq qoidalari talablariga rioya qilishini taʼminlash;

“Korrupsiyaga qarshi kurash toʻgʻrisida”gi Oʻzbekiston Respublikasi Qonuni talablariga muvofiq Inspeksiyada korrupsiya va boshqa huquqbuzarliklarning oldini olish chora-tadbirlarini qabul qilish, huquqiy amaliyot va qonunchilikni takomillashtirish chora-tadbirlarini ishlab chiqish va tatbiq etish yoʻli bilan ularning sodir etilishiga koʻmaklashuvchi sabablar va sharoitlarni aniqlash, tahlil qilish va bartaraf etish;

“Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi Qonuni bilan belgilangan muddatda va tartibda jismoniy va yuridik shaxslarning murojaatlarini koʻrib chiqish;

davlat siri va boshqa maxfiy maʼlumotlar bilan ishlashda qonun hujjatlari talablariga rioya qilish;

vakolati doirasiga kiradigan masalalar yuzasidan faoliyatni takomillashtirish boʻyicha amaliy chora-tadbirlarni qabul qilish, qonun hujjatlarini takomillashtirish haqida takliflar ishlab chiqish va Inspeksiya boshligʻiga kiritish.

20. Inspeksiya boshligʻi:

Inspeksiyaga yuklangan vazifalar va funksiyalarning bajarilishi;

ushbu Nizomning 13-bandida nazarda tutilgan javobgarlik sohalari boʻyicha;

ushbu Nizomning 17-bandida koʻrsatilgan oʻz funksional vazifalarining sifatli bajarilishi uchun shaxsan javob beradi.

21. Inspeksiya boshligʻining oʻrinbosarlari:

Inspeksiyaning oʻzi nazorat qiladigan tarkibiy tuzilmalarida Inspeksiyaga yuklangan vazifalar va funksiyalarning bajarilishi;

ushbu Nizomning 13-bandida nazarda tutilgan Inspeksiyaning mutasaddilik qilinadigan masalalarga doir javobgarlik sohalari boʻyicha;

ushbu Nizomning 18-bandida koʻrsatilgan oʻz funksional vazifalarining sifatli bajarilishi uchun shaxsan javob beradi.

22. Markaziy apparatning tarkibiy boʻlinmalari rahbarlari:

tegishli tarkibiy boʻlinmalarga yuklangan vazifalar va funksiyalar bajarilishi uchun;

ushbu Nizomning 12-bandida nazarda tutilgan Inspeksiya markaziy apparatining javobgarlik sohalari boʻyicha;

ushbu Nizomning 19-bandida koʻrsatilgan oʻz funksional vazifalarini sifatli bajarish uchun shaxsan masʼuldir.

23. Inspeksiya boshligʻi Inspeksiya faoliyati va unga yuklangan vazifalar samarali bajarilishi boʻyicha doimiy monitoringni olib boradi hamda Inspeksiya faoliyati samaradorligiga xolisona baho beradi.

24. Inspeksiya faoliyatining samaradorligi va natijadorligi muntazam ravishda baholab boriladi.

25. Inspeksiya faoliyatining samaradorligi va natijadorligini baholash Inspeksiya boshligʻi tomonidan tasdiqlanadigan Inspeksiya faoliyati samaradorligi va natijadorligini baholash mezonlari va indikatorlariga asoslanadi.

26. Inspeksiya faoliyatining samaradorligi va natijadorligini baholash yakunlari boʻyicha quyidagi choralar koʻriladi:

Inspeksiya rahbarlari va xodimlarini ragʻbatlantirish (mukofotlash) yoki intizomiy javobgarlikka tortish;

Inspeksiya faoliyatida aniqlangan kamchiliklarni bartaraf qilish va uning faoliyatini yanada takomillashtirish.

27. Inspeksiya faoliyatining samaradorligi va natijadorligini baholash tartibi qonun hujjatlari bilan belgilanadi.

28. Inspeksiya markaziy apparati tarkibiy tuzilmalarining hududiy inspeksiyalar va idoraviy mansub tashkilotlar bilan oʻzaro hamkorligi markaziy apparat tarkibiy tuzilmalarining rahbarlari tomonidan taʼminlanadi.

29. Inspeksiya markaziy apparatining tarkibiy tuzilmalari hududiy inspeksiyalari bilan oʻz faoliyati yoʻnalishlari boʻyicha oʻzaro hamkorlik qilib:

topshiriqlarni hududiy inspeksiyalar va idoraviy mansub tashkilotlarga yetkazadi hamda ularning bajarilishini nazorat qiladi;

hududiy inspeksiyalari va idoraviy mansub tashkilotlarga tarkibiy tuzilmalarning bevosita faoliyati masalalari boʻyicha soʻrovlar yuboradi hamda ularning ijro etilishini nazorat qiladi;

hududiy inspeksiyalar va idoraviy mansub tashkilotlar faoliyatini tekshiradi va oʻrganadi, umumlashtiradi, takomillashtirishga qaratilgan chora-tadbirlarni ishlab chiqadi va Inspeksiya rahbariyatiga kiritadi;

hududiy inspeksiyalar va idoraviy mansub tashkilotlar faoliyatini tashkil etish va faoliyati natijalari toʻgʻrisida hisobot va axborot materiallari, statistika va boshqa maʼlumotlar oʻrganilishi va umumlashtirilishini tashkil etadi;

hududiy inspeksiyalar va idoraviy mansub tashkilotlar ish rejalarini tahlil qiladi, ularning faoliyatini rejalashtirishni takomillashtirishga doir choralar koʻradi;

hududiy inspeksiyalar va idoraviy mansub tashkilotlardan tushgan takliflarni koʻrib chiqadi;

normativ-huquqiy hujjatlar loyihalarini tayyorlashda hududiy inspeksiyalar va idoraviy mansub tuzilmalar ishtirokini tashkil etadi, qonun hujjatlarini takomillashtirish boʻyicha ulardan tushgan takliflarni koʻrib chiqadi.

30. Hududiy inspeksiyalar va idoraviy mansub tashkilotlar Inspeksiya markaziy apparatining tarkibiy tuzilmalari bilan oʻzaro hamkorlik qiladi, shu jumladan:

Inspeksiya rahbariyati topshiriqlari ijrosi haqida xabar beradi;

belgilangan faoliyat sohasida qonun hujjatlarini amalga oshirish boʻyicha faoliyat natijalari toʻgʻrisida Inspeksiyaning markaziy apparatiga axborot taqdim etadi;

ularning faoliyatini tekshirish va oʻrganish natijasida ishda aniqlangan kamchiliklar va qoidabuzarliklarni bartaraf etish natijalari toʻgʻrisida xabar beradi;

oʻz faoliyati natijalari toʻgʻrisidagi hisobotlarni belgilangan muddatlarda Inspeksiyaning markaziy apparatiga taqdim etadi;

Inspeksiya vakolatiga taalluqli sohalardagi muammolarni hal qilishga qaratilgan takliflarni Inspeksiyaning markaziy apparatiga yuboradi;

Mahalliy ijro etuvchi hokimiyat organlari, davlat organlarining hududiy tuzilmalari, kompleks ijtimoiy-iqtisodiy rivojlantirish boʻyicha sektorlar bilan oʻzaro hamkorlik natijalari toʻgʻrisida xabar beradi;

vakolatli organlar tomonidan oʻtkazilgan oʻz faoliyatini tekshirish natijalari toʻgʻrisida maʼlumot beradi;

joylarda Inspeksiyaning hayʼati yigʻilishini, seminar, konferensiya, tanlov, koʻrik va boshqa tashkiliy tadbirlarni oʻtkazish toʻgʻrisida takliflar kiritadi.

31. Inspeksiya markaziy apparati tarkibiy tuzilmalari va hududiy inspeksiyalarining oʻzaro hamkorlik jarayonida yuzaga keladigan kelishmovchiliklar Inspeksiya boshligʻining topshirigʻiga binoan uning tegishli oʻrinbosari tomonidan koʻrib chiqiladi. Agar inspeksiya boshligʻi oʻrinbosari tomonidan kelishmovchiliklarni tartibga solishning imkoniyati boʻlmasa, soʻnggi qaror bevosita boshliq tomonidan qabul qilinadi.

32. Inspeksiya xodimlarining mehnatiga haq toʻlash fondi quyidagilardan iborat:

a) lavozim maoshidan;

b) quyidagi miqdordagi oylik ustama haqlaridan:

Inspeksiyaning boshqaruv xodimlarining lavozim maoshiga 40 foiz miqdorda;

Inspeksiyaning boshqaruv, texnik va xizmat koʻrsatuvchi xodimlariga uzoq muddat va uzluksiz xizmati uchun (respublika davlat boshqaruvi organidagi mehnat faoliyati) uchun ustama haq:

2 yildan 5 yilgacha — 10 foiz miqdorida;

5 yildan 10 yilgacha — 20 foiz miqdorida;

10 yildan 15 yilgacha — 30 foiz miqdorida;

15 yildan 20 yilgacha — 40 foiz miqdorida;

20 yildan 25 yilgacha — 50 foiz miqdorida;

25 yildan — 60 foiz miqdorida;

v) quyidagilarni oʻz ichiga oladigan ragʻbatlantiruvchi va boshqa toʻlovlardan:

mehnat qonunchiligida belgilangan bayram sanalar munosabati bilan xodim lavozim maoshining bir baravarigacha (ragʻbatlantiruvchi koeffitsentni hisobga olgan holda) miqdorda;

xodimlarni ijtimoiy qoʻllab-quvvatlash va ularning ish samaradorligini oshirish maqsadida har oyda yoʻl transporti xarajatlari uchun bazaviy hisoblash miqdorining bir baravarigacha (xizmat avtotransporti biriktirilgan xodimlar bundan mustasno) hamda xodimlarning ovqatlanishi xarajatlariga koʻmaklashish maqsadida bazaviy hisoblash miqdorining ikki baravarigacha miqdorda kompensatsiya toʻlovlari;

zarur hollarda, oʻn oylik bazaviy hisoblash miqdorida (xodimning davolanishi, yubiley yoshi munosabati bilan, shuningdek, pensiyaga chiqqanda, toʻy, dafn marosimi va boshqalar uchun) xodimlarga kasaba uyushmasi bilan kelishgan holda moddiy yordam puli.

33. Xodimlarga qishloq xoʻjaligi mahsulotlari sotib olish uchun har yili bir marta bazaviy hisoblash miqdorining 10 baravarigacha miqdorda toʻlov amalga oshiriladi.

34. Inspeksiya xodimlari quyidagi shakllarda moddiy ragʻbatlantiriladi:

mukofotlash;

lavozim maoshiga shaxsiy ustamalar toʻlash;

moddiy yordam koʻrsatish.

35. Inspeksiya xodimlari xizmat vazifalarini vijdonan va tashabbuskorlik bilan bajarganligi hamda ishdagi yuksak yutuqlari uchun Inspeksiya boshligʻi tomonidan quyidagicha mukofotlanadi:

yil yakuni boʻyicha xodimlarning samarali mehnatlarini hisobga olgan holda, lavozim maoshining bir baravari miqdorida mukofotlash;

Inspeksiya xodimlariga mehnat faoliyatida yuqori natijalarga erishganligi uchun Inspeksiya boshligʻi tomonidan Oʻzbekiston Respublikasi Moliya vazirligi bilan kelishilgan holda tasdiqlanadigan Inspeksiya xodimlari faoliyatini baholashning reyting tizimiga muvofiq xar oylik belgilanadigan quyidagi miqdorlardagi toʻlovlar beriladi:

70 balldan 79 ballgacha toʻplagan xodimlarga — lavozim maoshiga 50 foiz;

80 balldan 89 ballgacha toʻplagan xodimlarga — lavozim maoshiga 100 foiz;

90 balldan 100 ballgacha toʻplagan xodimlarga — lavozim maoshiga 200 foiz.

36. Ish sifati yomonlashganda, topshiriqlar oʻz vaqtida bajarilmaganda, mehnat va ijro intizomi buzilganda, lavozim maoshiga belgilangan ustamalar bekor qilinishi yoki kamaytirilishi mumkin.

37. Mehnatga haq toʻlash fondini shakllantirishda yil hisobiga bir oylik mehnatga haq toʻlash fondi miqdorida moddiy yordam koʻrsatish va ikki oylik mehnatga haq toʻlash fondi miqdorida mukofotlash uchun mablagʻlar nazarda tutiladi.

38 Xodim vafot etgan hollarda, moddiy yordam (agar xodim vafot etgan yilda bevosita unga moddiy yordam koʻrsatilmagan boʻlsa) uning turmush oʻrtogʻiga, turmush oʻrtogʻi yoʻqligida — u bilan birga yashovchi voyaga yetgan farzandlariga yoki qonuniy vakillariga (vasiylar va homiylarga) yoxud voyaga yetmagan bolalarni (bolalikdan nogironlarni — yoshidan qatʼiy nazar) farzandlikka olganlarga, shuningdek, agar xodimlar nikohda boʻlmaganda va farzandlari boʻlmagan hollarda, xodimning qaramogʻidagi shaxslarga yoki ota-onalariga teng ulushda toʻlab beriladi.

39. Istisno tariqasida, xodimning asoslantirilgan arizasiga asosan Inspeksiya rahbarining roziligi bilan mehnatga haq toʻlash fondiga ajratilgan mablagʻlar doirasida quyidagi hollarda qoʻshimcha tarzda moddiy yordam koʻrsatilishi mumkin:

yaqin qarindoshlari vafot etganda — oʻlim toʻgʻrisidagi guvohnoma nusxasiga asosan;

alohida ehtiyoj tugʻilganda (baxtsiz hodisa, avariya, uzoq muddatli kasallik sababli maxsus davolanish yoki oiladagi ogʻir moddiy ahvol).

40. Xodimlar xarajatlarini qoplash, moddiy yordam miqdori va uning toʻlanishi xodimda intizomiy jazo chorasi mavjudligiga bogʻliq boʻlmaydi.

41. Inspeksiya xodimlarini moddiy ragʻbatlantirish boʻyicha tadbirlar:

xarajatlar smetasida nazarda tutilgan budjetdan ajratiladigan mablagʻlar;

Oʻzbekiston Respublikasi Qurilish vazirligi faoliyatini qoʻllab-quvvatlash jamgʻarmasi mablagʻlari;

qonun hujjatlari bilan taqiqlanmagan boshqa manbalar hisobidan amalga oshiriladi.

42. Oʻzbekiston Respublikasi Davlat budjeti hisobidan moliyalashtiriladigan Inspeksiya xodimlariga respublika budjetidan quyidagi mablagʻlar nazarda tutiladi:

yagona tarif setkasi boʻyicha tasdiqlangan razryadlarga muvofiq lavozim maoshi;

40 foiz miqdorida mehnatni ragʻbatlantirish koeffitsiyenti (ragʻbatlantiruvchi koeffitsiyentni hisobga olgan holda);

yilda oylik mehnatga haq toʻlash fondi miqdorida moddiy yordam;

ikki oylik mehnatga haq toʻlash fondi miqdorida mukofot puli;

15 foizlik moddiy ragʻbatlantirish fondi.

43. Oʻzbekiston Respublikasi Davlat budjeti hisobidan moliyalashtiriladigan Inspeksiya xodimlariga boshqa toʻlovlar Oʻzbekiston Respublikasi Qurilish vazirligi faoliyatini qoʻllab-quvvatlash jamgʻarmasining mablagʻlari hisobidan amalga oshiriladi.

44. Inspeksiya xodimlariga Vazirlar Mahkamasining “Davlat hokimiyati va boshqaruvi organlari, sud organlari va notarial idoralar xodimlari mehnatiga haq toʻlashning tarif setkasini joriy etish toʻgʻrisida” 1996-yil 12-apreldagi 147-son qaroriga 2-ilova bilan tasdiqlangan Mehnatga haq toʻlash razryadlari qoʻllaniladi.

45. Inspeksiya qonun hujjatlarida belgilangan tartibda qayta tashkil etiladi va tugatiladi.

46. Ushbu Nizom talablari buzilishida aybdor boʻlgan shaxslar qonun hujjatlarida belgilangan tartibda javob beradilar.

1. Ushbu Namunaviy nizom Oʻzbekiston Respublikasi Qurilish vazirligi huzuridagi Qurilish sohasida hududiy nazorat inspeksiyasining (keyingi oʻrinlarda — Hududiy inspeksiya) maqomi, asosiy vazifalari, funksiyalari, huquqlari va javobgarligi, faoliyatini tashkil etish tartibini, shuningdek, rahbarlarining funksional vazifalari, huquqlari va javobgarligini belgilaydi.

2. Hududiy inspeksiya Oʻzbekiston Respublikasi Qurilish vazirligi huzuridagi Qurilish sohasida nazorat inspeksiyasi (keyingi oʻrinlarda — Inspeksiya) tarkibiga kiradi va oʻz vakolati doirasida oʻziga biriktirilgan hududlardagi qurilish obyektlarida qurilish materiallari, mahsulotlari va konstruksiyalarining texnik boshqaruv va normativ hujjatlari talablariga muvofiqligini, shaharsozlik faoliyatiga oid qonun hujjatlariga hamda qurilish normalari va qoidalariga rioya etilishini tanlov asosida nazorat qiladi.

3. Hududiy inspeksiya qurilish va shaharsozlik sohasida nazorat organi hisoblanadi (yoʻl qurilishi obyektlari va hududiy nazorat inspeksiyasidan roʻyxatdan oʻtmagan obyektlar bundan mustasno).

4. Hududiy inspeksiya oʻz faoliyati yuzasidan Inspeksiyaga boʻysunadi va hisobot beradi.

5. Hududiy inspeksiya oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, shuningdek, ushbu Nizomga va boshqa qonun hujjatlariga, shu jumladan Qurilish vazirligi va Inspeksiyaning buyruqlari, qarorlariga hamda boshqa qonun hujjatlariga amal qiladi.

6. Hududiy inspeksiya xoʻjalik hisobidagi tashkilot hisoblanadi.

7. Hududiy inspeksiya yuridik shaxs hisoblanadi, Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhrga va blankalarga, mustaqil balansga, banklarda hisobvaraqlariga, shu jumladan xorijiy valyutadagi bank hisobvaraqlariga ega boʻladi.

8. Hududiy inspeksiyaning rasmiy nomi:

a) davlat tilida:

toʻliq nomi — Oʻzbekiston Respublikasi Qurilish vazirligi huzuridagi Qurilish sohasida hududiy nazorat inspeksiyasi;

qisqartirilgan nomi — Hududiy qurilish nazorati inspeksiyasi;

b) rus tilida:

toʻliq nomi — Territorialnaya inspeksiya po kontrolyu v sfere stroitelstva pri Ministerstve stroitelstva Respubliki Uzbekistan;

qisqartirilgan nomi — Territorialnaya inspeksiya po kontrolyu stroitelstva;

v) ingliz tilida:

toʻliq nomi — Territorial Inspectorate of Construction Supervision under the Ministry of Construction of the Republic of Uzbekistan;

qisqartirilgan nomi — Territorial Construction Inspection Inspectorate.

9. Quyidagilar Hududiy inspeksiyaning asosiy vazifalari hisoblanadi:

aholi punktlari kompleks qurilishlarini, shaharsozlik toʻgʻrisidagi qonunlar, shaharsozlik meʼyorlari, qoidalari va standartlarga rioya qilinishini tanlov asosida davlat nazoratini amalga oshirish;

aholi punktlarining tasdiqlangan bosh rejalariga Qoraqalpogʻiston Respublikasi Vazirlar Kengashi, viloyatlar va Toshkent shahar, tuman va shahar hokimliklari, hududiy qurilish boshqarmalari tomonidan qatʼiy amal qilishi yuzasidan nazoratni amalga oshirish;

buyurtmachining texnik nazorati va loyiha tashkilotlarining mualliflik nazoratini, pudratchining ichki nazorat tizimini olib borilishini nazorat qilish;

qurilish obyektlaridagi qurilish materiallari, mahsulotlari va konstruksiyalarining shaharsozlik normalari va qoidalari, davlat standartlari talablariga hamda loyiha hujjatlarida qabul qilingan texnik yechimlarga, qurilish-montaj ishlarining barcha bosqichlariga rioya etishlarini nazorat qilish;

qurilish-montaj ishlarini boshlash uchun roʻyxatdan oʻtkazish;

shaharsozlik qonunchiligiga, qurilish sohasidagi qurilish meʼyorlari va qoidalari boʻyicha Inspeksiyaga takliflar kiritish va normativ-huquqiy hujjatlarni takomillashtirishda ishtirok etish;

yangi qurilayotgan bino va inshootlarning seysmik jihatdan zaifligini baholash uchun zarur boʻlgan axborotni oʻz ichiga olgan elektron texnik pasportlarni shakllantirish va platformaga kiritilishida hamda mavjud binolar va inshootlarning instrumental-texnik tekshiruvdan oʻtkazilishida ishtirok etish.

10. Hududiy inspeksiya oʻziga yuklangan vazifalarni bajarish uchun quyidagi funksiyalarni amalga oshiradi:

a) aholi punktlari kompleks qurilishlarini, shaharsozlik toʻgʻrisidagi qonunlar, shaharsozlik meʼyorlari, qoidalari va standartlarga rioya qilinishini tanlov asosida davlat nazoratini amalga oshirish sohasida:

qurilish obyektlarida tasdiqlangan loyiha hujjatlari, amalga oshirilayotgan qurilish-montaj ishlari hamda qoʻllanilayotgan qurilish materiallari va buyumlarini shaharsozlik normalari va qoidalari hamda standartlariga rioya etilishini tanlov asosida nazorat qiladi;

yuridik va jismoniy shaxslarning shaharsozlik toʻgʻrisidagi qonunlarga, qurilish meʼyorlari va qoidalari hamda standartlariga rioya etilishini tanlov asosida nazorat qiladi;

b) aholi punktlarining tasdiqlangan bosh rejalariga Qoraqalpogʻiston Respublikasi Vazirlar Kengashi, viloyatlar va Toshkent shahar, tuman va shahar hokimliklari, hududiy qurilish boshqarmalari tomonidan qatʼiy amal qilishi yuzasidan nazoratni amalga oshirish sohasida:

tasdiqlangan bosh rejalarga qatʼiy amal qilinishi yuzasidan hududiy qurilish boshqarmalari tomonidan olib borilayotgan ishlar boʻyicha davlat nazoratini amalga oshiradi;

qurilish obyektlarida sinovlar amalga oshirilganligi, topotasvirlar mavjudligini nazorat qiladi;

v) buyurtmachining texnik nazorati va loyiha tashkilotlarining mualliflik nazoratini, pudratchining ichki nazorat tizimi amalga oshirilishini nazorat qilish sohasida:

qurilish obyektida buyurtmachi, loyiha tashkiloti va pudratchi tomonidan ijro hujjatlarini yuritilishini, shaharsozlik hujjatlari ishlab chiqilishini hamda qurilish sohasida qonunda koʻrsatilgan litsenziyali faoliyat turlarini amalga oshirish huquqini beruvchi hujjatlarning mavjudligini nazorat qiladi;

g) qurilish obyektlaridagi qurilish materiallari, mahsulotlari va konstruksiyalarining shaharsozlik normalari va qoidalari, davlat standartlari talablariga hamda loyiha hujjatlarida qabul qilingan texnik yechimlarga, qurilish-montaj ishlarining barcha bosqichlariga rioya etishlarini nazorat qilish sohasida:

moliyalashtirish manbalaridan qatʼi nazar, xavf-xatar toifasidan kelib chiqqan holda, qurilish obyektlarida (xavf-xatar toifasi past boʻlgan hamda ikki qavatgacha, (tsokolni hisobga olmagan holda), balandligi yer yuzasidan 12 metrdan past va (yoki) umumiy maydoni 500 kvadrat metrgacha boʻlgan yakka tartibdagi uy-joylar shuningdek 300 metr kubdan kichik boʻlgan noturar bino va inshootlardan tashqari) ruxsat berilgan hujjatlar mavjudligi, shaharsozlik norma va qoida talablariga rioya etilayotganligi borasida belgilangan tartibda inspektorlik nazoratini oʻtkazadi;

qurilish obyektlarida xavf-xatar toifasidan kelib chiqqan holda tanlov asosida nazorat funksiyalarini amalga oshiradi;

d) qurilish-montaj ishlarini boshlash uchun roʻyxatdan oʻtkazish sohasida:

Oʻzbekiston Respublikasining davlat dasturlariga kiritilgan hamda davlat budjeti mablagʻlaridan moliyalashtirilgan obyektlarning qurilishi va naʼmunaviy loyihalar boʻyicha quriladigan yakka tartibdagi hamda ikki qavatdan yuqori (tsokolni hisobga olmagan holda), balandligi yer yuzasidan 12 metrdan va (yoki) umumiy maydoni 500 kvadrat metrdan ortiq boʻlgan yakka tartibdagi uy-joylar shuningdek 300 m.kubdan koʻp hajmdagi noturar bino va inshootlarda qurilish-montaj ishlarining bajarilishini toʻgʻridan-toʻgʻri roʻyxatdan oʻtkazadi;

Hududiy inspeksiyadan tegishli tartibda qurilish-montaj ishlarini amalga oshirish uchun roʻyxatdan oʻtgan, qurilishi tugallangan obyektlarni foydalanishga qabul qilish xayʼati tarkibida majburiy ishtirok etadi.

e) yangi qurilayotgan bino va inshootlarning seysmik jihatdan zaifligini baholash uchun zarur boʻlgan axborotni oʻz ichiga olgan elektron texnik pasportlarni shakllantirish va platformaga kiritilishida hamda mavjud binolar va inshootlarning instrumental-texnik tekshiruvdan oʻtkazish sohasida:

seysmik faol zonalarda qurilishi rejalashtirilayotgan barcha turdagi binolar va inshootlarning, shuningdek, koʻp qavatli turar joylarning seysmik jihatdan zaifligini baholash uchun zarur boʻlgan axborotni oʻz ichiga olgan elektron texnik pasportlarning buyurtmachilar tomonidan rasmiylashtirilishini tekshiradi;

Oʻzbekiston Respublikasida qurilayotgan binolar va inshootlarning zilzilabardoshligini taʼminlash, shuningdek, seysmik zaif hisoblangan bino va inshootlarni instrumental-texnik tekshiruvdan oʻtkazish hamda zilzilabardoshligini oshirish uchun zarur choralar koʻrishga koʻmaklashadi.

11. Hududiy inspeksiya inspektorlari qonunchilikda belgilangan tartibda har 3 yilda attestatsiyadan oʻtadilar va ularga natijalariga koʻra maxsus guvohnoma beriladi.

12. Hududiy inspeksiya oʻziga yuklangan vazifalar va funksiyalarni amalga oshirishda quyidagi huquqlarga ega:

bino va inshootlarning zilzilaga bardoshliligiga taʼsir qiluvchi, shuningdek, inson salomatligi va hayotiga tahdid soluvchi konstruktiv huquqbuzarliklar aniqlangan holatlarda, qurilish-montaj ishlarini toʻxtatib turish va demontaj ishlarini amalga oshirishni talab qilish;

yuridik va jismoniy shaxslarga obyektdagi huquqbuzarliklarni bartaraf qilish uchun mos ravishda, biroq 60 kundan ortiq boʻlmagan muddatni belgilagan holda, aniqlangan huquqbuzarliklarni bartaraf etish boʻyicha ijro etilishi majburiy boʻlgan koʻrsatmalar berish;

qonunchilik hujjatlarida nazarda tutilgan qurilish sohasidagi ruxsat berish tartib-taomillariga rioya qilinmagan hamda aniqlangan huquqbuzarliklarni bartaraf etish boʻyicha kamida ikkita koʻrsatma bajarilmagan taqdirda qurilish-montaj ishlarini toʻxtatib qoʻyish va demontaj ishlarini amalga oshirish toʻgʻrisidagi daʼvo bilan sudga murojaat qilish;

loyihalashtirish va qurilish sohasida faoliyatni amalga oshirish uchun litsenziyalar va ruxsat beruvchi hujjatlarni toʻxtatib turish, tugatish va bekor qilish masalalarini hal qilish yuzasidan tegishli organlar va tashkilotlarga taqdimnomalar yuborish;

obyektlarda bino va inshootlarning zilzilaga bardoshliligiga taʼsir qiluvchi sifatsiz qurilish materiallari va buyumlar qoʻllanilgani aniqlangan hollarda, qurilish materiallari va buyumlar ishlab chiqarish, sotish va qoʻllashni toʻxtatib turish haqida tegishli organ va tashkilotlarga taqdimnomalar yuborish;

hududiy davlat boshqaruvi organlari, xoʻjalik birlashmalari, mahalliy davlat hokimiyati organlaridan oʻz vakolati doirasiga kiruvchi masalalarni hal qilish uchun zarur boʻlgan maʼlumotlarni soʻrash va olish;

hududiy davlat boshqaruvi organlari, xoʻjalik birlashmalari va mahalliy davlat hokimiyati organlariga Hududiy inspeksiya vakolatiga kiruvchi masalalar yuzasidan takliflar kiritish;

Hududiy inspeksiyada belgilangan tartibda roʻyxatdan oʻtkazilgan obyektlarda nazorat funksiyalarini vakolatli organni xabardor qilmagan holda amalga oshirish;

qurilish obyektlarida foydalanilayotgan qurilish materiallari, buyumlari, konstruksiyalari va bajarilayotgan qurilish-montaj ishlarini nazorat qilish uchun shaharsozlik faoliyati subyektlaridan belgilangan tartibda loyiha, texnologik va ijro hujjatlari, shuningdek, boshqa zarur maʼlumotlarni soʻrash va olish;

pudratchi tashkilotlarga konstruksiyalarning alohida detallarini ochish, poydevordagi va qayta toʻldiriladigan tuproqni tekshirish ishlarini topshirish, zarurat boʻlganda, tegishli xulosa tayyorlash uchun ilmiy-tadqiqot tashkilotlaridan ekspert-mutaxassislarni jalb qilish;

qurilish obyektlarining barcha bosqichlarida pudratchining ichki, loyihachining mualliflik va texnik nazoratni amalga oshiruvchi mutaxassislarning maxsus sertifikatlari mavjudligini tekshirish, nazorat davomida sertifikat mavjud boʻlmaganda buyurtmachi, pudratchi va loyiha tashkilotlariga masʼul shaxslarni qurilish obyektlaridan chetlashtirish yuzasidan taqdimnomalar kiritish;

shaharsozlik toʻgʻrisidagi qonun hujjatlari talablari buzilganligi holati aniqlanganda, huquqbuzarliklar toʻgʻrisidagi bayonnomalarni rasmiylashtirish;

avariya holatidagi binolar, inshootlar, ularning qismlari, konstruktiv elementlari va avariyaga olib kelgan sabablarni tekshirish boʻyicha texnik komissiyalarda ishtirok etish;

mavjud binolar va inshootlarning texnik holatini shartnoma asosida oʻrganish va tegishli xulosa berish;

qurilish obyektlarida sinov laboratoriya ishlarini shartnoma asosida oʻtkazish;

shaharsozlik toʻgʻrisidagi qonun hujjatlarining buzilishiga oid maʼmuriy huquqbuzarliklar toʻgʻrisida maʼmuriy bayonnomalar tuzish va ishlarni koʻrib chiqish, huquqbuzarlik faktiga eʼtiroz bildirilgan hollarda ishni koʻrib chiqish uchun sudga taqdim etish;

shaharsozlik qonunchiligi talablariga rioya etilishi yuzasidan davlat tashkilotlari, ilmiy-tadqiqot, loyihalash va nodavlat notijorat tashkilotlari hamda boshqa vakolatli organlar bilan hamkorlik qilish;

qurilish ishlarida mustahkamlik, seysmik qoidalarining buzilishi natijasida aholi sogʻligʻi va hayotiga zarar yetkazilishi yoki ogʻir oqibatlarga olib kelinishini oldini olish maqsadida huquqni muhofaza qiluvchi organlarga choralar koʻrish yuzasidan tegishli hujjatlarni ilova qilgan holda xabar berish;

nazorat natijalarini tahlil qilish, xalqaro tajribalarni oʻrganish, meʼyoriy talablarni takomillashtirish boʻyicha, qurilish-montaj ishlarini yaxshilash hamda qurilish materiallaridan oqilona foydalanish yuzasidan takliflar kiritish;

har chorakda Inspeksiyaga bajarilgan ishlar toʻgʻrisida hisobot berish;

elektron reytinglarni joriy etish uchun oʻrnatilgan muddatlarda “Shaffof qurilish” boʻyicha Inspeksiyaning milliy axborot tizimi bilan integratsiyalashtirgan maʼlumotlarni taqdim etish;

oʻziga yuklangan vazifalar doirasida ish rejalari, shuningdek, aniq faoliyat yuzasidan tadbirlar rejasini ishlab chiqish, belgilangan tartibda tasdiqlash va Inspeksiyaga taqdim etish;

Inspeksiya topshirigʻiga binoan shaharsozlik va qurilish masalalari boʻyicha oʻquv seminarlarni tashkil qilish va oʻtkazish;

Hududiy inspeksiya xodimlarini qayta tayyorlash va ularning malakasini oshirishga ehtiyojini oʻrganish, shuningdek, bu masalalar boʻyicha Inspeksiyaga aniq takliflar kiritish;

Hududiy inspeksiya nomenklaturasiga kiritilgan lavozimlarga malakali kadrlarni tavsiya qilish;

Hududiy inspeksiya manfaatlarini himoya qilish, shuningdek, inspeksiya vakolatiga kiruvchi masalalar boʻyicha daʼvogar va javobgar boʻlish.

13. Hududiy inspeksiya:

oʻziga yuklangan vazifalar va funksiyalarning sifatli va oʻz vaqtida bajarilishini taʼminlash;

shaharsozlik faoliyati subyektlarining qurilish-montaj ishlari loyiha hujjatlariga muvofiq ravishda bajarilishini tanlab nazorat qilish;

qurilish obyektlarida ishlatilayotgan qurilish materiallari, konstruksiyalari va buyumlarining texnik jihatdan tartibga solish normativ hujjatlar talablariga muvofiqligini nazorat qilish;

jismoniy va yuridik shaxslarning huquqlariga rioya etilishini va qonuniy manfaatlari himoya qilinishini taʼminlash;

qurilish sohasida qonunlarning ijro etilishi, aniqlangan qonunbuzarlik holatlarining oʻz vaqtida koʻrib chiqilishini taʼminlash hamda oʻz vakolati doirasida tegishli chora-tadbirlar koʻrish;

har oylik, choraklik va yillik hisobotlar, maʼlumotlar va statistik maʼlumotlarning oʻz vaqtida taqdim etilishini taʼminlash;

qurilish obyektlarda aniqlangan muammolarni har tomonlama va chuqur oʻrganish hamda umumlashtirish asosida hududlarda tegishli sohani rivojlantirishga doir takliflar tayyorlash uchun masʼuldir.

14. Hududiy inspeksiya boshligʻi Oʻzbekiston Respublikasi qurilish vaziri bilan kelishilgan holda, Inspeksiya boshligʻi tomonidan lavozimga tayinlanadi va lavozimdan ozod etiladi;

15. Hududiy inspeksiya boshligʻi oʻzi tomonidan lavozimga tayinlanadigan va lavozimidan ozod qilinadigan ikki nafar oʻrinbosarga, shu jumladan, bir nafar birinchi oʻrinbosarga ega.

Inspeksiya boshligʻi:

Hududiy inspeksiya xodimlari uchun majburiy boʻlgan buyruqlar chiqaradi hamda ularning bajarilishini nazorat qiladi;

Hududiy inspeksiya xodimlarini faoliyatini ragʻbatlantirish uchun tegishli buyruqlar chiqaradi;

inspektorlik vakant lavozimlariga taklif qilinayotgan nomzodlarning qurilish sohasida kamida 3 yillik ish tajribasiga, mutaxassisligi boʻyicha muxandis-quruvchi, arxitektor, muxandis-gidrotexnik, malakali, amaliy tajribaga ega ekanligi, yuqori darajali kasbiy va maʼnaviy-axloqiy sifatlarga ega boʻlishi kafolatlanganligini taʼminlaydi.

16. Inspeksiya boshligʻi qonun hujjatlariga muvofiq boshqa vakolatlarni ham amalga oshiradi.

17. Hududiy inspeksiyalar nizomi, tuzilmasi, shtat birliklari normativlarini hamda xarajatlar smetasini Inspeksiya boshligʻi tasdiqlaydi.

18. Quyidagilar Hududiy inspeksiya boshligʻining asosiy funksional vazifalari hisoblanadi:

Oʻzbekiston Respublikasi Konstitutsiyasi va qonunlariga, shuningdek, boshqa normativ-huquqiy hujjatlarga amal qilish;

Hududiy inspeksiyalar faoliyatiga umumiy rahbarlik qilish, Oʻzbekiston Respublikasi Prezidentining Farmonlari va qarorlari, Vazirlar Mahkamasining qarorlari va boshqa qonun hujjatlari hamda Qurilish vazirligi va Inspeksiya hujjatlari va qarorlari bilan Hududiy inspeksiyaga yuklangan vazifalar va funksiyalar bajarilishini tashkil etish;

Oʻzbekiston Respublikasi Prezidentining, Vazirlar Mahkamasi va Qurilish vazirligining topshiriqlari va hujjatlari ijrosini taʼminlash, ijro intizomini mustahkamlash boʻyicha kompleks amaliy chora-tadbirlarni amalga oshirish, shuningdek, Oʻzbekiston Respublikasi Prezidentining “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat boshqaruvi organlari, xoʻjalik birlashmalari hamda barcha darajadagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son va “Davlat organlari va tashkilotlarida ijro intizomini yanada mustahkamlash chora-tadbirlari toʻgʻrisida” 2018-yil 5-oktabrdagi PQ-3962-son qarorlari hamda Vazirlar Mahkamasining “Ijro intizomini mustahkamlash chora-tadbirlari toʻgʻrisida” 1999-yil 12-yanvardagi 12-son qaroriga muvofiq topshiriqlarning oʻz vaqtida va sifatli bajarilishi uchun Hududiy inspeksiya xodimlarining shaxsiy javobgarligini oshirish choralarini koʻrish;

Qurilish vazirligi va Inspeksiyaning buyruqlari, qarorlari va topshiriqlarining oʻz vaqtida va sifatli bajarilishini taʼminlash;

Inspeksiyaning faoliyati doirasiga kiradigan masalalar boʻyicha mahalliy ijro etuvchi hokimiyat organlari va boshqa mahalliy tashkilotlar bilan hamkorlik qilish;

Hududiy inspeksiya xodimlari tomonidan Odob-axloq qoidalari talablariga rioya qilishini taʼminlash;

“Korrupsiyaga qarshi kurash toʻgʻrisida”gi Oʻzbekiston Respublikasi Qonuni talablariga muvofiq Inspeksiyada korrupsiya va boshqa huquqbuzarliklarning oldini olish chora-tadbirlarini koʻrish, huquqiy amaliyot va qonunchilikni takomillashtirish chora-tadbirlarini ishlab chiqish va tatbiq etish yoʻli bilan ularning sodir etilishiga koʻmaklashuvchi sabablar va sharoitlarni aniqlash, tahlil qilish va bartaraf etish;

jismoniy va yuridik shaxslarning murojaatlarini “Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi Qonuni bilan belgilangan muddatda va tartibda koʻrib chiqish;

qonun hujjatlarida nazarda tutilgan holatlarda huquqbuzarliklar boʻyicha dalolatnomalar tuzish va koʻrsatmalar berish;

inspektorlik vakant lavozimlariga taklif qilinayotgan nomzodlarning qurilish sohasida kamida 3 yillik ish tajribasiga, mutaxassisligi boʻyicha muxandis-quruvchi, arxitektor, muxandis-gidrotexnik, malakali, amaliy tajribaga ega ekanligi, yuqori darajali kasbiy va maʼnaviy-axloqiy sifatlarga ega boʻlishi kafolatlanganligini taʼminlash;

Hududiy inspeksiya xodimlarini ragʻbatlantirish va intizomiy javobgarlikka tortish masalalarini hal qilish, jumladan, ularning egallab turgan lavozimlariga layoqatli ekanligini koʻrib chiqish, shaxsiy masʼuliyatini oshirish boʻyicha tizimli chora-tadbirlarni amalga oshirish;

Hududiy inspeksiyaning belgilangan koʻrsatkichlarga soʻzsiz erishishni taʼminlashga qaratilgan qoʻshimcha chora-tadbirlarni tasdiqlash va bu boʻyicha Inspeksiya boshligʻiga taklif kiritish;

Hududiy inspeksiya xodimlari faoliyatining samaradorligi va natijadorligini tizimli tanqidiy tahlil qilish;

Hududiy inspeksiya faoliyatini takomillashtirish, shuningdek, davlat xizmatlari samaradorligi, sifati va maqbulligini oshirish boʻyicha taklifni Inspeksiya boshligʻiga koʻrib chiqish uchun kiritish;

davlat sirlariga oid va maxfiy tusga ega boʻlgan axborotlar bilan ishlashda qonun talablariga rioya qilish;

Hududiy inspeksiya xodimlari uchun majburiy boʻlgan buyruqlar chiqarish va koʻrsatmalar berish;

Hududiy inspeksiya mulkini qonunchilikda belgilangan tartibda tasarruf etish;

shaharsozlik toʻgʻrisidagi qonun hujjatlarininng buzilishiga oid maʼmuriy huquqbuzarliklar toʻgʻrisidagi ishlarni koʻrib chiqadi.

ushbu Nizomga muvofiq majburiyatlarni taqsimlashga koʻra boshqa vakolatlarni amalga oshirish.

19. Quyidagilar Hududiy inspeksiya boshligʻi oʻrinbosarlarining asosiy funksional vazifalari hisoblanadi:

Oʻzbekiston Respublikasi Konstitutsiyasi va qonunlari, shuningdek, normativ-huquqiy hujjatlar talablariga rioya qilish;

Hududiy inspeksiya boshligʻi vaqtincha boʻlmaganda, uning vazifalarini bajarish;

Hududiy inspeksiyaning oʻzi mutasaddilik qiladigan boʻlimlari faoliyatini muvofiqlashtirish, nazorat qilish va bevosita boshqarish, ular xodimlari oʻrtasida vazifalarni taqsimlash;

Hududiy inspeksiya faoliyatining oʻzi mutasaddilik qiladigan yoʻnalishlar boʻyicha Oʻzbekiston Respublikasi Prezidentining hujjatlari, Vazirlar Mahkamasining qarorlari bilan tasdiqlangan Inspeksiyaning faoliyatini yanada takomillashtirish boʻyicha konsepsiyalar, kompleks dasturlar va tadbirlarning bajarilishini tanqidiy va chuqur tahlil qilish;

oʻzi mutasaddilik qiladigan boʻlimlar tomonidan reja koʻrsatkichlarining soʻzsiz bajarilishini taʼminlash choralarini koʻrish, boʻlinmalar rahbarlarining hisobotlarini muntazam ravishda eshitish va ushbu koʻrsatkichlarga erishish uchun ularning shaxsiy masʼuliyatini oshirish;

oʻzi mutasaddilik qiladigan boʻlimlari rahbarlarining ish rejalarini tasdiqlash, ularning bajarilishi yuzasidan nazoratni taʼminlash;

oʻzi mutasaddilik qiladigan boʻlimlar faoliyatida ijro intizomini mustahkamlash boʻyicha kompleks amaliy chora-tadbirlarni bajarish, shuningdek, boʻlimlar rahbarlarining shaxsiy masʼuliyatini oshirish chora-tadbirlarini koʻrish;

Inspeksiyaning Hududiy inspeksiya faoliyatiga taalluqli buyruqlari, Hududiy inspeksiya buyruqlari va topshiriqlarini oʻz vaqtida va sifatli bajarilishini taʼminlash;

oʻzi mutasaddilik qiladigan boʻlimlar xodimlarini tanlash va joy-joyiga qoʻyish boʻyicha Hududiy inspeksiya boshligʻiga takliflar kiritish;

oʻzi mutasaddilik qiladigan boʻlimlar rahbarlari faoliyatining samaradorligi va natijadorligini muntazam ravishda tanqidiy tahlil qilish;

oʻzi mutasaddilik qiladigan boʻlimlar rahbarlari va xodimlarini ragʻbatlantirish va intizomiy javobgarlikka tortish boʻyicha Hududiy inspeksiya boshligʻiga takliflar kiritish;

huquqni qoʻllash amaliyotini va qonun hujjatlarini takomillashtirishga doir chora-tadbirlarni ishlab chiqish va amalga oshirish orqali “Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq korrupsiya va boshqa huquqbuzarliklarning oldini olish choralarini koʻrish, shuningdek, ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish;

“Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi Qonunida belgilangan muddatlarda va tartibda jismoniy va yuridik shaxslarning murojaatlarini koʻrib chiqish boʻyicha samarali ishlarni tashkil etish, aholi bilan toʻgʻridan-toʻgʻri va ochiq muloqotni yoʻlga qoʻyish, jismoniy shaxslarni va yuridik shaxslar vakillarini muntazam ravishda shaxsan qabul qilish, shu jumladan, joylarga borib qabul qilish;

Oʻzbekiston Respublikasi Prezidentining Xalq qabulxonalari bilan samarali hamkorlik qilish, ularning faoliyatida faol ishtirok etish, jismoniy va yuridik shaxslar vakillarining Oʻzbekiston Respublikasi Prezidentining Virtual qabulxonasidan tushgan murojaatlari oʻz vaqtida va toʻlaqonli koʻrib chiqilishini taʼminlash;

davlat siriga kiritilgan maʼlumotlar va maxfiy axborot bilan ishlashda qonun hujjatlari talablariga rioya qilish.

20. Hududiy inspeksiya boshligʻi:

Inspeksiyaga yuklangan vazifalar va funksiyalarning bajarilishi, shuningdek, ushbu Nizomning 13-bandida nazarda tutilgan masalalar boʻyicha;

ushbu Nizomning 18-bandida koʻrsatilgan oʻz funksional vazifalari sifatli bajarilishi uchun shaxsan javob beradi.

21. Hududiy inspeksiya boshligʻining oʻrinbosarlari:

tegishli boʻlimlarga yuklangan vazifalar va funksiyalar bajarilishi uchun;

ushbu Nizomning 13-bandida nazarda tutilgan javobgarlik sohalari boʻyicha;

ushbu Nizomning 19-bandida koʻrsatilgan oʻz funksional vazifalarini sifatli bajarish uchun shaxsan masʼuldir.

22. Hududiy inspeksiya boshligʻi Hududiy inspeksiya faoliyati va unga yuklangan vazifalar samarali bajarilishi boʻyicha doimiy monitoring olib boradi hamda Hududiy inspeksiya faoliyati samaradorligiga xolisona baho beradi.

23. Hududiy inspeksiya faoliyatining samaradorligi va natijadorligi muntazam ravishda baholab boriladi.

24. Hududiy inspeksiya faoliyatining samaradorligi va natijadorligini baholash Inspeksiya boshligʻi tomonidan tasdiqlanadigan Hududiy inspeksiya faoliyati samaradorligi va natijadorligini baholash mezonlari va indikatorlarga asoslanadi.

25. Hududiy inspeksiya faoliyatining samaradorligi va natijadorligini baholash yakunlari boʻyicha quyidagi choralar koʻriladi:

Hududiy inspeksiya boshligʻining oʻrinbosarlari va xodimlarini ragʻbatlantirish (mukofotlash) yoki intizomiy javobgarlikka tortish;

Hududiy inspeksiya faoliyatida aniqlangan kamchiliklarni bartaraf qilish va uning faoliyatini yanada takomillashtirish.

26. Hududiy inspeksiya faoliyatining samaradorligi va natijadorligini baholash tartibi Inspeksiya tomonidan belgilanadi.

27. Hududiy inspeksiya Inspeksiya bilan hamkorlikda:

faoliyatning belgilangan sohasida qonunlarni amalga oshirish natijalari haqida axborot taqdim etadi;

faoliyatni oʻrganish jarayonida aniqlangan kamchiliklar va qonunbuzarliklarni bartaraf etish natijalari haqida axborot beradi;

oʻz ishi natijalari haqida hisobotlar taqdim etadi;

hududlarning ijtimoiy-iqtisodiy rivojlanishi muammolarini, jumladan, aholining eng muhim muammolarini hal qilishga moʻljallangan takliflarni yoʻllaydi;

vakolatli organlar tomonidan oʻtkazilgan oʻz faoliyati tekshiruvi natijalari haqida axborot beradi.

28. Hududiy inspeksiya faoliyati quyidagi manbalar hisobidan moliyalashtiriladi:

a) davlat qurilish nazorati amalga oshiriladigan barcha obyektlar uchun Hududiy inspeksiyalarga ajratmalarning qurilish-montaj ishlari qiymatining (qoʻshimcha qiymat soligʻisiz) 0,18 foiz miqdoridagi Hududiy inspeksiyalar ixtiyorida qoldiriladigan mablagʻlar;

b) Oʻzbekiston Respublikasi Qurilish vazirligi faoliyatini qoʻllab-quvvatlash jamgʻarmasidan moliyalashtiriladigan mablagʻlar;

v) mavjud binolar va inshootlarning texnik holatini tekshirish boʻyicha shartnoma asosida ishlarni bajarish va xizmatlar koʻrsatishdan, shuningdek, laboratoriya xizmatlari va qonun hujjatlarida taqiqlanmagan xizmatlarning boshqa turlarini koʻrsatishdan olingan daromadlar.

29. Mavjud binolar va inshootlarning texnik holatini tekshirish boʻyicha bajarilayotgan ishlar va koʻrsatilayotgan xizmatlarning, shuningdek, sinov laboratoriya xizmatlari va Inspeksiya tomonidan koʻrsatilayotgan xizmatlar boshqa turlarining qiymatini aniqlash metodikasi Inspeksiya tomonidan tasdiqlanadi.

30. Hududiy inspeksiya xodimlariga Qurilish vazirligi huzuridagi Qurilish sohasida nazorat inspeksiyasi xodimlarini moddiy ragʻbatlantirish tartibida belgilangan mehnatga haq toʻlash, moddiy ragʻbatlantirish va ijtimoiy himoya qilish shartlari tatbiq etilgan holda, ushbu mablagʻlar Hududiy inspeksiyalar hisobidan amalga oshiriladi.

Hududiy inspeksiyaning moddiy-texnika bazasini mustahkamlash, shuningdek, uning xodimlarini moddiy ragʻbatlantirish, shu jumladan qoʻshimcha toʻlovlar, ustama haqlar, mukofotlar, ijtimoiy va boshqa toʻlovlarni toʻlash Hududiy inspeksiyalar va Oʻzbekiston Respublikasi Qurilish vazirligi faoliyatini qoʻllab-quvvatlash jamgʻarmasi mablagʻlari hisobidan qoʻshimcha moliyalashtirish yoʻli bilan amalga oshirilishi mumkin.

Hududiy inspeksiyaning xodimlariga oʻz xizmat vazifalarini tashabbus koʻrsatib va vijdonan bajarganliklari uchun Hududiy inspeksiya boshligʻi tomonidan inspeksiya mablagʻlari hisobidan lavozim maoshining 200 foizigacha ustama belgilanishi mumkin.

31. Hududiy inspeksiya qonun hujjatlarida belgilangan tartibda qayta tashkil etiladi va tugatiladi.

32. Ushbu Nizom talablari buzilishida aybdor boʻlgan shaxslar qonun hujjatlarida belgilangan tartibda javob beradilar.

2. Vazirlar Mahkamasining “Oʻzbekiston Respublikasi Qurilish vazirligi, uning tarkibiy boʻlinmalari, shuningdek, respublika va hududiy arxitektura-shaharsozlik kengashlari toʻgʻrisidagi nizomlarni tasdiqlash haqida” 2018-yil 31-martdagi 603-son qarorida:

a) 1-bandda:

toʻrtinchi xatboshi chiqarib tashlansin;

beshinchi xatboshi toʻrtinchi xatboshi deb hisoblansin;

b) 4 va 4a-ilovalar oʻz kuchini yoʻqotgan deb hisoblansin;

v) 5-ilovaning 4-bandiga:

quyidagi mazmundagi oʻn beshinchi xatboshi qoʻshilsin:

“qurilish sohasidagi hududiy nazorat inspeksiyalari tomonidan jamgʻarmaga yoʻnaltirilgan mablagʻlarning 0,01 foizi — Inspeksiya va uning Hududiy inspeksiyalari ehtiyojlarini moliyalashtirishga yoʻnaltiriladi;”

oʻn beshinchi xatboshi oʻn oltinchi xatboshi deb hisoblansin.