“O‘zbekiston Respublikasining Biologik xilma-xillik haqidagi Konvensiyaning bioxavfsizlik bo‘yicha Kartaxena protokoliga qo‘shilishi to‘g‘risida (Monreal, 2000-yil 29-yanvar)”gi O‘zbekiston Respublikasining Qonuni ijrosini ta’minlash maqsadida Vazirlar Mahkamasi qaror qiladi:

1. O‘zbekiston Respublikasi Innovatsion rivojlanish vazirligi, Fanlar akademiyasi, Sog‘liqni saqlash vazirligi, Qishloq xo‘jaligi vazirligi hamda Ekologiya va atrof-muhitni muhofaza qilish davlat qo‘mitasining Biologik xilma-xillik haqidagi Konvensiyaning bioxavfsizlik bo‘yicha Kartaxena protokolida (Monreal, 2000-yil 29-yanvar) (keyingi o‘rinlarda — Kartaxena protokoli) belgilangan Milliy muvofiqlashtiruvchi markaz vazifalarini O‘zbekiston Respublikasi Fanlar akademiyasining Genomika va bioinformatika markaziga (keyingi o‘rinlarda — Markaz) yuklash to‘g‘risidagi taklifiga rozilik berilsin.

2. Markazga quyidagi qo‘shimcha vazifalar yuklansin:

genetik modifikatsiyalangan organizmlarning (keyingi o‘rinlarda — GMO) biologik xavfsizligi bo‘yicha ilmiy tadqiqotlar natijalarini hamda boshqa ma’lumotlarni tahlil qilish va umumlashtirish;

oziq-ovqat xomashyosi, qishloq xo‘jaligi mahsulotlari hamda ozuqa va urug‘larda GMOni aniqlash bo‘yicha laboratoriya tadqiqotlari, shuningdek, xo‘jalik shartnomalari asosida tahlillarini o‘tkazish;

respublikada sinovdan o‘tkazilishi yoki ishlatilishi kutilayotgan GMO va uning asosida yaratilgan mahsulotlar xavfsizligi bo‘yicha ilmiy asoslangan ekspertizalar tashkil etish;

manfaatdor vazirliklar va idoralar, yuridik va jismoniy shaxslarga hamda ommaviy axborot vositalariga biologik xavfsizlik to‘g‘risidagi ma’lumotlarni taqdim etib borish, ilmiy, ilmiy-texnik, ekologik, huquqiy axborot va tajriba almashinuviga ko‘maklashish;

xalqaro axborot tarmoqlaridagi biologik xavfsizlik to‘g‘risidagi ma’lumotlar asosida milliy ma’lumotlar bazasini yaratish;

xorijiy mamlakatlar biologik xavfsizlik tashkilotlari va xalqaro tashkilotlar bilan ma’lumotlar almashish;

GMOlarni aniqlash va ularni atrof-muhitga chiqarishning xavfini baholash sohasida kadrlar tayyorlash, qayta tayyorlash va malakasini oshirishda ishtirok etish;

Biologik xilma-xillik haqidagi Konvensiya kotibiyati bilan biologik xavfsizlik masalalari bo‘yicha doimiy aloqada bo‘lish va biologik xavfsizlik sohasida vositachilik mexanizmini joriy etish;

biologik xilma-xillikni ta’minlash sohasidagi normativ-huquqiy hujjatlarni takomillashtirish bo‘yicha takliflar ishlab chiqishda ishtirok etish.

3. O‘zbekiston Respublikasi Innovatsion rivojlanish vazirligi huzuridagi Ilg‘or texnologiyalar markaziga oziq-ovqat xomashyosi, qishloq xo‘jaligi mahsulotlari hamda ozuqa va urug‘larda GMOni aniqlash bo‘yicha referens-laboratoriya vazifasi yuklatilsin.

Belgilab qo‘yilsinki, referens-laboratoriya GMOni aniqlashning laboratoriya natijalari yuzasidan munozarali holat yuzaga kelganda “uchinchi tomon” sifatida qatnashadi.

4. O‘zbekiston Respublikasi Fanlar akademiyasi 2020-yildan boshlab belgilangan tartibda Kartaxena protokoli qoidalarining bajarilishi yuzasidan Biologik xilma-xillik haqidagi Konvensiya kotibiyatiga hisobot berib borilishini ta’minlasin.

5. Belgilansinki, Markazning mazkur qaror 2-bandida belgilangan vazifalarni bajarish bilan bog‘liq qo‘shimcha xarajatlari:

tasdiqlangan xarajatlar smetasi asosida O‘zbekiston Respublikasi Davlat budjeti (qo‘shimcha jalb qilingan xodimlar mehnatiga haq to‘lashdan tashqari);

xo‘jalik shartnomalaridan tushgan budjetdan tashqari mablag‘lar (qo‘shimcha jalb qilingan xodimlar mehnatiga haq to‘lash uchun) hisobidan amalga oshiriladi.

6. O‘zbekiston Respublikasi Innovatsion rivojlanish vazirligi, Qishloq xo‘jaligi vazirligi, Sog‘liqni saqlash vazirligi, Ekologiya va atrof-muhitni muhofaza qilish davlat qo‘mitasi Kartaxena protokoli qoidalarini amalga oshirishda o‘zlariga taalluqli qismi bo‘yicha mas’ul vakolatli organlar etib belgilansin.

7. O‘zbekiston Respublikasi Tashqi ishlar vazirligi Fanlar akademiyasi hamda Innovatsion rivojlanish vazirligining buyurtmanomalariga binoan Kartaxena protokoli masalalari bo‘yicha tashrif buyuruvchi xorijiy mutaxassislarga O‘zbekiston Respublikasiga kirish vizalari konsullik yig‘imlari va haqiqiy xarajatlarning o‘rnini qoplash hisobidan yig‘imlar undirilmasdan, belgilangan tartibda rasmiylashtirilishini ta’minlasin.

8. O‘zbekiston Respublikasi Investitsiyalar va tashqi savdo vazirligi Kartaxena protokoli bo‘yicha Markazga yuklangan qo‘shimcha vazifalarni samarali bajarish maqsadida xalqaro beg‘araz texnik ko‘mak mablag‘larini (grantlarni) jalb etishda ko‘maklashsin va bu borada donor mamlakatlar, xalqaro va xorijiy hukumat hamda nohukumat tashkilotlar bilan doimiy ravishda amaliy ish olib borsin.

9. O‘zbekiston Respublikasi Innovatsion rivojlanish vazirligi:

biologik xavfsizlikni ta’minlash, oziq-ovqat, qishloq xo‘jaligi mahsulotlari hamda ozuqa va urug‘lar tarkibida GMOni tadqiq etishga qaratilgan fundamental, amaliy va innovatsion loyihalarning tanlovlar asosida shakllantirilishini ta’minlasin;

boshqa manfaatdor vazirliklar va idoralar bilan birgalikda o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

10. Ushbu qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari A.J. Ramatov, O‘zbekiston Respublikasi innovatsion rivojlanish vaziri I.Y. Abdurahmonov hamda O‘zbekiston Respublikasi Fanlar akademiyasi prezidenti B.S. Yuldashev zimmasiga yuklansin.