Oʻzbekiston Respublikasi Prezidentining “Oʻzbekiston Respublikasi Prezidentining ayrim hujjatlariga oʻzgartirishlar kiritish toʻgʻrisida” 2019-yil 29-avgustdagi PF-5794-son Farmoni ijrosini taʼminlash, “Dori-Darmon” aksiyadorlik kompaniyasi va uning tarkibidagi tashkilotlarning moliyaviy barqarorligini oshirish, respublika aholisi va tibbiyot muassasalarining dori vositalariga boʻlgan ehtiyojini taʼminlash, shuningdek, yolgʻiz keksalar va nogironligi boʻlgan shaxslarni manzilli ijtimoiy muhofaza qilish va qoʻllab-quvvatlash chora-tadbirlarini yanada kuchaytirish maqsadida Vazirlar Maxkamasi qaror qiladi:

1. Oʻzbekiston Respublikasi Hukumatining ilovaga muvofik ayrim qarorlariga oʻzgartirish va qoʻshimchalar kiritilsin.

2. Oʻzbekiston Respublikasi Sogʻliqni saqlash vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari — iqtisodiyot va sanoat vaziri J.A. Qoʻchqorov va Oʻzbekiston Respublikasi sogʻliqni saqlash vaziri A.K. Shadmanov zimmasiga yuklansin.

1. Vazirlar Mahkamasining “Oʻzbekiston Respublikasi Sogʻliqni saqlash vazirligining tibbiy-ijtimoiy muassasalari toʻgʻrisidagi nizomlarni tasdiqlash haqida” 2011-yil 23-avgustdagi 240-son qarorida (Oʻzbekiston Respublikasi QT, 2011-yil, 8-son, 71-modda):

a) 1-ilovada:

2-band quyidagi tahrirda bayon qilinsin:

“2. “Saxovat” internat uylari Oʻzbekiston Respublikasida doimiy yashaydigan, Oʻzbekiston Respublikasining Oila kodeksiga muvofiq ularni parvarish qilishi shart boʻlgan qarindoshlari yoki boshqa shaxslar boʻlmagan yolgʻiz keksalar, 18 yoshidan boshlab I va II guruh nogironligi boʻlgan shaxslar hamda oʻzgalar parvarishiga muhtoj yolgʻiz yashovchi I guruh nogironligi boʻlgan keksalar (keyingi oʻrinlarda — vasiylikka olinuvchilar) uchun davlat tibbiy-ijtimoiy muassasalari hisoblanadi”;

10-bandga quyidagi tahrirdagi xatboshi qoʻshilsin:

“Saxovat” internat uylari qonun hujjatlarida belgilangan tartibda pullik xizmatlar koʻrsatishi ham mumkin”;

11-band quyidagi tahrirda bayon qilinsin:

“11. “Saxovat” internat uylariga Oʻzbekiston Respublikasida doimiy yashaydigan, Oʻzbekiston Respublikasining Oila kodeksiga muvofiq ularni parvarish qilishi shart boʻlgan qarindoshlari yoki boshqa shaxslar boʻlmagan yolgʻiz keksalar, 18 yoshidan boshlab I va II guruhlar nogironligi boʻlgan shaxslar hamda oʻzgalar parvarishiga muhtoj yolgʻiz yashovchi I gurux nogironligi boʻlgan keksalar qabul qilinadi”;

15-band quyidagi tahrirda bayon qilinsin:

“15. “Saxovat” internat uyiga rasmiylashtirilayotgan yolgʻiz keksaning, 18 yoshidan boshlab I va II guruh nogironligi boʻlgan shaxsning hamda oʻzgalar parvarishiga muhtoj yolgʻiz yashovchi I guruh nogironligi boʻlgan keksaning doimiy yashash joyidagi tuman (shahar) tibbiyot birlashmasi boshligʻi nomiga berilgan arizasi”.

b) 5-ilovada:

10-bandga quyidagi tahrirdagi xatboshi qoʻshilsin:

“Pansionat qonun hujjatlarida belgilangan tartibda pullik xizmatlar koʻrsatishi ham mumkin”;

11-bandning ikkinchi xatboshisi quyidagi tahrirda bayon qilinsin:

“Boʻsh joylar mavjud boʻlgan taqdirda pansionatga yolgʻiz urush va mehnat faxriylaridan tashqari Oʻzbekiston Respublikasida doimiy yashaydigan, Oʻzbekiston Respublikasining Oila kodeksiga muvofiq ularni parvarish qilishi shart boʻlgan qarindoshlari yoki boshqa shaxslar boʻlmagan yolgʻiz keksalar, 18 yoshdan boshlab I va II guruh nogironligi boʻlgan shaxslar, oʻzgalar parvarishiga muhtoj yolgʻiz yashovchi I guruh nogironligi boʻlgan keksalar ham qabul qilinishi mumkin”.

2. Vazirlar Mahkamasining “Dori-Darmon” aksiyadorlik kompaniyasini boshqarish samaradorligini va “O`zmedimpeks” davlat unitar korxonasining moliyaviy barqarorligini oshirish chora-tadbirlari toʻgʻrisida” 2018-yil 22-oktabrdagi 849-son qarorining 6-bandidagi “uch yil muddatga” soʻzlari “ikki yillik imtiyozli davr bilan besh yil muddatga” soʻzlari bilan almashtirilsin.

3. Vazirlar Mahkamasining 2019-yil 1-avgustdagi 641-son qarori bilan tasdiqlangan Oʻzbekiston Respublikasi Sogʻliqni saqlash vazirligi huzuridagi Farmatsevtika tarmogʻini rivojlantirish agentligining Farmatsevtika tarmogʻini qoʻllab-quvvatlash va rivojlantirish jamgʻarmasi toʻgʻrisidagi nizomning 3-bandi ikkinchi xatboshisidagi “yigʻimning 1,0 foizi” soʻzlari “yigʻim summasining 83 foizi” soʻzlari bilan almashtirilsin.