O‘zbekiston Respublikasi Hukumati (keyingi o‘rinlarda — O‘zbekiston tomoni) va Birlashgan Arab Amirliklari Hukumati (keyingi o‘rinlarda — Amirliklar tomoni), keyingi o‘rinlarda “Tomonlar” deb ataluvchilar,

ikki mamlakat o‘rtasidagi do‘stona munosabatlarni mustahkamlash maqsadida,

O‘zbekiston Respublikasining Birlashgan Arab Amirliklaridagi Elchixonasi uchun qulay ish va yashash sharoitlarini yaratish maqsadida,

1961-yil 18-apreldagi Diplomatik alokalar to‘g‘risidagi Vena konvensiyasini inobatga olgan holda,

quyidagilar to‘g‘risida kelishib oldilar:

Amirliklar tomoni O‘zbekiston Respublikasining Elchixonasi binosini qurish uchun O‘zbekiston Respublikasiga quyidagi yer uchastkasini bepul taqdim etadi: G‘arbiy Havzadagi 9-sonli yer uchastkasi: Abu-Dabi shahri, diplomatik tumani, W 59/2; maydoni: 5575 kvadrat metr (besh ming besh yuz yetmish besh kvadrat metr).

1. Amirliklar tomoni mazkur Bitimning 1-moddasida qayd etilgan, O‘zbekiston tomoniga taqdim etiladigan yer uchastkasini har qanday qarzlardan yoki uchinchi tomonlarning huquqlaridan holi, garovga quyilmagan hamda undan mazkur Bitim maqsadlarida foydalanishga to‘sqinlik qilishi mumkin bo‘lgan biror boshqacha tarzda majburiyat yuklamaydigan holda taqdim etilishini kafolatlaydi.

2. Mazkur Bitimning 1-moddasida qayd etilgan yer uchastkasi qabul qiluvchi davlat tomonidan o‘rnatilgan barcha soliqlardan ozod etiladi.

O‘zbekiston tomoni:

a) Amirliklar tomonining yozma roziligisiz mazkur Bitimning 1-moddasida qayd etilgan yer uchastkasini kengaytirmaslik, sotmaslik, majburiyatlar bilan bog‘lamaslik, uchinchi tomonga mulk qilib topshirmaslik, ijaraga yoki ikkilamchi ijaraga bermaslik majburiyatini oladi;

b) Binolarni ekspluatatsiya qilish, qurish, chegaralarini ajratish va saqlash, shu jumladan, kommunal xizmatlar (gaz, elektr, suv ta’minoti va boshqa shunga o‘xshash xizmatlar turlari), barcha turdagi aloqa xizmatlaridan foydalanish bilan bog‘liq xarajatlarni o‘z hisobidan qoplaydi.

Mazkur Bitimning 1-moddasida qayd etilgan yer uchastkasida O‘zbekiston Respublikasi Elchixonasi uchun binolar va inshootlar qurish qabul qiluvchi Davlat qonunchiligiga muvofiq amalga oshiriladi.

Amirliklar tomoni O‘zbekiston Respublikasi Elchixonasining binosini qurish va jihozlash uchun O‘zbekiston tomoni Birlashgan Arab Amirliklariga olib kiradigan materiallar, jihozlar va texnikani barcha turdagi bojxona to‘lovlaridan ozod qilinishiga ko‘maklashadi.

O‘zbekiston tomoni olib kirishdan oldin Birlashgan Arab Amirliklarining Tashqi ishlar va xalqaro hamkorlik vazirligidan zarur ruxsatni olishi lozim.

Amirliklar tomoni mazkur Bitimning 1-moddasida qayd etilgan yer uchastkasida quriladigan O‘zbekiston Respublikasi Elchixonasi binosiga bo‘lgan egalik huquqiga oid huquqiy hujjatlarni Birlashgan Arab Amirliklari qonunchiligiga muvofiq rasmiylashtirishga ko‘maklashadi.

Mazkur Bitimga Tomonlarning o‘zaro roziligi asosida mazkur Bitimning ajralmas qismi hisoblanadigan alohida bayonnomalar orqali o‘zgartirish va qo‘shimchalar kiritilishi mumkin.

Mazkur Bitim qoidalarini talqin qilish yoki qo‘llashdan kelib chiqadigan barcha nizolar Tomonlar o‘rtasida diplomatik kanallar orqali maslahatlashuvlar va muzokaralar yo‘li bilan hal etiladi.

1. Mazkur Bitim uning kuchga kirishi uchun zarur bo‘lgan davlat ichki protseduralari bajarilganligi to‘g‘risidagi so‘nggi xabarnoma diplomatik kanallar orqali olingan sanadan kuchga kiradi va qirq to‘qqiz (49) yil davomida amalda bo‘ladi.

2. Mazkur Bitim basharti Tomonlardan biri diplomatik kanallar orqali uni tugatish niyati to‘g‘risida bunday tugatishdan kamida bir (1) yil oldin boshka Tomonni yozma ravishda xabardor qilmasa, o‘z-o‘zidan keyingi shunday muddatlarga uzayaveradi.

3. Mazkur Bitim tugatilgan taqdirda, Tomonlar mazkur Bitimning 1-moddasida qayd etilgan yer uchastkasida joylashgan bino masalalari bo‘yicha alohida muzokaralar o‘tkazadilar.

Buning tasdig‘i sifatida, o‘zlarining tegishli hukumatlari tomonidan o‘rnatilgan tartibda vakolat berilgan quyida imzo chekuvchilar mazkur Bitimni imzoladilar.

Abu-Dabi shahrida 2019-yil 25-martda ikki nusxada, har biri o‘zbek, arab va ingliz tillarida tuzildi, bunda barcha matnlar teng autentikdir.

Mazkur Bitimni talqin qilishda tafovutlar yuzaga kelgan taqdirda, ingliz tilidagi matn ustuvor hisoblanadi.