Mamlakatimizda tadbirkorlik subyektlarini himoya qilishning huquqiy mexanizmlarini yanada mustahkamlash, investitsiyaviy va ishbilarmonlik muhitini yaxshilash, biznesni rivojlantirish uchun byurokratik to‘siqlarni bartaraf etish maqsadida:

1. O‘zbekiston Respublikasi Prezidentining ayrim hujjatlariga ilovaga muvofiq o‘zgartirish va qo‘shimchalar kiritilsin.

2. O‘zbekiston Respublikasi Vazirlar Mahkamasi bir oy muddatda hukumat qarorlariga ushbu Farmondan kelib chiqadigan, shu jumladan eksport-import operatsiyalari bo‘yicha valyuta nazorati to‘g‘risidagi qonun hujjatlarini buzganligi uchun xo‘jalik yurituvchi subyektlar tomonidan to‘langan jarima summasini O‘zbekiston Respublikasining Davlat budjetidan qaytarib berish tartibini aniqlashtirishni hisobga olgan holda tegishli o‘zgartirish va qo‘shimchalar kiritsin.

3. Mazkur Farmonning ijrosini nazorat qilish O‘zbekiston Respublikasining Bosh vaziri A.N. Aripov zimmasiga yuklansin.

1.O‘zbekiston Respublikasi Prezidentining 1994-yil 20-apreldagi PF-837-son Farmoni bilan tasdiqlangan Eksport-import operatsiyalari bo‘yicha valyuta nazorati to‘g‘risidagi nizomning 10-bandi:

a) quyidagi mazmundagi oltinchi — sakkizinchi xatboshilar bilan to‘ldirilsin:

“Agar jarimani qo‘llash masalasini ko‘rib chiqish paytiga kelib, valyuta mablag‘larining kelib tushishi yoki respublikaga tovarlarni olib kirish hamda “erkin muomalaga chiqarish” rejimida rasmiylashtirish, ishlarni bajarish va xizmatlar ko‘rsatish ta’minlangan bo‘lsa, jarima qo‘llanilmaydi.

Agar sudning jarima qo‘llash to‘g‘risidagi qarorini ijro etish paytiga kelib, valyuta mablag‘larining kelib tushishi yoki respublikaga tovarlarni olib kirish hamda “erkin muomalaga chiqarish” rejimida rasmiylashtirish, ishlarni bajarish va xizmatlar ko‘rsatish ta’minlangan bo‘lsa, qo‘llanilgan jarima to‘lanmaydi.

Agar jarima qo‘llanilganidan keyin 90 kunlik muddat ichida valyuta mablag‘larining kelib tushishi yoki respublikaga tovarlarni olib kirish hamda “erkin muomalaga chiqarish” rejimida rasmiylashtirish, ishlarni bajarish va xizmatlar ko‘rsatish ta’minlangan bo‘lsa, to‘langan jarima O‘zbekiston Respublikasining Davlat budjetidan qaytarib berilishi lozim.”;

b) oltinchi xatboshisi to‘qqizinchi xatboshi deb hisoblansin.

2. O‘zbekiston Respublikasi Prezidentining 2018-yil 30-oktabrdagi “Tovar bozorlarida savdoni yanada erkinlashtirish va raqobatni rivojlantirish chora-tadbirlari to‘g‘risida”gi PF-5564-son Farmoni 1-bandi “a” kichik bandining beshinchi xatboshisi “tashqi savdo shartnomalari bo‘yicha qarzlar bundan mustasno” so‘zlari bilan to‘ldirilsin.