“Shahar yoʻlovchilar transporti toʻgʻrisida”gi Oʻzbekiston Respublikasi Qonuni va Vazirlar Mahkamasining “Umumiy foydalaniladigan transportda yoʻlovchi tashuvchilar faoliyatini hamda ularni moliyalashtirish tartibini takomillashtirish toʻgʻrisida” 2012-yil 17-sentabrdagi 273-son qaroriga muvofiq, shuningdek, Toshkent shahar yoʻlovchi tashish transporti tashkilotlarini moliyaviy sogʻlomlashtirish maqsadida Vazirlar Mahkamasi qaror qiladi:

1. Toshkent shahar hokimligi, Oʻzbekiston Respublikasi Moliya vazirligi, “Oʻzbekiston temir yoʻllari” AJ va “Toshshahartransxizmat” AJning cheklangan tariflar boʻyicha yoʻlovchi tashish hisobidan yuzaga kelgan zararlarni qoplash toʻgʻrisidagi taklifiga rozilik berilsin:

“Toshshahartransxizmat” AJ avtobus saroylarining — 2018-yil IV choragi va 2019-yil I choragi boʻyicha 38 715 700 ming soʻm;

“Toshkent metropoliteni” UKning — 2018-yil va 2019-yil I choragi boʻyicha 9 011 000 ming soʻm.

2. Oʻzbekiston Respublikasi Moliya vazirligi va Toshkent shahar hokimligi:

a) “Toshshahartransxizmat” AJ avtobus saroylarida 2018-yil IV choragi va 2019-yil I choragi boʻyicha 38 715 700 ming soʻm miqdoridagi zararni quyidagi qoʻshimcha manbalar:

27 771 650 ming soʻm — Oʻzbekiston Respublikasining respublika budjeti hisobidan;

10 944 050 ming soʻm — Toshkent shahar mahalliy budjeti hisobidan;

b) “Toshkent metropoliteni” UKning 2018-yil va 2019-yil I choragi boʻyicha 9 011 000 ming soʻm miqdoridagi zararni Oʻzbekiston Respublikasining respublika budjetining daromadlar rejasining orttirib bajarilgan qismi hisobidan qoplasin.

3. “Toshshahartransxizmat” AJ “Toshshahartransxizmat” AJ avtobus saroylarining 2018-yil IV choragi va 2019-yil I choragi boʻyicha zararlarni qoplash uchun ajratilayotgan 38 715 700 ming soʻm miqdoridagi mablagʻlar yetkazib beriladigan dizel yoqilgʻisi uchun “Oʻzbekneftegaz” AJ tashkilotlariga yoʻnaltirilishini taʼminlansin.

4. “Toshkent metropoliteni” UK 2018-yil va 2019-yil I choragi boʻyicha zararlarni qoplash uchun ajratilayotgan 9 011 000 ming soʻm miqdoridagi mablagʻlar isteʼmol qilingan elektr energiyasi uchun qarzdorlikni qoplashga yoʻnaltirilishini taʼminlasin.

5. Davlat aktivlarini boshqarish agentligi, Oʻzbekiston Respublikasi Transport vazirligi, Toshkent shahar hokimligi va “Oʻzbekiston temir yoʻllari” AJ Oʻzbekiston Respublikasi Monopoliyaga qarshi kurashish qoʻmitasi bilan birgalikda “Toshshahartransxizmat” AJ va “Toshkent metropoliteni” UKni moliyaviy sogʻlomlashtirish va ularning zararlarini kamaytirish boʻyicha amaliy choralar koʻrish toʻgʻrisida ikki oy muddatda Vazirlar Mahkamasiga taklif kiritsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — transport vaziri A.J. Ramatov va Oʻzbekiston Respublikasi Bosh vazirining oʻrinbosari — moliya vaziri J.A. Qoʻchqorov zimmasiga yuklansin.