Oʻzbekiston Respublikasi Prezidentining “Jizzax viloyatini kompleks rivojlantirishni davlat tomonidan tartibga solish va boshqarishning samarali modelini ishlab chiqish toʻgʻrisida” 2019-yil 3-yanvardagi PF-5609-son Farmonini ijro etish va “Ilgʻor hudud” sinov-tajriba loyihasini amalga oshirish doirasida, shuningdek, respublikada turistik xizmatlarni yanada diversifikatsiyalash va umumeʼtirof etilgan jahon standartlariga muvofiq golf industriyasini jadal rivojlantirish uchun shart-sharoitlar yaratish maqsadida Vazirlar Mahkamasi qaror qiladi:

1. Oʻzbekiston Respublikasi Prezidenti huzuridagi Loyiha boshqaruvi milliy agentligi (keyingi oʻrinlarda Agentlik deb ataladi), Oʻzbekiston Respublikasi Investitsiyalar va tashki savdo vazirligi va Jizzax viloyati hokimligining:

Jizzax viloyatining Gʻallaorol tumanida zarur madaniy-koʻngilochar infratuzilmani, jumladan, biznes-klass kottejlar shaharchasini, mehmonxonalar, koʻngilochar obyektlar va dam olish — sogʻlomlashtirish markazini oʻz ichiga olgan, golf boʻyicha professional va havaskorlar turnirlarini oʻtkazish uchun moʻljallangan, shuningdek, golf oʻynashga aholi va turistlarni faol jalb qilishni koʻzda tutuvchi jahon standartlariga muvofiq boʻlgan golf majmuasini tashkil etish loyihasini (keyingi oʻrinlarda loyiha deb ataladi) amalga oshirish;

“Mirasmanda Golf Resort” masʼuliyati cheklangan jamiyatni (keyingi oʻrinlarda “Mirasmanda Golf Resort” MChJ deb ataladi) tashkil etish toʻgʻrisidagi takliflariga rozilik berilsin.

2. Quyidagilar:

“Mirasmanda Golf Resort” MChJning dastlabki ustav fondi “Raqamli ishonch” raqamli iqtisodiyotni rivojlantirishni qoʻllab-quvvatlash jamgʻarmasining ulushi hisobiga (keyingi oʻrinlarda Jamgʻarma deb ataladi) keyinchalik ulushning bir qismini xorijiy investorlarga sotish yoʻli bilan shakllantirilishi;

istiqbolli uchastkalarni oʻrganish asosida “SongNo Golf Design” kompaniyasi (Koreya Respublikasi) tomonidan yer uchastkalari chegaralari aniqlangan holda golf majmuasi joylashuvining birlamchi dizayni taqdim etilganligi maʼlumot uchun qabul qilinsin.

3. “Mirasmanda Golf Resort” MChJga, istisno tariqasida:

loyihaning bosh rejasini, texnik-iqtisodiy asosini va boshqa loyihaoldi hujjatlarni ishlab chiqishga “SongNo Golf Design” kompaniyasi bilan toʻgʻridan toʻgʻri shartnoma tuzishga;

loyihani amalga oshirish doirasida tovarlar (ishlar, xizmatlar)ni tender (tanlov) savdolari oʻtkazmasdan eng yaxshi takliflarni tanlash orqali xarid qilishga ruxsat berilsin.

4. Jizzax viloyat hokimligi:

Agentlik, Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi bilan birgalikda bir oy muddatda Jizzax viloyatining Gʻallaorol tumani hududida “Mirasmanda Golf Resort” MChJga loyihani amalga oshirish uchun 200 gektar yer uchastkasi doimiy foydalanish huquqi bilan belgilangan tartibda ajratilishini;

jismoniy va yuridik shaxslarning loyihani amalga oshirish hududida joylashgan yer uchastkalari olib qoʻyilishi, shu jumladan, ekilgan qishloq xoʻjaligi ekinlariga yetkazilgan zarar bilan bogʻliq xarajatlar Jamgʻarma mablagʻlari hisobiga qoplanishini taʼminlasin.

Belgilab qoʻyilsinki, ushbu bandda koʻrsatilgan xarajatlar keyinchalik loyiha qiymatiga qoʻshiladi va loyihani amalga oshirishda ishtirok etuvchi investorlar tomonidan Jamgʻarmaga qoplab beriladi.

5. Oʻzbekiston Respublikasi Mudofaa vazirligining “Harbiyloyiha” loyihalash instituti” davlat korxonasi zarurat boʻlganda loyiha doirasida ishlarni bajarish uchun talab etiladigan masshtabda kontur xaritalarini ishlab chiqishda “SongNo Golf Design” kompaniyasiga koʻmaklashsin.

6. Loyihani amalga oshirish doirasida “Mirasmanda Golf Resort” MChJ, loyiha tashkiloti, bosh pudratchi va subpudratchi tashkilotlar 2022-yil 1-iyunga qadar:

yagona ijtimoiy toʻlovdan tashqari barcha turdagi soliqlar va majburiy toʻlovlarni;

loyihani amalga oshirish uchun jalb etiladigan xorijiy mutaxassislarning mehnatiga haq toʻlash fondi qismi boʻyicha yagona ijtimoiy toʻlovni;

loyihani amalga oshirish uchun zarur boʻlgan tovarlarni, shu jumladan “vaqtincha olib kirish” bojxona rejimida olib kirishda bojxona toʻlovlari (qoʻshimcha qiymat soligʻi va bojxona yigʻimlari bundan mustasno);

ishlar, xizmatlar boʻyicha — Oʻzbekiston Respublikasi norezidentlaridan olinadigan qoʻshilgan qiymat soligʻi toʻlashdan ozod qilinsin.

7. Oʻzbekiston Respublikasi Tashki ishlar vazirligi Agentlikning buyurtmanomalari boʻyicha loyihani amalga oshirishda ishtirok etuvchi xorijiy mutaxassislarga kirish vizalari konsullik yigʻimlari va boshqa yigʻimlar undirilmasdan belgilangan tartibda rasmiylashtirilishini taʼminlasin.

8. Jizzax viloyati hokimligi Oʻzbekiston Respublikasi Uy-joy kommunal xizmat koʻrsatish vazirligi, Energetika vazirligi, “Oʻztransgaz” AJ va “Oʻzbektelekom” AK bilan birgalikda loyiha boʻyicha tasdiqlangan loyiha-smeta hujjatlari shartlariga muvofiq qurilish obyektlari muhandislik-kommunikatsiya infratuzilmalariga (elektr energiyasi, gaz, suv taʼminoti, kanalizatsiya, telefon aloqasi va shu kabilar) oʻtkazilishini oʻrnatilgan tartibda taʼminlasin.

9. Oʻzbekiston Respublikasi Ichki ishlar vazirligi Agentlikning buyurtmanomalariga boʻyicha, loyihani amalga oshirishda qatnashadigan xorijiy mutaxassislarga belgilangan tartibda koʻp martalik vizalar berilishi va muddati uzaytirilishi, shuningdek, ular yashaydigan joyda vaqtinchalik propiska qilinishi va propiska muddati uzaytirilishini davlat bojini undirmasdan rasmiylashtirilishini taʼminlasin.

10. Oʻzbekiston Respublikasi Bandlik va mehnat munosabatlari vazirligi “Mirasmanda Golf Resort” MChJning buyurtmanomalari boʻyicha loyihani amalga oshirishda ishtirok etish uchun yuqori malakali xorijiy mutaxassislarni Oʻzbekiston Respublikasiga jalb etishga ruxsatnomalarning belgilangan tartibda berilishini (muddati uzaytirilishini), shuningdek, jalb etiladigan xorijiy mutaxassislarga Oʻzbekiston Respublikasi hududida mehnat faoliyati bilan shugʻullanish huquqini beradigan tasdiqnomalarning berilishini (muddati uzaytirilishini) taʼminlasin.

11. Mazkur qarorning bajarilishini nazorat qilish Oʻzbekiston Respublikasi Bosh vazirining investitsiyalar va tashqi iqtisodiy aloqalar masalalari boʻyicha oʻrinbosari E.M. Ganiyev va Jizzax viloyati hokimi A.E. Saliyev zimmasiga yuklansin.