Shisha idish va boshqa qadoqlash mahsulotlari ishlab chiqarishni jadal rivojlantirish, ichki bozorni yanada to‘liq to‘ldirishni ta’minlash va eksport salohiyatini mustahkamlash maqsadida Vazirlar Mahkamasi qaror qiladi:

1. Vazirlar Mahkamasining “Oziq-ovqat mahsulotlari ishlab chiqarishni kengaytirish uchun shisha idish mahsuloti ishlab chiqarishni yanada rivojlantirish chora-tadbirlari to‘g‘risida” 2017-yil 12-oktabrdagi 816-son qaroriga ilovaga muvofiq o‘zgartirishlar kiritilsin.

2. O‘zbekiston Respublikasi Davlat aktivlarini boshqarish agentligi, Toshkent shahar hokimligi O‘zbekiston Respublikasi Transport vazirligi huzuridagi Avtomobil yo‘llari qo‘mitasi bilan birgalikda ushbu qarordan kelib chiqqan holda, “Asl Oyna” MChJ bilan o‘n kun muddatda qo‘shimcha bitim tuzilishini ta’minlasin.

3. Ushbu qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari — O‘zbekiston Respublikasi transport vaziri A.J. Ramatov zimmasiga yuklansin.

1. 12-bandda:

a) birinchi xatboshidagi “O‘zbekiston Respublikasi Xususiylashtirilgan korxonalarga ko‘maklashish va raqobatni rivojlantirish davlat qo‘mitasi” so‘zlari “O‘zbekiston Respublikasi Davlat aktivlarini boshqarish agentligi O‘zbekiston Respublikasi Transport vazirligi huzuridagi Avtomobil yo‘llari qo‘mitasi bilan birgalikda” so‘zlari bilan almashtirilsin;

b) ikkinchi xatboshi quyidagi tahrirda bayon etilsin:

““Asl Oyna” MChJ bilan ushbu qarorga ilovada nazarda tutilgan 2017 — 2021-yillarda umumiy qiymati 110 mln AQSh dollari bo‘lgan investitsiya loyihalarini amalga oshirish va 500 ta yangi ish o‘rni tashkil etish uchun Toshkent shahri, Sergeli tumani, Janubiy sanoat zonasida joylashgan umumiy maydoni 10 gektardan ortiq bo‘lgan “Monolit uylar qurish bo‘yicha sobiq baza” mulkiy kompleksini, shuningdek, “Toshvilyo‘lsanoat” unitar korxonasining Toshkent shahri, Sergeli tumani, Janubiy sanoat zonasida joylashgan tutash hududlari bilan birgalikda umumiy maydoni 5,85 gektar bo‘lgan bino va inshootlarini “nol” xarid qiymatida sotish bo‘yicha oldi-sotdi shartnomasi tuzsin”.