O‘zbekiston Respublikasi Prezidentining “Farg‘ona neftni qayta ishlash zavodini to‘g‘ridan to‘g‘ri xorijiy investitsiyalarni jalb qilgan holda modernizatsiya qilish chora-tadbirlari to‘g‘risida”gi 2019-yil 10-apreldagi PQ-4275-son qarorining ijrosini ta’minlash maqsadida Vazirlar Mahkamasi qaror qiladi:

1. “Farg‘ona neftni qayta ishlash zavodi” MChJ (keyingi o‘rinlarda FNQIZ deb ataladi) ustav kapitalidagi davlat ulushini “PT Trans Asia Resources” (Indoneziya) kompaniyasi yoki uning 100 foiz ulushli shu’ba kompaniyasiga (keyingi o‘rinlarda investor deb ataladi) sotishning asosiy shartlari 1-ilovaga* muvofiq tasdiqlansin.

2. “PT Trans Asia Resources” (Indoneziya) kompaniyasi bilan “Farg‘ona neftni qayta ishlash zavodi” MChJning ustav kapitalidagi davlat ulushini sotish yuzasidan muzokaralar o‘tkazish bo‘yicha Ishchi guruh 2-ilovaga* muvofiq tarkibda tashkil qilinsin.

Ishchi guruh (A.S. Sultanov):

a) uch oy muddatda:

xalqaro baholash tashkiloti tomonidan FNQIZning bozor qiymati baholanishini tashkil qilishni;

investorning vakillarini jalb qilgan holda, FNQIZning asosiy vositalari, tayyor mahsulot qoldiqlari, xomashyo va tarkibiy qismlarni, shuningdek, debitorlik va kreditorlik qarzlari hamda boshqa majburiyatlarini xatlovdan o‘tkazishni;

yuridik, moliyaviy va boshqa turdagi audit jarayonlarini o‘tkazish, shuningdek, FNQIZni modernizatsiya qilish rejasini tayyorlash va tashqi moliyalashtirishni jalb etish uchun barcha zarur moliyaviy va texnik hujjatlarni investorga taqdim etishni;

b) FNQIZning bozor qiymati bahosi olingandan so‘ng:

ikki oy muddatda ushbu qaror bilan tasdiqlangan FNQIZning ustav kapitalidagi davlat ulushini sotishning asosiy shartlari asosida investor bilan FNQIZning ustav kapitalidagi davlat ulushini oldi-sotdi shartnomasi yuzasidan muzokaralar o‘tkazilishini;

oldi-sotdi shartnomasiga investor tomonidan FNQIZning ishlab chiqarish quvvatlari bazasida mahalliy uglevodorod xomashyosidan qaytarib berish asosida qayta ishlash bo‘yicha tegishli shartnomalarni yoki bozor sharoitlari asosida oldi-sotdi shartnomalarini tuzish orqali foydalanish shartlari kiritilishini;

FNQIZning ustav kapitalidagi davlat ulushini oldi-sotdi shartnomasining loyihasi bo‘yicha xalqaro tashkilotning huquqiy xulosasi olinishini;

FNQIZning ustav kapitalidagi davlat ulushini oldi-sotdi shartnomasining loyihasi Vazirlar Mahkamasiga ma’qullash uchun kiritilishini ta’minlasin.

3. O‘zbekiston Respublikasi Davlat aktivlarini boshqarish agentligi (keyingi o‘rinlarda Agentlik deb ataladi) va FNQIZga sotishdan oldingi zarur tartib-taomillarni o‘z vaqtida amalga oshirish uchun, istisno tariqasida, tender savdolarini o‘tkazmasdan to‘g‘ridan to‘g‘ri muzokaralar asosida baholash, konsalting va yuridik xizmatlar ko‘rsatish, shu jumladan xalqaro kompaniyalar bilan — FNQIZ ustav kapitalidagi davlat ulushini baholash jarayonini huquqiy qo‘llab-quvvatlash, sotish shartlarini ishlab chiqish hamda oldi-sotdi shartnomasini ishlab chiqish va tuzish uchun tegishli shartnomalarni tuzishga va ushbu shartnomalarni O‘zbekiston Respublikasi Iqtisodiyot va sanoat vazirligi huzuridagi “Loyihalar va import kontraktlarini kompleks ekspertiza qilish markazi” DUKda ekspertizadan o‘tkazishga ruxsat etilsin.

4. Belgilab qo‘yilsinki:

FNQIZning ustav kapitalidagi davlat ulushini oldi-sotdi shartnomasining loyihasi bo‘yicha xulosalar tayyorlash doirasida FNQZ mablag‘lari yuridik, baholash va konsalting kompaniyalari xizmatlari haqini to‘lash manbalari hisoblanadi;

FNQIZning ustav kapitalidagi davlat ulushining bozor qiymati mustaqil xalqaro baholash kompaniyasi tomonidan xalqaro baholash standartlariga muvofiq baholanadi va uning asosida tomonlarning muzokara pozitsiyalari shakllantiriladi;

FNQIZning ustav kapitalidagi davlat ulushining bozor qiymatini baholash muddati baholash kompaniyasi bilan shartnoma tuzilgan sanadan boshlab uch oydan oshmasligi lozim.

5. “O‘zbekneftgaz” AJ:

ikki hafta muddatda “Farg‘ona neftni qayta ishlash zavodi” MChJning aktivlari nominal (balans) qiymatda Farg‘ona viloyati hokimligi va “O‘zbekneftgaz” AJga 3-ilovaga* muvofiq ro‘yxat bo‘yicha beg‘araz berilishini ta’minlasin;

FNQIZning ustav kapitalidagi davlat ulushiga egalik qilish huquqi investorga o‘tgunigacha tayyor mahsulot, xomashyo, tarkibiy qismlarni sotishdan olingan daromadlar hamda FNQIZning debitorlik qarzlarini undirishdan tushgan mablag‘lar hisobidan FNQIZ majburiyatlari qoplanishini ta’minlasin.

6. Belgilab qo‘yilsinki, FNQIZ majburiyatlari o‘z vaqtida qoplanmagan taqdirda, “O‘zbekneftgaz” AJ FNQIZning ustav kapitalidagi davlat ulushiga egalik qilish huquqi investorga o‘tgunigacha yuzaga kelgan FNQIZning undirilmagan debitorlik qarzi, qaytarilmagan kreditorlik qarzi va boshqa majburiyatlari bo‘yicha huquqiy vorisiga aylanadi.

7. O‘zbekiston Respublikasi Moliya vazirligi Iqtisodiyot va sanoat vazirligi, Monopoliyaga qarshi kurashish qo‘mitasi bilan birgalikda neft mahsulotlari uchun bozor tamoyillari asosida narxlarni shakllantirish bo‘yicha ikki oy muddatda takliflar kiritsin.

8. Vazirlar Mahkamasining “Neft-gaz tarmog‘i tashkilotlarining aktivlaridan yanada samarali foydalanish chora-tadbirlari to‘g‘risida” 2018-yil 25-avgustdagi 685-son qaroriga 4-ilovaga* muvofiq o‘zgartirish va qo‘shimchalar kiritilsin.

9. Mazkur qarorning bajarilishini nazorat qilish O‘zbekiston Respublikasi energetika vaziri A.S. Sultanov va O‘zbekiston Respublikasi davlat aktivlarini boshqarish agentligi direktori A.Y. Xaydarov zimmasiga yuklansin.