Oʻzbekiston Respublikasi Hukumati va Fransiya Respublikasi Hukumati, keyingi oʻrinlarda “Tomonlar” deb ataluvchilar,

Oʻzbekiston va Fransiya oʻrtasidagi anʼanaviy doʻstona rishtalarni mustahkamlashni istab,

suverenitet, milliy mustaqillik, tenglik va oʻzaro manfaat tamoyillarining ahamiyatini eʼtirof etib,

ish oʻrinlarini yaratish, iqtisodiy rivojlanish va ijtimoiy taraqqiyot uchun masʼul va barqaror turizm ahamiyatini eʼtirof etib,

sayyohlik munosabatlarini rivojlantirish va ragʻbatlantirish, sayyohlar oqimini oshirish va ularning turizm sohasidagi xususiy sektorlari hamda turizm uchun masʼul davlat muassasalari oʻrtasida hamkorlikni kuchaytirish zaruratini hisobga olgan holda,

oʻzlarining tegishli davlatlaridagi amaldagi qonun va qoidalarga muvofiq,

quyidagilar toʻgʻrisida kelishib oldilar:

1. Tomonlar oʻz davlatlarining amaldagi qonunchiligiga muvofiq oʻzlarining turistik yoʻnalishlari va madaniy merosini targʻib qilish tadbirlarini tayyorlash va amalga oshirishda axborot, ilgʻor amaliyot va tajriba almashish, shuningdek, texnik yordamni ragʻbatlantirish orqali oʻzaro yordam berishga intiladilar.

2. Tomonlar oʻz davlatlarining amaldagi qonunchiligiga muvofiq ikki davlatning xususiy va davlat sayyohlik sektorlari oʻrtasida tegishli loyihalarda, jumladan, quyidagi mavzular boʻyicha axborot, ilgʻor amaliyot va tajriba almashish hamda texnik yordam koʻrsatish orqali hamkorlikni ragʻbatlantirishga harakat qiladilar:

tabiatga oid turizm va ekoturizm;

ziyorat va tibbiy turizm;

madaniy turizm;

mehmondoʻstlik;

turistik muhandislik;

turistik infratuzilmalar;

turizm sohasidagi yangi texnologiyalar va innovatsiyalar;

turizmning sifat va tartibga solishga oid standartlari;

hamkorlikning oʻzaro manfaatli boshqa yoʻnalishlari.

3. Tomonlar ikki mamlakatning sayyohlik sohasidagi kadrlar salohiyatini mustahkamlanishiga koʻmaklashish maqsadida ikki mamlakat mutaxassislarining malaka oshirish dasturlarini amalga oshirishni ragʻbatlantirishga harakat qiladilar.

Oʻzbekiston Respublikasi Turizmni rivojlantirish davlat qoʻmitasi hamda Fransiya Respublikasi Yevropa masalalari va tashqi ishlar vazirligi mazkur Hadli bitimni amalga oshirish boʻyicha vakolatli organlar hisoblanadilar.

Mazkur Hadli bitimda belgilangan tadbirlar Tomonlarning vakolatli tashkilotlari va idoralari tomonidan tasdiqlash uchun taqdim etiladigan maxsus kelishuvlar, dasturlar yoki loyihalar orqali amalga oshirilishi mumkin. Bunday kelishuvlar, dasturlar yoki loyihalar mazkur Hadli bitim doirasida amalga oshiriladigan maxsus tadbirlarning maqsadlari, moliyaviy shartlari va boshqa masalalarini belgilab beradi.

Tomonlarning oʻzaro kelishuviga koʻra mazkur Hadli bitimga istalgan vaqtda yozma ravishda oʻzgartirishlar kiritilishi mumkin. Har qanday oʻzgartirishlar mazkur Hadli bitimning 6-moddasida belgilangan tartibda kuchga kiradi va uning ajralmas qismi hisoblanadi.

Mazkur Hadli bitimni talqin qilish va/yoki qoʻllashda yuzaga keladigan Tomonlar oʻrtasidagi har qanday nizolar Tomonlar oʻrtasida oʻzaro maslahatlashuv va muzokaralar oʻtkazish yoʻli bilan hal qilinadi.

Mazkur Hadli bitim Tomonlar uning kuchga kirishi uchun zarur boʻlgan protseduralarni tugatganliklari toʻgʻrisidagi oxirgi yozma xabarnomani diplomatik kanallar orqali olgan sanadan boshlab kuchga kiradi.

Tomonlarning har biri mazkur Hadli bitimning amal qilishini boshqa Tomonga diplomatik kanallar orqali yozma xabarnoma yuborish orqali istalgan vaqtda tugatishi mumkin. Bunday holatda, Hadli bitim xabarnoma olingan sanadan keyin 2 oy oʻtgach oʻz kuchini yoʻqotadi.

Mazkur Hadli bitim nomuayyan muddatga tuziladi, basharti uni tugatish istagi boʻlsa, Hadli bitim Tomonlardan biri ikkinchi Tomonning uni tugatish niyati toʻgʻrisidagi yozma xabarnomasini olgan sanadan soʻng olti oy davomida oʻz kuchida qoladi.

Mazkur Hadli bitimning tugatilishi Tomonlarning ushbu Hadli bitim doirasida amalga oshirilayotgan loyihalardan kelib chiqadigan huquq va majburiyatlariga daxl qilmaydi.

Buning tasdigʻi sifatida Tomonlarning oʻz hukumatlari tomonidan lozim darajada vakolatlantirilgan vakillari mazkur Hadli bitimni imzoladilar.

Parij shahrida 2018-yil “9” oktyabrda ikki nusxada, oʻzbek va fransuz tillarida tuzildi, bunda barcha matnlar teng autentikdir.