Oʻzbekiston Respublikasi Prezidentining “2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Faol investitsiyalar va ijtimoiy rivojlanish yili”da amalga oshirishga oid Davlat dasturi toʻgʻrisida” 2019-yil 17-yanvardagi PF-5635-son Farmoni ijrosini taʼminlash hamda taʼlim muassasalariga budjetdan tashqari mablagʻlarni jalb qilish, ularning moddiy-texnika bazasini mustahkamlash, professor-oʻqituvchilar, iqtidorli oʻquvchi va talabalarni moddiy qoʻllab-quvvatlash, bitiruvchilar va taʼlim muassasalari oʻrtasida faol aloqalarni oʻrnatish orqali taʼlim sohasini yanada rivojlantirish maqsadida Vazirlar Mahkamasi qaror qiladi:

1. Taʼlim muassasalarida uni bitirib, yuksak yutuqlarga erishgan nomdor shaxslarning homiylik xayriya mablagʻlari hisobiga shakllantiriladigan bitiruvchilar jamgʻarmasi tashkil etilsin.

2. Taʼlim muassasalarida uni bitirib, yuksak yutuqlarga erishgan nomdor shaxslarning homiylik xayriya mablagʻlari hisobiga shakllantiriladigan bitiruvchilar jamgʻarmasi toʻgʻrisida nizom ilovaga muvofiq tasdiqlansin.

3. Oʻzbekiston Respublikasi Oliy va oʻrta maxsus taʼlim vazirligi, Xalq taʼlimi vazirligi hamda boshqa manfaatdor vazirlik va idoralar bilan birgalikda bir oy muddatda oʻzlari qabul qilgan normativ-huquqiy hujjatlarni ushbu qarorga muvofiqlashtirsinlar.

4. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari A.A. Abduxakimov, oliy va oʻrta maxsus taʼlim vaziri I.U. Madjidov hamda xalq taʼlimi vaziri Sh.X. Shermatov zimmasiga yuklansin.

1. Ushbu Nizom taʼlim muassasalarida uni bitirib, yuksak yutuqlarga erishgan nomdor shaxslarning homiylik xayriya mablagʻlari hisobiga bitiruvchilar jamgʻarmalarini (keyingi oʻrinlarda Jamgʻarma deb ataladi) tashkil etish, uning mablagʻlarini shakllantirish va ulardan foydalanish tartibini belgilaydi.

Ushbu Nizom Oʻzbekiston Respublikasi Mudofaa vazirligi, Ichki ishlar vazirligi, Favqulodda vaziyatlar vazirligi, Davlat xavfsizlik xizmati, Milliy gvardiyasi va Davlat bojxona qoʻmitasi tasarrufidagi taʼlim muassasalariga nisbatan tatbiq etilmaydi.

2. Jamgʻarma tashkiliy-huquqiy shaklidan qatʼi nazar davlat, nodavlat taʼlim muassasalarida va Oʻzbekiston Respublikasi hududida tashkil etilgan xorijiy taʼlim muassasalarining filiallarida taʼlim muassasalari rahbarlarining tegishli buyrugʻiga muvofiq tashkil etilishi mumkin.

Taʼlim muassasalarida jamgʻarmaning tashkil etilishi majburiy emas.

3. Jamgʻarma mablagʻlarini shakllantirishda homiylik xayriyalari orqali ishtirok etuvchi jismoniy va yuridik shaxslarning mazkur Jamgʻarma faoliyatiga aralashuviga yoʻl qoʻyilmaydi.

4. Jamgʻarma yuridik shaxs hisoblanmaydi va uning mablagʻlari taʼlim muassasalarining Oʻzbekiston Respublikasi Moliya vazirligining Gʻaznachiligida ochilgan alohida budjetdan tashqari shaxsiy gʻazna hisobvaragʻida (gʻazna ijrosi bilan qamrab olinmagan taʼlim muassasalarida ularning maxsus hisob raqamlarida) jamlanadi va ushbu Nizomda belgilangan maqsadlarga sarflanadi.

5. Jamgʻarma mablagʻlari quyidagi manbalar hisobidan shakllantiriladi:

taʼlim muassasalarini bitirib, yuksak yutuqlarga erishgan nomdor bitiruvchilarning homiylik xayriya mablagʻlari;

Jamgʻarmaning vaqtinchalik boʻsh turgan mablagʻlarini bank depozit hisobvaraqlariga joylashtirilishidan olingan foiz daromadlari.

6. Jamgʻarma mablagʻlari quyidagi maqsadlarni moliyalashtirishga yoʻnaltiriladi:

iqtidorli, bilimli oʻquvchi va talabalarning oʻz bilimlarini yanada mustahkamlashlari uchun zarur boʻladigan oʻquv va ilmiy adabiyotlar hamda jihozlarni xarid qilish;

iqtidorli, bilimli oʻquvchi va talabalarning oʻz ustida ishlashlari va bilimlarini muntazam rivojlantirishga intilishlarini moddiy qoʻllab-quvvatlash va ragʻbatlantirish;

oʻquvchi va talabalarning tumanlar, viloyatlar, respublika va xalqaro miqyosida oʻtkaziladigan (bilimlar sohasi, sport, maʼnaviy-maʼrifiy va boshqa tadbirlar) turli musobaqalarda faol ishtirokini taʼminlash;

kam taʼminlangan oilalar va yetim bolalar toifasiga kiruvchi oʻquvchi va talabalarni moddiy qoʻllab-quvvatlash;

professor-oʻqituvchilar va xodimlar mehnatini ragʻbatlantirish;

ijtimoiy faol va taʼlim muassasasida koʻp yillar mobaynida mehnat qilgan professor-oʻqituvchilar va xodimlarni moddiy ragʻbatlantirish;

taʼlim muassasalari moddiy-texnik bazasini mustahkamlash, shu jumladan bino va inshootlarni taʼmirlash, zarur zamonaviy oʻquv va ilmiy-laboratoriya uskunalari, mebellar, inventarlar hamda axborot-kommunikatsiya vositalari bilan jihozlash va boshqa tovar-moddiy boyliklarini xarid qilish;

faol oʻquvchi va talabalar oʻrtasida oʻtkaziladigan respublika tanlovlari gʻoliblarini hamda ularning ustoz va murabbiylarini taqdirlash va ragʻbatlantirish;

Jamgʻarma mablagʻlarini ushbu bandda nazarda tutilmagan maqsadlarga yoʻnaltirishga yoʻl qoʻyilmaydi.

7. Jamgʻarma mablagʻlaridan foydalanish taʼlim muassasalari tomonidan tasdiqlanadigan daromadlar va xarajatlar smetasi asosida amalga oshiriladi.

8. Jamgʻarmaning daromadlar va xarajatlar smetasiga zarurat boʻlganda, yil davomida belgilangan tartibda oʻzgartirishlar kiritilishi mumkin.

9. Jamgʻarma faoliyatini boshqarish va uning mablagʻlarini taqsimlash taʼlim muassasalari rahbarlari raislik qiluvchi Jamgʻarmani boshqarish kengashlari va umumiy oʻrta taʼlim muassasalarida Kuzatuv kengashlari (keyingi oʻrinlarda Kengash deb ataladi) tomonidan amalga oshiriladi.

10. Kengash 7 — 9 nafar tarkibda shakllantiriladi va taʼlim muassasasi rahbari tomonidan tasdiqlanadi. Kengash tarkibiga taʼlim muassasalarining rahbar va masʼul xodimlari, oʻquvchi va talabalar, Oʻzbekiston yoshlar ittifoqi vakillari hamda mazkur taʼlim muassasalarini bitirib, yuksak yutuqlarga erishgan nomdor bitiruvchilar kiritiladi.

11. Kengash majlisi aʼzolarning kamida uchdan ikki qismi qatnashgan taqdirda vakolatli hisoblanadi. Koʻrib chiqilayotgan masalalar boʻyicha qarorlar oddiy koʻpchilik ovoz berish yoʻli bilan qabul qilinadi.

Qaror qabul qilishda ovozlar teng boʻlib qolgan taqdirda, Kengash raisi tomonidan hal qiluvchi qaror qabul qilinadi. Qabul qilingan qaror bayonnoma shaklida rasmiylashtiriladi hamda taʼlim muassasalarining bayonnoma asosida qabul qilingan buyrugʻi bilan amalga oshiriladi.

12. Kengash majlisi har chorakda kamida bir marotaba, zarurat boʻlganda navbatdan tashqari chaqiriladi.

13. Kengash:

Jamgʻarma mablagʻlari hisobiga moliyalashtiriladigan tadbirlarning ustuvor yoʻnalishlarini belgilaydi;

har chorak yakuni va hisobot yili yakuni boʻyicha Jamgʻarma mablagʻlarining daromadlari tushumi va xarajatlari toʻgʻrisidagi hisobotlarni koʻrib chiqadi va tasdiqlaydi;

Jamgʻarma mablagʻlaridan maqsadli va samarali foydalanilishi ustidan nazoratni amalga oshiradi;

Jamgʻarma mablagʻlarini shakllantirish va ulardan foydalanish bilan bogʻliq boshqa vakolatlarni amalga oshiradi.

14. Jamgʻarma faoliyatini qoʻllab-quvvatlash va unga taʼlim muassasalarini bitirib, yuksak yutuqlarga erishgan bitiruvchilarning homiylik mablagʻlarini jalb etish taʼlim muassasasi nomidan amalga oshiriladi.

15. Taʼlim muassasasining moliya-hisob boʻlinmasi Jamgʻarmaning ishchi organi (keyingi oʻrinlarda Ishchi organ deb ataladi) hisoblanadi va Jamgʻarmadan mablagʻ ajratishga oid murojaatlar Ishchi organ tomonidan koʻrib chiqiladi.

16. Ishchi organ:

Jamgʻarmaning kelgusi yil uchun daromadlari va xarajatlari prognoz koʻrsatkichlarini ishlab chiqadi;

Jamgʻarmaning daromadlar va xarajatlar smetasini tuzadi, shuningdek ularga qonunchilik hujjatlarida belgilangan tartibda oʻzgartirishlar kiritadi va tasdiqlash uchun taqdim etadi;

Jamgʻarma tushumlarini koʻpaytirish va uning mablagʻlaridan samarali foydalanish boʻyicha takliflar tayyorlaydi;

Jamgʻarmaning tushumlar manbalari boʻyicha daromadlari hamda asosiy xarajatlar yoʻnalishlari boʻyicha hisob va hisobotini yuritadi;

har chorak yakuni boʻyicha Jamgʻarma mablagʻlaridan foydalanilishi toʻgʻrisida hisobot tayyorlaydi hamda Kengashga koʻrib chiqish va tasdiqlash uchun taqdim etadi.

17. Jamgʻarmaning daromadlari va xarajatlari smetasi qonunchilik hujjatlarida belgilangan tartibda tuziladi va tasdiqlanadi.

18. Jamgʻarmaning joriy yilda foydalanilmay qolgan mablagʻlari keyingi yilga oʻtadi va boshqa maqsadlar uchun olib qoʻyilmaydi.

19. Jamgʻarmaning vaqtinchalik boʻsh turgan mablagʻlari taʼlim muassasalari tomonidan Oʻzbekiston Respublikasining moliyaviy barqaror va toʻlov qobiliyati yuqori boʻlgan banklarining depozit hisobvaraqlariga joylashtirilishi mumkin hamda olingan foiz daromadlari ushbu Nizomning 6-bandida nazarda tutilgan maqsadlarga sarflanadi.

20. Jamgʻarma mablagʻlaridan foydalanish boʻyicha hisob va hisobotlar taʼlim muassasalarining budjetdan tashqari boshqa mablagʻlaridan alohida, budjet tashkilotlari uchun budjetdan tashqari mablagʻlar boʻyicha qonunchilik hujjatlarida belgilangan tartibda yuritiladi.

21. Jamgʻarma daromadlari va xarajatlari smetasining ijrosi toʻgʻrisidagi yillik hisobot taʼlim muassasasining yil yakunlari boʻyicha oʻtkaziladigan yigʻilishida Kengash aʼzolari ishtirokida koʻrib chiqiladi va tasdiqlanadi.

22. Jamgʻarmaning daromadlar va xarajatlar smetasi va uning ijrosi toʻgʻrisidagi hisobotlar, shuningdek, tovarlar (ish va xizmatlar)ni xarid qilish boʻyicha tuzilgan shartnomalar roʻyxatlari taʼlim muassasasining Internet jahon axborot tarmogʻidagi rasmiy-veb saytlarida eʼlon qilinadi.

23. Ishchi organ Jamgʻarma mablagʻlarining qonuniyligi va maqsadli yoʻnaltirilishi, shuningdek Jamgʻarma faoliyati boʻyicha buxgalteriya hisobi va hisobotlari tashkil etilishi uchun javob beradi.

24. Davlat taʼlim muassasalarida Jamgʻarmaning daromadlari va xarajatlari smetalarining ustidan nazorat Oʻzbekiston Respublikasi Moliya vazirligining Davlat moliyaviy nazorati bosh boshqarmasining hududiy boshqarmalari tomonidan amalga oshiriladi.

25. Jamgʻarmani qayta tashkil etish va uni tugatish qonunchilik hujjatlariga muvofiq amalga oshiriladi.

26. Ushbu Nizomni qoʻllashda yuzaga keladigan nizolar qonunchilik hujjatlarida belgilangan tartibda hal etiladi.

27. Ushbu Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradilar.